“Nega” Ia Kahirakahira

PEROVETA tauna Habakuku bamona, Iesu ena aposetolo taudia idia ura dikadika hisihisi ibounai idia ore. Idia diba Dirava ena Basileia ese tanobada ai gau ibounai do ia hamaoromaoroa dainai, Iesu idia nanadaia: “Mani oi hamaoroa ai dekenai, oiemu hereva gauna edena negai do idia vara? [Basileia siahuna dekenai] do oi giroa mai, bona tanobada dokona danu, ena toana be dahaka?” (Mataio 24:3) Iesu ena haere be inai: Iehova Dirava sibona ia diba edena negai Basileia be tanobada ibounai do ia biagua. (Mataio 24:36; Mareko 13:32) To, Iesu bona ma haida be tanobada ai do idia vara gaudia haida idia perovetalaia, bona unai ese do idia hahedinaraia nega dokona ia kahirakahira.​—“ Nega Dokona Idia Hamomokania Siridia” ena maua itaia.

Idia momo be hari idia guguru noho, ani? Danu Iesu ia peroveta, gaukara badana ta be tanobada ibounai dekenai do idia karaia. Ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”​—Mataio 24:14.

Hari inai negai be unai peroveta herevana ena anina ia guguru noho. Iehova ena Witnes taudia be unai gaukara idia karaia. Tano 236 ai, Witnes taudia seven milioni mai kahana be taunimanima idia hadibaia Basileia be dahaka do ia karaia, bona taunimanima idia durua hisihisi do ia haorea Diravana ena taravatu maorodia idia badinaia totona. Dirava ena Basileia oi dibaia noho, unai amo hisihisi lasi tanobadana ai do oi noho ena helaro oi abia diba.

[Maua rau 8 ai]

 Nega Dokona Idia Hamomokania Siridia

MATAIO 24:6, 7; APOKALUPO 6:4

• Tuari

MATAIO 24:7; MAREKO 13:8

• Tano mareremarere

• Hitolo

LUKA 21:11; APOKALUPO 6:8

• Gorere

MATAIO 24:12

• Kara dikadia do idia bada

• Lalokau do ia keru

APOKALUPO 11:18

• Tanobada hadikaia karadia

2 TIMOTEO 3:2

• Moni mataganigani henia

• Tama sina kamonai henia lasi karana

• Sibona lalokau henia karana

2 TIMOTEO 3:3

• Lalokau be lasi

• Lalotamona be lasi

• Ibounai do idia lebulebu

• Kara namo do idia ura henia lasi

2 TIMOTEO 3:4

• Lebulebu karadia idia ura henia bada, to Dirava idia ura henia maragi

2 TIMOTEO 3:5

• Momo idia koikoi, idia gwau idia be Keristani taudia

MATAIO 24:5, 11; MAREKO 13:6

• Peroveta koikoi taudia momo do idia hedinarai

MATAIO 24:9; LUKA 21:12

• Keristani taudia momokanidia do idia dagedage henia

MATAIO 24:39

• Taunimanima be Baibel ena hadibaia herevadia idia laloa maragi

[Foto rau 8 ai]

Tanobada hegegemadai, Iehova ena Witnes taudia be ma haida dekenai Dirava ena Basileia idia hadibaia