“RUMA-TA-RUMA-TA haroro gaukara do lau karaia diba lasi!” Stadi matamata momo be unai bamona idia hereva. To, ataiai ia noho herevana be pilgrim tadikaka ta ese ia gwauraia. Pilgrim tadikaka be tok idia henia bona Baibel idia hadibaia namonamo taudia.

Zion’s Watch Tower magasin idia duahia taudia momo be edia tomadiho idia rakatania, badina idia ura Baibel ena hereva momokani idia tahua taudia idia bamoa. Unai magasin ese ena duahia taudia ia hagoadaia hereva momokani idia ura henia taudia ma haida do idia tahua, bona idia ida Baibel idia stadilaia. Grup maragidia haida be heduru totona idia noinoi, bona lagani 1894 ai Watch Tower Society ese loaloa taudia ia siaia matamaia unai grup idia vadivadi totona. Gabeai edia ladana idia gwauraia Pilgrim taudia. Unai loaloa tadikaka be gaukara goada taudia bona idia abidia hidi badina idia manau, Baibel idia diba namonamo, tok namodia idia henia, hahediba taudia namodia bona Iesu ena mauri davalaia boubouna idia abidadama henia. Edia vadivadi be dina tamona o rua lalonai idia karaia. Bible Student momo be nega ginigunana haroro gaukara idia karaia neganai, loaloa tadikaka ta ena tok totona boiboi pepadia idia hariharilaia. Hugo Riemer, gabeai Hakaua Oreana ena memba ta ai ia lao, be adorahi ta ai tok ia henia murinai, kamonai taudia edia henanadai ia haerelaidia ela bona daba kahana. Ia gwau, ena be ia hesiku bada to unai hebou ia moalelaia.

Zion’s Watch Tower ese ia hahedinaraia loaloa tadikaka edia gaukara ena badina badana be, tadikaka taihu edia abidadama do idia hagoadaia. Unai idia karaia totona, kamonai taudia edia ruma dekenai idia hebou bona idia hagoadadia. Kahirakahira idia noho Bible Student taudia be loaloa tadikaka ena tok kamonai totona idia mai, bena tadikaka ese edia henanadai ia haerelaidia. Unai murinai idia ese Keristani heabidae karana idia moalelaia. Taihu Maude Abbott be kekeni neganai, daba ta unai hebou ta dekenai ia lao. Hebou murinai ibounai be aniani teibolo latana ta badinai idia haboua. Taihu ia gwau: “Aniani namodia momo herea idia mailaia hegeregere, hem, kokoroku, paraoa idauidau, pai bona keke! Ai ibounai be aniani bada herea ai ania dainai, 2 o’klok ai ai hebou lou neganai, emai matana ia mahuta.” Idaunegai loaloa gaukara ia karaia tadikaka Benjamin Barton, ia gwau: ‘Bema lau be idia henia aniani namodia ibounai lau ania, reana lau mase vadaeni!’ Brooklyn hedikwota amo revareva ta ese taihu ibounai ia hadibaia, namona be loaloa tadikaka totona aniani momo do idia nadua lasi. Bona hanuaboi ai ia mahuta haraga be namo, unai amo do ia goada dina ma ta ena gaukara ia karaia totona.

Loaloa tadikaka be hahediba taudia namodia. Bona edia tok henia dalana idia hanamoa totona, gau idauidau, hegeregere laulau idia gaukaralaia. Tadikaka R. H. Barber ena tok be kamonai taudia edia lalona ia veria dalanai ia henia. Tadikaka W. J. Thorn be tama ta bamona ena tok ia henia. Dina ta tadikaka Shield Toutjian be motuka ai idia heau lao lalonai, draiva ia hamaoroa motuka ia hastopua totona. Ia diho bona dala badinai idia tubu flaoaflaoa haida ia abia, bena motuka ai idia noho taudia dekenai Iehova ese ia havaraia gaudia ia herevalaia.

 Loaloa gaukara be auka bona edia mauri lagani be 40 ia hanaia taudia idia hekwarahi. To, loaloa gaukara ena badina idia haidaua neganai, haida ese unai idia badinaia be auka. Hari idia ese ruma-ta-ruma-ta haroro gaukarana do idia gunalaia. Watch Tower, March 15, 1924 ia gwau, Keristani korikoridia edia “gaukara badana ta be basileia do idia harorolaia. Loaloa tadikaka idia siaia ena badina be unai.”

Loaloa tadikaka haida be unai dala matamatana idia ura henia lasi dainai, edia gaukara idia rakatania, bona haida be sibona edia orea maragidia idia hamatamaia. Tadikaka Robie D. Adkins ia laloatao, tok namodia ia henia loaloa tadikaka ta be mai badu ida ia gwau: “Lau be platfom amo tok henia karana sibona lau manadalaia. Ruma-ta-ruma-ta haroro gaukara do lau karaia diba lasi!” Tadikaka Adkins ma ia gwau: “Lagani 1924 ai Columbus, Ohio ena hebouhebou dekenai unai tadikaka lau itaia. Tadikaka taihu tausen momo be idia moale, to ia sibona be au maragina ta henunai ia gini bona ia moale lasi. Unai murinai ia lau itaia lou lasi. Gabeai orea ia rakatania.” To, “tadikaka momo be mai moale ida edia motuka dekenai buka idia abia lao.” Unai ese ia hahedinaraia, idia ura dikadika ruma-ta-ruma-ta haroro gaukarana idia karaia.​—⁠Kara 20:20, 21.

Ena be loaloa tadikaka momo be reana ruma-ta-ruma-ta haroro gaukara totona idia gari, to mai edia lalona ibounai ida idia karaia. German gado ia diba loaloa tadikaka ta, Maxwell G. Friend be ruma-ta-ruma-ta haroro gaukara ia herevalaia neganai, ia gwau: “Loaloa tadikaka ena gaukara lalonai, unai ese hahenamo momo ia mailaia.” Loaloa tadikaka ta John A. Bohnet ia gwau, tadikaka momo be mai moale ida Basileia harorolaia gaukarana idia abia dae, bona “idia ura dikadika haroro gaukara idia karaia.”

Lagani momo lalodiai loaloa tadikaka ese tadikaka taihu idia hagoadaia bada. Nega daudau orea lalonai ia noho tadikaka Norman Larson ia gwau: “Lau maragi neganai, lau itaia loaloa tadikaka be gaukara namona idia karaia. Idia ese lau idia hadibaia dala maorona lau badinaia totona.” Unai nega amo ema bona hari, sibona edia ura idia dadaraia loaloa naria tadikaka be ma haida idia durua noho. Unai dainai tadikaka taihu momo idia gwau: “Ruma-ta-ruma-ta haroro gaukara ai karaia diba!”

[Blurb on page 32]

Loaloa tadikaka ia mai be moale negana!

[Picture on page 31]

Lagani 1905 ai, loaloa tadikaka Benjamin Barton be gabu 170 ia vadivadi

[Picture on page 32]

Loaloa tadikaka Walter J. Thorn ena kara be tama ta bamona dainai, idia boiria Papa

[Picture on page 32]

Lagani 1902 ai, loaloa tadikaka J. A. Browne idia siaia Jamaica ai grup maragidia 14 ia hagoadaia totona

[Picture on page 32]

Loaloa tadikaka ese tadikaka taihu edia abidadama bona lalotamona karana idia hagoadaia, bona idia durudia orea ida do idia gaukara hebou