1, 2. (a) Dahaka dainai nega haida ita matakepulu bamona? (b) Ita diba Dirava ena Basileia ese kahirakahira dahaka do ia karaia?

 REANA oi itaia vadaeni, gau ta ia vara neganai, unai gauna idia itaia taudia ta ta be sivarai idauidau idia gwauraia. Unai hegeregerena, gorere tauna ta be doketa ese ia sekea, bona ia gwauraia herevadia ia laloatao lasi. Eiava nega haida reana ta be ena ki eiava mata galasi ia tahua to ia davaria lasi, ena be idia be ena badinai idia noho. Dahaka dainai unai bamona ia vara? Saiens taudia haida idia gwau, bema ita ura gau momo herea be nega tamona ita karaia, do ita matakepulu bamona. Unai ia vara badina, iseda darana ese gau momo be nega tamona ai ia lalohadailaia diba lasi.

² Hari, momo be tanobada ai idia vara noho gaudia idia itaia namonamo lasi, badina idia “matakepulu” bamona. Reana idia abia dae lagani 1914 amo tanobada ai gau momo be idia idau, to unai gaudia idia vara ena badina idia lalopararalaia lasi. Ita be Baibel ita stadilaia dainai, ita diba Dirava ena Basileia be lagani 1914 ai ia mai, unai negai Keriso be guba ai King dagina ia abia. To ita diba inai guriguri, “Oiemu Basileia do ia mai. Oiemu ura gauna tanobada dekenai do ia vara, guba dekenai ia vara bamona,” ena kahana haida be idia do  guguru lasi. (Mat. 6:10) Inai tanobada dikana ia ore neganai, unai guriguri be do ia guguru momokani. Unai neganai, Dirava ena ura be tanobada ai do ia vara, guba ai ia vara bamona.

3. Baibel ita stadilaia dainai dahaka gaudia ita lalopararalaia?

³ Ita be hanaihanai Baibel ita stadilaia dainai, ita laloparara Dirava ena peroveta herevadia be idia guguru noho. To tanobada taudia be unai idia diba lasi! Idia be edia mauri bona ura gaudia dekenai idia bisi bada dainai, idia diba lasi Iesu Keriso be lagani 1914 ai ia King vadaeni, bona Dirava ena hahemaoro negana be kahirakahira. Namona be sibona oi nanadaia: ‘Lau abia dae momokani inai tanobada ai idia vara gaudia ese idia hamomokania dokona be kahirakahira, a?’ Bema oi be vanegai sibona oi bapatiso, sibona oi nanadaia: ‘Lau be dahaka gaudia lau laloa bada?’ Herevana emu haere be dahaka, to hari ita ese point toi do ita herevalaia, bona idia ese do idia hahedinaraia dahaka dainai ita abia dae momokani Dirava ena ura be kahirakahira tanobada ai do ia vara.

4, 5. (a) Lagani 1914 amo Iesu be dahaka ia karaia? (Laulau ginigunana itaia.) (b) Hosi guia taudia toi be dahaka idia laulaulaia, bona edena dala ai unai peroveta herevana ia guguru?

⁴ Lagani 1914 ai, Iesu Keriso be hosi kurokurona ta latanai ia helai, bona Dirava ese ia dekenai korona ia henia. Vadaeni ia lao Satani ena tanobada dikana do ia haorea totona. (Apokalupo 6:1, 2 duahia.) Apokalupo karoa 6 ese ia hahedinaraia Dirava ena Basileia ia gini murinai, tanobada ai dika bada do idia vara. Hegeregere, tuari, hitolo bada, gorere, bona mase idia havaraia gaudia ma haida do idia vara. Unai gaudia be Iesu Keriso ena murinai idia heau hosi guia taudia toi ese idia laulaulaia.—Apok. 6:3-8.

⁵ Baibel ena peroveta herevana hegeregerena, ena be gavamani idia gaukara hebou maino idia havaraia totona, to tuari ese “tanobada amo maino ia kokia.” Lagani 1914 ai ia vara tuarina be tanobada amo maino ia kokia tuari badana ginigunana. Bona ena be gavamani idia hekwarahi moni ena siahu idia habadaia, bona saiens taudia ese edia diba idia habadaia noho, to taunimanima be idia do hitolo noho. Danu, lagani ta ta ai taunimanima milioni momo be gorere, dika badadia, bona hekwakwanai ma haida amo idia mase. Hari, unai gaudia be tanobada hegegemadai idia vara loulou, bona taunimanima momo idia mase noho. Unai ena anina oi lalopararalaia, a?

6. Daidia be Baibel ena peroveta herevadia edia guguru dalana idia lalopararalaia, bona dahaka idia karaia?

⁶ Taunimanima momo be Spanish influenza gorerena bona Tanobada Tuarina Ginigunana dainai, idia lalohekwarahi bada. To, horoa Keristani taudia idia laloa “idau bese edia nega,” be lagani 1914 ai do ia ore. (Luka 21:24) Idia diba momokani lasi lagani 1914 murinai dahaka do ia vara. To, idia diba gauna be Dirava ena Basileia dekenai mai anina bada gauna ta do ia vara. Unai peroveta herevana ena guguru negana idia lalopararalaia murinai, mai gari lasi ida idia haroro matamaia idia gwau, Dirava be ia lohia matamaia vadaeni. Unai dainai idia momo be dagedage bada idia davaria. Unai ese Baibel ena peroveta herevana ia hagugurua. Lagani momo lalonai Basileia ena inai taudia ese “taravatu maoromaorodia lasi” idia atoa haroro gaukara idia koua totona. Danu, idia ese tadikaka idia dagedage henidia, dibura ai idia atodia, bona idia tauadae, pididia  o edia aiona idia utua oho.—Isa. 10:1; Apok. 12:15.

7. Dahaka dainai momo be tanobada ai idia vara gaudia idia lalopararalaia lasi?

⁷ Ena be gau momo ese idia hamomokania Dirava ena Basileia be guba ai ia lohia vadaeni, to dahaka dainai momo be unai idia lalopararalaia lasi? Dirava ena taunimanima be lagani momo lalonai idia haroro idia gwau, tanobada ai idia vara gaudia ese Baibel ena peroveta herevadia idia hagugurua noho. To, dahaka dainai momo be unai idia lalopararalaia lasi? Taunimanima idia ura edia matana amo idia itaia gaudia sibona idia abia dae, a? (2 Kor. 5:7) Edia mauri lalonai idia vara gaudia dekenai idia bisi bada dainai, Dirava ese ia karaia noho gaudia idia itaia lasi, a? (Mat. 24:37-39) Haida be Satani ena koikoi herevadia ese idia hakaua kerere, a? (2 Kor. 4:4) Eda matana amo ita itaia gaudia sibona lasi, to abidadama ese ita ia durua Dirava ena Basileia ese ia karaia gaudia ita itaia totona. Ita moale badina idia vara noho gaudia ita lalopararalaidia diba!

8-10. (a) Edena dala ai 2 Timoteo 3:1-5 ese ia perovetalaia gaudia be idia guguru noho? (b) Dahaka dainai ita gwau diba kara dikadia be idia bada idia lao noho?

⁸ Ita abia dae kahirakahira Dirava ena Basileia ese tanobada do ia biagua ena badina iharuana be inai: Kara dika ia bada ia lao noho. Kahirakahira lagani 100 lalodiai, ita itaia 2 Timoteo 3:1-5 ese ia perovetalaia gaudia idia guguru noho. Unai gaudia be tanobada hegegemadai idia vara loulou noho. Unai oi itaia danu, a? Mani haheitalai haida ita herevalaia.—2 Timoteo 3:1, 13 duahia.

⁹ Lagani 1940 bona 1950 lalodiai idia karaia moale karadia, spot gadara, bona dabua haida edia sitaelo be taunimanima ese idia ura henia lasi. To hari, unai gaudia be taunimanima ese idia abia dae. Dagedage bada bona matabodaga karadia be gabu ibounai dekenai idia vara noho. Danu, taunimanima be dagedage, matabodaga bona kara dikadia idia karaia ma haida idia hereaia totona. Lagani 1950 lalodiai, TV dekenai dagedage bona matabodaga laulaudia  idia hedinarai lasi, to hari idia gwau famili ese unai bamona laulau idia itaia diba. Danu, taunimanima idia laloparara, moale karadia bona dabua edia sitaelo momo be geligeli taudia edia mauri dalana idia hahedinaraia. To, ita moale badina Dirava ena lalohadai unai gaudia dekenai ita diba!—Iuda 14, 15 duahia.

¹⁰ Lagani 1950 lalodiai sikuli dekenai matamata taudia be idia gwau-edeede momo lasi, to hari unai kara be bada herea. Tama sina be idia lalohekwarahi bada, dika edia natudia be kuku idia ania, kekero muramura idia inua o mavaru dikadia idia karaia. Hari, inai bamona ripoti dikadia ita kamonai momo: Mauri lagani 15 stiuden ta be ipidi amo ena klas turadia ia pidia; rua idia mase bona 13 be bero idia abia. Matamata taudia haida be idia kekero murinai, mauri lagani nain kekeni ta idia alaia mase, bona ena tamana bona kasin idia dadabaia. Danu, ripoti ta ese ia hahedinaraia, Asia tanona ta ai, idia hanaia lagani 10 lalodiai taravatu utua karadia momo be matamata taudia ese idia karaia. Momokani, ita gwau diba kara dikadia be idia bada idia lao noho.

11. Dahaka dainai momo idia laloparara lasi kara dika be ia bada ia lao noho?

¹¹ Aposetolo Petero ia gwau: “Dina gabediai, hevaseha taudia do idia mai bona hevaseha herevadia do idia gwauraia, bona sibodia edia ura hegeregerena do idia kara, bona do idia gwau: ‘Ia gwauhamata do ia mai bona noho, to ia be edeseni? Emai sene taudia be mase lalonai idia mahuta negana amo ema bona hari, gau ta ia idau lasi, Dirava ese gau ibounai ia havaraia negana hegeregerena.’” (2 Pet. 3:3, 4) Dahaka dainai haida be unai bamona idia hereva? Toana be taunimanima be kara ta idia itaia loulou neganai, unai kara idia abia dae bona idia laloa momo lasi. Mani inai oi laloa, bema emu turana be karaharaga ena kara ia haidaua, reana do oi hoa. To, bema lagani haida lalonai taunimanima ese metairametaira edia lalohadai bona kara idia haidaua, reana unai dekenai do oi hoa lasi. To, unai bamona kara be mai ena dika.

12, 13. (a) Dahaka dainai tanobada ai idia vara gaudia dainai ita lalometau lasi be namo? (b) Dahaka ese ita do ia durua inai dina gabedia ena “nega aukadia” ita haheaukalaia totona?

¹² Aposetolo Paulo ese ita ia hadibaia “dina gabediai nega aukadia do idia vara.” (2 Tim. 3:1) To, Dirava ena hesiai taudia be unai nega aukadia idia haheaukalaia diba. Iehova, ena lauma helaga bona Keristani kongrigeisen ese ita do ia durua ita gini goada totona. Oibe, Dirava be ita dekenai siahu do ia henia, unai ese “taunimanima edia siahu ia hereaia.”—2 Kor. 4:7-10.

¹³ Paulo be dina gabedia ena peroveta herevana ia hamatamaia neganai, ia gwau, “namona be inai oi diba.” Dahaka dainai unai bamona ia hereva? Unai hereva ese ia hahedinaraia ena peroveta herevana be do ia guguru momokani. Ita diba momokani, kara dika be do ia bada ia lao ela bona Iehova ese dokona ia mailaia. Histori ese ia hahedinaraia, bese momo idia moru badina dahaka be maoro bona dahaka be kerere idia laloa bada lasi. Unai dainai, ena be momo ese idia abia dae lasi, to lagani 1914 amo idia vara gaudia dainai, ita abia dae momokani Dirava ena Basileia ese kahirakahira kara dika do ia haorea.

14-16. Dirava ena Basileia be kahirakahira do ia mai ia hamomokania badina ihatoina be dahaka?

¹⁴ Dirava ena Basileia be kahirakahira do ia mai ia hamomokania badina ihatoina be inai: Dirava ena taunimanima dekenai idia vara gaudia ese idia hamomokania dokona be kahirakahira. Hegeregere, Dirava ena Basileia be guba ai ia do lohia  lasi neganai, horoa taudia haida be Iehova ena hesiai gaukara idia karaia noho. To, idia laloa lagani 1914 ai do idia vara gaudia idia vara lasi neganai, dahaka idia karaia? Hahetoho bona dagedage negadiai, idia momo be Dirava idia badinaia bona hesiai henia noho. Lagani idia hanaia lalodiai, horoa tadikaka momo be Dirava idia badinaia ela bona idia mase.

¹⁵ Iesu be inai nega oromana ena dokona ia perovetalaia neganai, ia gwau: “Inai uru be do ia ore lasi ela bona unai gaudia ibounai idia vara.” (Mataio 24:33-35 duahia.) Ita diba Iesu ese “inai uru” ia herevalaia neganai, ia be horoa Keristani taudia edia orea rua ia herevalaia. Orea ginigunana be lagani 1914 ai idia noho, bona idia laloparara Keriso be unai lagani ai ia lohia matamaia. Idia be lagani 1914 ai eiava lagani 1914 be do lasi neganai, Dirava ese lauma helaga amo ia horodia.—Roma 8:14-17.

¹⁶ “Inai uru” lalonai ia noho orea iharuana be orea ginigunana ida idia gaukara hebou horoa taudia. Orea ginigunana taudia haida idia do mauri noho lalonai, orea iharuana taudia be lauma helaga ese ia horodia. Unai ese ia hahedinaraia, hari idia noho horoa taudia ibounai be Iesu ese ia herevalaia “inai uru” taudia lasi. Hari, orea iharuana ena horoa taudia danu be idia buruka noho. To, Mataio 24:34 ai Iesu ia gwau, “inai uru be do ia ore lasi” lalonai, hisihisi badana do ia matamaia. Unai dainai ita abia dae momokani, kahirakahira Dirava ena Basileia ena King ese kara dika do ia haorea bona kara maoromaoro tanobadana do ia mailaia.—2 Pet. 3:13.

17. Ita herevalaia badina toi amo dahaka ita dibaia?

¹⁷ Ita herevalaia badina toi amo dahaka ita dibaia? Iesu ia gwau dokona do ia mai dinana bona horana be ta ia diba lasi. (Mat. 24:36; 25:13) To, Paulo ena hereva bamona, ita be “hari ita noho negana” ena oromana ita itaia bona lalopararalaia. (Roma 13:11 duahia.) Oibe, ita be dina gabedia ai ita noho. Bema Baibel ena peroveta herevadia bona Iehova bona Iesu ese idia karaia gaudia ita laloa dobu, do ita laloparara ita be inai nega oromana ena dokona ai ita noho.

18. Iesu Keriso ena lohia siahuna idia dadaraia taudia dekenai dahaka do ia vara?

¹⁸ Hosi kurokurona ai ia Guia Tauna, Iesu Keriso, ena lohia siahuna idia dadaraia taudia be kahirakahira do idia laloparara idia kerere vadaeni. To, do idia heau mauri diba lasi. Unai nega ai momo be mai gari bada ida do idia boiboi: “Daika ia gini diba?” (Apok. 6:15-17) Apokalupo karoa 7 ese unai ia haerelaia. Unai nega ai horoa taudia bona hutuma bada taudia sibona do idia “gini,” badina Dirava ese idia ia lalonamo henia. Unai murinai, “hutuma bada taudia” be hisihisi badana amo do idia roho mauri, bona Dirava ena tanobada matamatana lalonai do idia vareai.—Apok. 7:9, 13-15.

19. Oi abia dae momokani dokona be kahirakahira dainai, dahaka oi naria noho?

¹⁹ Bema hari, ita ese inai mai anina bada peroveta herevadia edia guguru daladia ita laloa dobu, Satani ena tanobada ena lalona veria gaudia ese ita do idia koia lasi, bona tanobada ai idia vara noho gaudia edia anina do ita lalopararalaia. Kahirakahira, Keriso ese kara maoromaoro tuarina amo inai tanobada dikana do ia haorea bona do ia kwalimu. (Apok. 19:11, 19-21) Unai murinai hahenamo idauidau do ita moalelaia!—Apok. 20:1-3, 6; 21:3, 4.