1. Edena kara ese ita do ia durua Dirava ita tohotohoa totona?

 HEREVANA ita be haida ese idia davaria hekwakwanai ita mamia lasi, to Iehova be ita dekenai ma haida edia hemami lalopararalaia karana ia henia. (Efeso 5:1, 2 duahia.) Edena dala ai Dirava amo ita abia harihari gauna ita gaukaralaia namonamo diba? Bona dahaka dainai unai harihari gauna ita gaukaralaia namonamo?

 2. Edena dala ai ita abia hisihisi ese Iehova ena lalona ia hahisia?

² Ita moale badina Dirava ia gwauhamata abidadama horoa taudia be guba ai mase diba lasi maurina do idia abia, bona Iesu ena “mamoe ma haida” be tanobada ai do idia noho ela bona hanaihanai. (Ioa. 10:16; 17:3; 1 Kor. 15:53) To, Iehova be hari idia vara kara dikadia amo ita davaria hisihisi ia lalopararalaia. Idaunegai, Aigupito dekenai Israela taudia ese idia davaria hisihisi dainai Iehova ia lalohisihisi. (Isa. 63:9, BHḡ) Bona gabeai, Israela taudia be iena dubu helaga idia haginia lou murinai, edia inai taudia dekenai idia gari, Iehova be edia hemami ia lalopararalaia. Idia dekenai ia gwau: “Umui ia dogoatao tauna ese ia [Ieho va ena] matana ena nadinadi ia dogoatao.” (Sek. 2:8, BHḡ) Sina ta ese ena natuna ia lalokau henia hegeregerena, Iehova danu be iena hesiai taudia ia lalokau henidia bona ia ura idia ia durua. (Isa. 49:15) Anina be Iehova ese haida edia hemami ia lalopararalaia bona iena kara ita tohotoho diba.—Sal. 103:13, 14.

 3. Edena dala ai Iesu be hebogahisi ia hahedinaraia?

³ Iesu be taunimanima ese idia davaria hisihisi ia mamia, ena be unai hisihisi ia davaria lasi. Hegeregere, ia diba taunimanima be dubu gunalaia taudia dekenai idia gari, badina idia koidia bona sibodia edia taravatu idia atoa to Dirava ena lasi. (Mat. 23:4; Mar. 7:1-5; Ioa. 7:13) Iesu be idia dekenai ia gari lasi o ia idia koia diba lasi, to taunimanima ese idia davaria hisihisi ia lalopararalaia. Unai dainai, “hutuma ia itaia neganai ia hebogahisi henidia, badina idia be mamoe naria tauna ese ia naria lasi mamoe bamona, haida ese idia haberoa bona idia dadaraia.” (Mat. 9:36) Iena Tamana hegeregerena, Iesu be mai ena lalokau bona hebogahisi.—Sal. 103:8.

 4. Iesu be taunimanima edia hisihisi ia itaia dainai, dahaka ia karaia?

⁴ Iesu ia itaia taunimanima be hisihisi idia davaria neganai, idia ia durua badina ia lalokau henidia. Ia ese ena Tamana ena lalokau karana ia hahedinaraia. Hegeregere, gabu daudau ai idia haroro murinai, Iesu bona ena aposetolo taudia idia ura regerege lasi gabuna ta dekenai idia lao, bona do idia laga-ani. Ena be Iesu ia hesiku bada, to idia naria hutuma dekenai ia hebogahisi bona “idia dekenai gau momo ia hadibaia matamaia.”—Mar. 6:30, 31, 34.

5, 6. Dirava ena lalokau ita tohotohoa totona, edena dala ai iseda dekena taudia ita kara henia? Haheitalai gwauraia. (Laulau ginigunana itaia.)

⁵ Eda dekena taudia ita kara henia neganai, ita ese Dirava ena lalokau karana ita tohotohoa. Mani inai haheitalai oi laloa: Tadikaka matamata ta ena ladana be Alan. Ia ese aena dika bona matana dika tadikaka burukana ta ia laloa. Alan ese Iesu ena hereva ia laloatao: “Umui ura taunimanima ese umui dekenai idia karaia hegeregerena, idia dekenai danu unai bamona do umui karaia.” (Luka 6:31) Alan be sibona ia nanadaia, ‘Lau ura haida be lau ida dahaka do ai karaia?’ bona ia haere, ‘Lau ura idia ida lau gadara!’ To unai tadikaka burukana be ia heau bona gadara diba lasi. Unai dainai, Alan be inai bamona ia henanadai be namo, ‘Bema lau be unai tadikaka burukana, lau ura haida be lau ida dahaka do ai karaia?’

⁶ Herevana Alan be ia matamata, to ia buruka neganai do ia abia hemami ia laloa. Ia be unai tadikaka burukana ia bamoa bona ia hereva neganai, Alan ia kamonai namonamo. Gabeai, ia laloparara unai tadikaka be ia hegeregere lasi Baibel ia duahia bona ruma-ta ruma-ta haroro gaukara ia karaia totona. Alan be unai tadikaka do ia durua dalana ia laloa bona ia ura unai tadikaka ia durua. Bema haida edia hemami ita lalopararalaia bona lalokau ita hahedinaraia, ita ese Iehova ita tohotohoa unai.—1 Kor. 12:26.

 7. Edena dala ai iseda tadikaka edia hisihisi ita lalopararalaia diba?

⁷ Momokani, nega haida taunimanima ese idia davaria hisihisi ita lalopararalaia totona be auka. Badina taunimanima momo ese idia davaria hekwakwanai be ita diba lasi. Hegeregere, iseda tadikaka  momo be hisihisi idia davaria noho badina idia gorere o haida ese idia haberoa o idia buruka noho. Danu, haida be hisihisi idia davaria noho badina idia lalometau, idia gari bada, bona guna haida ese idia kara auka henia. Bona ruma bese haida lalonai tama o sina sibona be ena natudia ia naria, eiava haida edia ruma bese taudia be Iehova ena witnes taudia lasi. Taunimanima ibounai be mai edia hekwakwanai, bona nega momo unai hekwakwanai ta be iseda amo ia idau. To, edena dala ai Dirava ena lalokau ita tohotohoa diba? Haida idia hereva neganai, idia ita kamonai namonamo ela bona edia hemami ita lalopararalaia namonamo. Bena idia ita durua diba, unai amo Iehova ena lalokau ita hahedinaraia. Hegeregere, Iehova ese edena bamona ena hekwakwanai ia laloa dalana be ia dekenai ita hadibaia o dala ma ta ai ita durua diba.—Roma 12:15; 1 Petero 3:8 duahia.

 8. Dahaka ese Iesu ia durua hebogahisi ia hahedinaraia totona?

⁸ Iesu ia gwau: “Atai Momokani Diravana . . . ese tanikiu lasi taudia bona kara dika taudia ia hebogahisi henidia.” (Luka 6:35) Iesu ese Dirava ena hebogahisi karana ia tohotohoa. Dahaka ese Iesu ia durua taunimanima dekenai hebogahisi ia hahedinaraia totona? Iesu be taunimanima edia hemami ia laloa. Hegeregere, kara dika hahinena ta be Iesu dekenai ia mai, ia taitai bona ena mata ranu amo iena aena ia haparia. Iesu ia itaia unai hahine be ena kara dika dainai, ia lalohisihisi bona ia helalo-kerehai. Iesu ia diba bema unai hahine dekenai ia hebogahisi lasi, do ia lalohisihisi bada herea. Unai dainai ia hanamoa bona ena dika ia gwauatao. Farisea tauna be ia vara gauna dekenai ia moale lasi, to Iesu be ia dekenai mai manau ida ia hereva.—Luka 7:36-48.

 9. Dahaka ese ita ia durua hebogahisi karana ita hahedinaraia totona? Haheitalai gwauraia.

⁹ Edena dala ai Dirava ena hebogahisi karana ita tohotohoa diba? Aposetolo Paulo ia gwau: “Lohiabada ena igui hesiai tauna ia heai be anina lasi, to gau badana be taunimanima ibounai ia hebogahisi henia.” (2 Tim. 2:24) Hegeregere, hebogahisi hahedinaraia dalana mani oi laloa. Bema emu bosi be ena gaukara ia karaia namonamo lasi, dahaka do oi karaia? Bema hua haida ai hebou ia reaia tadikaka be Kingdom Hall dekenai ia mai, ia dekenai dahaka do oi gwau? Bema haroro gaukara ai ruma tauna ta ia gwau ia bisi, edena dala ai hebogahisi do oi hahedinaraia? Bema ruma dekenai emu adavana ese oi ia nanadaia, “Dahaka dainai emu palani Saturday totona be lau dekenai oi hadibaia lasi?” Mai hebogahisi ida do oi haere, a? Unai dainai ita ese haida edia hemami bona eda hereva ese idia do ia hahisia dalana ita laloa guna. Bena do ita diba taunimanima dekenai dahaka do ita gwauraia bona karaia, unai amo Iehova ena hebogahisi karana ita tohotohoa diba.—Aonega Herevadia 15:28 duahia.

10, 11. Dahaka ese ita ia durua diba Dirava ena aonega ita tohotohoa totona? Haheitalai gwauraia.

¹⁰ Iehova ena aonega be bada herea, bona vaira negana do idia vara gaudia ia itaia diba. Ena be vaira negana ai do idia vara gaudia ita diba lasi, to ita aonega diba. Edena dala ai? Abia hidi ita do karaia lasi neganai, namona be ita laloa namonamo guna edena dala ai unai abia hidi ese ita o ma haida ia hanamoa o hadikaia diba. Namo lasi Israela taudia ita tohotohoa. Idia  be Iehova idia gwau-edeede henia ena dika idia laloa lasi. Danu edia hetura karana Iehova ida bona idia totona ia karaia gaudia idia laloa lasi. Mose be unai ia itaia dainai, ia diba Israela taudia be do idia kara dika. Ia gwau: “Israela be aonega lasi besena. Idia edia lalona be idia kehoa lasi. Idia kwalimu lasi ena badina, idia diba lasi, bona dahaka ia vara ena anina, be idia laloa lasi.”—Deu. 31:29, 30; 32:28, 29.

¹¹ Dirava ena aonega ita tohotohoa totona, namona be do ita karaia karana ese gabeai do ia havaraia dika ita laloa guna. Bema do oi adavaia mero o kekeni ida oi loa hebou, namona be mahuta hebou urana dekenai umui naria namonamo. Ita ura lasi iseda palani o ita karaia karana ta ese iseda hetura karana Iehova ida ia hadikaia! Unai dainai namona be Dirava ena hereva hegeregerena ita kara: “Aonega tauna ese dika ia itaia noho, bona unai dika dekena amo ia raka siri, to aonega lasi tauna, be unai dika dekenai do ia raka lao, bona gabeai hisihisi do ia davaria.”—Aon. 22:3.

12. Edena dala ai ita laloa gaudia ese ita ia hadikaia diba?

¹² Aonega tauna ese ena lalohadai ia biagua noho. Ita laloa gaudia ese ita idia durua o hadikaia diba, lahi ese ita ia durua o hadikaia diba hegeregerena. Lahi amo eda aniani ita nadua diba. To, bema ita naria namonamo lasi lahi ese eda ruma ia araia o ita ia hamasea diba. Unai hegeregerena, Iehova ita tohotohoa totona laloa namonamo karana ese ita do ia durua. Bema hanaihanai matabodaga karadia bona kara dikadia ita laloa, unai ese iseda lalona do ia veria diba kara dika ita karaia totona. Unai ese eda hetura karana Iehova ida ia hadikaia diba.—Iamesi 1:14, 15 duahia.

13. Heva be edena bamona mauri dalana ia laloa?

¹³ Hahine ginigunana Heva amo gau ta ita dibaia. Iehova ese Adamu bona Heva ia taravatua, “kara namo bona kara dika hadibaia au” ena huahua do idia ania lasi. (Gen. 2:16, 17) Gaigai ese Heva ia hamaoroa: “Dohore umui mase lasi. Dirava be inai bamona ia hereva badina ia diba, umui ania neganai aonega do umui davaria, bona Dirava hegeregere do umui noho, kara namona bona kara dikana do umui diba.” To Heva “ia itaia, unai au ena toana be namo herea, bona ena au huahua ia itaia be aniani gauna namona.” Dahaka ia vara? “Vadaeni, unai au ena huahua ia abia, bona ia ania. Ma iena tau dekenai ia henia danu, bona ia danu ia ania.” (Gen. 3:1-6) Unai neganai Heva ia laloa Satani  be gau namona ta ia herevalaia. Heva be abia hidi ia karaia neganai, ia be ena dika bona namo ia laloa lasi, to Satani ena hereva ia badinaia. Unai ese dika bada ia havaraia! Heva ena adavana Adamu ena kara dika dainai, “kara dika be tanobada dekenai ia vareai, bona kara dika ese mase ia mailaia.”—Roma 5:12.

14. Edena dala ai Baibel ese ita ia durua matabodaga karana ita dadaraia totona?

¹⁴ Heva ese ia karaia kara dika be matabodaga karana lasi. To, Baibel ese ita ia sisiba henia, matabodaga lalohadai ita abia lasi. Iesu ia gwau: “Bema tau ta be hahine ta ia raraia ela bona ia ura henia dikadika, unai tauna be iena kudouna dekenai ia heudahanai vadaeni.” (Mat. 5:28) Danu, Paulo ia gwau: “Tauanina ena ura karaia totona umui palani guna lasi.”—Roma 13:14.

15. Edena bamona kohu ita haboua be namo, bona dahaka dainai?

¹⁵ Danu, Baibel ia gwau namona be Iehova hamoalea karadia ita laloa bona moni bona kohu momo ura henia karana ita dadaraia. Herevana ta be moni o kohu momo tauna, to unai gaudia ese ia do ia gimaia lasi. (Aon. 18:11) Iesu ia gwau bema tau ta be kohu momo ia haboua bona Iehova ia atoa guna lasi, ia be kavakava tauna. Ia be ‘Dirava dekenai gau momo ia henia lasi tauna.’ (Luka 12:16-21) Bema Iehova hamoalea karadia ita karaia, do ia moale bada. (Aon. 27:11) Bema Iehova ena lalonamo ita abia bona eda ‘kohu be guba dekenai ita haboua,’ do ita moale! (Mat. 6:20) Bona iseda hetura karana Iehova ida be mai anina bada.

16. Ita laloa momo neganai, dahaka ese ita ia durua diba?

¹⁶ Bema inai tanobada dekenai moni o kohu momo ita tahua, ita be gau momo do ita lalohekwarahilaia. (Mat. 6:19) Iesu ia gwau, hanaihanai moni idia laloa momo taudia be do idia hekwarahi Dirava ena Basileia idia atoa guna totona. (Mat. 13:18, 19, 22) Taunimanima haida be idia laloa momo, badina idia laloa nega vaira gau dikana ta ia vara garina. Bema ita laloa momo, do ita gorere o iseda abidadama Iehova dekenai do ia manoka. To, namona be ita abia dae Iehova ese ita ia durua diba. Baibel ia gwau: “Laloa metau ese oiemu moale do ia koua, to hereva namodia ese oi idia hamoalea diba.” (Aon. 12:25) Unai dainai bema gau ta oi laloa momo, Iehova ia hesiai henia tauna ta o oi ia diba namonamo turana ta oi hereva henia. Tama o sina ta, emu adavana o tura namona ta ese oi ia hagoadaia diba Iehova oi abidadama henia bona oi ia durua oi laloa momo lasi totona.

17. Bema ita laloa momo, edena dala ai Iehova ese ita ia durua diba?

¹⁷ Iehova be iseda hemami ia lalopararalaia dainai, ita laloa momo neganai, ia ese ita do ia durua. Paulo ia gwau: “Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai. Bona Dirava ena maino, laloparara ibounai ia hereaia gauna, ese emui kudouna bona lalona do ia gimaia, Keriso Iesu amo.” (Fili. 4:6, 7) Unai dainai bema oi laloa momo, emu hetura karana Iehova ida ia goada totona oi ia durua daladia oi laloa, hegeregere tadikaka bona taihu, elda taudia, hesiai tauna mai ena kamonai, guba anerudia bona Iesu edia heduru oi laloa.

18. Edena dala ai ita laloa gaudia ese ita idia durua diba?

¹⁸ Ita herevalaia bamona, bema ita gaukara goada ma haida edia hemami ita lalopararalaia totona, ita be Iehova ita tohotohoa. (1 Tim. 1:11; 1 Ioa. 4:8) Bema ma haida dekenai hebogahisi bona lalokau ita hahedinaraia, ita karaia gaudia dainai idia vara gau namodia ita laloa, bona ita laloa hekwarahi lasi, do ita moale. Namona be Basileia henunai do ita moalelaia mauri namona ita laloa bona ita gaukara goada Iehova ita tohotohoa totona.—Roma 12:12.