Dirava Kahirakahira Oi Lao

‘Mani Oi Dekenai Ai Giroa Lou’

Guna Iehova oi hesiai henia, a? Hari oi ura ia oi hesiai henia lou, to oi daradara bema oi do ia abia dae, eiava? Mani emu kara inai atikol bona gabeai do ai halasia gauna oi duahia namonamo. Unai atikol rua be oi totona ai hegaegaelaia.

DIRAVA ena hesiai gaukara ia hadokoa bona Keristani taravatudia ia badinaia lasi hahinena ta ia gwau: “Iehova lau guriguri henia ia dekenai lau giroa lou bona ena lalona lau hahisia dainai egu dika ia gwauatao totona.” Unai hahine dekenai oi hebogahisi, a? Nega haida oi laloa: ‘Dirava ese guna ia idia hesiai henia taudia be edena bamona ia lalodia? Idia ia laloatao, a? Ia ura idia “giroa lou,” a?’ Unai henanadai haerelaia totona, mani Ieremia ena hereva ita laloa. Unai henanadai edia haere ese emu lalona do idia hagoadaia.​—⁠Ieremia 31:18-20 duahia.

Ieremia ese ia herevalaia gaudia idia vara negana mani oi laloa. Lagani 740 B.C.E. ai, Ieremia ena nega ia do mai lasi lalonai, Israela ena basileia 10 be Asuria taudia ese idia abidia mauri neganai, Iehova ese ia durudia lasi. * Unai dala amo Dirava ese idia ia matahakani henia, badina kara dika badadia idia karaia matamaia bona peroveta taudia edia sisiba idia dadaraia. (2 King Taudia 17:5-18) Israela taudia be Dirava idia rakatania bona idau tano ai idia noho neganai, idia abia mauri aukana dainai edia kara idia haidaua, a? Iehova ese idia ia laloaboio, a? Idia do ia abia dae lou, a?

‘Emai Lalona Ai Giroa Vadaeni’

Israela taudia be igui hesiai gaukara idia karaia lalonai, edia kerere idia lalopararalaia bona idia helalo-kerehai. Iehova ese edia helalo-kerehai momokani toana ia itaia. Iehova ese idau tano ai idia noho Israela taudia edia kara bona hemami ia herevalaia be mani oi laloa.

Iehova ia gwau: “Lau be Israela taudia edia lalohisihisi hereva lau kamonai.” (Siri 18) Israela taudia be edia kara dika ena hisihisi dainai idia taitai neganai, Iehova ia kamonai. Idia be gwau-edeede natuna ta bamona, sibona dekenai ia havaraia hekwakwanai ia laloa neganai, ia lalohisihisi bona ia ura ena tamana dekenai ia giroa lou. (Luka 15:11-17) Israela taudia be dahaka idia gwau?

“Lohiabada e, ai be boromakau, idia do hamanadaia lasi gauna bamona, to oi ese kamonai henia dala ai dekenai oi hadibaia.” (Siri 18) Israela taudia idia laloparara matahakani idia abia be namo. Idia be idia hamanadaia lasi boromakau ta bamona. Buka ta ia gwau, reana unai haheitalai ena anina be idia be boromakau natuna ta bamona, “au mai matana amo idia gwadaia ena hisihisi do ia mamia lasi, bema ia gwau-edeede lasi.”

 “Ai do oi hakaua mai lou. Ai ura oi dekenai do ai giroa mai, badina oi be Lohiabada, aiemai Dirava.” (Siri 18) Israela taudia idia manau bona Dirava dekenai idia noinoi. Idia be Iehova idia gwau-edeede henia, to hari Ia idia noia ia lalonamo henidia totona.

“Aiemai lalona ai giroa vadaeni. . . . Ai be ai hemarai, bona taunimanima ese ai idia matauraia lasi.” (Siri 19) Israela taudia be edia kara dika dainai idia lalohisihisi. Idia abia dae idia be kerere bona unai idia gwauraia hedinarai. Danu idia hemarai bona edia kwarana idia atoa diho.​—⁠Luka 15:18, 19, 21.

Israela taudia idia helalo-kerehai. Idia lalohisihisi bada, Dirava vairanai edia kara dika idia gwauraia hedinarai, bona edia kara dikadia idia rakatania. Idia helalo-kerehai dainai Iehova ia hebogahisi, a? Idia ia abia dae lou, a?

“Oi Dekenai Do Lau Bogahisihisi Henia”

Iehova ese Israela taudia ia lalokau henia. Ia gwau: “Lau be Israela ena tamana, bona Eparaima be lauegu vara guna natuna.” (Ieremia 31:9) Lalokau tamana be ena natuna ia giroa lou neganai, ia dadaraia lasi. Iehova be Tamana ta bamona ena taunimanima ia hereva henia dalana mani oi laloa.

“Oi Israela, be lauegu natuna lalokauna, oi be lau lalokau henia bada merona. Oiemu ladana lau gwauraia neganai, mai lalokau danu oi lau laloa noho.” (Siri 20) Unai be hereva namodia, ani? Dirava be lalokau tamana ta bamona ena natudia ia hereva henia bona edia kara dika dainai idia ia sisiba henia loulou. Idia kamonai lasi neganai, Iehova ese ia koudia lasi idau tano dekenai idia lao totona. Ena be idia ia panisia, to idia ia laloaboio lasi. Lalokau tamana ta be ena natudia ia laloaboio lasi. Iehova ese ena natudia edia helalo-kerehai momokani toana ia itaia neganai, ena hemami be edena bamona?

“Mai egu kudouna ibounai oi lau ura henia noho, vadaeni oi dekenai do lau bogahisihisi henia.” (Siri 20) Iehova be ena natudia ia lalokau henia bada. Idia be mai edia ura ida idia helalo-kerehai dainai, Iehova ia moale bona ia ura idia giroa lou. Iesu ena parabole ai boio merona ena tamana bamona, Iehova be mai ena hebogahisi ida idia ia abia dae lou.​—⁠Luka 15:20.

“Iehova Dekenai Lau Giroa Lou”

Ieremia 31:18-20 ena hereva amo Iehova ena hebogahisi karana ita lalopararalaia. Dirava ese guna ia idia hesiai henia taudia ia laloaboio lasi. Bema unai bamona taudia idia ura ia dekenai idia giroa lou be edena bamona? Dirava ia hegaegae edia ‘kara dika ia gwauatao’ totona. (Salamo 86:5) Mai kudouna ibounai ida idia helalo-kerehai taudia be ia dadaraia diba lasi. (Salamo 51:17) Danu, ia be mai moale ida idia ia abia dae.​—⁠Luka 15:22-24.

Matamanai ai herevalaia hahinena be ena lalona ia hadaia Iehova dekenai ia giroa lou totona bona ena gabu ai idia noho Iehova ena Witnes taudia edia kongrigeisen ta ia vadivadi henia. Ia karaia gauna ginigunana be, ena lalohadai kereredia ia hamaoromaoroa. Ia gwau, “Lau laloa lau be anina lasi.” To kongrigeisen ena elda taudia ese ia idia hagoadaia bona durua ia goada lou totona. Unai hahine be mai moale ida ia gwau, “Iehova dekenai lau giroa lou be hahenamo badana!”

Bema guna Iehova oi hesiai henia bona hari oi ura ia oi hesiai henia lou, vadaeni oi ai boiria emu gabu ai ia noho Iehova ena Witnes taudia edia kongrigeisen ta oi vadivadi henia. Laloatao, bema helalo-kerehai taudia be Iehova dekenai idia gwau, ‘Mani oi dekenai ai giroa lou,’ Iehova be mai hebogahisi ida idia ia abia dae.

Baibel duahiduahi April ai:

◼ Ieremia 17-31

[Footnote]