NEPALI taudia edia aonega herevana ta ia gwau: “Bema ma haida oi kara namo henidia, idia ese oi do idia kara namo henia danu.” Unai hereva ena anina be taunimanima be kara namodia bona hemataurai idia hahedinaraia taudia idia ura henidia.

Momokani, matamata taudia ese hemataurai karana idia hahedinaraia neganai, unai be moale gauna! Honduras ai sekit naria tauna ta be haroro gaukara ai mauri lagani idauidau matamata taudia ia bamoa, bona ia gwau: “Lau itaia lau ia bamoa natu maragina ena hemataurai karana ese ruma tauna ena lalona ia veria ia kamonai namonamo totona.”

Iseda negai, momo be hemataurai karana idia hahedinaraia lasi, unai dainai ma haida kara henia dalana ita diba be mai anina bada. Danu, Baibel ese ita ia hadibaia ‘namona be Keriso ena sivarai namona ena dala hegeregerena, kara maorona ita karaia.’ (Fili. 1:27; 2 Tim. 3:​1-5) Unai dainai namona be iseda natudia dekenai hemataurai karana ita hadibaia. Edena dala ai idia oi hadibaia ma haida idia hereva henia namonamo sibona lasi, to idia matauraia totona? a

Haheitalai Namona Hahedinaraia

Natudia be tama sina edia kara idia itaia bona tohotohoa. Unai dainai tama sina ese natudia dekenai ma haida matauraia karana idia hadibaia neganai, idia ese hemataurai karana idia hahedinaraia guna be namo. (Deu. 6:​6, 7) Umui hereva sibona be hegeregere lasi, to emui kara amo haheitalai namodia umui hahedinaraia.

Mani Paula b ena sivarai ita laloa. Ena be ena sinana sibona ese ia naria, to ma haida matauraia karana ia manadalaia. Dahaka dainai? Ia gwau: “Emai sinana be hemataurai hahinena, unai dainai ia auka lasi iena haheitalai namona ai tohotohoa totona.” Tadikaka ta ladana Walter ese ena natuna memerodia ia hadibaia edia Witnes lasi sinana idia matauraia be namo. Ia gwau: “Egu adavana lau hereva auka henia lasi. Unai ese egu natudia ia durua edia sinana idia matauraia totona.” Ena natudia idia bada idia lao neganai, Walter be hanaihanai Baibel amo idia ia hadibaia bona Iehova ena heduru ia noia. Hari, iena natuna ta be Iehova ena Witnes taudia edia brens opesi ta dekenai ia gaukara, bona ma ta be painia gaukara ia karaia. Iena  natudia ese ia bona edia sinana idia lalokau henia bona matauraia.

Baibel ia gwau: “Dirava be maino Diravana, bona ia ese gau ibounai ia karaia namonamo.” (1 Kor. 14:33) Iehova ese ia karaia gaudia ibounai be ia karaia namonamo. Unai dainai Keristani taudia ese ia idia tohotohoa totona, edia ruma ia goeva be namo. Tama sina haida be natudia idia hadibaia sikuli idia do lao lasi neganai, edia mahuta gaudia bona dabua idia atoa namonamo, bona ruma gaukara ma haida idia karaia totona. Bema natudia idia itaia edia ruma lalona bona murimurina ia goeva, idia danu be edia daiutu do idia hagoevaia bona edia kohu do idia atoa namonamo.

Sikuli ai idia dibaia gaudia dainai emu natudia edia lalohadai be dahaka? Edia tisa ena gaukara namona dainai, idia tanikiu henia, a? Oi danu be emu natuna ena tisa oi tanikiu henia, a? Bema unai bamona oi karaia, emu natudia ese edia sikuli gaukara do idia laloa bada bona edia tisa do idia matauraia. Unai dainai emu natudia oi hadibaia hanaihanai edia tisa idia tanikiu henia be namo. Herevana ia be tisa ta, doketa ta, sitoa naria tauna, o gaukara ma ta ia karaia tauna, to edia gaukara namona dainai idia ita tanikiu henia neganai, ita hahedinaraia idia ita matauraia. (Luka 17:​15, 16) Keristani matamata taudia be edia sikuli turadia amo idia idau, badina hemataurai bona kara namodia idia hahedinaraia. Unai dainai idia ita hanamodia be namo.

Keristani kongrigeisen taudia ta ta ese hemataurai karana dekenai haheitalai namona idia hahedinaraia be namo. Danu, kongrigeisen lalonai matamata taudia be nega momo inai bamona hereva idia gaukaralaia, hegeregere “mani emu kara” o “tanikiu.” Unai ese ia hahedinaraia idia ese hemataurai karana idia laloa bada! Hebou lalonai taunimanima badadia be Iehova ena hereva idia kamonai namonamo neganai, matamata taudia ese unai kara do idia tohotohoa. Natudia be Kingdom Hall ai hemataurai karadia idia itaia neganai, unai ese idia do ia durua edia dekena taudia idia matauraia totona. Hegeregere, mauri lagani 4 merona Andrew be ena tama sina ese idia hadibaia taunimanima badadia edia vairana amo ia raka hanai neganai, namona be ia gwau “Ekskius.”

Tama sina ese edia natudia dekenai kara namodia idia hadibaia totona, dahaka gau ma haida idia karaia diba? Namona be nega idia atoa Baibel sivaraidia amo idia dibaia gaudia be edia natudia ida idia herevalaia totona.​—⁠Roma 15:⁠4.

Baibel Sivaraidia Gaukaralaia

Samuela ena mauri lagani be 3 o 4 bamona neganai, ena sinana ese dubu helaga dekenai ia abia lao. Ena sinana ese ia hadibaia Hahelaga Tauna Eli ia matauraia be namo. Reana emu gabu dekenai umui gaukaralaia hanamoa herevadia be emu natuna oi hadibaia, bona ia ida oi tohoa loulou. Samuela bamona, emu natudia be ‘[Iehova] bona taunimanima ese do idia ura henia.’​—⁠1 Sam. 2:⁠26.

Danu, Baibel sivarai haida amo hemataurai bona hemataurai lasi karana edia idau be emu natuna ida oi herevalaia. Hegeregere, Israela taudia edia negai gwau-edeede King Ahasaia ia  ura peroveta tauna Elia ia itaia dainai, tuari biaguna ta mai ena tuari taudia 50 ia siaidia Elia idia abia totona. Unai tuari biaguna be Elia ia oda henia ia ida King Ahasaia dekenai do ia lao totona. Ena hereva amo ia hahedinaraia Iehova ena gwaukau tauna ia matauraia lasi. Elia ena haere be dahaka? Ia gwau: “Bema lau be Dirava ena tau, lahi be guba dekena amo do ia diho mai, oi bona oiemu tau 50 do ia gabua ore.” Vadaeni, Elia ena hereva hegeregerena, “nega tamona, lahi ia diho, unai tuari biaguna mai ena tuari taudia ia alaia mase.”​—⁠2 Kin. 1:​9, 10.

King Ahasaia be nega iharuana tuari biaguna ma ta bona ena tuari taudia 50 ia siaia. To, unai tuari biaguna danu be Elia ia oda henia ia ida do ia lao totona. Lahi be guba amo ia diho lou bona unai tuari biaguna mai ena tuari taudia ia gabua ore. Bena nega ihatoina, tuari biaguna ma ta bona tuari taudia 50 ia siaidia Elia idia abia totona. To, unai tuari biaguna ihatoina be Elia ia matauraia. Elia ia oda henia lasi, to ia tui diho bona Elia ia noia, ia gwau: “Dirava ena tau e, mani emu kara lau bona egu tuari taudia dekenai do oi bogahisihisi henia. Aiemai mauri do oi laloa, ai do oi hamauria! Unai tuari biagudia ruaosi, mai edia tuari taudia ibounai be lahi guba dekena amo ese idia ia gabua ore. To mani emu kara lau dekenai do oi bogahisihisi!” Unai tuari biaguna be reana ia gari, to mai hemataurai ida Elia ia hereva henia dainai, ia mase lasi. Unai dainai Iehova ena aneru ese Elia ia hamaoroa unai tuari biaguna ida ia lao be namo. (2 Kin. 1:​11-15) Unai sivarai amo ita diba hemataurai karana be mai anina bada.

Aposetolo Paulo be Roma tuari taudia ese dubu helaga dekenai idia hakaua lao neganai, ia diba ia be maoro lasi do ia hereva totona. Unai dainai mai hemataurai ida ami ofesa ta ia nanadaia: “Ia namo oi dekenai hereva ta lau gwauraia?” Unai ese dala ia kehoa Paulo ese ena maoro ia herevalaia totona.​—⁠Kara 21:​37-40.

Iesu idia kota henia neganai, ena vairana idia botaia. To ia diba edena dala ai ena inai taudia do ia haere henia. Ia gwau: “Bema lau hereva kerere, unai kerere oi gwauraia hedinarai, to bema lau hereva maoro, dahaka dainai lau oi botaia?” Iesu ena haere karana dekenai ena inai taudia be kerere ta idia davaria lasi.​—⁠Ioa. 18:​22, 23.

Baibel lalonai idia noho sivaraidia ese ita idia durua iseda kerere idia gwauraia hedinarai neganai, mai manau ida unai ita abia dae bona hamaoromaoroa be namo. (Gen. 41:​9-13; Kara 8:​20-24) Hegeregere, Abigaila be ena adavana Nabala ena hemataurai lasi karana dainai, Davida ia sori henia sibona lasi, to aniani momo ia henia danu. Davida be Abigaila ese ia karaia kara namona ia laloaboio lasi. Unai dainai Nabala ia mase murinai, Davida ese Abigaila ia adavaia.​—⁠1 Sam. 25:​23-41.

Namona be emu natudia oi hadibaia ma haida do idia matauraia bona kara namo henidia totona, ena be nega haida unai idia karaia be auka. Unai amo ‘taunimanima vairanai iseda diari do ita hahedinaraia, vadaeni iseda kara namodia do idia itaia bena iseda Tamana guba ai ia noho do idia hanamoa.’​—⁠Mat. 5:16.

[Footnotes]