1, 2. Dirava ena lalonamo ita abia totona, ‘edena bamona ita noho be namo?’

 TAUNIMANIMA momo idia ura diba ma haida ese idia be edena bamona idia laloa. To, ita Keristani taudia be Iehova ese ita ia laloa dalana ita laloa bada. Badina iunives ibounai lalonai ia sibona be Atai Momokani Diravana, bona “mauri ibounai ena badina.”—Sal. 36:9.

² Aposetolo Petero ia gwau Iehova ena lalonamo ita abia totona, eda “kara ibounai do idia helaga be namo, bona Dirava do [ita] badinaia namonamo.” (2 Petero 3:11, BH duahia.) Iseda “kara” idia helaga ena anina be kara maoromaoro ita badinaia, iseda lalohadai ia goeva bona tomadiho koikoi ita dadaraia. Danu, “Dirava do [ita] badinaia namonamo” totona, namona be Dirava ita lalokau henia bona ita matauraia. Dirava be iseda kara sibona ia laloa lasi, to iseda kudouna ai idia noho gaudia ia laloa danu. Iehova be iseda “kudouna ia tahua” dainai, ia diba bema iseda kara be idia helaga bona ia sibona ita badinaia noho, eiava lasi.—1 Siv. 29:17, NW.

3. Edena henanadai ita lalodia be namo?

³ Satani Diabolo ia ura lasi Dirava ena lalonamo ita abia. Unai dainai, dala idauidau ia gaukaralaia iseda hetura karana Iehova ida ia hadikaia totona. Satani be koikoi herevadia bona karadia ia gaukaralaia, unai amo ita ese Iehova tomadiho henia karana do ita rakatania. (Ioa. 8:44; 2 Kor. 11:13-15) Unai dainai, namona be sibona ita nanadaia: ‘Edena dala ai Satani ese taunimanima ia koia? Edena dala ai egu hetura karana Iehova ida lau gimaia diba?’

4. Satani be eda hetura karana Dirava ida ia hadikaia totona dahaka ia karaia, bona dahaka dainai?

⁴ Hahediba tauna Iamesi, ia gwau: “Ta be sibona ena ura ese ia tohoa, unai ura ese ena lalona ia veria bona ia koia. Bona unai ura ia rogorogo bamona neganai kara dika ia havaraia, vadaeni kara dika ia vara guguru  neganai, mase ia havaraia.” (Iam. 1:14, 15) Satani be eda hetura karana Dirava ida ia hadikaia totona, iseda kudouna ia dibagania toho, badina ia diba iseda ura gaudia ibounai be kudouna lalonai idia matamaia.

5, 6. (a) Edena dala ai Satani be iseda kudouna ia dibagania toho? (b) Satani ese edena dala toi ia gaukaralaia iseda kudouna ia veria totona? Dahaka dainai Satani be unai gaudia gaukaralaia dalana ia diba namonamo?

⁵ Edena dala ai Satani be iseda kudouna ia dibagania toho? Baibel ia gwau: “Tanobada ibounai be Dika Tauna ena siahu lalonai ia noho.” (1 Ioa. 5:19) Oibe, Satani ese ‘tanobada lalonai idia noho gaudia’ ia gaukaralaia. (1 Ioane 2:15, 16 duahia.) Lagani tausen momo lalonai, Satani be taunimanima ia koia totona tanobada ai gau idauidau ia gaukaralaia. Ita be inai tanobada ai ita noho dainai, namona be sibona ita gimaia unai amo ita do ia koia lasi.—Ioa. 17:15.

⁶ Satani be dala idauidau ia gaukaralaia iseda kudouna dekenai ura dikadia ia havaraia totona. Aposetolo Ioane be Satani ese ia gaukaralaia daladia toi ia herevalaia: (1) “tauanina ena ura,” (2) “matana ese idia ura henia gaudia” bona (3) “ta ese ena kohu ia heagilaia karana.” Tano gagaena ai Satani ese unai dala toi ia gaukaralaia, Iesu ia dibagania totona. Satani be lagani momo lalonai unai dala idauidau ia gaukaralaia dainai, ia diba namonamo edena dala ai taunimanima ta ta edia kudouna do ia veria. Inai stadi ai do ita itaia edena dala ai sibona do ita gimaia, bona Satani ena hedibagani lalonai do ita moru lasi. To guna mani ita itaia, dahaka dainai Diabolo be Heva ia koia, to Iesu ia koia lasi?

7. Edena dala ai Satani ese “tauanina ena ura” ia gaukaralaia, Heva ia dibagania totona?

⁷ Taunimanima ibounai idia mauri noho totona, idia aniani be gau badana. Iseda Havaraia Tauna ese tano ia karaia aniani momo herea ia havaraia totona. Satani ese aniani ura henia urana ia gaukaralaia diba, ita ia koia Dirava ena ura ita dadaraia totona. Heva dekenai unai ia karaia dalana mani ita laloa. (Genese 3:1-6 duahia.) Satani ese Heva ia hamaoroa, “kara namo bona kara dika hadibaia auna” ena huahua ia ania neganai, do ia mase lasi, to unai dina ai ia be Dirava bamona do ia lao. (Gen. 2:9) Unai be hegeregere ia gwau, Heva be ia mauri noho totona, Dirava ia badinaia be anina lasi. Unai be koikoi herevana! Satani ese unai lalohadai be Heva ena lalona dekenai ia atoa neganai, Heva be abia hidi do ia karaia: Unai lalohadai do ia dadaraia, eiava do ia laloa noho ela bona unai au huahua do ia ura henia matamaia. Ena be Eden umana lalonai au huahua be momo herea, to Heva be Satani ena hereva ia laloa noho dainai, “unai au ena huahua ia abia, bona ia ania.” Satani ese Heva ena kudouna lalonai ura dikana ia havaraia dainai, Heva be ena Havaraia  Tauna ese ia taravatua au huahua ia ania.

8. Edena dala ai Satani ese “tauanina ena ura” ia gaukaralaia Iesu ia dibagania totona, bona dahaka dainai ia kwalimu lasi?

⁸ Tano gagaena ai, Satani ese unai dala tamona ia gaukaralaia Iesu ia dibagania totona. Iesu be dina 40 bona hanuaboi 40 ia aniani lasi bona ia hitolo dainai, Satani ese unai hitolo mamina ia gaukaralaia Iesu ia dibagania toho. Satani ia gwau: “Bema oi be Dirava ena natuna, inai nadi oi hamaoroa paraoa ta ai do ia lao.” (Luka 4:1-3) Satani be unai bamona ia hereva neganai, Iesu be abia hidi do ia karaia: Ia ese Satani do ia dadaraia, eiava ena siahu do ia gaukaralaia kerere bona nadi be paraoa ai ia halaoa, ena hitolo ia haorea totona. Iesu ia diba iena siahu be sibona ena namo totona do ia gaukaralaia lasi be namo. Unai dainai ena be ia hitolo, to ia be ena hetura karana Dirava ida ia laloa bada. Ia haere ia gwau: “Toretore Helagadia ia gwau: ‘Taunimanima be aniani sibona amo lasi, to Iehova ena uduna amo idia mai hereva ibounai dainai do idia mauri.’”—Mat. 4:4, 5.

9. Inai hereva “matana ese idia ura henia gaudia” ena anina be dahaka? Edena dala ai Satani ese unai ia gaukaralaia Heva ia dibagania totona?

⁹ Ioane ia gwau, Satani ese ia gaukaralaia hedibagani ma ta be “matana ese idia ura henia gaudia.” Unai hereva ena anina be, bema ta ese ena matana amo gau ta ia raraia noho, ia ura henia matamaia diba. Satani ese Heva dekenai unai dala ia gaukaralaia danu, Satani ia gwau: “Emui matana do idia kehoa.” (Gen. 3:5, BHḡ) Heva ese au huahua ia raraia noho dainai ia ura henia dikadika, bona ia itaia au huahua be “aniani gauna namona.”

10. Edena dala ai Satani be “matana ese idia ura henia gaudia” ia gaukaralaia Iesu ia dibagania totona? Bona Iesu ena haere be dahaka?

¹⁰ Edena dala ai Satani be “matana ese idia ura henia gaudia” ia gaukaralaia, Iesu ia dibagania totona? Satani ese Iesu dekenai “tanobada ena basileia ibounai ia hahedinaraia. Bena Diabolo be ia dekenai ia gwau: ‘Oi dekenai siahu do lau henia inai basileia ibounai bona edia hairai oi biagua totona.’” (Luka 4:5, 6) Momokani, Iesu ese ena matana korikori amo tanobada basileiadia ibounai ia itaia diba lasi. Unai dainai, Satani ese matahanai ta amo basileia ibounai edia hairai ia hahedinaraia, badina ia laloa unai ese Iesu ena lalona do ia veria. Satani ese Iesu ia hamaoroa: “Bema oi ese nega tamona sibona lau oi tomadiho henia, inai gaudia ibounai do oi abia.” (Luka 4:7) Iesu ia ura lasi momokani Satani ena ura do ia badinaia. Iesu be maoromaoro ia dekenai ia haere: “Toretore Helagadia ia gwau: ‘Iehova oiemu Dirava oi tomadiho henia be namo, bona ia sibona dekenai hesiai gaukara helagana do oi karaia.’”—Luka 4:8.

11. Edena dala ai Satani ese Heva ia dibagania?

¹¹ Ioane be “ta ese ena kohu ia heagilaia karana” ia herevalaia danu. Adamu bona Heva be tanobada ai sibodia idia noho neganai, idia be ma haida vairanai ‘edia kohu idia heagilaia’ diba lasi. To, idia ese hekokoroku karana idia hahedinaraia. Satani be Heva ia dibagania neganai, ia hahedinaraia toana be Dirava ese Heva amo mai anina bada gauna ta ia hunia. Diabolo ese Heva ia hamaoroa, “kara namo bona kara dika hadibaia au ena huahua” ia ania dinana ai, ‘Dirava hegeregere do ia noho, kara namo bona kara dika do ia diba.’ (Gen. 2:17; 3:5) Satani ia ura Heva do ia laloa, Dirava ia dadaraia bona sibona ia naria diba. Heva ia hekokoroku dainai, Satani ena koikoi herevana ia abia dae. Ia be Dirava ese ia taravatua au huahua ia ania, badina ia laloa do ia mase lasi. To ia be sibona ia koia!

12. Satani ese edena dala ma ta ai Iesu ia dibagania? Iesu be edena bamona ia haere?

¹² To Iesu be Heva bamona lasi, badina manau karana ia hahedinaraia! Satani be dala ma ta ai Iesu ia dibagania, badina ia ura Iesu be ma haida vairanai do ia hekokoroku bona Dirava do ia tohoa. To, Iesu ese unai ia dadaraia bona Satani ia hamaoroa: “Toretore Helagadia ia gwau: ‘Iehova oiemu Dirava do oi tohoa lasi.’”—Luka 4:9-12 duahia.

13, 14. Satani ese hedibagani idauidau ia gaukaralaia dalana mani oi gwauraia.

¹³ Satani ese Heva bona Iesu dekenai ia gaukaralaia hedibagani be, hari ia gaukaralaia danu. Satani ese “tauanina ena ura gaudia” ia gaukaralaia, taunimanima ia dibagania matabodaga karadia idia karaia, idia inuinu kekero bona idia aniani momo totona. Bona “matana ese idia ura henia gaudia” ia gaukaralaia taunimanima ia dibagania, unai amo Intanet dekenai ponografi idia itaia. Danu, Satani be “ta ese ena kohu ia heagilaia karana” ia gaukaralaia, unai amo taunimanima ia dibagania idia hekokoroku, dagi bona ladana bada idia ura henia, bona kohu momo idia tahua totona.

¹⁴ ‘Tanobada lalonai idia noho gaudia,’ be haoda tauna ese ia gaukaralaia guma bamona. Guma ena toana be namo herea, to iena lalonai be huku ia noho. Unai hegeregerena, Satani ese dina ta ta ai ita ura abia gaudia ia gaukaralaia ita ia dibagania, Dirava ena taravatu ita utua totona. Unai bamona hedibagani ese iseda lalona idia veria bona iseda kudouna idia hadikaia diba.  Unai gaudia dainai do ita laloa, sibona iseda ura gaudia bona eda namo ita atoa guna be gau badana, to Dirava ena ura ita laloa maragi. Unai bamona hedibagani ese ita do ia tarapua, a?

15. Edena dala ai Iesu bamona Satani ena hedibagani ita dadaraidia diba?

¹⁵ Ena be Heva be Satani ena hedibagani ese ia tarapua, to Iesu ese unai hedibagani ia dadaraia. Hedibagani ta ta lalonai, Iesu be Baibel amo ia haere, ia gwau: “Toretore Helagadia ia gwau.” Bema Baibel ita stadilaia namonamo, siri momo do ita dibaia bona hedibagani negadiai, unai siri ese ita do idia durua lalohadai maorona ita abia totona. (Sal. 1:1, 2) Baibel ai Dirava idia badinaia taudia edia sivarai ita laloatao neganai, unai ese ita do ia durua idia ita tohotohoa totona. (Roma 15:4) Iehova ita matauraia, ia ura henia gaudia ita ura henia bona ia inai henia gaudia ita inai henia karana ese ita do ia gimaia.—Sal. 97:10.

16, 17. Dahaka dainai iseda “darana” ita gaukaralaia namonamo be gau badana?

¹⁶ Aposetolo Paulo ese ita ia hagoadaia iseda “darana” do ita gaukaralaia namonamo, unai amo Dirava ena lalohadai do ita abia, to tanobada ena lalohadai do ita dadaraia. (Roma 12:1, 2) Paulo be ita ia hadibaia namona be iseda lalohadai ita biagua namonamo. Ia gwau: “Ai ese Dirava ena diba ida idia hegeregere lasi lalohadai kereredia bona hekokoroku lalohadai ibounai, ai koua noho. Bona ai ese lalohadai ibounai ai guia noho, Keriso idia badinaia totona.” (2 Kor. 10:5) Iseda kudouna ai ita laloa gaudia ese do idia hahedinaraia ita be edena bamona taudia. Unai dainai, namona be eda kudouna ai Dirava ia hamoalea gaudia ita “laloa noho.”—Fili. 4:8.

¹⁷ Bema ita ura ita helaga, lalohadai bona ura mirodia ita dadaraia be gau badana. Namona be mai “kudou goevana” ida Iehova ita lalokau henia. (1 Tim. 1:5) To, ‘kudouna be mai ena koikoi bada,’ unai dainai bema ita naria namonamo lasi, ‘tanobada lalonai idia noho gaudia’ ese ita idia veria diba. (Ier. 17:9) Unai dainai, Paulo ena sisiba ita badinaia be namo. Ia gwau: “Do umui tahua noho bema umui be emui abidadama umui dogoatao noho eiava lasi.” Baibel ita stadilaia neganai, namona be sibona ita nanadaia, ‘Egu lalohadai bona ura amo Dirava lau hamoalea, a?’—2 Kor. 13:5.

18, 19. Dahaka dainai ita gaukara goada be namo, Iehova ena ura ita badinaia namonamo totona?

¹⁸ ‘Tanobada lalonai idia noho gaudia’ ita dadaraia totona, Ioane ena sisiba ita laloa be namo, ia gwau: “Tanobada bona ena ura be do ia ore, to Dirava ena ura ia karaia tauna be do ia noho hanaihanai.” (1 Ioa. 2:17) Toana be Satani ena tanobada be do ia noho hanaihanai, to ia be nega ta do ia ore. Unai anina be Satani ena tanobada ese ia henia gaudia be do idia noho hanaihanai lasi. Bema unai ita laloatao noho, unai ese ita do ia durua Satani ena hedibagani ita dadaraidia totona.

¹⁹ Aposetolo Petero ese ita ia hagoadaia, namona be ita gaukara goada Dirava ena lalonamo ita abia totona. Unai amo ita hahedinaraia, ita be ‘Iehova ena dina ia mai negana ita naria bona ita laloa noho. Unai nega ai guba be lahi ese do ia araia ore, bona guba bona tanobada gaudia be do idia siahu momokani bona do idia veve!’ (2 Pet. 3:12) Kahirakahira unai dina do ia ginidae, bona Iehova ese Satani ena tanobada ibounai do ia hadikaia ore. To, unai ita naria noho lalonai, Satani be, Heva bona Iesu ia dibagania bamona, ‘tanobada lalonai idia noho gaudia’ do ia gaukaralaia ita ia dibagania totona. Namo lasi Heva bamona sibona eda ura ita laloa bada. Badina bema unai bamona ita karaia, unai be hegeregere Satani be iseda dirava ai ita halaoa. To, namona be Iesu ita tohotohoa bona Satani ena hedibagani idauidau ita dadaraia. Namona be ita ta ta ita gaukara goada Iehova ena ura ita badinaia namonamo totona.