Memero Kekeni Edia Henanadai

Edena Dala ai Egu Tama Sina Lau Diba Namonamo?

Jessica bona ena tama sina be turadia haida ida idia aniani hebou. Idia aniani neganai, turana ta be Jessica ena sinana dekenai ia gwau, “Oi diba dahaka! Varani lau be Richard​—haisikuli ai oi tura henia merona​—lau itaia.”

Jessica be unai ia kamonai neganai ia hoa. Ia be Richard ia diba lasi!

“Sinagu, oi be tamagu ida oi do hetura lasi neganai, ma ta oi tura henia, a? Unai lau diba lasi.”

JESSICA bamona, emu tama sina amo oi diba lasi gauna ta oi kamonai neganai oi hoa, a? Bema oibe, reana do oi laloa idia amo gau ma haida oi diba be namo!

Dahaka dainai emu tama sina amo gau haida oi do diba namonamo lasi? Idia oi diba namonamo amo dahaka namo do ia vara? Bona edena dala ai idia oi diba namonamo?

Gau Ma Haida Oi Dibaia

Dahaka dainai emu tama sina amo gau ma haida oi do diba namonamo lasi? Nega haida unai ia vara badina idia be oi danu idia noho lasi. Jacob, * ena mauri lagani be 22, ia gwau: “Egu mauri lagani be eit neganai, egu tama sina be edia headava idia hadokoa. Unai murinai, lagani ta lalonai lau be nega ta ta sibona egu tamana lau itaia. Lau ura dikadika egu tamana amo gau momo lau diba.”

Ena be lagani momo lalonai emu tama sina ida oi noho, to reana edia sivarai ibounai be oi dekenai idia gwauraia lasi. Dahaka dainai? Nega haida tama sina idia hemarai guna idia karaia kerere idia herevalaia totona. (Roma 3:23) Danu, reana idia laloa  bema edia kerere idia gwauraia hedinarai, idia do oi matauraia lasi, eiava oi be sibona emu ura gaudia do oi karaia.

To, nega momo emu tama sina ese edia sivarai be oi dekenai idia herevalaia lasi, badina unai oi do henanadailaia lasi. Mero matamata ta ladana, Cameron ia gwau, “Emu tama sina ida lagani momo oi noho bona idia amo gau momo oi dibaia noho be hoa gauna!” Namona be dala oi tahua idia oi diba namonamo totona. Namo do ia havaraia daladia foa mani oi laloa.

Namba #1: Emu tama sina do idia moale, badina oi be idia oi laloa bada. Do idia moale badina oi ura edia mauri lalonai idia vara gaudia oi diba. Bona reana oi do idia laloa bada bona emu hemami do idia lalopararalaia!​—Mataio 7:12.

Namba #2: Emu tama sina edia lalohadai oi lalopararalaia. Hegeregere, guna emu tama sina edia kohu bona moni be momo lasi, a? Unai oi diba neganai, unai ese oi ia durua hari moni idia gaukaralaia namonamo ena badina oi lalopararalaia, herevana oi laloa unai bamona idia karaia be anina lasi.

Emu tama sina edia lalohadai oi lalopararalaia karana ese oi do ia durua. Mero matamata ladana, Cody ia gwau, “Egu tama sina edia lalohadai lau diba amo, lau herevalaia gaudia lau laloa namonamo, unai amo edia lalona lau hahisia lasi.”​—Aonega Herevadia 15:23.

Namba #3: Emu mauri ai idia vara gaudia oi herevalaia totona oi hemarai lasi be namo. Bridgette, ena mauri lagani be 18, ia gwau: “Lau hemarai egu Tamana dekena lau ura henia merona lau herevalaia totona. To egu Tamana dekenai egu lalohadai lau herevalaia neganai, ia be guna kekeni ta ia ura henia bona unai ia moalelaia ena sivarai be lau dekenai ia gwauraia. Ia be ena kekeni ida edia hetura karana ia hadokoa bona ia lalohisihisi bada ena sivarai be lau dekenai ia gwauraia danu. Unai ese lau ia hagoadaia lau dekenai idia vara gaudia ma haida be ia dekenai lau gwauraia totona.”

Namba #4: Reana gau haida do oi dibaia. Emu tama sina edia mauri sivaraidia ese oi do ia durua, oi lalohisihisilaia gaudia bona hahetoho oi hanaidia totona. Joshua, ena mauri lagani be 16, ia gwau: “Lau ura lau diba egu tama sina be edena dala ai tauanina, hemami, bona tomadiho gaudia dekenai ai idia naria. Reana idia amo mai anina bada gaudia ma haida lau dibaia.” Baibel be inai henanadai ia henia: “Aonega be taunimanima burukadia dekenai ia noho, bona edia lagani be momo taudia ese, diba bada idia davaria noho,” a?​—Iobu 12:12.

Kara ta Oi Karaia Emu Tama Sina Oi Dibaia Totona

Bema oi ura emu tama sina oi diba namonamo, dahaka oi karaia be namo? Heduru daladia haida be inai:

Nega maorona oi abia hidi. Unai ena anina be hanaihanai emu tama sina ida umui helai bona herevahereva sibona lasi. To, gau ma haida umui karaia hebou, hegeregere umui gadara, o gaukara ta umui karaia, o umui raka hebou, o motuka amo umui heau neganai, umui herevahereva diba. Cody, matamanai ita herevalaia merona, ia gwau: “Egu tama sina ida motuka amo dala dekenai ai heau neganai, ai herevahereva namonamo. Momokani, egu taiana dekenai earphone lau atoa bona miusiki lau kamonai eiava lau mahuta be auka lasi, to nega momo herevahereva karana lau hamatamaia ese namo bada ia havaraia!”

Oi Henanadai. Namona be inai oi diba: Ena be nega maorona ai emu tama o sina ida oi herevahereva, to reana emu sinana be oi dekenai guna ia ura henia merona do ia herevalaia lasi, o emu tamana be ena ruma bese ena motuka ia hadikaia sivaraina do ia herevalaia lasi. To bema unai gaudia oi henanadailaia, vadaeni oi dekenai do idia herevalaia diba!​—Oi ura henanadailaia gaudia oi diba totona,  rau 12 ena maua itaia.

Gau ma haida oi herevalaia danu. Nega momo henanadai tamona oi henia neganai, emu tama o sina be sivarai ma haida ia gwauraia. Reana do oi ura ena hereva oi koua bona oi hamaoroa matamanai umui herevalaia gauna do umui herevalaia lou totona, to unai bamona oi karaia lasi! Laloatao, oi be emu tama sina edia mauri lalonai idia vara gaudia oi diba sibona lasi, to oi ura idia ida emu hetura karana oi hagoadaia. Unai bamona oi karaia totona, dala namona ta be idia ura herevalaia gaudia oi herevalaia.​—Filipi 2:4.

 Oi laloa namonamo. “Taunimanima edia laloa gaudia be hunia, ranu dobuna bamona, to mai ena diba bada tauna ese, unai laloa gaudia ia davaria diba.” (Aonega Herevadia 20:5) Laloa namonamo karana oi hahedinaraia be namo, bema oi ura emu tama o sina ese idia ura lasi gwauraia sivaraina ta idia herevalaia. Hegeregere, reana oi ura diba emu tamana ena mauri lagani be oi emu bamona neganai, ia be kerere ta ia karaia dainai ia hemarai. Bema unai bamona kerere ia vara lou, vadaeni dahaka ia karaia unai ia hanaia totona. To unai bamona gaudia umui do herevalaia lasi neganai, reana oi gwau diba, “Ia namo bema inai henanadai . . . ”

Mai aonega ida oi hereva. Emu tama sina ese edia mauri ai idia vara gaudia be oi dekenai idia herevalaia neganai, namona be ‘hereva dekenai do oi kamonai haraga, to hereva do oi gwauraia haraga lasi.’ (Iamesi 1:19) Emu tama sina idia gwauraia sivaraina dainai idia oi kirikirilaia o hahemaraia lasi. Hegeregere, inai bamona hereva​—“Lau abia dae lasi oi be unai bamona oi karaia!” o “Unai dainai oi be lau oi kara auka henia!”​—ese emu tama o sina do ia koua hereva ma haida do ia gwauraia lasi. Danu, namo lasi oi dekenai idia gwauraia herevadia be ma haida dekenai oi herevalaia.

Emu Tama Sina Oi Dibaia Namonamo Noho!

Ataiai idia noho heduru herevadia ese oi do idia durua, emu tama sina ida oi noho lalonai idia oi diba namonamo totona. To bema oi be gabu ma ta dekenai oi noho be edena bamona? Unai hakaua herevadia ese oi do idia durua emu tama sina oi tura henidia lou, eiava oi diba namonamo lasi  tama o sina oi tura henia diba. Matamanai ita herevalaia merona, Jacob dekenai unai bamona ia vara. Ena be hari ia be sibona ia noho, to ia gwau, “Hari egu tamana lau dibaia namonamo dainai lau moale.”

Unai dainai, ena be emu tama sina ida oi noho o gabu ma ta dekenai oi noho, to emu tama sina oi dibaia namonamo noho be namo. Inai kahana lalonai idia noho herevadia ese oi idia durua, unai bamona oi karaia totona.

“Memero Kekeni Edia Henanadai” edia hereva ma haida oi diba totona, inai Web sait www.watchtower.org/ype oi itaia diba.

[Futnout]

INAI OI LALOA

◼ Inai kahana lalonai oi ura edena henanadai be emu tama sina dekenai oi gwauraia?

◼ Edena dala ai emu tama sina oi dibaia noho karana ese oi ia durua, sibona emu kara oi lalopararalaia namonamo totona?

[Maua/Foto rau 12 ai]

  Emu tama sina dekenai inai bamona henanadai oi henia:

HEADAVA: Edena dala ai oi bona Sinagu (o Tamagu) umui hedavari? Dahaka dainai Tamagu (o Sinagu) oi ura henia? Oi headava murinai edeseniai oi noho?

MARAGI NEGANA: Edeseniai oi vara? Oi be emu kakana o tadina danu umui noho hebou namonamo, a? Emu tama sina be oi idia kara auka henia o oi idia hebogahisi henia?

EDUKEISEN: Sikuli ai edena gaudia oi stadilaia bona maka namodia oi abia? Edena gaudia oi ura lasi stadilaia? Edena tisa ena gaukara oi ura henia? Dahaka dainai unai tisa ena gaukara oi ura henia?

MONI GAUKARA: Emu moni gaukara ginigunana be dahaka? Oi moalelaia, a? Bema oi ura henia gaukarana ta oi abia hidi, oi laloa edena bamona gaukara do oi karaia?

URA HENIA GAUDIA: Bema oi ura gabu ta dekenai oi loaloa, edena gabu do oi lao? Edena bamona gaukara o gadara oi ura dibaia?

TOMADIHO: Oi be Keristani ruma bese lalonai oi tubu daekau, a? Bema lasi, dahaka ese emu ura ia habadaia Baibel oi dibaia totona? Baibel ena hakaua herevadia oi badinaia dainai dahaka hahetoho oi davaria?

LALOA BADA GAUDIA: Oi laloa dahaka gaudia be mai anina bada, ta oi tura henia namonamo totona? emu mauri lalonai oi moale totona? emu headava ia noho daudau totona? Dahaka sisiba namona oi abia?

Inai oi tohoa: Henanadai haida oi abia hidi bona emu tama sina ese do idia haerelaia dalana oi laloa. Bena, idia oi nanadaia bona idia henia haere be oi laloa gauna ida oi hahegeregerea toho.

[Maua rau 13 ai]

HEREVA TA TAMA SINA DEKENAI

Oi be emu adavana, natuna kekeni, bona turadia haida ida umui aniani hebou. Umui herevahereva lalonai, emu turana be oi dekenai guna oi tura henia bona gabeai unai hetura karana ia dika merona ia herevalaia. Unai sivarai be emu natuna kekeni dekenai oi do gwauraia lasi. Hari ia ura emu sivarai ma haida ia diba. Dahaka do oi karaia?

Emu natuna ese ia gwauraia henanadai oi laloa be namo. Dala namona ta be, natuna be oi dekenai henanadai ia henia bona emu haere ia kamonai be nega namona umui herevahereva hebou diba​—tama sina momo idia ura unai bamona idia karaia.

Guna emu mauri lalonai idia vara gaudia ibounai be emu natuna mero o kekeni dekenai oi herevalaia, a? Reana do oi ura lasi hemarai gaudia be natuna dekenai do oi gwauraia. To, bema ia hegeregere, oi karaia kerere haida bona oi davaria metau gaudia oi gwauraia hedinarai karana ese emu natuna ia durua diba. Edena dala ai?

Haheitalai ta mani oi laloa. Nega ta aposetolo Paulo be sibona ia herevalaia neganai, ia gwau: “Lau ura be kara namona lau karaia, to kara dika sibona lau karaia diba. . . . Lau madi o! Lau be dika momokani inai!” (Roma 7:21-24) Iehova Dirava be ena lauma helaga amo Paulo ia hasiahua dainai unai hereva ia torea bona Baibel ai idia noho ita idia durua totona. (2 Timoteo 3:16) Paulo ena hereva ese ita ia durua bada dainai namo ita abia, ani?

Unai hegeregerena, bema emu abia hidi maorodia bona oi karaia kereredia edia sivarai be emu natudia dekenai oi gwauraia, unai ese idia do ia durua emu lalohadai idia diba namonamo totona. Momokani, oi tubu daekau dalana be emu natuna ena amo ia idau. To, ena be gau haida idia idau, to iseda kara o ura gaudia be idia idau lasi; bona Baibel ena hakaua herevadia danu idia idau lasi. (Salamo 119:144) Oi davaria hahetoho bona oi hanaia daladia oi herevalaia karana ese emu natuna ia durua idia sibona ese idia davaria hekwakwanai idia hamaoromaoroa totona. Mero matamata ta ladana, Cameron, ia gwau: “Bema oi itaia emu tama sina ese idia davaria hahetoho be oiemu hegeregerena, unai ese oi do ia durua oi laloparara emu tama sina be idia goevadae lasi.” Ma ia gwau, “Gabeai hekwakwanai ta oi davaria neganai, reana do oi laloa emu tama sina be guna unai bamona hekwakwanai idia davaria danu.”

Naria namonamo: Namo lasi emu sivarai ibounai lalonai sisiba herevadia oi gwauraia. Momokani, reana do oi laloa emu natuna be lalohadai kerere do ia abia o do ia mamia ia danu be oi hegeregerena kerere ia karaia be namo. To, namo lasi oi laloa oi herevalaia gaudia amo emu natuna be diba ia abia (“Unai dainai namo lasi unai oi . . . ”), to namona be emu hemami oi herevalaia. (“Lau dekenai idia vara gaudia lau laloa neganai, lau ura lasi unai gaudia idia vara lou, badina . . . ”) Emu natuna mero o kekeni do ia laloa lasi oi be ia oi sisiba henia, to oi dekenai idia vara gaudia amo diba ia abia.​—Efeso 6:4.

[Maua rau 13 ai]

“Dina ta ai, egu sinana lau hamaoroa egu sikuli turadia lau bamoa neganai lau moale, to Keristani tadikaka taihu lau bamoa neganai lau moale lasi. Unai dina murinai, egu teibolo latanai be Sinana ese ia torea revareva ta ia noho. Unai revareva lalona ia gwau, guna ia danu be Keristani tadikaka taihu huanai turana ia davaria lasi. Ia be lau dekenai Baibel ese ia gwauraia taudia haida edia sivarai ia herevalaia, bona ena be ta ese idia ia hagoadaia lasi to idia be Dirava idia hesiai henia noho. Danu, ma haida lau tura henidia dainai, lau ia hanamoa. Lau hoa badina lau sibona be unai hekwakwanai lau davaria lasi. Egu sinana be unai hekwakwanai ia davaria danu, bona unai lau diba dainai lau moale bona lau tai. Egu sinana ese lau dekenai ia herevalaia gaudia dainai, unai ese lau ia hagoadaia, bona lau ia durua kara maorona lau karaia totona.”​—Junko, ena mauri lagani be 17, Japan amo.

[Foto rau 11 ai]

Emu tama sina oi noia edia foto gunana o gau ma ta be oi dekenai idia hahedinaraia totona. Nega momo unai ese emui herevahereva karana ia hamatamaia diba