SCOTLAND tauna ta be mai ena bisinesi dainai ia moale, to dahaka ese unai moale ia hereaia? Dahaka ese Brazil tauna ta ia durua ena matabodaga maurina bona drag ania karana ia rakatania totona? Edena dala ai Slovenia tauna ta ese ena inuinu momo karana ia rakatania? Edia sivarai mani oi duahia.

“Lau laloa egu mauri be namo.”​—JOHN RICKETTS

IA VARA LAGANINA: 1958

TANO: SCOTLAND

GUNA: BISINISI TAUNA

EGU MAURI GUNANA: Lau bada daekau lalonai egu mauri lau moalelaia. Egu tamana be Britain ami ena ofesa ta dainai ai be Scotland sibona dekenai ai noho lasi, to England, Germany, Kenya, Malaysia, Ireland, bona Cyprus dekenai danu. Egu mauri lagani be 8 neganai, Scotland ena sikuli ta dekenai lau noho. Gabeai Cambridge University amo lau gradueit.

Egu mauri lagani be 20 neganai, oela bisinesi lau vareai bona lagani 8 lau gaukara. Ginigunana be South America dekenai, gabeai Africa bena Western Australia dekenai lau gaukara. Australia dekenai lau noho neganai, bisinesi ta lau hamatamaia, to gabeai lau hoihoilaia.

Egu mauri lagani be 40 neganai, egu bisinesi lau hoihoilaia amo lau abia moni dainai egu gaukara lau rakatania. Egu nega be laolao dekenai lau haorea. Motabaik amo nega rua Australia lau hagegea, bona tanobada lau hagegea danu. Lau laloa egu mauri be ia namo.

BAIBEL ESE EGU MAURI IA HAIDAUA DALANA: Egu gaukara lau do rakatania lasi neganai, lau ura egu mauri namona dainai Dirava lau tanikiu henia. Anglican dubu dekenai lau lao badina unai dubu dekenai lau bada. To Baibel ena hereva idia gwauraia momo lasi. Murinai, Mormon taudia ida ai stadi, to Baibel idia badinaia lasi dainai idia lau rakatania.

Dina ta Iehova ena Witnes taudia be egu iduara dekenai idia pidipidi. Maoromaoro lau diba edia hahediba herevadia be Baibel amo idia abia. Idia duahia siri ta be Timoteo Ginigunana 2:3, 4. Unai siri ese ia hahedinaraia Dirava ena “ura be taunimanima idauidau do ia hamauria bona hereva momokani ena diba maoromaoro do idia abia.” Lau hoa badina Witnes taudia idia gwau Baibel amo diba maoromaoro do ita abia.

Iehova ena Witnes taudia ida Baibel ai stadilaia neganai, lau idia durua diba maoromaoro lau abia totona. Hegeregere, Iesu bona Dirava be Toi Tamona Diravana lasi, to idia be idauidau. (Ioane 14:28; 1 Korinto 11:3) Unai hereva momokani lau diba neganai lau moale. Lau badu badina nega bada lau negea kava Toi Tamona ena anina lau dibaia totona!

Bena daudau lasi Iehova ena Witnes taudia edia hebou dekenai lau lao matamaia. Ibounai edia hetura karana bona kara namodia dainai lau hoa—idia be Dirava gari henia taudia. Edia lalokau karana dainai lau abia dae tomadiho momokani lau davaria vadaeni.​—Ioane 13:35.

NAMO LAU DAVARIA DALANA: Bapatiso lau abia murinai, hahine namona ta ladana Diane lau davaria. Ia be Iehova ena orea lalonai ia tubu daekau bona ena kara namodia dainai ia lau ura henia. Gabeai ai headava. Diane ena hetura karana bona heduru be Iehova amo ia mai hahenamo badana.

Lau bona Diane ai ura bada pablisa momo lasi gabuna dekenai ai lao Baibel ena sivarai namona harorolaia totona. Lagani 2010 ai, Belize, Central America dekenai ai lao. Iniseniai, Dirava idia lalokau henia bona idia ura ia ura dibaia taudia momo dekenai ai haroro.

Dirava momokani bona ena Hereva, Baibel lau dibaia dainai lalomaino lau abia. Ful-taim haroro gaukara lau karaia dainai, lau moale taunimanima momo dekenai Baibel lau herevalaia. Egu mauri ia hanamoa hegeregerena, ita itaia Baibel ena hereva momokani ese ta ena mauri ia hanamoa neganai, ita moale bada. Egu mauri totona Dirava lau tanikiu henia dala hereadaena lau davaria vadaeni.

“Lau idia kara namo henia.”​—MAURÍCIO ARAÚJO

IA VARA LAGANINA: 1967

TANO: BRAZIL

GUNA: KARA BODAGA MAURI IA BADINAIA

EGU MAURI GUNANA: Lau be taoni maragina ta ladana Avare, Sao Paulo state dekenai lau tubu. Unai taoni ai idia noho taudia momo be gaukara taudia.

Lau be egu sinana ena bogana lalonai lau noho neganai, egu tamana ia mase. Lau mero maragi neganai, egu sinana ia noho lasi lalonai ena dabua do lau hahedokilaia. Hahine edia kara bamona lau karaia dainai, taunimanima idia laloa lau be geligeli. Gabeai, memero bona tatau ida lau mahuta hebou matamaia.

Egu mauri lagani be 18 bamona neganai, nightclub bona dubu lalonai mahuta hebou taudia (tatau bona hahine) lau tahua. Carnival negana ai hahine edia dabua do lau hahedokilaia bona samba-sikuli parade ai do lau mavaru. Taunimanima momo be lau idia diba.

Egu turadia haida be geligeli taudia, ariara hahine bona drag abia taudia. Haida ese lau idia doria cocaine drag lau tohoa bena daudau lasi unai kara lau manadalaia. Nega haida hanuaboi ibounai unai drag ai ania. Nega haida be sibona lau noho bona unai drag do lau ania. Egu tauanina be ia maragi dainai taunimanima idia gwau lau be AIDS gorere lau abia.

BAIBEL ESE EGU MAURI IA HAIDAUA DALANA: Unai neganai Iehova ena Witnes taudia lau davaria. Lau idia kara namo henia. Idia duahia Baibel siri ta be Roma 10:13, ia gwau: “Iehova ena ladanai idia boiboi taudia ibounai be mauri do idia abia.” Unai hereva ese lau ia hadibaia Iehova ena ladana gaukaralaia karana be mai anina bada. Nega momo, hanuaboi ibounai drag lau ania murinai, windo do lau kehoa, guba lau itaia bona mai taitai ida Iehova lau guriguri henia, lau ia durua totona.

Egu sinana ia itaia drag ania karana ese egu mauri ia hadikaia bona ia lalohisihisi, ia dainai lau lalohekwarahi bona egu lalona lau hadaia drag ania karana do lau hadokoa. Daudau lasi murinai, Witnes taudia ida Baibel lau stadilaia. Lau idia hamaoroa stadi karana ese lau do ia hagoadaia drag lau rakatania totona, bona unai ia vara!

Baibel lau stadilaia noho lalonai lau laloparara namona be egu mauri dalana lau haidaua. Nega daudau herea lalonai tatau ida mahuta hebou karadia lau karaia dainai, ia auka unai kara lau rakatania totona. To lau ia durua gauna be hebamo dikadia lau dadaraia. Egu tura gunadia lau rakatania bona inuinu bona mavaru gabudia dekenai lau lao lasi.

Ena be ia auka egu kara lau haidaua totona, to Iehova be lau ia laloa bada bona egu hekwakwanai ia lalopararalaia karana lau dibaia neganai, unai ese lau ia hagoadaia. (1 Ioane 3:19, 20) Lagani 2002 ai, tatau ida mahuta hebou karadia lau hadokoa bona unai lagani lalonai lau bapatiso bona Iehova ena Witnes tauna ai lau lao.

NAMO LAU DAVARIA DALANA: Egu kara lau haidaua dainai egu sinana ia moale bada bona ia danu Baibel stadi ia hamatamaia. Ena be stroke gorere ia abia, to Iehova ia lalokau henia bona Baibel ena hereva momokani ia ura henia bada.

Lagani 8 lalonai, ful-taim hesiai gaukara lau karaia, egu nega ibounai lau gaukaralaia ma haida dekenai Baibel lau herevalaia. Nega haida lau hekwarahi ura dikadia lau dadaraia totona. To lau lalomanoka lasi badina lau diba unai ura dikadia lau dadaraia neganai, Iehova lau hamoalea noho.

Iehova kahirakahira lau lao bona ia moalelaia dalana lau badinaia, unai ese lau ia durua sibona egu mauri lau matauraia totona. Hari egu mauri lau moalelaia.

“Lau be inuinu momo tauna.”​—LUKA ŠUC

IA VARA LAGANINA: 1975

TANO: SLOVENIA

GUNA: INUINU KEKERO TAUNA

EGU MAURI GUNANA: Lau be Slovenia ena siti badana, Ljubljana dekenai lau vara. Egu maragi negana lau moalelaia ela bona egu lagani be foa. Bena egu tamana be sibona ia hamasea. Unai nega aukana murinai, egu sinana be ia gaukara goada tauanina dalana ai lau bona egu kakana mero ia naria totona.

Egu mauri lagani be 15 neganai, egu tubuna hahine ida lau noho. Lau moale ia ida lau noho, badina egu turadia momo be ia noho gabuna ai idia noho. Bona taravatu be momo lasi, egu sinana ida lau noho negana bamona lasi. Egu lagani be 16 neganai, wiken dekenai idia inuinu taudia lau tura henia. Egu huina lau utua lasi bona dabua, gwau-edeede taudia edia hegeregerena, lau hahedokilaia, bona gabeai kuku ania lau hamatamaia.

Ena be drag idauidau lau abia toho to lau dekenai inuinu be namo herea. Matamana neganai wain galasi rua eiava toi sibona lau inua to gabeai nega tamona kavabu ta lau haorea diba. Lau inuinu momo to lau hahedinaraia lasi lau kekero. Nega haida egu laga ena bonana sibona amo taunimanima idia diba lau inuinu. To idia diba lasi lau ese wain eiava bia haida be vodka ida lau inua vadaeni!

Nega haida hanuaboi ibounai klab dekenai ai inuinu. Ena be alkahol momo lau inua, to idia kekero neganai idia lau durua idia gini totona. Dina ta egu turana ta ena hereva lau kamonai, ia gwau lau be dram mai matu badana ta bamona. Slovenia gado ai unai anina be alkahol oi inua ena bada be taunimanima ibounai edia ia hanaia. Lau kamonai neganai lau hemarai bada herea.

Lau ese egu mauri be lau gaukaralaia dalana lau laloa hamatamaia. Lau laloa lau be kava mase. Egu mamina be egu mauri lalonai lau karaia gau ibounai be anina lasi.

BAIBEL ESE EGU MAURI IA HAIDAUA DALANA: Unai neganai egu sikuli turana ta lau itaia, ena kara be ia haidaua bona hari ia be lalomanau tauna. Lau daradara dainai lau abia lao kofi shop ta dekenai. Ai herevahereva neganai ia gwau ia be Iehova ena Witnes taudia ida Baibel ia stadilaia noho. Lau tubu daekau neganai dubu dekenai lao lasi dainai, ia herevalaia gaudia ibounai be matamata lau dekenai. Witnes taudia edia hebou lau lao henia hamatamaia bona idia ida Baibel ai stadilaia.

Baibel stadi amo lau idia hagoadaia hereva momokani idauidau lau dibaia. Gau ta lau diba be ita be Baibel ese ia gwauraia “dina gabedia ai” ita noho. (2 Timoteo 3:​1-5) Danu, lau diba nega daudau lasi bena Dirava ese taunimanima dikadia ibounai be tanobada amo do ia haorea, bona taunimanima namodia be mauri hanaihanai Paradaiso lalonai do idia abia diba. (Salamo 37:29) Lau ura dikadika egu mauri lau hagoevaia unai taunimanima namodia ida do lau noho hebou totona.

Baibel ena hereva momokani idauidau lau diba neganai egu turadia lau hamaoroa. Momo ese lau idia hevasehalaia to lau badu lasi. Edia kara amo lau diba idia be egu tura momokani lasi. Lau diba egu inuinu karana ena badina be taunimanima dikadia lau tura henia. Wiken totona idia naria bona idia inuinu kekero lou.

Unai tura dikadia lau rakatania bona kara namodia idia hahedinaraia Iehova ena Witnes taudia lau bamoa. Hari Dirava idia lalokau henia bona mai edia lalona ibounai ida kara namodia idia badinaia taudia ida lau hebamo dainai, lau goada. Metairametaira egu inuinu karana lau rakatania.

NAMO LAU DAVARIA DALANA: Iehova lau tanikiu henia badina hari egu moale be inuinu dainai lasi. Bema egu kara gunana lau karaia noho reana dika bada herea do lau davaria. To hari lau diba egu mauri be namo herea.

Mai moale bada ida, lagani 7 lau be Iehova ena Witnes taudia edia brens ofis Slovenia dekenai lau gaukara noho. Iehova lau dibaia bona ena hesiai gaukara lau karaia dainai hari egu mauri be mai anina bada.