“Taunimanima be idia naria noho dainai, edia lalona ai Ioane be inai bamona idia laloa, ‘Reana ia be Mesia?’”​—LUKA 3:​15, THE EMPHATIC DIAGLOTT.

1. Aneru ese mamoe naria taudia dekenai dahaka moale sivaraina ia gwauraia?

 IA HANUABOI vadaeni bona Iuda taudia haida be murimuri ai edia mamoe idia naria. Bena Iehova ena aneru ta be mai diari bada ida ia hedinarai! Idia gari to aneru ese moale sivarai ta ia gwauraia: “Umui gari lasi, badina lau mai, umui dekenai taunimanima ibounai ese do idia moalelaia bada sivarai namona lau gwauraia totona, badina hari dina . . . umui do ia hamauria tauna, Keriso Lohiabada be ia vara.” Aneru ese ia gwauraia beibi be Keriso o Mesia ai do ia lao. Ia gwau unai beibi be Davida ena taoni ai, animal idia ubua gabuna ta dekenai do idia davaria. Bena aneru momo idia hedinarai bona ane amo Iehova idia hanamoa: “Atai momokani Diravana hanamoa, bona tanobada ai ia lalonamo henia taudia ese maino do idia abia.”​—Luka 2:​8-14.

2. “Mesia” ena anina be dahaka? Taunimanima be edena dala ai do idia diba unai beibi be Mesia ai do ia lao?

² Unai mamoe naria taudia be Iuda taudia bona idia diba Mesia o “Keriso” be Dirava ese ia Horoa Tauna. (Eso. 29:​5-7, BHğ) To, edena dala ai unai mamoe naria taudia bona ma haida be do idia diba Iehova ese unai beibi be Mesia ai do halaoa? Gau ginigunana be Toretore Helagadia ai Mesia ena peroveta herevadia idia stadilaia bona do idia tahua bema unai peroveta herevadia be unai beibi dekenai do idia guguru.

Dahaka Dainai Mesia Idia Naria?

3, 4. Daniela 9:​24, 25 ena peroveta herevana be edena dala ai ia guguru?

³ Lagani momo murinai, Ioane Bapatiso be iena haroro gaukara ia hamatamaia. Bona, ena hereva bona kara dainai, taunimanima haida idia laloa ia be Mesia. (Luka 3:15 duahia.) To, Baibel lalonai peroveta herevana ta ese taunimanima ia durua, Mesia do ia hedinarai negana idia diba totona. Unai peroveta herevana ia gwau: “Lagani 490 be nega Dirava ese ia maka karaia . . . Ierusalema haginia lou herevana idia gwauraia ela bona Mesia ia ginidae be lagani ibounai 483 be do idia ore.”​—Dan. 9:​24, 25.

 ⁴ Hari, Iehova ena hesiai taudia idia diba Daniela 9:25 ese ia herevalaia lagani 483 be lagani 455 B.C.E. ai ia matamaia. Unai lagani ai Parasa ena King Aratasaseta ese Nehemia dekenai gwaumaoro ia henia, Ierusalema do idia hanamoa bona haginia lou totona. (Neh. 2:​1-8) Lagani ibounai 483 be lagani 29 C.E. ai ia ore. Unai lagani ai Nasareta tauna Iesu be bapatiso ia abia, lauma helaga ese ia horoa bona Mesia ai ia lao.​—Mat. 3:​13-17. a

5. Inai stadi lalonai edena peroveta herevadia do ita stadilaia?

⁵ Baibel lalonai Mesia idia perovetalaia herevadia be momo. Inai stadi lalonai Mesia ena vara, ena maragi negana, bona haroro gaukara idia perovetalaia herevadia do ita stadilaia. Bona do ita itaia edena dala ai unai peroveta herevadia be Iesu dekenai idia guguru. Unai ese iseda abidadama Baibel dekenai do ia hagoadaia bona do ia hamomokania Iesu be Mesia.

Iesu Ena Vara

6. Edena dala ai Genese 49:10 ena hereva ia guguru?

⁶ Iuda iduhuna amo do ia vara. Iakobo be ia mase gwauraia neganai, ena natuna memerodia ia hanamoa bona Iuda dekenai ia gwau: “Kepata, lohia ena toana, be Iuda ese do ia dogoatao, bona haida ese do idia kokia lasi. Iena king siahu do ia dogoatao noho, ela bona siahu momokani ena biaguna, Silo, do ia mai. Vadaeni ia dekenai bese ibounai ese, dohore idia kamonai henia.” (Gen. 49:10) Iuda tomadiho ena hahediba taudia idia abia dae, Iakobo ese Iuda dekenai ia gwauraia herevana be Mesia dekenai do ia momokani. To, Iakobo ena hereva ena anina be dahaka? Ita diba ia be king ta ia herevalaia badina kepata be lohia taudia ese idia dogoatao bona ia hahedinaraia idia be mai edia maoro idia lohia bona oda herevadia idia henia totona. Unai dainai, unai peroveta herevana ese ia hahedinaraia Iuda besena amo king ta do ia hedinarai bona ia be mai ena maoro ia lohia totona. Iuda besena amo ia mai king ginigunana be Davida bona dokona be Sedekaia. To, Iakobo ese Sedekaia murinai do ia lohia king ma ta ia perovetalaia, ia be do ia lohia ela bona hanaihanai. Silo, ena anina be ia be “Unai Gauna Ena Biaguna.” Dirava ese Sedekaia ia hamaoroa unai king be kepata ena biaguna bona ia be mai ena maoro ia lohia totona. (Ese. 21:​26, 27) Aneru Gabriela ese Maria ia hamaoroa: “Iehova Dirava ese ia dekenai ena tamana Davida ena terona do ia henia. Ia be Iakobo ena bese do ia lohiaia ela bona hanaihanai, bona ena Basileia be do ia doko lasi.” (Luka 1:​32, 33) Iesu be Davida ena bese tauna bona Iuda iduhuna amo ia vara, bona Sedekaia murinai Iehova ese ia abia hidi unai kepata ia dogoatao totona. Unai dainai ita gwau diba Silo be Iesu Keriso.​—Mat. 1:​1-3, 6; Luka 3:​23, 31-34.

7. Edena dala ai Mika 5:2 ena hereva ia guguru?

⁷ Betelehema ai do ia vara. Peroveta tauna Mika ia gwau: “Betelehema Eparata, Iuda ena hanua ibounai edia huanai oi be maragi momokani. To oi dekena amo Lohia Badana ta do ia vara, bona ia ese Israela do ia biagua, egu ladana dekenai. Iena tubuna bona iena iduhu be gunaguna idia noho, ia mai bona hari danu.” (Mika 5:2) Unai peroveta herevana amo ita diba Mesia be Betelehema ai do ia vara. Unai be Iuda ena taoni ta, guna ena ladana be Eparata. To, Iesu ena sinana Maria, bona ena adavana Iosepa, be taoni ladana Nasareta dekenai idia noho. Iesu ena vara dinana ia kahirakahira neganai, Roma ena lohia tauna ese taunimanima ia oda henidia, edia tamadia edia hanua dekenai do idia giroa lou edia ladana idia rejista totona. Unai dainai, Iosepa bona Maria be Betelehema dekenai idia lao, bona unuseniai Maria ia mara. (Mat. 2:​1, 5, 6) Peroveta herevana hegeregerena, Iesu be Betelehema ai ia vara!

8, 9. (a) Baibel ese Mesia ena vara dalana be edena bamona ia gwauraia? (b) Mesia ia vara murinai, dahaka ia vara?

⁸ Tau ia diba lasi kekeni ta ese do ia havaraia. (Isaia 7:14 duahia.) Unai siri ai Heberu gado herevana ʽal·mahʹ idia gaukaralaia, bona ena  anina be “kekeni.” To, kekeni ta, tau ia do diba lasi idia herevalaia neganai, bethu·lahʹ idia gaukaralaia. Ita diba inai hereva ʽal·mahʹ ese tau ta ia do sihari lasi kekeni ia herevalaia danu. Hegeregere Rebeka ia do headava lasi neganai, Baibel ese unai hereva ia gaukaralaia. (Gen. 24:​16, 43) Lauma helaga ese Mataio ia hasiahua dainai ia gwau Iesu ia vara neganai, Isaia 7:14 ena hereva ia guguru. Mataio ese Grik herevana par·theʹnos ia gaukaralaia bona ena anina be rami-hebou kekenina. Evanelia buka idia torea taudia Mataio bona Luka idia gwau Maria be rami-hebou kekenina bona ia be lauma helaga ena siahu amo ia rogorogo.​—Mat. 1:​18-25; Luka 1:​26-35.

⁹ Ia vara murinai natu maragidia do idia hamasea. Lagani handred momo gunanai, Mesia ia do vara lasi neganai, unai bamona ia vara danu. Aigupito ena Farao ese oda ia henia Heberu taudia edia natu memerodia be Naila Sinavaina ai do idia negea. (Eso. 1:22) Ieremia 31:​15, 16 ena peroveta herevana ia gwau, “Rahela ese, iena natuna dainai ia taitai noho,” badina inai taudia ese iena natudia idia abia. Taunimanima ese iena taitai regena be Rama hanuana amo idia kamonai, unai be Ierusalema ena not kahana, Beniamina ena taoni dekenai. Mataio ia gwau King Heroda ese oda ia henia Betelehema ai idia noho natu memerodia ibounai do idia hamasea neganai, unai peroveta herevana ia guguru. (Mataio 2:​16-18 duahia.) Unai ia vara neganai, taunimanima idia lalohisihisi bada!

10. Hosea 11:1 ena peroveta herevana be edena dala ai ia guguru?

¹⁰ Dirava ese Aigupito amo do ia boiria. (Hos. 11:1) King Heroda amo Iesu idia hamauria totona, aneru ta ese Iosepa bona Maria ia hamaoroa Israela do idia rakatania bona Aigupito dekenai do idia lao. Unuseniai idia noho ela bona Heroda ia mase. Heroda ena mase murinai, Iosepa ese Iesu be Israela dekenai ia abia giroa. Iehova ese Hosea dekenai ia gwauraia herevana be ia momokani, ia gwau: “Aigupito amo, egu natuna mero lau boiria.” (Mat. 2:​13-15) Momokani, Iesu be sibona ia hamauria diba lasi, to iena tamana, Iehova ese unai ia karaia diba.

Haroro Gaukara Ia Hamatamaia!

11. Daika ese Mesia ena dala ia hegaegaelaia?

¹¹ Gwaukau tauna ta ese iena dala do ia hegaegaelaia. Malaki ia gwau tau ta ese taunimanima edia lalona do ia hegaegaelaia, unai amo Mesia ia ginidae neganai, ia do idia abia dae. Ia gwau unai tauna be peroveta tauna Elia bamona. (Malaki 4:​5, 6 duahia.) Iesu ia gwau unai tauna be Ioane Bapatiso. (Mat. 11:​12-14) Mareko ia gwau Ioane ese Mesia ena dala ia hegaegaelaia. Unai be Isaia ena peroveta herevana hegeregerena. (Isa. 40:3; Mar. 1:​1-4) Iesu ese Ioane ia hamaoroa lasi iena dala ia hegaegaelaia totona. To, Dirava ia ura taunimanima be Mesia do idia diba dainai, ia ese Ioane ia abia hidi, Elia bamona taunimanima edia lalona do ia hegaegaelaia.

12. Dirava ese Mesia dekenai dahaka gaukara badana ia henia?

¹² Dirava ese gaukara badana ta do ia henia. Dina ta Nasareta ena sinagoga lalonai Iesu be lokua toretorena ia kehoa bona Isaia ena hereva ia duahia. Ia gwau: “Iehova ena lauma be lau latanai ia noho, badina lau ia horoa, ogogami taudia dekenai sivarai namona do lau gwauraia, lau ia siaia idia guia taudia ruhaia sivaraina do lau harorolaia bona matakepulu taudia edia matana do lau kehoa, idia hahisia taudia do lau ruhaia, bona Iehova ena lalonamo negana do lau harorolaia.” Iesu be Mesia korikorina dainai, idia dekenai ia gwau: “Umui kamonai sirina be hari dina ia guguru.”​—Luka 4:​16-21.

13. Isaia ese Iesu ena haroro gaukara Galilea ai be edena bamona ia perovetalaia?

¹³ Idia peroveta Galilea ai ena haroro gaukara do ia hamatamaia. Isaia ese “Sebuluno,” “Napatali,” bona “Galilea tano” ia perovetalaidia. Ia gwau: “Dibura dekenai idia raka noho taudia ese, diari badana idia itaia vadaeni. Idia be dibura masemase tano dekenai idia noho, to hari  be diari ese, idia ia hadiaria noho.” (Isa. 9:​1, 2) Iesu ese ena haroro gaukara be Galilea ena taoni ladana Kaperanauma dekenai ia hamatamaia. Sebuluno bona Napatali dekenai ia haroro danu. Unai hanua taudia ia durudia hereva momokani ena diari idia itaia totona. (Mat. 4:​12-16) Oibe, Galilea ai Iesu ese Ororo Harorona ia henia, ena aposetolo taudia ia abia hidi, bona ena hoa kara ginigunana ia karaia. Danu, Galilea ai Iesu ia toreisi lou neganai, ena hahediba taudia 500 mai kahana dekenai ia hedinarai. (Mat. 5:1–7:27; 28:​16-20; Mar. 3:​13, 14; Ioa. 2:​8-11; 1 Kor. 15:6) Momokani, Isaia ena peroveta herevana hegeregerena, Iesu be “Sebuluno bona Napatali iduhu edia tano” ai ia haroro. Danu, Israela ena tano ma haida dekenai Basileia ena sivarai namona ia harorolaia.

Peroveta Herevadia ma Haida

14. Edena dala ai Salamo 78:2 ena hereva ia guguru?

¹⁴ Parabole bona haheitalai amo taunimanima do ia hadibaia. Salamo torea tauna Asapa ia gwau: “Aonega herevadia do lau gwauraia.” (Sal. 78:2) Edena dala ai ita diba unai peroveta herevana be Iesu ese ia hamomokania? Mataio ia gwau: “Parabole sibona amo idia ia hereva henia. Unai amo peroveta tauna ia gwauraia herevana ia guguru, ia gwau: ‘Lau be parabole amo do lau hereva, idaunega amo idia hunia gaudia do lau hahedinaraia.’ ” (Mat. 13:​31-35) Hegeregere, nega ta Iesu be mastadi uhena bona paraoa hatubua gauna ena haheitalai ia gaukaralaia Dirava ena Basileia ia hadibaia totona. Oibe, Iesu be haheitalai bona parabole amo taunimanima ia durua, Iehova ena kara bona hereva momokani idia lalopararalaia totona.

15. Edena dala ai Isaia 53:4 ena hereva ia guguru?

¹⁵ Taunimanima edia gorere do ia hanamoa. Isaia ia peroveta ia gwau: “Iseda hisihisi dikadia, bona iseda lalohisihisi danu, be ia ese ia huaia.” (Isa. 53:4) Petero ena ravana hahine ia gorere neganai, Iesu ese ia hanamoa. Unai murinai, taunimanima momo be Petero ena ruma dekenai idia mai bona Iesu ese edia gorere ia hanamoa. Unai ese Isaia ena peroveta herevana ia hamomokania, Mataio ia gwau: “Ia ese iseda gorere bona hisihisi ia kokia.” (Mat. 8:​14-17) Iesu be unai nega sibona ai taunimanima edia gorere ia hanamoa lasi, to Baibel ia hahedinaraia gorere taudia momo ia hanamodia danu.

16. Edena dala ai aposetolo Ioane ese Isaia 53:1 ena hereva ia hamomokania?

¹⁶ Gau namodia momo do ia karaia to taunimanima ese do idia dadaraia. (Isaia 53:1 duahia.) Aposetolo Ioane ese unai peroveta herevana ia hamomokania, ia gwau: “Ena be idia vairanai hoa karadia momo ia karaia, to ia idia abidadama henia lasi. Unai dala amo peroveta tauna Isaia ena hereva ia guguru, ia gwau: ‘Iehova e, ai kamonai gauna be daika ese ia abidadama henia? Bona Iehova ese ena siahu be daika dekenai ia hahedinaraia?’ ” (Ioa. 12:​37, 38) Oibe, lagani haida murinai danu, aposetolo Paulo ese sivarai namona ia harorolaia neganai, taunimanima haida sibona idia abia dae Iesu be Mesia.​—Roma 10:​16, 17.

17. Edena dala ai Salamo 69:4 ena hereva ia guguru?

¹⁷ Taunimanima ese do idia badu henia kava. (Sal. 69:4) Iesu ia gwau: “Bema tau ta ese ia karaia lasi gaukaradia be idia huanai lau karaia lasi, idia be idia kara dika lasi, to hari idia ese unai gaukara idia itaia, bona lau bona egu Tamana idia inai henia. To unai ia vara, edia Taravatu dekenai idia torea herevana ia guguru totona, ia gwau, ‘Lau idia badu henia kava.’ ” (Ioa. 15:​24, 25) Inai hereva “Taravatu” ese Toretore Helagadia ibounai ia herevalaia. (Ioa. 10:34; 12:34) Evanelia bukadia ai ita duahia siridia ese idia hahedinaraia, Iuda tomadiho gunalaia taudia ese Iesu idia badu henia kava. Danu, Iesu ia gwau: “Tanobada ese umui ia inai henia be anina lasi, to ia ese lau ia inai henia, badina ena kara dika lau gwauraia hedinarai.”​—Ioa. 7:7.

18. Pura vaira ena stadi ai dahaka do ita stadilaia?

¹⁸ Hahediba taudia ginigunadia be idia diba momokani Iesu be Mesia. Idia diba Heberu Toretoredia lalonai idia noho peroveta herevadia  ibounai be Iesu dekenai idia guguru. (Mat. 16:16) Inai stadi amo ita dibaia, Iesu ena maragi negana bona ena haroro gaukara idia perovetalaia herevadia ibounai be idia momokani. To, Baibel lalonai Mesia ena peroveta herevadia ma haida idia noho, bona pura vaira ai unai do ita stadilaia. Unai peroveta herevadia ita laloa dobu neganai, do ita abia dae momokani Iesu be Mesia.

[Footnote]

Edena Bamona Do Oi Haere?

• Baibel ese Iesu ena vara be edena bamona ia perovetalaia?

• Daika ese Mesia ena dala ia hegaegaelaia?

• Edena dala ai Isaia karoa 53 ena peroveta herevadia idia guguru?

[Study Questions]