1, 2. (a) Solomona ese matamata taudia dekenai dahaka sisiba ia henia? (b) Dahaka dainai mauri lagani 50 ia hanaia taudia dekenai, Solomona ena sisiba be mai anina bada danu?

 IEHOVA ese King Solomona ia hasiahua matamata taudia dekenai inai hereva ia gwauraia totona: “Oi be eregabe neganai, ia ese oi ia karaia Dirava do oi laloa. Badina be nega dika dinadia do idia ginidae.” Unai “nega dika dinadia” be dahaka? Solomona be buruka negana ia herevalaia ia gwau, imana do idia heudeheude, aena do idia manoka, isena do idia moru, matana do idia itaia namonamo lasi, huina do idia kurokuro, bona doruna do ia gageva. Unai dainai, Solomona ia gwau ita do matamata lalonai Iehova ita hesiai henia be namo.—Hadibaia Tauna 12:1-5 duahia.

² Keristani taudia momo edia mauri lagani be 50 ia hanaia eiava idia buruka idia lao, to idia goada noho. Reana edia huina idia kurokuro, to Solomona ese ia herevalaia hekwakwanai ibounai idia davaria lasi. Unai Keristani buruka taudia be Solomona ese matamata taudia dekenai ia henia sisiba idia badinaia diba, a? Ia gwau: “Oi be eregabe neganai, ia ese oi ia karaia Dirava  do oi laloa.” Unai sisiba ena anina be dahaka?

3. Iseda Havaraia Tauna Badana ita “laloatao” anina be dahaka?

³ Herevana ita be lagani momo Iehova ita hesiai henia vadaeni, to namona be nega ita atoa iseda Havaraia Tauna ena kara badadia ita “laloatao” totona. Mauri be iena harihari gauna hereadaena ta. Dirava ese ia havaraia gaudia ia karaia dalana ita lalopararalaia diba lasi. To, Iehova ese ita totona gau idauidau ia karaia, unai amo mauri ita moalelaia diba. Iehova ese ia havaraia gaudia ita laloa dobu neganai, iena lalokau, aonega bona siahu ita laloa bada. (Sal. 143:5) To, iseda Havaraia Tauna Badana ita “laloatao,” anina be ia ura do ita karaia gaudia ita laloa bada. Unai ita karaia neganai, do ita ura ia ita hesiai henia, badina ia karaia gaudia ibounai ita laloa bada.—Had. 12:13.

4. Tadikaka taihu badadia be sibona dekenai dahaka henanadai idia henia diba, bona dahaka dainai?

⁴ Bema oi be gau momo oi dibaia vadaeni, namona be sibona oi nanadaia, ‘Egu tauanina ia do goada noho lalonai, edena dala ai egu mauri do lau gaukaralaia?’ Gaukara momo oi diba dainai, reana haida ese idia karaia diba lasi hesiai gaukara idauidau oi karaia diba. Iehova amo oi dibaia gaudia be matamata taudia dekenai oi hadibaia diba. Idia oi hagoadaia totona, emu hesiai gaukara lalonai oi davaria ekspiriens haida oi herevalaia diba. King Davida be unai ia karaia totona ia guriguri, ia gwau: “Dirava e, lau be mero negana dekena amo, oi ese lau oi hadibaia vadaeni, . . . Momokani hari lau be buruka, bona egu huina idia kurokuro vadaeni. To Dirava e, lau do oi rakatania lasi. Lau ese oiemu siahu lau herevalaia noho neganai, lau dekenai do oi noho, bona oiemu goada be gabeai do idia vara besedia, dekenai do lau gwauraia hedinarai.”—Sal. 71:17, 18.

5. Edena dala ai tadikaka taihu badadia ese idia dibaia gaudia, be ma haida dekenai idia hadibaia diba?

⁵ Edena dala ai lagani momo lalodiai oi dibaia gaudia be ma haida dekenai oi hadibaia diba? Matamata taudia haida be emu ruma dekenai oi boiria diba umui moale hebou totona. Palani oi karaia idia ida oi haroro hebou, bona emu hesiai gaukara amo oi davaria moalena be idia ida oi herevalaia diba. Elihu ia gwau: “Tau badadia do idia hereva be namo. Buruka taudia ese edia aonega do idia hadibaia be namo.” (Iobu 32:7) Aposetolo Paulo ese taihu badadia ia hamaorodia, edia hereva bona haheitalai amo ma haida do idia hagoadaia. Ia gwau: “Namona be hahine badadia danu be mai hemataurai ida . . . kara namodia idia hadibaia.”—Tito 2:3.

6. Dahaka dainai kongrigeisen lalonai tadikaka taihu badadia be mai anina bada?

⁶ Bema oi be Keristani tau o hahine badana, oi ese ma haida oi durua diba. Lagani 30 o 40 gunanai, oi diba lasi gaudia be hari oi lalopararalaia dalana mani oi laloa. Emu mauri lalonai Baibel ena hakaua hereva be mai moale ida oi badinaia. Ma haida dekenai Baibel ena hereva momokani oi hadibaia namonamo. Bema oi be elda ta, dala kererena ia abia hidi tadikaka oi durua diba, ia goada lou totona. (Gal. 6:1) Reana oi ese kongrigeisen ena gaukara, hebouhebou ena dipatmen, o Kingdom Hall konstraksen gaukarana oi naria diba. Reana doketa oi hereva henidia diba, rara lasi medikol daladia idia gaukaralaia totona. Danu, ena be vanegai sibona oi bapatiso, to oi be mauri lalonai gau momo oi diba. Hegeregere, bema oi be mai emu natudia, oi be natudia naria dalana oi manadalaia. Momokani, tadikaka taihu badadia be gau momo idia diba dainai, idia hegeregere ma haida idia hadibaia, hakaua, bona hagoadaia totona.—Iobu 12:12 duahia.

7. Tadikaka taihu badadia ese matamata taudia dekenai dahaka treinini idia henia diba?

 ⁷ Edena dala ai emu diba oi gaukaralaia ma haida oi durua totona? Reana matamata taudia oi hadibaia diba Baibel stadi idia hamatamaia bona karaia totona. Bema oi be taihu, reana oi ese sina matamatadia oi durudia diba, Iehova ena hesiai gaukara idia karaia bona edia natudia idia naria namonamo totona. Bema oi be tadikaka, matamata tadikaka oi hadibaia diba mai edia lalona ibounai ida tok idia henia, bona haroro taudia namodia ai idia lao totona, a? Tadikaka taihu burukadia oi vadivadi henia bona hagoadaia daladia, be idia dekenai oi hadibaia diba, a? Ena be hari emu goada be guna bamona lasi, to oi ese dala idauidau ai matamata taudia oi treinini henia diba. Baibel ia gwau: “Eregabe taudia edia hairaina be edia goada. To buruka taudia edia hairaina be edia huina kurokuro.”—Aon. 20:29.

8. Aposetolo Paulo be ia buruka ia lao neganai, dahaka ia karaia?

⁸ Aposetolo Paulo be ia buruka ia lao neganai, ena diba bona goada ia gaukaralaia Iehova ia hesiai henia totona. Lagani 61 C.E. ai, Paulo be Roma ena dibura ruma amo idia ruhaia neganai, ia be misinari gaukara lalonai hahetoho momo ia haheaukalaia vadaeni. Unai dainai, bema Paulo ia ura, Roma ai mauri namona do ia noholaia bona unuseniai ia haroro. (2 Kor. 11:23-27) Bona Roma tadikaka be do idia moale, bema Paulo ia noho bona idia ia durua. To, Paulo ia itaia tano ma haida ai Basileia harorolaia taudia be momo lasi. Unai dainai, ia be Timoteo bona Tito ida ena misinari gaukara ia hamatamaia lou. Idia be Efeso, Kerete bona reana Makedonia idia lao. (1 Tim. 1:3; Tito 1:5) Paulo ia ura Sipania dekenai do ia lao danu, to ita diba lasi ia lao eiava lasi.—Roma 15:24, 28.

9. Petero be edena negai haroro taudia be momo lasi gabudia ia lao? (Laulau ginigunana itaia.)

⁹ Aposetolo Petero ena mauri lagani be 50 ia hanaia neganai, ia danu be Basileia harorolaia taudia be momo lasi gabudia dekenai ia lao. Edena dala ai unai ita diba? Bema iena mauri lagani be Iesu ena hegeregerena o ia be bada, anina be lagani 49 C.E. ai, Ierusalema dekenai aposetolo taudia ma haida ia hedavari henidia neganai, ena mauri lagani be 50 bamona. (Kara 15:7) Unai murinai, Petero be Babulonia dekenai ia lao, badina ia ura unuseniai idia noho Iuda taudia do ia haroro henidia. (Gal. 2:9) Lagani 62 C.E. bamona, Babulonia ai, ena revareva ginigunana ia torea. (1 Pet. 5:13) Ena be idau tano ai ia noho be auka bona ia buruka ia lao, to unai ese ia koua lasi mai moale ida Iehova ia hesiai henia totona.

10, 11. Robert bona ena adavana edia mauri lagani be 55 bamona neganai, dahaka idia karaia?

¹⁰ Hari, mauri lagani 50 ia hanaia tadikaka taihu badadia idia itaia edia mauri be ia idau, to dala momo ai Iehova idia hesiai henia diba. Idia haida be pablisa be momo lasi gabudia idia lao. Hegeregere, Robert ia gwau: “Lau bona egu adavana emai mauri lagani be 55 bamona neganai, ai laloparara dala ma haida ai Iehova ai hesiai henia diba. Emai natuna tamona be ruma ia rakatania bona emai tama sina burukadia ai naria lasi. Danu idia mase neganai, ai totona moni sisina idia rakatania. Lau itaia emai ruma ai hoihoilaia neganai, emai moni be do ia hegeregere emai abitorehai banika dekenai ai haloua, bona sibona ai naria ela bona egu pensen monina lau abia matamaia. Ai kamonai Bolivia ai momo idia ura Baibel idia stadilaia, bona unuseniai gau edia davana be maragi. Unai dainai, emai lalona ai hadaia unuseni do ai lao. Unai gabu ena noho dalana ai manadalaia be auka, badina idia karaia gaudia be North America dekenai ai manadalaia gaudia amo idia idau. To, emai hekwarahi dainai hahenamo momo ai davaria.”

 ¹¹ Robert ma ia gwau: “Hari, ai be kongrigeisen gaukaradia idauidau ai karaia. Emai Baibel stadi taudia haida be idia bapatiso. Danu, gunika hanuana ta ai ogogami famili ta ai stadi henia, bona idia be wiki ta ta ai unai gabu daudauna amo taoni dekenai idia mai idia hebou totona. Unai famili ia goada ia lao, bona edia natuna mero roboana ia painia dainai, ai moale bada!”

12, 13. Brian ia ritaea murinai ena adavana ida dahaka idia karaia?

¹² Tadikaka taihu badadia edia haheitalai ese idau gado kongrigeisen bona grup idia durua bada diba. Danu, unai bamona gabudia ai haroro gaukara ita moalelaia diba. Hegeregere, Britain tadikaka ta Brian ia gwau, ena mauri lagani be 65 bena ia ritaea murinai, ia bona ena adavana idia moale lasi. Ia gwau: “Emai natudia be ruma idia rakatania vadaeni, bona teritori ai Baibel stadi ai davaria be auka. Bena iunivesiti ai ia gaukara China merona ta lau davaria. Kongrigeisen hebou dekenai ai boiria bona ia mai, bena unai murinai ia ida Baibel stadi lau hamatamaia. Wiki haida murinai ena China turana ta ia mailaia, bona wiki rua murinai, ena turadia ma rua ia mailaidia.

¹³ “Gabeai, iunivesiti ai ia gaukara China tauna ma ta be Baibel stadi totona lau ia noia neganai, lau laloa, ‘Ena be egu mauri lagani be 65, to Iehova ena hesiai gaukara do lau hadokoa lasi.’ Unai dainai, egu adavana, ena mauri lagani be 63, lau nanadaia bema ia ura China gado ia dibaia. China gado ai dibaia totona, China gado idia rekodia kaset ai gaukaralaia. Unai be lagani 10 gunanai. Idau gado taudia edia teritori dekenai ai haroro neganai, lau bona egu adavana ai mamia ai matamata lou bamona. Ai be China taudia ibounai 112 ai stadi henia vadaeni! Idia momo be hebou dekenai idia mai bona ta be ai danu ia painia noho.”

14. Tadikaka taihu badadia be dahaka idia karaia diba? Edena dala ai Paulo ena haheitalai ese idia ia durua diba?

¹⁴ Ena be Tadikaka taihu badadia momo be Iehova ena hesiai gaukara idauidau idia  karaia diba, to haida be idia hegeregere lasi. Haida be idia gorere, bona haida be edia tama sina burukadia o edia natudia idia naria. To, oi moale diba badina Iehova be oi karaia diba gaudia ia laloa bada. Unai dainai, namo lasi oi karaia diba lasi gaudia dainai oi lalohisihisi, to mai moale ida oi karaia diba gaudia oi karaia. Mani aposetolo Paulo ena haheitalai oi laloa. Lagani momo lalodiai, ia be dibura ruma ai ia noho dainai, misinari gaukara ia karaia lasi. To, ia idia vadivadi henia taudia dekenai Baibel ia herevalaia bona edia abidadama ia hagoadaia.—Kara 28:16, 30, 31.

15. Dahaka dainai Kongrigeisen taudia ese tadikaka taihu badadia idia laloa bada?

¹⁵ Iehova be tadikaka taihu badadia ese idia karaia diba hesiai gaukara ibounai ia laloa bada. Ena be Solomona ia hahedinaraia buruka negana be mai ena hisihisi momo, to Iehova be ia oi hanamoa totona oi karaia gaudia ia laloa bada. (Luka 21:2-4) Kongrigeisen taudia be tadikaka taihu badadia edia haheitalai idia laloa bada, badina lagani momo lalodiai idia haheauka, bona Dirava idia abidadama henia.

16. Ana ia buruka dainai dahaka hahenamo ia reaia, to Dirava tomadiho henia totona dahaka ia karaia?

¹⁶ Baibel ese vabu burukana ta ladana Ana ena abidadama karana ia sivarailaia. Iena mauri lagani be 84 neganai Iesu ia vara. Reana Ana be ia buruka bona ia mase dainai, Iesu murinai ia raka lasi, lauma helaga ese ia horoa lasi, bona Basileia ena sivarai namona ia harorolaia lasi. To, ia be dala idauidau ai Iehova ia hesiai henia. Baibel ia gwau: “Ia be hanaihanai dubu helaga dekenai ia lao bona dina bona hanuaboi hesiai gaukara helagana ia karaia.” (Luka 2:36, 37) Daba bona adorahi ai hahelaga tauna ese bonana namo muramura ia gabua neganai, Ana be unuseniai idia hebou taudia ida miniti 30 lalonai Iehova ia guriguri henia. Beibi maragina Iesu ia itaia neganai, “Ierusalema ena hahemauri idia naria taudia ibounai dekenai unai natuna ia herevalaia.”—Luka 2:38.

17. Edena dala ai buruka o gorere taudia ita hagoadaia, tomadiho momokani idia durua totona?

¹⁷ Hari, namona be dala ita tahua idia buruka o gorere taudia ita durua totona. Haida idia ura hebou badadia bona maragidia dekenai idia mai, to idia hegeregere lasi. Gabu haida ai, kongrigeisen ese dala idia karaia unai bamona taudia be telefon amo hebou idia kamonai totona. Gabu haida ai reana unai bamona idia karaia diba lasi. Ena be tadikaka taihu badadia be hebou idia lao lasi, to idia ese tomadiho momokani idia durua diba. Hegeregere, idia ese kongrigeisen ena gaukara ia heau namonamo totona idia guriguri diba.—Salamo 92:13, 14 duahia.

18, 19. (a) Tadikaka taihu badadia be edena dala ai ma haida idia hagoadaia diba? (b) Daidia ese Baibel ena sisiba: “Oi ia karaia Diravana do oi laloatao,” idia badinaia diba?

¹⁸ Tadikaka taihu badadia be reana do idia diba lasi idia ese ma haida idia hagoadaia diba. Hegeregere, lagani momo lalodiai Ana be mai abidadama ida dubu helaga dekenai ia lao, to ia diba lasi lagani momo murinai iena haheitalai ese ma haida do ia hagoadaia. Ana ese Iehova ia lalokau henia karana ena sivarai be Baibel lalonai idia torea. Unai hegeregerena, oi emu lalokau Iehova totona be tadikaka taihu ese do idia laloaboio diba lasi. Unai dainai, Baibel ia gwau: “Kara maoromaoro taudia edia mauri dinadia, be do idia momo, bona buruka taudia edia huina kurokuro, be matauraia gauna.”—Aon. 16:31.

¹⁹ Momokani, ita ibounai be ita hegeregere lasi, Iehova ena hesiai gaukara ibounai ita karaia totona. To, ita do goada noho taudia ese inai hereva ita laloatao be namo: “Oi ia karaia Diravana do oi laloatao, nega dika dinadia idia do ginidae lasi neganai.”—Had. 12:1, BHḡ.