‘Natuna Ia Ura Tamana Ia Hahedinaraia’

“Ta ese Tamana ia diba lasi to Natuna sibona, bona Natuna ia ura tauna sibona dekenai ia do ia hahedinaraia.”​—⁠LUKA 10:22.

EMU HAERE BE DAHAKA?

Dahaka dainai Iesu sibona ese Tamana ia hahedinaraia diba?

Edena dala ai Iesu ese ma haida dekenai ena Tamana ia hahedinaraia?

Edena dala ai Iesu bamona ma haida dekenai emu guba Tamana oi hahedinaraia diba?

1, 2. Edena henanadai be momo ese idia haerelaia diba lasi, bona dahaka dainai?

‘DIRAVA be daika?’ Momo ese unai henanadai idia haerelaia be auka. Hegeregere, sibona idia gwauraia Keristani taudia momo be Toi Tamona hahediba herevana idia abia dae. To momo idia gwau unai hahediba herevana idia lalopararalaia lasi. Buka ta ia torea pris tauna ta ia gwau: “Toi Tamona hahediba herevana ena anina be ta ese ia gwauraia hedinarai diba lasi.” Ma haida be evolusen lalohadaina idia abia dae dainai, idia gwau Dirava ia noho lasi bona gau ibounai be sibona idia vara kava. Charles Darwin ia abia dae Dirava ia noho, to ia gwau “taunimanima be Dirava ia noho lalohadaina idia abia dae be auka.”

² Herevana edena dubu idia lao, to taunimanima momo idia daradara, ‘Dirava ia noho eiava?’ Dirava idia ura dibaia taudia be mai edia henanadai momo, to haere namodia idia davaria lasi dainai idia hesiku. Satani ese “unai taudia edia lalona ia hadiburaia.” (2 Kor. 4:4) Unai dainai momo be Dirava, iseda Tamana bona Havaraia Tauna idia diba namonamo lasi!​—⁠Isa. 45:18.

3. (a) Daika ese ita dekenai Tamana ia hahedinaraia? (b) Edena henanadai edia haere do ita tahua?

³ Taunimanima ese Dirava momokanina idia diba be mai anina bada. Dahaka dainai? Badina “Iehova ena ladana dekenai idia boiboi taudia” sibona be hahemauri do idia abia. (Roma 10:13) Dirava ena ladana dekenai ita boiboi totona, namona be ita diba Dirava be daika bona ia be edena bamona Tauna. Unai mai anina bada herevadia be Iesu ese ena hahediba taudia dekenai ia hadibaia, unai amo ena Tamana be idia dekenai ia hahedinaraia. (Luka 10: 22 duahia.)  Inai stadi ai inai henanadai toi edia haere do ita tahua: (1) Dahaka dainai Iesu sibona ese Tamana ia hahedinaraia goevagoeva diba? (2) Edena dala ai unai ia karaia? (3) Edena dala ai Iesu ita tohotohoa diba?

IESU SIBONA ESE TAMANA IA HAHEDINARAIA

4, 5. Dahaka dainai Iesu sibona ese Tamana ia hahedinaraia diba?

⁴ Iesu sibona ese Tamana be ma haida dekenai ia hahedinaraia diba. Dahaka dainai? Badina mauri gaudia ibounai idia do vara lasi neganai, Iesu be guba ai ia noho. Ia be “Dirava sibona ese ia havaraia natuna tamona.” (Ioa. 1:14, futnout; 3:18) Guba bona tanobada gaudia idia do vara lasi neganai, Iesu sibona be Tamana ida ia noho bona Tamana ese gaukara ibounai ia hadibaia. Ia be lagani tausen momo lalodiai ena Tamana ida ia herevahereva dainai, Tamana ena kara namodia ia diba goevagoeva. Unai dainai idia be tura namodia ai idia lao bona ta ta idia lalokau henia. (Ioa. 5:20; 14:31) Momokani, Iesu be Tamana ena kara ibounai ia diba!​—⁠Kolose 1:15-17 duahia.

⁵ Tamana ese Natuna be ena gwaukau tauna ai ia halaoa, bona “idia gwauraia Dirava ena Hereva.” (Apok. 19:13) Unai dainai, Iesu sibona ese Tamana be ma haida dekenai ia hahedinaraia diba. Oibe, Ioane ia gwau Iesu be “Hereva” bona “Tamana ena kemena kahirakahira ia noho.” (Ioa. 1:1, 18, futnout.) Ioane be unai ia gwauraia neganai, ia be vaia aniani neganai idia karaia karana ta ia laloa. Aniani negadiai vadivadi taudia be ta ta kahirakahira idia helai, unai amo idia herevahereva diba. Unai hegeregerena, Natuna be “Tamana ena kemena kahirakahira ia noho” bona idia herevahereva hebou.

6, 7. Edena dala ai Iehova bona Iesu edia hetura karana ia goada?

⁶ “Dina ibounai Dirava be [Natuna] dekenai ia moale,” bona edia hetura karana be ia goada ia lao. (Aonega Herevadia 8:22, 23, 30, 31 duahia.) Idia gaukara hebou neganai Iesu be Tamana ena kara ia itaia bona tohotohoa. Aneru bona taunimanima idia havaraia neganai, Iehova ese idia ta ta ia kara henia dalana ia itaia, unai amo Tamana ena lalokau bona hemataurai karana ia dibaia.

⁷ Satani ese Iehova ena lohia siahuna ia dadaraia neganai, Iesu be Tamana ena lalokau, hahemaoro goeva, aonega bona siahu ia hahedinaraia dalana ia itaia. Unai ese Iesu ia durua haroro gaukara ai do ia davaria hahetoho ia haheaukalaia totona.​—⁠Ioa. 5:19.

8. Dahaka dainai Iesu ena sivarai ese ita ia durua Tamana ena kara ita dibaia totona?

⁸ Iesu be Iehova ia tura henia namonamo dainai, ia sibona ese Tamana ena kara ibounai ia herevalaia goevagoeva diba. Iehova ita diba totona, ia havaraia Natuna tamona ena hahediba herevadia bona kara ita diba be namo. Hegeregere, bema inai hereva “lalokau” be diksenari ta dekenai ita duahia sibona, ena anina korikori do ita lalopararalaia lasi. To, Baibel lalonai Iesu ese taunimanima ia kara henia dalana ita duahia neganai, inai hereva “Dirava be lalokau” ita lalopararalaia. (1 Ioa. 4:8, 16) Iesu be ena hahediba taudia dekenai Dirava ena lalokau bona kara badadia ma haida ia hahedinaraia danu.

IESU ESE TAMANA IA HAHEDINARAIA DALANA

9. (a) Edena dala rua ai Iesu ese ena hahediba taudia dekenai Tamana ia hahedinaraia? (b) Iesu be dahaka haheitalai ia gaukaralaia?

⁹ Edena dala ai Iesu be ena hahediba taudia bona gabeai ena murinai idia  raka taudia dekenai ena Tamana ia hahedinaraia? Dala rua ai unai ia karaia: (1) Ena hahediba herevadia bona (2) ena kara amo. Mani Iesu ena hahediba herevadia ita laloa guna. Iena murinai idia raka taudia dekenai ia hadibaia gaudia ese Tamana ena kara, lalohadai, bona hemami ia hahedinaraia. Hegeregere, Iesu ia gwau Tamana be mamoe naria tauna ta bamona, bona ena mamoe ta ta ia lalodia bada. Unai dainai, mamoe ta ia boio neganai, mamoe serina ia rakatania bona ia lao ia boio mamoe ia tahua totona. Iesu ia gwau: “Bema ia davaria, . . . do ia moale bada, to idia boio lasi mamoe 99 dekenai ena moale be do ia maragi.” Dahaka dainai unai haheitalai ia gaukaralaia? Iesu ia gwau: “Egu Tamana guba dekenai be ia ura lasi inai ladana maragi tauna ta ia boio.” (Mat. 18:12-14) Unai haheitalai amo Iehova dekenai dahaka oi dibaia? Reana nega haida oi laloa ma haida edia matanai oi be anina lasi bona oi idia laloa bada lasi. To namona be oi laloatao, emu guba Tamana be emu hemami ia diba bona oi ia laloa bada.

10. Edena dala ai Iesu be Tamana ena kara ia hahedinaraia?

¹⁰ Iesu ese Tamana ia hahedinaraia dalana ma ta be ena kara amo. Aposetolo Filipi ese Iesu ia hamaoroa: “Ai dekenai Tamana oi hahedinaraia.” Iesu ia gwau: “Lau ia itaia tauna be Tamana danu ia itaia vadaeni.” (Ioa. 14:8, 9) Iesu ese Tamana ena kara ia hahedinaraia ena sivarai haida be inai: “Lepera gorere dikana ia abia tauna ta” be Iesu ia noia do ia hanamoa neganai, Iesu ese ia dogoatao bona ia hamaoroa: “Lau ura, harihari oi goeva.” (Luka 5:12, 13) Danu, Lasaro ia mase neganai, Iesu “ena lalona ia hisihisi bada bona ia lalohekwarahi” dainai “ena mata ranu ia diho.” Unai nega ai, ena hahediba taudia ese Tamana ena hebogahisi karana idia itaia. Ena be Iesu ia diba Lasaro do ia hatorea isi lou, to Lasaro ena famili bona turadia ese idia mamia lalohisihisi ia mamia danu. (Ioa. 11:32-35, 40-43) Reana oi be Iesu ena sivarai ta oi ura henia, badina unai sivarai amo Iehova ena hebogahisi karana oi dibaia.

11. (a) Iesu ese dubu helaga ia hagoevaia sivaraina amo dahaka ia hahedinaraia? (b) Dahaka dainai unai ese ita ia hagoadaia?

¹¹ Iesu ese dubu helaga ia hagoevaia sivaraina oi duahia neganai, dahaka oi dibaia? Ia vara gauna mani oi laloa: Iesu be varo amo kwadia gauna ta ia karaia bona mamoe bona boromakau idia hoihoilaia taudia be dubu helaga amo ia luludia. Bona moni senisia taudia edia koini ia bubudia bona edia pata ia girodia. (Ioa. 2:13-17) Iena kara dainai hahediba taudia be King Davida ena hereva idia laloa, ia gwau: “Oiemu Dubu Helaga lau ura henia dikadika, bona inai  ura ese lahi bamona lau ia gabua noho.” (Sal. 69:9) Iesu ena kara amo ia hahedinaraia, ia ura bada tomadiho momokani ia gimaia, bona unai amo Iehova ena kara ia hahedinaraia. Oibe, Iehova be tanobada ai idia vara dika ia itaia neganai, ia lalohisihisi! Bona ia be mai ena siahu unai dika ia kokia totona, bona ia ura bada unai do ia karaia. Unai dainai ma haida ese ita idia hahisia neganai, Iehova bona Iesu edia hemami ita diba dainai unai ese ita ia hagoadaia.

12, 13. Iesu ese ena hahediba taudia ia kara henia dalana amo dahaka oi dibaia?

¹² Iesu ese ena hahediba taudia ia kara henia dalana amo ena Tamana ena kara ia hahedinaraia. Nega momo iena hahediba taudia be edia huanai daika be bada idia hepapahuahulaia. (Mar. 9:33-35; 10:43; Luka 9:46) Iesu be lagani tausen momo Tamana ida ia noho, bona ia diba ia be hekokoroku karana ia inai henia. (2 Sam. 22:28; Sal. 138:6) Danu, ia diba Satani be hekokoroku tauna, bona sibona ena namo ia laloa bada. Unai dainai, ena murinai idia raka taudia haida be hekokoroku karana idia hahedinaraia neganai, Iesu ia lalohisihisi. Idia be sibona edia namo idia laloa bada! Aposetolo taudia danu be unai kara idia hahedinaraia ela bona Iesu ena hanuaboi ginigabena! (Luka 22:24-27) To, Iesu be mai manau ida idia ia sisiba henia. Ia durudia totona ia hesiku haraga lasi, badina ia diba gabeai iena manau karana do idia tohotohoa.​—⁠Fili. 2:5-8.

¹³ Iesu be Iehova ese ia hadibaia namonamo dainai, mai manau ida edia lalohadai kererena ia hamaoromaoroa. Ena kara bona hereva amo Tamana ia hahedinaraia. Iehova be ena taunimanima ia rakatania lasi, ena be idia kerere loulou. Iehova ena kara ita diba dainai, unai ese ita ia durua ita helalo-kerehai bona ia ita noia eda dika ia gwauatao totona.

NATUNA IA URA TAMANA IA HAHEDINARAIA

14. Edena bamona ita diba Iesu ia ura ma haida dekenai ena Tamana ia hahedinaraia?

¹⁴ Lohia taudia momo idia ura taunimanima idia biagua auka dainai, gau haida be idia dekenai idia hadibaia lasi. To, Iesu be unai bamona lasi. Taunimanima dekenai gau momo ia hadibaia badina ia ura ia durudia ena Tamana idia diba totona. (Mataio 11:27 duahia.) Danu, Iesu ese ena hahediba taudia dekenai “laloparara ia henia, Dirava momokanina [idia] dibaia totona.” (1 Ioa. 5:20) Unai ena anina be dahaka? Iesu ese ena murinai idia raka taudia ia durua ena Tamana idia dibaia totona. To, ia be taunimanima ese idia lalopararalaia lasi, Toi Tamona hahediba herevana ia hadibaia lasi.

15. Dahaka dainai Iesu be ena hahediba taudia dekenai gau ibounai ia hahedinaraia lasi?

¹⁵ To, Iesu ese gau ibounai ia hahedinaraia, a? Lasi. (Ioane 16:12 duahia.) Dahaka dainai? Badina ia diba unai nega ai ia gwauraia gaudia ibounai do idia “lalopararalaia lasi.” To, Iesu ia gwau “durua tauna” ia ginidae neganai, idia dekenai gau momo do ia hahedinaraia. Unai durua tauna be lauma helaga, bona “hereva momokani ibounai dekenai [idia] do ia hakaua lao.” (Ioa. 16:7, 13) Tama sina be edia natudia dekenai gau ibounai idia hadibaia lasi, to idia naria ela bona idia bada bona idia laloparara diba. Unai hegeregerena, Iesu ia naria ela bona ena hahediba taudia be Iehova ena kara ma haida idia lalopararalaia diba. Unai bamona ia karaia badina ia diba edia laloparara be mai ena hetoana.

 IESU BAMONA HAIDA DURUA IEHOVA IDIA DIBA TOTONA

16, 17. Dahaka dainai ma haida dekenai emu guba Tamana oi hahedinaraia diba?

¹⁶ Bema emu turana ena kara namodia oi diba, do oi ura ma haida dekenai ena kara oi herevalaia, ani? Iesu be tanobada ai ia noho neganai ena Tamana ia herevalaia. (Ioa. 17:25, 26) Ita danu be ma haida dekenai Iehova ita hahedinaraia diba, a?

¹⁷ Ita dibaia gauna be, Iesu sibona be Tamana ia diba goevagoeva. To ia ura ia dibaia gaudia haida be ma haida dekenai ia hahedinaraia. Bona ena hahediba taudia dekenai aonega ia henia ena Tamana ena kara idia lalopararalaia totona. Hari inai negai taunimanima momo be Dirava idia diba lasi, to ita be eda guba Tamana ita diba namonamo badina Iesu ese ita ia hadibaia. Ita moale badina Iesu be ena kara bona hahediba herevadia amo ita dekenai ena Tamana ia hahedinaraia! Iehova ita diba be hahenamo badana. (Ier. 9:24; 1 Kor. 1:31) Ia ita tura henia totona ita hekwarahi, bona hari ia be iseda turana namona bona ita kahirakahira ia noho. (Iam. 4:8) Unai dainai ma haida dekenai Iehova ita hahedinaraia diba. To, edena dala ai unai ita karaia diba?

18, 19. Edena dala amo ma haida dekenai eda guba Tamana ita hahedinaraia diba?

¹⁸ Namona be eda hereva bona kara amo Iesu ita tohotohoa bona ma haida dekenai eda guba Tamana ita hahedinaraia. Laloatao, haroro ai ita davaria taudia momo be Dirava idia diba lasi. Reana Dirava dekenai lalohadai kererena idia abia, badina hahediba hereva koikoidia idia abia dae. Baibel amo Dirava ena ladana, ena ura, bona ena kara be idia dekenai ita hadibaia diba. Danu, guna Dirava ena kara haida ita lalopararalaia lasi, to Baibel ena sivarai haida ese ita idia durua ita laloparara totona. Namona be ita dibaia gaudia be tadikaka taihu ida ita herevalaia, unai amo idia danu be goada do idia abia.

¹⁹ Iesu hegeregerena, namona be eda kara amo Iehova ita hahedinaraia. Iseda kara amo Iesu ena lalokau ita hahedinaraia neganai, taunimanima edia lalona ita veria diba, Iesu bona ena Tamana idia tura henia totona. (Efe. 5:1, 2) Aposetolo Paulo ia gwau: “Namona be lau umui tohotohoa, lau ese Keriso lau tohotohoa bamona.” (1 Kor. 11:1) Ita moale badina iseda kara amo ma haida ita durua Iehova idia dibaia totona! Iesu bamona, namona be ita gaukara goada ma haida dekenai eda guba Tamana ita hahedinaraia totona.

[Study Questions]