Lagani momo lalonai, iseda pablikeisen ese idia hahedinaraia Magoga tauna Goga be Satani Diabolo, ia be guba amo idia negea diho murinai unai ladana ia abia. Badina Apokalupo bukana ese Satani Diabolo ia herevalaia neganai, ia gwau ia be tanobada taudia do ia gunalaia Dirava ena taunimanima idia tuari henia totona. (Apok. 12:1-17) Unai dainai ita laloa Goga be Satani ia perovetalaia.

To, mai anina bada henanadai haida idia vara. Dahaka dainai? Mani oi laloa: Iehova ese Goga ena moru negana ia herevalaia neganai, ia gwau: “Lau ese ataiai manudia ibounai, bona boroma idauidau ibounai danu do lau mailaia, emui tauanidia do idia ania.” (Ese. 39:4) Bena Iehova ia gwau: “Unai dina dekenai lau ese Goga dekenai guria gabuna do lau henia Israela dekenai . . . Unuseni Goga bona iena orea badana ibounai do idia guridia.” (Ese. 39:11) To, edena dala ai lauma tauna be ‘ataiai manudia bona boroma idauidau’ ese do idia ania? Edena dala ai Satani be tanobada ai ‘do idia guria’? Baibel ia hahedinaraia Satani be lagani 1,000 lalonai guri dobu masemase lalonai do ia noho, to animal ese do ia ania o do idia guria lasi.—Apok. 20:1, 2.

Baibel ese ia hahedinaraia lagani 1,000 dokonai, Satani be guri dobu masemase amo do idia ruhaia, bona “do ia lao tanobada ena kona 4 dekenai idia noho besedia ia hakaudia kerere totona, idia be Goga bona Magoga, bona idia do ia haboudia tuari totona.” (Apok. 20:8) Bema Satani be Goga, edena dala ai sibona do ia hakaua kerere? Unai dainai, Esekiela ena peroveta herevana bona Apokalupo bukana ese idia herevalaia “Goga” be Satani idia herevalaia lasi.

Vadaeni, daika be Magoga tauna Goga? Haere ita diba totona, namona be Baibel ai ita tahua daika ese Dirava ena taunimanima ia tuari henia. Baibel be Magoga tauna Goga ena tuari sibona ia herevalaia lasi, to “not kahana ena king” bona “tanobada ena king taudia” edia tuari ia herevalaia danu. (Ese. 38:2, 10-13; Dan. 11:40, 44, 45, NW; Apok. 17:14; 19:19) Unai be tuari idauidau, a? Lasi. Baibel be tuari tamona ia herevalaia, to ladana idauidau ia gaukaralaia. Dahaka dainai unai bamona ita hereva? Badina Baibel ia gwau, tanobada ena bese ibounai be unai tuari totona do idia haboua, unai neganai Aramagedono ena tuari do ia vara.—Apok. 16:14, 16.

Dirava ena taunimanima do idia tuari henia negana ginigabena idia herevalaia Baibel siridia ita hahegeregerea neganai, ia hahedinaraia inai ladana Magoga tauna Goga be Satani ia herevalaia lasi, to idia haboua tanobada besedia ia herevalaia. Do  idia haboua besedia be “not kahana ena king” ese do ia gunalaia, a? Ena haere ita diba momokani lasi. To, unai lalohadai be Iehova ese Goga dekenai ia gwauraia herevana bamona, ia gwau: “Oiemu gabu mirigini kahana [“not kahana,” NW] dekena amo do oi raka mai, mai oiemu orea badana danu, bese idauidau edia tuari taudia, idia ibounai ese hosi idia guia taudia.”—Ese. 38:6, 15.

Unai hegeregerena, Esekiela ena negai ia noho peroveta tauna Daniela be not kahana ena king ia herevalaia, ia gwau: “Dina ia daekau kahana dekena amo bona mirigini kahana [“not kahana,” NW] dekena amo hereva ia mai dainai, gari badana do ia abia, vadaeni mai badu dikadika danu do ia raka lao lou, taunimanima momo do ia hadikaia bona hamasea ore gwauraia. Vadaeni davara badana ena kone, bona ororo helagana, Dubu Helaga ia noho gabuna edia huanai, unai Suria king ese iena palai ruma namo herea do ia haginia. Unai neganai iena mase negana do ia ginidae, bona tau ta ese do ia durua lasi.” (Dan. 11:44, 45) Unai be Esekiela bukana ese Goga ia herevalaia dalana hegeregerena.—Ese. 38:8-12, 16.

Tuari nega ginigabena ai dahaka do ia vara? Daniela ia gwau: “Unai neganai Mikaela [Iesu Keriso] do ia toreisi [Aramagedono ai]. Ia be lohia aneru badana, oiemu bese taudia ia gimaia tauna [lagani 1914 amo]. Unai neganai nega dika bada herea [hisihisi badana] do ia vara. Matamana negana ia mai bona hari ia lao bona unai nega, be nega dika ta unai bamona do ia vara lasi. Bona unai neganai, oiemu bese taudia ese mauri do idia davaria, Dirava ena buka lalonai edia ladana idia torea vadaeni taudia ibounai.” (Dan. 12:1) Dirava ena gwaukau tauna Iesu ese do ia karaia gaudia be Apokalupo 19:11-21 ese ia herevalaia danu.

To, Apokalupo 20:8 ese ia herevalaia “Goga bona Magoga” be daika? Lagani 1,000 ena dokonai do ia vara hahetoho ginigabena ai, Iehova idia inai henia taudia be ala-ala lalohadaina do idia abia. Unai be ‘Magoga tauna Goga,’ hisihisi badana ai Dirava ena taunimanima idia tuari henia besedia unai, ena lalohadai bamona. Unai orea rua edia dokona be tamona—mase hanaihanai! (Apok. 19:20, 21; 20:9) Unai dainai, ita gwau diba Lagani 1,000 dokonai Iehova idia inai henia taudia be “Goga bona Magoga.”

Ita be Dirava ena Hereva ita stadilaia namonamo dainai, namona be mai haheauka ida ita naria bona ita itaia daika be kahirakahira “not kahana ena king” ai do ia lao. Herevana daika ese idia haboua tanobada besedia do ia gunalaia, to ita dibaia gaudia rua be inai: (1) Magoga tauna Goga bona ena tuari taudia be do idia kwalimu lasi bona do idia ore momokani; bona (2) ia lohia noho King, Iesu Keriso, ese Dirava ena taunimanima do ia hamauria bona hakaudia lao tanobada matamatana dekenai bona maino ai do idia noho.—Apok. 7:14-17.