Baibel ia hahedinaraia Gwauhamata Tano ena gabu haida dekenai, uda badadia idia noho bona au be “momo herea.” (1 Kin. 10:27; Ios. 17:15, 18) To, hari unai gabu dekenai au bona uda badadia be lasi dainai, taunimanima haida idia daradara.

Buka ta (Life in Biblical Israel) ia gwau: “Idaunegai Israel tano ai uda badadia bona au be momo, to hari be unai bamona lasi.” Ororo gabudia ai au badadia idia noho, hegeregere Aleppo pine (Pinus halepensis), evergreen oak (Quercus calliprinos), bona terebinth (Pistacia palaestina). Sepala be ororo gabuna, bona ia be Meditereinien ena kone bona Iuda ena ororo huanai ia noho, unai gabu ai sikamoa fig (Ficus sycomorus) audia be momo herea.

Buka ta (Plants of the Bible) ia gwau, hari Israel ena gabu momo dekenai au be momo lasi. Dahaka dainai? Taunimanima ese au idia utua noho dainai metairametaira uda badadia idia ore idia lao noho. Unai buka ma ia gwau: “Taunimanima be uma idia karaia totona au idia utua bona animal naria gabudia idia habadaia, danu ruma haginia bona lahi au totona au idia utua.”