1, 2. Ioane ena hereva bamona, edena dala ai Dirava ese ia lalokau henia dalana ia hahedinaraia?

 TAMANA ese ena natuna do ia hadibaia dala namona be ena haheitalai amo. Ioane ia gwau: “Ita ese lalokau ita hahedinaraia badina ia ese ita ia lalokau henia guna.” (1 Ioa. 4:19) Unai dainai, Iehova ese lalokau karana dekenai haheitalai hereadaena ia hahedinaraia, unai ese ita ia durua ia ita lalokau henia totona.

² Edena dala ai Dirava “ese ita ia lalokau henia guna”? Paulo ia gwau: “Dirava ese ita dekenai iena lalokau ia hahedinaraia dalana be inai: Ita be do kara dika taudia neganai, Keriso be ita totona ia mase.” (Roma 5:8) Iehova be ena Natuna ia henia boubou gauna bamona, taunimanima edia mauri davana karaia totona, unai amo ena lalokau ena badina ia hahedinaraia. Unai be sibona ena ura dadaraia lalokauna. Dirava ena hariharibada karana dainai, ita be namo ita abia bona ia ita lalokau henia.—1 Ioa. 4:10.

3, 4. Edena dala ai Dirava ita lalokau henia be namo?

³ Lalokau be Iehova ena kara badana ta, unai dainai Iesu be ia dekenai henanadai ia henia tauna ia hamaoroa, Dirava ena taravatu ginigunana be: “Iehova emu Dirava do oi lalokau henia mai emu kudouna ibounai, mai emu mauri ibounai, mai emu darana ibounai, bona mai emu goada ibounai ida.” (Mar. 12:30) Iesu ena  hereva ese ia hahedinaraia, Dirava lalokau henia karana be iseda kudouna amo ia matamaia gauna. Bema taunimanima o gau ta ita lalokau henia bada, to Iehova ita lalokau henia maragi, Iehova do ia moale lasi. To, namona be iseda mauri ai, darana, bona goada ibounai ida lalokau ita hahedinaraia. Anina be iseda tomadiho karadia lalonai bona dina ta ta ai ita karaia gaudia amo ita hahedinaraia Dirava ita lalokau henia. Peroveta tauna Mika ena hereva bamona, Iehova be unai bamona kara ia ura henia.—Mika 6:8 duahia.

⁴ Edena dala ai ita hahedinaraia iseda guba Tamana ita lalokau henia bada? Iesu ia gwau bamona, namona be iseda tomadiho karadia lalonai, bona iseda kara, hereva, bona hemami ese ia hahedinaraia Ia ita lalokau henia. Stadi gunanai, ita be dala foa ita herevalaia, edena dala ai Iehova be ena natudia dekenai ena lalokau bada ia hahedinaraia. Hari, edena dala ai Iehova ese ia abia dae daladia ai lalokau ita hahedinaraia diba do ita herevalaia.

 5. Iehova ese ita totona ia karaia gaudia ibounai dainai, oi ura edena bamona lalokau karana oi hahedinaraia?

⁵ Bema harihari gauna ta oi abia, dahaka do oi karaia? Do oi hahedinaraia unai harihari gauna oi laloa bada, bona do oi gaukaralaia namonamo. Iamesi ia gwau: “Harihari gaudia namodia ibounai bona harihari gaudia hereadaedia ibounai be atai amo, badina idia be guba diaridia edia Tamana amo idia diho mai. Dina ena laulauna be ia senisi diba, to Tamana be ia senisi diba lasi.” (Iam. 1:17) Iehova be hanaihanai ita dekenai gau namodia ia henia, unai amo mauri ita moalelaia diba. Unai ese eda lalona ia veria ia ita lalokau henia totona, ani?

 6. Israela taudia be Iehova amo hahenamo idia abia noho totona, dahaka idia karaia be namo?

⁶ Lagani handred momo lalonai, Israela taudia be Iehova ena henari henunai idia noho, bona tauanina dalanai bona tomadiho dalanai idia ia hanamoa. (Deu. 4:7, 8) To unai hahenamo idia abia noho totona, Dirava ena Taravatu idia badinaia be namo, unai taravatu ta be hanaihanai “hadoa gaudia edia anina ginigunana” be Iehova dekenai do idia henia. (Eso. 23:19) Unai amo Israela taudia idia hahedinaraia Iehova ena lalokau bona hahenamo idia laloa bada.—Deuteronomi 8:7-11 duahia.

 7. Edena dala ai iseda kohu ita gaukaralaia amo iseda lalokau Iehova dekenai ita hahedinaraia?

⁷ Ita be edena bamona? Ena be hari ita be boubou gaudia ita henia lasi, to iseda kohu amo Iehova ita hanamoa diba, unai amo ita hahedinaraia ia ita lalokau henia. (Aon. 3:9) Unai ita karaia diba daladia haida be dahaka? Momokani, iseda kohu ita gaukaralaia diba iseda gabu ai eiava tanobada ibounai ai Basileia ena gaukara ita durua totona. Ena be tauanina dalanai eda kohu be momo o lasi, to unai be dala namona eda lalokau Iehova dekenai ita hahedinaraia totona. (2 Kor. 8:12) To, dala ma haida ai ita hahedinaraia diba Iehova ita lalokau henia.

8, 9. Edena dala ai Iehova ena gwauhamata abidadama henia karana ese ia hahedinaraia Iehova ita lalokau henia? Ekspiriens gwauraia.

⁸ Iesu be ena murinai idia raka taudia ia hadibaia aniani bona dabua totona do idia laloa momo lasi, to Basileia do idia tahua guna. Ia gwau Iehova be eda dabu gaudia ia diba. (Mat. 6:31-33) Bema unai gwauhamata ita abidadama henia, ita hahedinaraia ita ese Iehova ita lalokau henia bada, badina abidadama bona lalokau be tamona. Ita abidadama henia lasi tauna ita lalokau henia diba lasi. (Sal. 143:8) Unai dainai sibona ita henanadai: ‘Egu mauri ai lau tahua  gaudia ese idia hahedinaraia lau be Iehova lau lalokau henia momokani, a? Dina ta ta ai lau karaia karadia ese idia hahedinaraia Iehova lau abidadama henia, badina ia ese egu dabu gaudia do ia henia, a?’

⁹ Keristani tauna ta ladana Mike be unai bamona lalokau bona abidadama karana ia hahedinaraia. Mike ia matamata neganai, ia ura dikadika idau tano dekenai Dirava do ia hesiai henia. To ia headava bona ena natudia be rua, to ia dekenai unai ura ia do noho. Mike bona ena ruma bese be iseda magasin bona ripoti ai tadikaka taihu edia ekspiriens idia duahia neganai, idia ia hagoadaia kohu momo idia tahua lasi totona. Edia ruma idia hoihoilaia bona apatmen maragina ta dekenai idia noho. Bena Mike be ena bisinesi, ruma badadia hanamoa o hagoevaia gaukarana, ia hamaragia bona Intanet amo tano ma ta ai bisinesi naria dalana ia dibaia. Unai ruma bese be edia gabu idia rakatania, bona lagani rua tano ma ta ai hesiai gaukara idia karaia. Mike ia gwau: “Mataio 6:33 ai Iesu ena hereva be ai dekenai ia momokani.”

10. King Davida ena hereva bamona, edena dala ai Iehova ena hereva laloa dobu karana ese ita ia durua?

¹⁰ Lagani 3,000 gunanai, King Davida be guba ai ia itaia gaudia ese ena lalona ia hagoadaia. Ia gwau: “Guba ese Dirava ena hairaina ia hedinaraia, bona guba dekenai noho gaudia ese, Dirava ia karaia gaudia idia hedinaraia noho.” Bena Dirava ena Taravatu dekenai ia gwau: “Lohiabada ena Taravatu be ia namo momokani. Ia ese taunimanima edia lauma ia hamauria lou. Lohiabada ena hadibaia hereva be momokani vadaeni. Idia ese aonega lasi taudia dekenai, aonega idia henia.” Unai lalohadai ia abia dainai, dahaka ia vara? Davida ia gwau: “Lohiabada e, oi be lauegu Nadi Gini Gabuna, bona egu Hamauria Tauna. Mani lau do oi durua, vadaeni lauegu uduna ena hereva, bona lauegu kudouna ena laloa, be do idia namo, oiemu vairana dekenai.” Unai ese ia hahedinaraia, Dirava bona Davida edia hetura karana be ia goada.—Sal. 19:1, 7, 14.

11. Dirava ita lalokau henia dainai, ita ura Baibel amo ita abia diba dekenai dahaka ita karaia? (Laulau ginigunana herevalaia.)

¹¹ Hari, Iehova ese ia havaraia gaudia dekenai bona iena ura dekenai iseda diba be bada. Inai tanobada taudia idia ura edia diba idia habadaia bona edukeisen badadia idia abia. To, momo be unai bamona idia karaia dainai, Dirava abidadama bona lalokau henia karana idia rakatania. Baibel ia gwau namona be diba, aonega bona laloparara ita abia. Unai amo do ita diba edena dala ai Dirava ese ita dekenai ia henia diba ita gaukaralaia. (Aon. 4:5-7) Dirava ena ura be “taunimanima idauidau do ia hamauria bona hereva momokani ena diba maoromaoro do idia abia.” (1 Tim. 2:4) Mai kudouna ibounai ida taunimanima dekenai Basileia ena sivarai namona ita gwauraia bona ita durudia Dirava ena ura idia lalopararalaia totona, unai amo Iehova dekenai eda lalokau ita hahedinaraia.—Salamo 66:16, 17 duahia.

12. Kekeni matamata ta be edena dala ai ia hahedinaraia Dirava ese ia henia harihari gaudia ia laloa bada?

¹² Matamata taudia be Iehova dekenai edia lalokau idia hahedinaraia diba, bema idia be Iehova ese ia henia gaudia idia laloa bada. Shannon ena mauri lagani be 11 neganai, ia bona ena taihuna, mauri lagani be 10, be edia tama sina ida “Dirava Badinaia Dalana” hebouhebou dekenai idia lao. Program lalonai, matamata taudia idia hadibaia idia makaia gabuna ta dekenai idia helai totona. Ena be ia gari, to ia lao. Gabeai ia moale bada, badina buka ladana Memero Kekeni  Edia Henanadai—Haere Maorodia bukana be harihari gauna bamona matamata taudia dekenai idia henia. Unai ese edena dala ai Shannon ia durua? Ia gwau: “Unai negai lau mamia Iehova be ia noho momokani bona lau ia lalokau henia bada.” Shannon ma ia gwau: “Ita moale bada, badina iseda Dirava, Iehova be ita dekenai harihari gaudia namodia ia henia!”

13, 14. Iehova ena sisiba ita laloa karana ese edena dala ai iseda lalokau ia dekenai ia hahedinaraia?

¹³ Baibel ia gwau: “Lohiabada ese ia lalokau henia taudia, be ia matakani henidia noho, tamana ta ese iena natuna, ia lalokau henia merona, ia matakani henia bamona.” (Aon. 3:12) Edena dala ai unai ese ita do ia durua? Paulo ia gwau: “Ta ese matahakani ia abia neganai, unai ia moalelaia lasi, to ia lalohisihisilaia.” Paulo ia hahedinaraia lasi ia be matahakani karana ia laloa maragi. Badina ia gwau: “To gabeai, unai matahakani amo diba idia abia taudia dekenai maino bona kara maoromaoro ia havaraia.” (Heb. 12:11) Bema Iehova ita lalokau henia, namona be ena sisiba ita abia dae. To, haida dekenai unai be auka. Unai dainai Iehova lalokau henia karana ese ita do ia durua bada diba.

¹⁴ Malaki ena negai, Iuda taudia momo be Dirava ena sisiba idia laloa lasi. Boubou henia karana ena Taravatu idia diba, to hemarai karadia idia karaia dainai Iehova ese sisiba aukana ia henia. (Malaki 1:12, 13 duahia.) Unai negai dahaka ia vara? Iehova ia gwau: “Dika bada herea momokani emui latanai do lau atoa, vadaeni emui gaukara davana, aniani, do idia dika momokani umui dekenai. To umui laloa egu sisiba hereva be anina lasi dainai, lau ese inai dika umui emui latanai lau atoa vadaeni.” (Mal. 2:1, 2) Unai ese ia hahedinaraia, Iehova ena sisiba dadaraia karana idia manadalaia taudia be dika bada do idia davaria.

15. Hari inai negai, edena bamona karadia dekenai ita naria namonamo?

¹⁵ Hari inai negai, taunimanima be sibodia idia laloa bada dainai, sisiba bona hakaua herevadia idia ura henia lasi. Danu nega  momo taunimanima be sisiba o matahakani idia abia neganai, idia moale lasi. To, Baibel ese Keristani taudia ia sisiba henia “inai nega oromana ai idia noho taudia do umui tohotohoa lasi.” Namona be ‘Dirava ena ura goevadaena’ ita lalopararalaia bona badinaia. (Roma 12:2) Iehova be iena orea amo nega korikori ai iseda mauri durua ena sisiba maorodia ia henia—mero o kekeni kara henia dalana, iseda hebamo karana bona moale karadia totona. Mai ura ida unai hakaua herevadia ita badinaia neganai, ita hahedinaraia iseda kudouna amo Iehova ita lalokau henia bada.—Ioa. 14:31; Roma 6:17.

16, 17. (a) Abia hidi ita karaia neganai, dahaka dainai Iehova ena ura ita laloa be namo? (b) Edena dala ai Israela taudia be Iehova idia tabekau henia lasi bona lalokau henia lasi?

¹⁶ Natudia maragidia be dika ta idia itaia neganai, maoromaoro edia tama sina dekenai idia heau lao. To nega momo natudia idia bada neganai, sibona edia diba bona abia hidi karana dekenai idia tabekau. To, tama sina ida hetura karana idia moalelaia natudia be edia tama sina edia sisiba do idia tahua guna, gabeai abia hidi idia karaia. Unai hegeregerena Iehova ese iseda ‘ura ia hagoadaia, ia ura henia gaudia ibounai ita karaia totona.’ To, bema abia hidi ita karaia lalonai Iena ura ita laloa bada lasi, anina be lalokau bona abidadama karana ia dekenai ita hahedinaraia lasi.—Fili. 2:13.

¹⁷ Samuela ena negai, Israela taudia be tuari lalonai Pilistia taudia ese idia halusia. Unai negai Dirava ena taunimanima be heduru idia tahua. Dahaka idia karaia? Idia gwau: “Namona be Lohiabada ena Taravatu Maua do ita abia, Silo dekena amo do ita mailaia iniseni. Vadaeni ia be ita huana dekenai do ia mai, bona ita idia tuari henia taudia dekena amo ia ese ita do ia hamauria.” Dahaka ia vara? “Momo herea idia mase, Israela taudia ibounai 30,000 idia mase. Bona Pilistia taudia ese Dirava ena Taravatu Maua idia henaoa, idia abia lao.” (1 Sam. 4:2-4, 10, 11) Israela taudia ese Taravatu Mauana idia abia lao badina idia ura Iehova ese idia ia durua. To, idia be Iehova ena hakaua dalana idia tahua lasi, badina sibona edia lalohadai idia badinaia, unai dainai dika bada ia vara.—Aonega Herevadia 14:12 duahia.

18. Iehova ena heduru ita tahua totona dahaka ita laloa be namo?

¹⁸ Salamo torea tauna ese lalohadai maorona ia hahedinaraia, ia gwau: “Iena durua totona do lau naria noho, badina ia be lauegu hamauria Tauna bona egu Dirava. Unai dainai lau ese iena ladana do lau hanamoa lou. Egu lauma be egu lalona dekenai ia metau noho. Unai dainai Lohiabada dekenai lau laloa noho.” (Sal. 42:5, 6) Ia ese Iehova ia lalokau henia bada! Iseda guba Tamana dekenai unai bamona lalokau bona tabekau karana oi hahedinaraia, a? Ena be emu haere be oibe, to emu abidadama karana oi habadaia diba. Baibel ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.”—Aon. 3:5, 6.

19. Edena bamona daladia ai oi ura Iehova dekenai emu lalokau oi hahedinaraia?

¹⁹ Iehova be ita ia lalokau henia guna dainai, ia do ita lalokau henia dalana ia hahedinaraia. Hanaihanai iena haheitalai hereadaena do ita laloa. Namona be Ia dekenai iseda lalokau ita habadaia ‘bona Iehova eda Dirava ita lalokau henia mai eda kudouna ibounai, mai eda mauri ibounai, mai eda darana ibounai, bona mai eda goada ibounai ida.’—Mar. 12:30.