Disasta momo ese hisihisi bada idia havaraia dainai, dahaka ita karaia diba ita hanaidia totona? Do ita karaia gaudia haida mani ita herevalaia.

Dika gabudia ita lao lasi. Baibel ia gwau: “Aonega tauna ese dika ia itaia noho, bona unai dika dekena amo ia raka siri, to aonega lasi tauna, be unai dika dekenai do ia raka lao, bona gabeai hisihisi do ia davaria.” (Aonega Herevadia 22:⁠3) Disasta idia do vara lasi neganai, unai aonega sisibana ita badinaia diba. Bema volkeino do ia pou, o abata, o lai badana ta do ia vara ena hadibaia hereva ita abia, aonega karana be seifti gabuna ta dekenai ita heau lao. Iseda mauri be mai anina bada, to ruma o kohu be anina lasi.

Haida idia laloa disasta idia vara lasi gabudiai idia noho be namo. Orea ta ia gwau: “Gabu haida dekenai hanaihanai disasta idia vara. Tanobada ena kahana haida dekenai disasta idia vara loulou bona toana be vaira negai unai gabudia dekenai disasta ma haida do idia vara.” Reana kone kahadia o volkeino badina hanuadia dekenai unai be momokani. Bema disasta idia vara diba gabudiai oi noho lasi o seifti gabuna ta dekenai oi lao, dika do oi davaria lasi.

Palani karaia guna. Ena be seifti herevadia ibounai oi badinaia, to oi laloa lasi negana ai dika do ia vara. Unai dika oi hanaidia diba, bema do oi karaia gaudia oi palanilaia guna. Unai be ita gwauraia vadaeni sisibana Aonega Herevadia 22:3 ai hegeregerena. Oi do idia durua gaudia oi abia hegaegae vadaeni, a? Buka ta (1-2-3 of Disaster Education) be inai gaudia ia gwauraia: First-aid gaudia, ranu, idia dika diba lasi aniani, bona mai anina bada pepadia. Danu, aonega karana be emu ruma bese ida do idia vara disasta idauidau bona do umui karaia gaudia umui herevalaia.

Dirava tura henia noho. Nega idauidau ai unai ese ita ia durua diba. Baibel ese Dirava ia gwauraia, “hebogahisi Tamana bona lalogoada ibounai ia henia Diravana. Iseda hisihisi ibounai lalonai ia ese ita dekenai lalogoada ia henia noho.” Siri ma ta ia gwau Ia be “lalometau taudia edia lalona ia hagoadaia Diravana.”​—⁠2 Korinto 1:​3, 4; 7:⁠6.

Oibe, Dirava be ia idia abidadama henia taudia dekenai idia vara gaudia ia itaia. Ia be lalokau Diravana bona dala idauidau ai hagoadaia herevadia ia henia. (1 Ioane 4:⁠8) Ita guriguri, Dirava ese hoa karadia ia karaia totona lasi, to ena lauma helaga amo ita ia durua totona. Lauma helaga ese dika idia davaria taudia ia durua Baibel ena hereva idia laloatao totona bona unai ese edia lalona ia hagoadaia. Momokani,  Dirava ena abidadama hesiai taudia edia hemami be idaunegai Israela ena king Davida ena bamona, ia gwau: “Lau be mase ena dibura koura gabuna, dekenai do lau raka lao, to dika ta dekenai do lau gari lasi, badina be, Lohiabada e, oi be lau danu oi noho. Oiemu mamoe hakaua itotohi, bona oiemu botaia auna ese, lau idia gimaia noho.”​—⁠Salamo 23:⁠4.

Keristani taudia idia durua heheni. Aposetolo edia negai, peroveta tauna Agabo ia gwau: “Tanobada ibounai dekenai hitolo bada do ia vara, bona momokani, unai be Klaudio ena nega ai ia vara.” Unai ese Iudea ai Iesu ena hahediba taudia momo edia noho ia hadikaia. Gabu ma haida ai idia noho hahediba taudia haida be unai idia kamonai neganai, dahaka idia karaia? Baibel ia gwau: “Hahediba taudia ese edia lalona idia hadaia, idia dekenai ia noho gauna hegeregerena, heduru gaudia be Iudea ai idia noho tadikaka dekenai do idia siaia.” (Kara 11:​28, 29) Mai lalokau ida edia kohu idia siaia, dika idia davaria tadikaka durua totona.

Hari disasta idia vara neganai, Dirava ena hesiai taudia be unai bamona idia karaia. Taunimanima idia diba Iehova ena Witnes taudia ese edia abiadadama tamona taudia idia durua. Hegeregere, February 27, 2010 ai, Chile dekenai tano mareremarere badana ta ia vara neganai, Iehova ena Witnes taudia ese dika idia davaria taudia idia durua haraga. Karla, sunami ese ena ruma ia hadikaia hahinena, ia gwau: “Dika ia vara dinana murinai, Witnes taudia be gabu ma haida amo idia mai ai idia durua totona, unai ese egu lalona ia hagoadaia bada. Lau daradara lasi, Iehova be unai volantia taudia amo ai ia durua. Iehova ena lalokau bona gimaia karana lau mamia.” Iena tubuna tauna, ia be Witnes lasi tauna, ese unai heduru karana ia itaia. Ia gwau: “Lagani momo lalonai egu dubu taudia dekenai unai bamona kara lau itaia lasi.” Ia itaia gauna ese ena lalona ia hamarerea dainai Iehova ena Witnes taudia ia noia ia ida Baibel idia stadilaia totona.

Dirava idia lalokau henia taudia tura henia karana ese dika negadiai ita do ia durua bada. To nega ta disasta do idia ore, a? Baibel ese unai ia haerelaia dalana mani ita itaia.

[Picture on page 6]

Oi do idia durua gaudia oi abia hegaegae vadaeni, a?

[Picture on page 7]

Ita guriguri, Dirava ese hoa karadia ia karaia totona lasi, to ena lauma helaga amo ita ia durua totona

[Picture on page 7]

Disasta negadiai Keristani taudia idia durua heheni

[Picture on page 7]

“Iehova ena lalokau bona gimaia karana lau mamia”