SEPTEMBER 6, 1926 ai, United States ai loaloa naria gaukara ia karaia Japan tadikaka ta be Japan dekenai ia giroa lou misinari gaukara ia karaia totona. Japan ai ia ginidae neganai, Gima Kohorona ena sabskripsen ia abia hanaihanai tauna ta ese ia welkam henia. Unai tauna be Kobe ai Baibel stadi grup ta ia hamatamaia. January 2, 1927 ai, Bible Student taudia ese Kobe dekenai edia hebouhebou ginigunana idia karaia. Unai hebouhebou dekenai taunimanima 36 idia lao, bona eit idia bapatiso. Unai be namo herea, to edena dala ai unai grup maragina ese Japan ai idia noho taunimanima 60 milioni do idia durua, Baibel ena diari idia itaia totona?

May 1927 ai, Bible Student taudia ese haroro gaukara badana idia karaia bona taunimanima idia boiria Baibel tok haida idia kamonai totona. Osaka ai do idia henia tok ginigunana totona, tadikaka ese saini bona laulau badadia idia atodia, bona boiboi pepadia 3,000 be ladana bada taudia dekenai idia siaia. Pepapepa 150,000 idia hariharilaia, bona Osaka ena niuspepa badadia lalonai bona tereini tiketi 400,000 amo unai tok idia advatais. Tok do idia henia dinana ai, peleini rua be siti ataiai idia roho bona boiboi pepadia 100,000 idia negea. Taunimanima 2,300 bamona be Osaka Asahi Hall idia hahonua tok ladana, “Dirava Ena Basileia be Kahirakahira Do Ia Mai” idia kamonai totona. Taunimanima 1,000 bamona idia haloua badina gabu be ia honu. Unai tok murinai, taunimanima 600 mai kahana idia noho henanadai bona haere ena kahana idia kamonai totona. Hua haida lalonai, Kyoto bona Japan ena west kahana ena siti haida dekenai pablik tok idia henia danu.

October 1927 ai, Bible Student taudia ese dala idia karaia Tokyo ai tok idia henia totona. Idia ese boiboi pepadia be dagi bada taudia dekenai idia henia, hegeregere praiminista, palamen ena memba ma haida, dubu bona ami gunalaia taudia. Tadikaka ese pousta, niuspepa, bona boiboi pepadia 710,000 idia gaukaralaia, bona taunimanima ibounai 4,800 be Tokyo dekenai idia lao tok toi idia kamonai totona.

Kolpota (painia) taudia be gaukara badana idia karaia, badina idia ese ruma ta ta dekenai Basileia ena sivarai namona idia harorolaia. Taihu Matsue Ishii be kolpota ginigunana ta Japan ai. Ia bona ena adavana Jizo, be Japan ena gabu momo dekenai idia haroro, hegeregere Sapporo amo ia lao Sendai, Tokyo, Yokohama, Nagoya, Osaka, Kyoto, Okayama, bona Tokushima. Taihu Ishii bona ena kakana, Sakiko Tanaka, be Japan taudia edia dabua ladana kimono idia hahedokilaia, bona gavamani tau badadia idia vadivadi henia. Gavamani tauna badana ta be buka ladadia The Harp of God bona Deliverance edia kopi 300 totona ia noinoi, badina ia ura dibura taudia edia laiberi ai ia atoa totona.

Katsuo bona Hagino Miura be Taihu Ishii amo buka haida idia abia, bona hereva momokani idia abia dae. Idia be lagani 1931 ai idia bapatiso bona kolpota taudia  ai idia lao. Lagani 1930 be do lasi neganai, Haruichi bona Tane Yamada, bona edia varavara momo be Basileia ena sivarai idia abia dae. Haruichi bona Tane be kolpota gaukara idia hamatamaia, bona edia natuna kekenina Yukiko, be ia lao Tokyo ena Betele ai ia gaukara totona.

Unai negai, motuka edia davana be bada herea bona dala be idia dika. Unai dainai, Kazumi Minoura bona kolpota matamatadia ma haida ese ensini lasi treila mai edia ruma idia gaukaralaia. Idia ese unai treila ladana idia atoa Iehu, unai be guna Israela tauna ta ena ladana. Ia be kariota ia taria tauna bona gabeai Israela ena king ai ia lao. (2 Kin. 10:15, 16) Iehu Badadia toi edia lata be mita 2.2, edia lababa be mita 1.9, bona edia ataiai be mita 1.9 bona idia ta ta lalonai painia taudia siks idia mahuta diba. Danu, Japan brens ai Iehu Maragidia 11, taunimanima rua ese basikele amo idia taria diba gaudia idia karaia. Kiichi Iwasaki be unai Iehu karaia gaukara ia durua, bona ia gwau: “Unai Iehu ta ta be mai edia palai bona lamepa totona motuka ena bateri ai atoa.” Kolpota taudia ibounai be Japan lalonai hereva momokani ena diari idia halasia. Idia ese not kahana, Hokkaido, amo ela bona saut kahana, Kyushu ai, ororo bona koura gabudia dekenai Iehu idia doria daekau bona doria diho.

Kolpota tauna Ikumatsu Ota ia gwau: “Taoni ta dekenai ai ginidae neganai, ai ese sinavai badinai eiava ava gabuna ta ai emai Iehu ai atodia. Matamanai ai ese ladana bada taudia, hegeregere taoni ena gavana, ai vadivadi henia guna, unai murinai hanua taudia edia ruma ai lao bona emai pablikeisen ai hahedinaraia. Unai teritori ai haorea murinai, taoni ma ta dekenai ai lao.”

Kobe ai Bible Student taudia ibounai 36 be hebouhebou ginigunana idia karaia neganai, unai be hegeregere unai “dina dekenai gaukara maragina sibona” idia hamatamaia. (Sek. 4:10) Lagani faiv sibona murinai​—⁠lagani 1932 ai​—⁠Japan ai kolpota bona pablisa taudia 103 be haroro gaukara namona idia karaia, idia ese buka 14,000 mai kahana idia hariharilaia. Hari, Japan ena pablik gabudia dekenai haroro gaukara idia karaia noho, bona pablisa kahirakahira 220,000 be Dina Ia Daekau Tanona ai edia diari idia halasia noho.​—⁠Orea ena Histori Japan amo.