EGU tama sina be lagani 1919 ai, International Bible Students edia hebouhebou badana Cedar Point, Ohio, U.S.A dekenai idia hedavari, bona hua haida murinai idia headava. Lau be lagani 1922 ai lau vara, bona egu tadina Paul be lagani rua murinai ia vara. Egu adavana Grace be lagani 1930 ai ia vara. Iena tama sina, Roy bona Ruth Howell, edia famili be Bible Students taudia. Ena sinana ena tama sina danu be Bible Students taudia, bona edia turana be Tadikaka Charles Taze Russell.

Lau bona Grace be lagani 1947 ai ai hedavari, bena July 16, 1949 ai ai headava. Ai do headava lasi neganai, headava murinai do ai karaia gaudia ai herevalaia hebou. Disisen ai karaia natudia do ai havaraia lasi, to ful-taim hesiai gaukara do ai karaia. October 1, 1950 ai, painia gaukara ai hamatamaia. Bena lagani 1952 ai, ai idia boiria sekit gaukara ai karaia totona.

Ai mamia heduru ai abia be namo unai asainmen matamata ai huaia namonamo totona. Lau be lo tadikaka amo heduru lau abia, bona lau ura ta ese Grace do ia durua danu. Lau ese Marvin Holien lau hereva henia, ia be emai famili ena turana ta, bona lagani momo lalonai sekit gaukara ia karaia. Lau gwau: “Grace be do matamata bona sekit gaukara ia manada lasi. Taihu namona ta oi abia hidi diba Grace ia durua totona, a?” Ia haere: “Oibe, painia namona ta, Edna Winkle ese ia durua diba.” Gabeai, Grace be Edna ia herevalaia, ia gwau: “Ia ese lau ia durua mai gari lasi ida taunimanima lau haroro henia totona. Bona koua herevadia haerelaia daladia ia diba namonamo. Danu, lau ia hadibaia ruma tauna ena hereva do lau kamonai namonamo, unai amo haere maorona lau henia diba. Ia ese lau ia durua bada!”

Lau bona Grace be Iowa provinsi ena sekit rua, bona Minnesota bona South Dakota provinsi edia sekit haida ai naria danu. Gabeai, New York ena Sekit 1 dekenai ai idia siaia, unuseniai Brooklyn bona Queens taoni edia sekit ai naria. Ai laloatao,  unai negai ai mamia, ai be hegeregere lasi unai sekit ai naria totona. Unai sekit ai Brooklyn Heights Kongrigeisen be Betele ena Kingdom Hall dekenai idia hebou. Idia momo be Betele ai idia noho lo tadikaka taihu. Unai kongrigeisen dekenai egu tok ginigunana lau henia murinai, Tadikaka Nathan Knorr be lau dekenai ia mai bona ia gwau: “Malcolm, oi ese sisiba haida oi henia ai badinaia totona, bona unai be maoro. Laloatao, bema ai dekenai sisiba oi henia lasi, oi be Iehova ena orea oi durua lasi. Emu gaukara namona oi karaia noho.” Hebou murinai, unai hereva be Grace dekenai lau gwauraia. Gabeai, emai Betele daiutu dekenai ai daekau neganai, ai lalometau bada dainai ai tai.

Hua haida murinai, revareva ta ai davaria. Ai idia boiria Gilead ena klas namba 24 dekenai do ai lao, bona February 1955 ai sikuli do ai haorea. Ai do lao lasi neganai, ai idia hadibaia sikuli ai haorea murinai, ai be misinari taudia bamona do idia siaia lasi. To, sikuli ese ai do ia durua emai sekit gaukara ai karaia namonamo totona. Unai be sikuli namo hereana bona ia amo manau karana ai diba.

Sikuli ai haorea murinai, ai idia siaia distrik gaukara ai karaia totona. Ai ese Indiana, Michigan, bona Ohio provinsi edia distrik ai naria. Bena ai hoa badina, December 1955 ai Tadikaka Knorr amo revareva ta ai abia. Ia gwau: “Namona be hereva momokani umui gwauraia. Lau ura diba bema umui ura Betele umui mai bona umui noho . . . eiava umui noho sisina, bena gabeai tano ma ta dekenai umui do ai siaia. Danu, namona be lau umui hadibaia bema umui ura sekit bona distrik gaukara umui karaia noho.” Emai haere be, edena hesiai gaukara ai dekenai idia henia be do ai abia dae sibona. Maoromaoro ai idia boiria Betele do ai lao!

Betele ai lau gaukara laganidia lalonai, United States ena gabu momo dekenai lau idia siaia, hebouhebou badadia bona maragidia ai tok lau henia totona. Tadikaka matamatadia momo lau hadibaia, bona gabeai idia be Iehova ena orea lalonai maduna badadia idia huaia. Gabeai lau be Tadikaka Knorr ena seketere ai lau lao; iena ofesi be tanobada hegegemadai haroro gaukara ia naria.

Haroro Naria Dipatmen dekenai lau gaukara laganidia lau moalelaia. Unuseniai lau be T. J. (Bud) Sullivan ida lau gaukara. Lagani momo lalodiai ia be unai dipatmen ena ovasia. To, tadikaka ma haida ese lau idia durua danu. Idia ta be tadikaka Fred Rusk, ia idia abia hidi lau do ia hadibaia totona. Lau laloatao nega ta lau henanadai, “Fred, dahaka dainai nega momo lau torea revarevadia oi haidaua?” Ia kiri bona ia gwau: “Malcolm, oi hereva  neganai, oi gwauraia gauna be hereva ma haida amo oi hahedinaraia diba. To, revareva ta oi torea neganai, hegeregere Betele ena revareva ta, namona be oi torea herevadia idia maoro bona momokani.” Bena lau ia hagoadaia ia gwau: “Oi lalohisihisi lasi, oi be gaukara namona oi karaia bona gabeai do oi manada.”

Betele ai ai noho laganidia lalonai, Grace be gaukara idauidau ia karaia. Hegeregere daiutu ia hagoevaia bona unai ia moalelaia. Unai negai Betele ai idia noho tadikaka matamatadia be hari ai idia hedavari henia neganai, mai kiri ida Grace idia hamaoroa, “Oi ese lau oi hadibaia bedi lau karaia namonamo totona, bona egu sinana be oi ese lau oi hadibaia dalana ia ura henia.” Danu, Grace be Magazine, Correspondence, bona Tape Duplicating dipatmen ai ia gaukara, bona unai ia moalelaia. Unai gaukara idauidau ia karaia amo ia laloparara, Iehova ena orea lalonai herevana dahaka gaukara o edeseniai ita gaukara, to unai be hahenamo badana. Unai nega amo ema bona hari, ena lalohadai ia idau lasi.

Lagani 1975 bamona ai, ai itaia emai tama sina be idia buruka idia lao bona ai durua be namo. Unai dainai disisen ai karaia Betele do ai rakatania. Unai ai karaia be auka, badina ai be emai tadikaka taihu ai lalokau henidia bada, bona ai ura lasi ai rakatanidia. To, lau mamia lau be mai egu maduna emai tama sina lau naria totona. Unai dainai Betele ai rakatania, to ai laloa bema gabeai dala ia kehoa do ai giroa lou diba.

Emai ruma bese durua totona, lau be insurens kampani ta dekenai lau gaukara. Lau laloatao treinini lau abia neganai, egu bosi ta ese lau ia hamaoroa: “Inai bisinesi lalonai oi kwalimu totona hanuaboi ai taunimanima do oi vadivadi henia, badina unai negai taunimanima momo oi davaria diba. Unai dainai, hanuaboi ibounai unai oi karaia be mai anina bada, bona gau ta ese oi ia koua lasi be namo.” Lau haere: “Lau laloparara oi be unai gaukara oi diba momo bona emu hereva lau matauraia. To, egu mauri lalonai Dirava tomadiho henia karana lau atoa guna, bona unai do lau haidaua lasi. Hanuaboi haida do lau gaukara, to Tuesday bona Thursday adorahi, lau be mai anina bada hebou dekenai do lau lao.” Keristani heboudia lau reaia lasi dainai, Iehova ese lau ia hanamoa.

Egu sinana be buruka taudia idia naria rumana ai ia noho, bona July 1987 ai iena bedi badinai ai noho lalonai ia mase. Nesi badana be Grace dekenai ia gwau: “Mrs. Allen namona be ruma oi lao bona oi laga-ani. Oi lalohisihisi lasi badina taunimanima ibounai idia diba, oi be nega ibounai oi hekwarahi emu ravana hahinena oi naria totona.”

December 1987 ai, Betele dekenai ai gaukara lou totona aplikeisen ta ai hahonua, badina unai gabu ai ura henia bada. To dina haida murinai,  doketa idia davaria Grace be colon kensa gorerena ia abia. Opereisen ia abia bona ia namo lou murinai, doketa idia gwau ena kensa gorerena ia ore. To unai nega lalonai Betele amo revareva ia mai, bona ai idia hadibaia emai kongrigeisen dekenai hesiai gaukara do ai karaia noho. Emai lalona ai hadaia unai ai karaia noho totona.

Gabeai, Texas dekenai moni gaukara ta lau davaria. Texas be siahu gabuna bona ai be unai gabu ai ura henia. Hari ai be lagani 25 unuseni ai noho, bona tadikaka taihu be ai idia laloa bada bona edia hebamo namona ai moalelaia.

Idia hanaia laganidia lalonai, Grace be colon, thyroid bona breast kensa gorere ia davaria. To ia maumau lasi, lauegu kwara dagina ia matauraia bona lau ida ia gaukara hebou. Nega momo turadia ese Grace idia nanadaia: “Dahaka ese oi bona emu adavana ia durua dainai, emui headava maurina umui moalelaia?” Grace ese badina foa ia gwauraia: “Ai be tura namodia, dina ta ta ibounai ai herevahereva, dina ta ta ai gaukara hebou, bona bema ai badu, dina ia do diho lasi neganai unai ai hamaoromaoroa.” Momokani, nega haida ai huanai hepapahuahu ia vara, to emai dika ai gwauatao heheni bona ai laloaboio. Unai ese emai headava maurina ia durua bada.

Ai davaria hahetoho idauidau amo gau namodia haida ai dibaia:

1. Nega ibounai Iehova dekenai oi tabekau, bona idia vara hekwakwanai oi haheaukalaia. Sibona emu diba dekenai oi tabekau lasi.​—⁠Aon. 3:5, 6; Ier. 17:7.

2. Herevana dahaka hekwakwanai idia vara, to Baibel ena hakaua herevadia oi badinaia. Iehova bona ena taravatu ita badinadia be mai anina bada. Ita ese Iehova do ita kamonai henia eiava ita dadaraia, to huanai ita noho diba lasi.​—⁠Roma 6:16; Heb. 4:12.

3. Iseda mauri lalonai gau tamona sibona be mai anina bada​—⁠Iehova amo ladana namona do ita abia. Namona be iena ura ita atoa guna, bona moni o kohu ita tahua momo lasi.​—⁠Aon. 28:20; Had. 7:1; Mat. 6:33, 34.

4. Oi guriguri Iehova ese oi do ia durua emu hesiai gaukara oi goadalaia bona karaia noho totona. Namona be oi karaia diba gaudia sibona oi laloa, to oi karaia diba lasi gaudia oi laloa momo lasi.​—⁠Mat. 22:37; 2 Tim. 4:2.

5. Orea ma ta be Iehova ena hahenamo bona lalonamo ia abia lasi.​—⁠Ioa. 6:68.

Lau bona Grace be kahirakahira lagani 65 ai headava vadaeni, bona ai ta ta be lagani 75 mai kahana lalodiai Iehova ai hesiai henia. Unai lagani ibounai lalonai ai ruaosi be Iehova hesiai henia gaukarana ai moalelaia. Ai guriguri bona emai ura be tadikaka taihu ibounai ese edia mauri lalonai, Iehova tabekau henia karana ena namo do idia mamia.