1. (a) Dahaka dainai hari Satani ita inai henia be gau badana? (b) Edena dala ai ita diba Satani ita halusia diba?

SATANI be horoa orena taudia bona “mamoe ma haida” ia tuari henidia noho. (Ioa. 10:16) Diabolo ia diba ena nega be kwadogi dainai, ia ura Iehova ena hesiai taudia momo edia abidadama ia hadikaia. (Apokalupo 12:9, 12 duahia.) To, Satani ita halusia diba. Baibel ia gwau: “Diabolo umui inai henia, bona ia be umui amo do ia heau siri.”—Iam. 4:7.

2, 3. (a) Dahaka dainai Satani ia ura taunimanima idia abia dae ia noho lasi? (b) Edena bamona oi diba Satani be ia noho?

² Momo idia laloa Satani ia noho lasi. Idia laloa Satani bona ena demoni be buka ai idia duahia, muvi bona vidio gadara ai idia itaia taudia sibona. Unai bamona taudia idia laloa aonega taudia be lauma dikadia idia noho herevana idia abia dae lasi. Unai lalohadai dainai Satani bona demoni idia badu, a? Lasi. Badina ia auka lasi unai bamona taudia ia hakaua kerere totona.—2 Kor. 4:4.

³ Ita be Iehova ena hesiai taudia dainai, Satani ese ita ia hakaua kerere lasi. Ita diba Diabolo be lauma korikorina ta. Edena bamona unai ita diba? Baibel ese ia hahedinaraia, Satani be  gaigai amo Heva ia hereva henia. (Gen. 3:1-5) Satani ese Iehova dekenai Iobu ena noho dalana ia henanadailaia. (Iobu 1:9-12) Satani ese Iesu ia dibagania toho. (Mat. 4:1-10) Lagani 1914 ai, Iesu be King ai ia lao murinai, Satani ese horoa orena taudia ia “tuari henia” matamaia. (Apok. 12:17) Satani ia do tuari noho, ia ura 144,000 edia orena taudia bona mamoe ma haida edia abidadama ia hadikaia. Ita kwalimu totona, namona be Satani ita dadaraia bona eda abidadama dekenai ita gini goada. Inai atikol lalonai ita ese dala toi do ita herevalaia.

4. Edena dala ai Satani be hekokoroku o heagi karana ia hahedinaraia?

⁴ Satani be hekokoroku o heagi tauna. Unai aneru dikana ese Dirava ena lohia siahuna ia hepapahuahulaia, bona ia ese taunimanima edia lalona ia veria ia idia tomadiho henia, to Iehova lasi. Unai ese Satani ena heagi karana ia hahedinaraia. Unai dainai, Satani ita tuari henia totona namona be ita manau bona heagi karana ita dadaraia danu. (1 Petero 5:5 duahia.) To heagi be dahaka? Hanaihanai heagi karana be kerere, a?

5, 6. (a) Hanaihanai heagi karana be kerere, a? Herevalaia. (b) Edena heagi karana be dika, bona edena Baibel sivarai haida ese idia hahedinaraia?

⁵ Diksenari ta ia gwau, nega haida heagi be lalogoada bona sibona matauraia karana ta. Danu “oi o famili tauna ta be gaukara namona ta idia karaia eiava gau namona ta idia abia neganai, oi abia moalena ia herevalaia.” Unai bamona heagi karana be kerere lasi. Aposetolo Paulo ia gwau: “Ai ese Dirava ena kongrigeisen edia huanai umui ai heagilaia, badina be dagedage bona hisihisi ibounai lalonai umui haheauka bona abidadama umui hahedinaraia.” (2 Tes. 1:4) Unai dainai, haida edia gaukara namodia ita moalelaia bona unai ita heagilaia karana ese ita ia durua diba. Namo lasi eda famili, eda sene o ita tubu daekau gabuna dainai ita hemarai.—Kara 21:39.

⁶ To, nega haida heagi karana ese eda hetura karana Iehova ida ia hadikaia diba. Bema unai kara ita hahedinaraia, elda taudia edia sisiba do ita lalohisihisilaia bona ita abia dae lasi. (Sal. 141:5) Unai bamona heagi be “sibona laloa bada karana” o “ta be hekokoroku karana ia hahedinaraia bona ia laloa ia ese haida ia hereaia.” Iehova be unai bamona heagi karana ia inai henia. (Ese. 33:28; Amo. 6:8) Taunimanima be sibona idia laloa bada karana idia hahedinaraia neganai, Satani ia moale. Nimiroda, Farao bona Abesaloma ese heagi kererena idia hahedinaraia neganai, Satani ena moale mani oi laloa! (Gen. 10:8, 9; Eso. 5:1, 2; 2 Sam. 15:4-6) Kaino ia heagi dainai, ena hetura karana Dirava ida ia haboioa. Iehova ese Kaino ia sisiba henia, to ia hekokoroku o heagi, bona sisiba ia badinaia lasi, bona ia kara dika.—Gen. 4:6-8.

7, 8. (a) Bese abia isi karana be dahaka, bona edena dala ai ia be hekokoroku karana ta? (b) Edena dala ai hekokoroku o heagi karana ese kongrigeisen ena maino ia hadikaia diba. Gwauraia hedinarai.

⁷ Hari, heagi o hekokoroku karana dainai, taunimanima ese ma haida idia hadikaia kava. Bese abia isi karana be hekokoroku karana ta. Diksenari ta ia gwau, bese abia isi karana ese tano o bese idauidau inai henia kava karana ia havaraia. Unai buka ia hahedinaraia unai kara ese “taunimanima edia bese edia diba bona aonega be bese ma haida ia hereaia, o bese ma ta ese bese ta ia hereaia lalohadaina ia havaraia.” Bese abia isi karana dainai dagedage bona tuari idia vara, bona taunimanima momo idia mase.

⁸ Namo lasi Keristani kongrigeisen  lalonai unai bamona kara ia vara. To, hekokoroku karana dainai tadikaka taihu huanai hepapahuahu ia vara diba. Unai be aposetolo taudia edia negai idia noho Keristani taudia dekenai ia vara, unai dainai Iamesi be idia dekenai ia henanadai, ia gwau: “Umui huanai hepapahuahu bona heai idia vara ena badina be dahaka?” (Iam. 4:1) Bema haida ita inai henia bona ita laloa idia ita hereaia, reana iseda hereva bona kara amo idia ita hahisia diba. (Aon. 12:18) Momokani, hekokoroku o heagi karana ese kongrigeisen ena lalotamona ia hadikaia diba.

9. Edena dala ai Baibel ese ita ia durua bese abia isi karana bona hekokoroku karadia ita dadaraia totona? (Laulau ginigunana itaia.)

⁹ Bema ma haida hereaia lalohadaina ita abia, namona be ita laloatao Iehova ese “hekokoroku taudia ibounai” ia badu henia. (Aon. 16:5) Danu, namona be iseda lalona ita tahua, bona sibona ita nanadaia: ‘Lau be bese, idau tano o mauri dala idau taudia lau hereaia lalohadaina lau abia, a?’ Namona be unai lalohadai ita dadaraia, badina laloatao, Dirava “ese tau tamona amo bese ibounai taudia ia karaia.” (Kara 17:26) Ita ibounai be bese tamona, bona Adamu amo ita mai. Unai dainai namo lasi oi laloa Dirava ese bese ta ia karaia dalana ese bese ma ta ia hereaia. Bema unai bamona oi laloa, oi ese dala oi kehoa Satani ese iseda Keristani lalokau bona lalotamona karana ia hadikaia totona. (Ioa. 13:35) Satani ita halusia totona namona be hekokoroku karadia ita dadaraia.—Aon 16:18.

10, 11. (a) Dahaka dainai inai tanobada ita ura henia be auka lasi? (b) Edena dala ai Dema be inai tanobada gaudia ia ura henia?

¹⁰ Satani be “inai tanobada ena lohia,” bona tanobada be ena siahu henunai ia noho. (Ioa. 12:31; 1 Ioa. 5:19) Inai tanobada taudia ese idia karaia gaudia momo be Baibel ena taravatu hegeregerena lasi. Momokani, inai tanobada ena gaudia haida be kerere lasi. To, ita diba momokani Satani ese inai tanobada lalonai idia noho gaudia ia gaukaralaia, eda ura gaudia amo ita ia tohoa bona kara dika ita karaia totona. Danu, ia ura inai tanobada ita ura henia bona Iehova tomadiho henia karadia ita rakatania.—1 Ioane 2:15, 16 duahia.

¹¹ Keristani taudia ginigunadia haida ese tanobada gaudia idia ura henia. Hegeregere, Paulo ia gwau: “Dema be inai nega oromana ia ura henia bada dainai lau ia rakatania.” (2 Tim. 4:10) Baibel ese ia hahedinaraia lasi Dema be edena tanobada gaudia ia ura henia dainai Paulo ia rakatania. Sedira Dema be kohu ia ura henia dainai, ena hetura karana Iehova ida ia rakatania. Bema unai bamona, Dema be Dirava ena hesiai gaukara lalonai hahenamo namodia ia haboioa. Ia karaia abia hidi ese namo ia havaraia, a? Lasi. Bema Dema be unai abia hidi ia karaia lasi, Paulo do ia durua noho. Bona Iehova ese do ia henia hahenamo ese inai tanobada ena hahenamo ia hereaia!—Aon. 10:22.

12. Satani be edena dala ai “taga ena koikoi siahuna” ia gaukaralaia ita ia hamorua totona?

¹² Ita dekenai unai bamona ia vara diba. Ita be Keristani taudia dainai, ita ura ita sibona bona eda ruma bese durua totona moni gaukara ita karaia. (1 Tim. 5:8) Iehova ia ura iseda mauri ita moalelaia, unai ita diba badina Adamu bona Heva dekenai paradaiso mai hairaina ia henia. (Gen. 2:9) Satani be “taga ena koikoi siahuna” ia gaukaralaia diba iseda lalona ia veria totona. (Mat. 13:22) Momo idia laloa moni, ladana bada bona kohu ese moale ia havaraia. Bema ita danu be unai bamona ita laloa,  eda hetura karana Iehova ida ita haboioa diba. Iesu be ia murinai idia raka taudia ia hadibaia: “Tau ta be biaguna rua edia igui hesiai gaukara ia karaia diba lasi, badina ia ese ta do ia inai henia bona ta do ia lalokau henia, eiava ta do ia durua bona ta do ia dadaraia. Dirava bona Taga edia hesiai gaukara umui karaia diba lasi.” (Mat. 6:24) Bema taga ena hesiai gaukara sibona ita karaia, vadaeni Iehova ena hesiai gaukara do ita karaia lasi. Bona Satani ena ura be unai. Namo lasi moni o kohu ita laloa bada dainai, Iehova tura henia karana ita laloa maragi. Satani ita halusia totona, namona be moni o kohu dekenai lalohadai maorona ita abia.—1 Timoteo 6:6-10 duahia.

13. Tanobada taudia be headava bona mahuta hebou karana dekenai dahaka idia laloa?

¹³ Satani ena tarapu ta be matabodaga karadia. Momo idia laloa headava karana bona adavana badinaia karana be auka, bona unai be idaunegai idia karaia karana ta sibona. Hegeregere, muvi ai ia hedinarai hahinena ta ia gwau: “Tau o hahine be adavana tamona sibona ida ia noho hanaihanai be hegeregere lasi. Lau itaia headava taudia ibounai edia headava ia dika o idia ura edia adavana korikorina idia rakatania.” Bona muvi ia karaia tauna ma ta ia gwau: “Lau itaia headava taudia ibounai edia headava ia dika o idia ura edia adavana korikorina idia rakatania.” Unai bamona ladana bada taudia be Dirava ena harihari gauna idia hadikaia neganai, Satani ia moale bada. Diabolo be headava karana ia durua lasi, bona ia ura lasi headava taudia idia moale. Satani ita dadaraia totona, namona be headava karana ita matauraia.

14, 15. Edena dala ai matabodaga karadia ita dadaraia diba?

¹⁴ Herevana ita headava o headava lasi, namona be ita hekwarahi matabodaga ena ura dikadia ita dadaraia totona. Unai oi dadaraia be auka, a? Lasi. Hegeregere, bema oi be mero o kekeni matamata ta, bona oi kamonai emu klas turadia be matabodaga karadia idia karaia, eiava fon amo laulau dikadia o herevadia idia siaia dainai idia hekokoroku. Tano haida ai fon amo matabodaga laulaudia o hereva siaia karana be ponografi karana ta. Baibel ia gwau: “Matabodaga karana ia karaia noho tauna be ia sibona ena tauanina dekenai ia kara dika.” (1 Kor. 6:18) Mahuta hebou karana ese ia havaraia gorere ese lalohisihisi bona mase idia havaraia. Bona singul taudia momo be ta ida idia mahuta hebou dainai idia lalohisihisi. Muvi bona TV ena program momo ese idia hahedinaraia mahuta hebou karana be kerere lasi bona Dirava ena taravatu headava dekenai idia makohia diba. Unai bamona lalohadai dainai taunimanima momo be “kara dika ena koikoi siahuna” ese ia hakaua kerere.—Heb. 3:13.

¹⁵ Bema oi laloa matabodaga urana oi dadaraia be auka, dahaka oi karaia be namo? Oi abia dae unai be emu manoka gauna. (Roma 7:22, 23) Dirava oi noia goada ia henia totona. (Fili. 4:6, 7, 13) Matabodaga karana ena hedibagani dadaraia. (Aon. 22:3) Bona hahetoho oi dadaraia haraga.—Gen. 39:12.

16. Edena dala ai Iesu ese Satani ena hedibagani ia dadaraia, bona ena haheitalai amo dahaka ita dibaia?

¹⁶ Iesu ese haheitalai namona ia hahedinaraia. Satani be ena gwauhamata herevadia amo ia ura Iesu ia koia neganai, karaharaga Iesu ese ia dadaraia. Maoromaoro Satani ia haere henia ia gwau: “Toretore Helagadia ia gwau.” (Mataio 4:4-10 duahia.) Iesu be Dirava ena Hereva ia diba dainai, Satani ese ia tohoa neganai, karaharaga  Baibel siri ia gaukaralaia. Satani ita tuari henia bona kwalimu totona, namona be matabodaga karadia ita dadaraia.—1 Kor. 6:9, 10.

17, 18. (a) Satani be dahaka tarapu haida ia gaukaralaia, bona dahaka dainai unai ita diba? (b) Satani dekenai dahaka do ia vara, bona dahaka ese oi ia durua oi haheauka totona?

¹⁷ Hekokoroku, moni o kohu tahua karana bona matabodaga karana be Satani ese ia gaukaralaia gaudia. To unai sibona lasi, ia ese dala ma haida amo Keristani taudia ia tohoa. Hegeregere, Keristani taudia haida be edia ruma bese taudia ese idia inai henia, sikuli turadia ese idia kirikirilaia, o gavamani ese edia haroro gaukara idia taravatua. Unai dekenai ita hoa lasi, badina Iesu ese ena murinai idia raka taudia ia hadibaia, ia gwau: “Egu ladana dainai taunimanima ibounai ese umui do idia inai henia, to ia haheauka ela bona dokona tauna be do ia mauri.”—Mat. 10:22.

¹⁸ Edena dala ai Satani ita tuari henia bona ita kwalimu diba? Iesu ia gwau: “Haheauka dainai emui mauri do umui dogoatao.” (Luka 21:19) Taunimanima ese ita dekenai idia havaraia hisihisi be nega sisina sibona. Ta ese iseda hetura karana Dirava ida ia hadikaia diba lasi. (Roma 8:38, 39) Ena be Iehova ena abidadama hesiai taudia haida idia mase, to unai ese ia hahedinaraia lasi Satani ia kwalimu, badina Iehova ese idia do ia hatorea isi lou! (Ioa. 5:28, 29) To Satani be helaro lasi. Dirava ese inai tanobada dikana do ia haorea murinai, Satani be lagani 1,000 lalonai guri dobu masemase ai do ia noho. (Apok. 20:1-3) Keriso ena lohia lagani 1,000 dokonai, Satani be “dibura amo do idia ruhaia,” bona nega sisina lalonai goevadae taudia ia hakaua kerere totona. Unai murinai, Diabolo do ia haorea momokani. (Apok. 20:7-10) Ita be mai eda helaro, to Satani be helaro lasi! Satani oi tuari henia noho bona emu abidadama oi dogoatao auka. Oi ese Satani oi tuari henia bona oi kwalimu diba!