1. Dahaka dainai Paulo be Korinto Keristani taudia dekenai ia moale?

 LAGANI 55 C.E. ai, aposetolo Paulo ia kamonai, Korinto tadikaka be ta ta edia huanai idia hepapahuahu momo. Paulo be tama ta bamona idia ia lalokau henia dainai, ia ese idia dekenai revareva ta ia siaia edia hekwakwanai idia hamaoromaoroa totona. (1 Kor. 1:11; 4:15) Danu, Paulo ese ena turana Tito ia noia idia do ia vadivadi henia, unai amo gabeai Troa ai do idia hedavari neganai, Tito ese ia vara gauna be Paulo do ia hamaoroa. Hua haida murinai, Paulo be Troa ai ia naria, bona tadikaka ia do lalodia noho. To, Tito ia mai lasi dainai, Paulo be Makedonia dekenai ia lao. Paulo ia moale badina gabeai ia bona Tito be Makedonia ai idia hedavari. Tito ese Paulo ia hamaoroa, Korinto tadikaka be iena sisiba idia badinaia, bona idia ura dikadika Paulo do idia itaia. Unai sivarai ese Paulo ena “moale ia habadaia.”​—⁠2 Kor. 2:12, 13; 7:5-9.

2. (a) Paulo ese Korinto kongrigeisen ia torea henia neganai, edena dala ai abidadama bona moale ia herevalaia? (b) Edena henanadai do ita haerelaidia?

² Daudau lasi murinai, Paulo ese Korinto kongrigeisen ia torea henia, ia gwau: “Ai be umui emui abidadama ai biagua lasi, to emui moale totona umui ida ai gaukara hebou, badina umui be emui abidadama dekenai umui gini goada noho.” (2 Kor. 1:24) Paulo ena hereva anina be dahaka? Bona hari, elda taudia ese iena hereva amo dahaka idia dibaia diba?

3. (a) Paulo ena hereva: “Umui be emui abidadama dekenai umui gini goada noho,” ena anina be dahaka? (b) Edena dala ai hari, elda taudia be Paulo idia tohotohoa?

³ Paulo be Keristani taudia edia kara badadia rua ia  herevalaia: Idia be abidadama bona moale. Paulo ese abidadama ia herevalaia guna, ia gwau: “Ai be umui emui abidadama ai biagua lasi,” bona “Umui be emui abidadama dekenai umui gini goada noho.” Paulo ia diba Korinto tadikaka be ia eiava ma ta dainai lasi, to mai edia ura ibounai ida Dirava idia hesiai henia. Ia diba idia be Dirava idia lalokau henia bona idia ura kara maoromaoro idia badinaia. Unai dainai, Paulo ia ura lasi iena tadikaka edia abidadama ia biagua. (2 Kor. 2:3) Hari inai negai, elda taudia be Paulo idia tohotohoa, bona idia abia dae edia tadikaka taihu be Dirava idia abidadama henia, bona mai edia lalona ibounai ida Ia idia hesiai henia. (2 Tes. 3:4) Elda taudia be kongrigeisen ai taravatu aukadia idia atoa lasi. To, idia ese Baibel bona Iehova ena orea ena hakaua herevadia amo tadikaka taihu idia durua, abia hidi maorodia idia karaia totona. Elda taudia ese edia tadikaka taihu edia abidadama idia biagua lasi.​—⁠1 Pet. 5:2, 3.

4. (a) Paulo ida idia “gaukara hebou” taudia be daidia? (b) Edena dala ai hari, elda taudia ese Paulo idia tohotohoa?

⁴ Paulo ma ia gwau: “Emui moale totona umui ida ai gaukara hebou.” Paulo ida idia “gaukara hebou” taudia be daidia? Idia be Korinto taudia hagoadaia totona, Paulo idia durua taudia. Edena bamona unai ita diba? Badina Paulo ese Korinto taudia dekenai revareva ia torea neganai, ia ese ia idia durua taudia rua ia herevalaia, ia gwau: “Lau bona Silivanus bona Timoteo ese Dirava ena Natuna, Keriso Iesu, be umui huanai ai harorolaia.” (2 Kor. 1:19) Danu, Paulo be ena revareva haida, Greek gado ai ia torea gaudia lalonai, ia ese inai hereva, ‘ia ida idia gaukara hebou’ taudia ia gaukaralaia. Anina be, ia ida haroro gaukara idia goadalaia taudia hegeregere, Apolo, Akwila, Prisikila, Timoteo bona Tito ia herevalaia. (Roma 16:3, 21; 1 Kor. 3:6-9; 2 Kor. 8:23) Unai dainai Paulo ia gwau: “Emui moale totona umui ida ai gaukara hebou.” Unai amo Paulo ia hahedinaraia ia bona ia ida idia gaukara hebou taudia idia ura, Korinto kongrigeisen idia durua mai moale ida Dirava idia hesiai henia totona. Hari inai negai, elda taudia edia lalohadai be unai bamona danu. Idia ura tadikaka idia durua ‘Lohiabada do idia tomadiho henia, mai edia moale danu.’​—⁠Sal. 100:2; Fili. 1:25.

5. Tadikaka taihu haida dekenai edena henanadai idia henia? Unai henanadai ita herevalaia neganai, dahaka oi laloa be namo?

⁵ Vanegai, tanobada hegegemadai tadikaka taihu goadadia haida dekenai inai henanadai idia henia, “Elda ta ena kara eiava hereva ese oi ia hagoadaia, a?” Hari, unai henanadai ena haere do ita herevalaia. Unai ita herevalaia neganai, mani emu kongrigeisen ena elda ta ena kara o hereva namodia oi laloa. Emu kongrigeisen taudia oi durua bona hamoalea diba daladia oi laloa danu be namo. a

6, 7. (a) Edena dala ta ai elda taudia ese Iesu, Paulo bona hesiai taudia ma haida idia tohotohoa diba? (b) Dahaka dainai eda tadikaka idia moale bema elda ese edia ladana idia laloatao?

⁶ Tadikaka taihu idia gwau, bema elda ta ia hahedinaraia ia be idia ia laloa bada, unai ese idia ia hamoalea. Elda taudia ese unai kara idia hahedinaraia totona, dala namona ta be Davida, Elihu bona Iesu idia tohotohoa. (2 Samuela 9:6; Iobu 33:1; Luka 19:5 duahia.) Unai tatau be ma haida idia hereva henia neganai, edia ladana idia hatoa. Unai  amo idia hahedinaraia idia be unai taudia idia laloa bada. Paulo ia abia dae iena tadikaka taihu edia ladana ia dibaia, bona ia gwauraia be mai anina bada. Ena revareva ta dokonai, ia ese tadikaka taihu 25 bona ma haida edia ladana ia torea. Idia ta be taihu Peresi. Paulo be Peresi ia herevalaia ia gwau: “Iseda lalokau taihuna Peresi dekenai hanamoa hereva umui henia.”​—⁠Roma 16:3-15.

⁷ Elda haida be tadikaka taihu edia ladana idia laloatao lasi. To, namona be idia hekwarahi edia ladana idia laloatao totona, badina unai amo idia hahedinaraia edia tadikaka taihu idia laloa bada. (Eso. 33:17) Danu, idia moale bema Gima Kohorona Stadi o hebou ma haida dekenai idia haere totona, elda ese edia ladana idia hatoa.​—⁠Ioane 10:3 sekea.

8. Edena mai anina bada dalana ta ai Paulo ese Iehova bona Iesu ia tohotohoa?

⁸ Paulo be ma haida edia gaukara namodia dainai ia hanamodia danu, unai amo ia hahedinaraia idia ia laloa bada. Unai be dala namona ma ta elda taudia ese tadikaka taihu idia durua, mai moale ida Dirava idia hesiai henia totona. Paulo be Korinto tadikaka ia tore henidia neganai, ia gwau: “Lau be umui lau heagilaia bada.” (2 Kor. 7:4) Ita diba Paulo ena hereva ese Korinto tadikaka edia kudouna ia hamoalea. Paulo ese kongrigeisen ma haida be edia gaukara namona dainai ia hanamodia danu. (Roma 1:8; Fili. 1:3-5; 1 Tes. 1:8) Paulo be Roma kongrigeisen ia torea henia bona Peresi ia herevalaia, ia gwau: “Lohiabada totona ia be gaukara momo ia karaia.” (Roma 16:12) Peresi be unai hereva ese ia hagoadaia bada. Paulo be ma haida ia hanamoa neganai, ia be Iehova bona Iesu ia tohotohoa unai.​—⁠Mareko 1:9-11; Ioane 1:47 duahia; Apok. 2:2, 13, 19.

9. Dahaka dainai kongrigeisen taudia ese ta ta idia hanamoa neganai, idia moale?

⁹ Elda taudia idia diba, idia ese tadikaka taihu dekenai hanamoa hereva idia gwauraia be mai anina bada. (Aon. 3:27; 15:23) Elda ta ese iena tadikaka ia hanamodia neganai, ia hahedinaraia idia ia laloa bada bona edia gaukara namodia ia moalelaia. Kongrigeisen tadikaka taihu ese elda amo hagoadaia herevadia idia abia be namo. Taihu ta, ena mauri lagani be 50 bamona, ia gwau, iena moni gaukara gabunai ia karaia gaukara dainai ena bosi amo hanamoa hereva ta ia abia lasi. Unuseniai gaukara taudia be ma haida idia laloa lasi bona idia kara helulu. Unai dainai, kongrigeisen totona gau ta ia karaia bona elda ta ese ia hanamoa neganai, ia moale. Ia gwau: “Lau mamia egu guba Tamana ese lau ia lalokau henia.” Adavana lasi tadikaka ta mai ena natuna rua be unai bamona ia mamia danu. Vanegai, tadikaka ena gaukara namodia dainai elda ta ese ia hanamoa. Unai elda ena hanamoa herevana ese tadikaka ia durua, ena hesiai gaukara ia goadalaia noho totona. Ia hahedinaraia bema elda ta ese tadikaka bona taihu ia hanamodia, unai ese idia ia durua mai moale ida Dirava idia hesiai noho bona idia hesiku lasi.​—⁠Isa. 40:31.

10, 11. (a) Edena dala ai elda taudia ese Nehemia idia tohotohoa diba? (b) Elda ta be ena tadikaka taihu ia vadivadi henia neganai, edena dala ai edia abidadama ia hagoadaia diba?

¹⁰ Edena dala ma ta ai elda ese edia tadikaka idia lalokau henia, bona idia durua mai moale ida Dirava idia hesiai henia totona? Idia ese heduru idia tahua taudia idia durua haraga. (Kara 20:28 duahia.) Unai dala amo idia be Baibel negadiai idia noho abidadama hesiai taudia idia tohotohoa. Hegeregere, Nehemia ia itaia ena tadikaka idia lalomanoka neganai, karaharaga gau ta ia karaia idia ia hagoadaia totona.  (Neh. 4:14) Hari danu, elda taudia be unai bamona idia karaia. Idia gaukara goada, idia lalomanoka tadikaka taihu idia hagoadaia totona. Tadikaka dekenai “Dirava amo ia mai harihari gauna,” o hagoadaia herevana idia gwauraia totona, tadikaka be edia ruma ai idia vadivadi henia. (Roma 1:11) Edena dala ai elda ese unai idia karaia diba?

¹¹ Namona be elda ese do ia vadivadi henia tauna ena hekwakwanai ia laloa namonamo guna. Hegeregere, namona be sibona ia nanadaia: ‘Unai tadikaka o taihu ena hekwakwanai be dahaka? Dahaka hereva do lau gwauraia ia lau hagoadaia totona? Edena siri o Baibel sivaraina ta amo ia lau hagoadaia diba?’ Bema elda ese unai gaudia ia laloa guna, ia vadivadi neganai, ena hereva amo tadikaka o taihu do ia durua bada. Danu, namona be tadikaka taihu dekenai nega ia henia idia hereva totona, bona edia hereva do ia kamonai namonamo. (Iam. 1:19) Taihu ta ia gwau: “Bema elda ta be mai ena lalona ibounai ida ma haida edia hereva ia kamonai namonamo, unai ese idia do ia durua bada.”​—⁠Luka 8:18.

12. Kongrigeisen lalonai daidia ese heduru idia abia be namo, bona dahaka dainai?

¹² Daidia be elda amo heduru idia abia be namo? Paulo ese elda taudia ia hamaoroa “mamoe oreana ibounai” idia naria totona. Kongrigeisen taudia ibounai ese heduru idia abia be namo, herevana ta be lagani momo lalonai ia painia eiava Iehova ena orea lalonai ia noho. Dahaka dainai elda taudia amo heduru idia abia be namo? Badina ena be edia abidadama ia goada, to inai tanobada dikana ena hekwakwanai dainai, nega haida idia mamia idia be hegeregere lasi edia hekwakwanai idia haheaukalaia totona. Unai bamona tadikaka taihu ese heduru idia abia be namo. King Davida dekenai ia vara gauna ta ese unai ia hamomokania.

13. (a) Edena negai Isibibenopa ia ura Davida ia alaia? (b) Edena dala ai Abisai be nega maorona ai Davida ia durua?

¹³ Davida be Samuela ese ia horoa murinai, Repaima tauna, Goliata ia tuari henia.  Davida be ia gari lasi bona Goliata ia hamasea. (1 Sam. 17:4, 48-51; 1 Siv. 20:5, 8) Lagani momo murinai, Israela taudia be Pilistia taudia idia tuari henia neganai, Davida be tau badana ma ta ia tuari henia. Iena ladana be Isibibenopa bona ia danu be Repaima tauna ta. (2 Sam. 21:16) Unai nega ai, Isibibenopa ese kahirakahira Davida ia hamasea. Davida ia gari dainai, a? Lasi. To Baibel ia gwau, “Davida be ia manoka.” Isibibenopa ia itaia Davida be ia manoka neganai, “Davida alaia totona ia mai kahirakahira.” To “Abisai Seruia be Davida durua totona ia mai, ia ese Pilistia tauna ia heatu henia, bona ia alaia mase.” (2 Sam. 21:15-17) Oibe, Davida be kahirakahira ia mase! To ia moale badina Abisai ese ia gimaia, bona kahirakahira dika ia davaria neganai, Abisai ese ia hamauria. Unai sivarai amo dahaka ita dibaia?

14. (a) Dahaka ese ita ia durua Goliata bamona hekwakwanai badadia ita haheaukalaia totona? (b) Edena dala ai elda ese ma haida idia durua, idia moale bona gini goada noho totona? Haheitalai ta gwauraia.

¹⁴ Tanobada hegegemadai Iehova ena taunimanima be ia idia hesiai henia noho, ena be Satani bona ma haida amo hahetoho momo idia davaria. Ita haida danu be Goliata bamona hekwakwanai badadia ita davaria. To, Davida be mai goada ida Goliata ia hamasea hegeregerena, ita danu be Iehova dekenai ita tabekau bona mai abidadama ida eda hekwakwanai ita haheaukalaidia be namo. To, nega haida ita mamia iseda goada be hegeregere lasi, Satani ena tanobada dikana ita tuari henia totona. Unai bamona negadiai, ita lalomanoka haraga dainai eda hekwakwanai ita haheaukalaidia be auka. To, reana elda ta ia itaia ita lalomanoka dainai, nega maorona ai ita ia durua. Unai murinai, ita mamia ita be mai moale ida Dirava ita hesiai henia noho diba. Ita momo be unai dala ai heduru ita abia. Painia taihu ta ena mauri lagani be 65 bamona, ia gwau: “Hua haida gunanai egu hemami ia namo lasi bona haroro gaukara lau karaia murinai, egu tauanina ia hesiku. Elda ta be unai ia itaia dainai, lau dekenai ia mai bona Baibel siri namodia haida amo lau ia hagoadaia. Ia gwauraia gaudia lau badinaia bona lau idia durua bada.” Ma ia gwau: “Lau moale badina unai elda ese egu lalohekwarahi ia itaia bona lau ia durua!” Ita moale badina elda taudia ese ita idia laloa bada, bona nega ibounai idia noho hegaegae ita idia durua totona, Abisai ese Davida ia durua bamona.

15, 16. (a) Dahaka dainai tadikaka taihu ese Paulo idia ura henia? (b) Dahaka dainai ita ese elda taudia ita ura henia?

¹⁵ Elda taudia be idia hekwarahi bada. Nega haida tadikaka taihu idia laloa momo dainai, idia mahuta namonamo lasi bona hanuaboi momokani idia noga idia guriguri, o idia durudia totona. (2 Kor. 11:27, 28) To Paulo bamona, elda idia moale edia maduna idauidau idia huaia totona. Paulo be Korinto taudia dekenai ia gwau: “Lau be mai moale ida umui totona gau ibounai do lau henia bona lau sibona do lau henia momokani.” (2 Kor. 12:15) Paulo be ena tadikaka ia lalokau henidia dainai, sibona ia “henia momokani” o ena goada ibounai ia gaukaralaia idia ia hagoadaia totona. (2 Korinto 2:4 duahia; Fili. 2:17; 1 Tes. 2:8) Unai dainai, tadikaka ese Paulo idia ura henia bada!​—⁠Kara 20:31-38.

¹⁶ Ita danu be eda elda taudia ita ura henia, bona Iehova ita tanikiu henia be namo, badina idia ia gaukaralaia ita idia naria totona. Ita moale badina idia be ita ta ta idia laloa bada, bona ita idia vadivadi henia ita idia hagoadaia totona. Ita moale badina iseda hekwakwanai ita haheaukalaia be auka neganai, elda taudia be hanaihanai idia noho hegaegae ita idia durua totona. Oibe, unai bamona elda be ‘eda moale totona ita ida idia gaukara hebou.’