Satani Ena Lohia Dalana Do Ia Kwalimu Lasi
Satani Ena Lohia Dalana Do Ia Kwalimu Lasi
“Kara dika tauna be do ia namo lasi.”—HAD. 8:13.
1. Dahaka dainai kara dika taudia kota henia karana be sivarai namona?
NEGA ta do ia ginidae, kara dika taudia be Dirava ena kota vairanai do idia gini. Unai negai, edia kara ena badina do idia gwauraia. (Aon. 5:22; Had. 8:12, 13) Kara dika taudia ese idia hahisia taudia bona kara maoromaoro idia ura henia taudia dekenai, unai be sivarai namona. Kara dika ibounai edia tamana badana, Satani Diabolo, be unai kota dekenai do ia gini danu.—Ioa. 8:44.
2. Dahaka dainai Iehova be nega ia henia Eden ai ia vara hepapahuahu ia hamaoromaoroa totona?
2 Eden ai, Satani be hekokoroku lalohadaina ia abia dainai, taunimanima edia lalona ia veria Iehova ena lohia dalana idia dadaraia totona. Unai dainai, iseda tama sina ginigunadia be Satani ena kahanai idia gini, idia gwau Iehova ena lohia dalana be maoro lasi, bona Dirava vairanai kara dika idia karaia. (Roma 5:12-14) Iehova ia diba ia idia matauraia lasi bona idia gwau-edeede taudia be dika do idia davaria. To, guba bona tanobada taudia ese unai idia diba be namo. Unai dainai, Iehova be nega ia henia unai gwau-edeede taudia edia hepapahuahu herevana ia hamaoromaoroa totona.
3. Taunimanima edia gavamani ita matauraia be maoro, a?
3 Taunimanima be Iehova ena lohia dalana idia dadaraia bona idia sibona edia gavamani idia haginia. Aposetolo Paulo ese Roma ai idia noho Keristani taudia ia hamaoroa “gavamani do idia kamonai henia” totona. Paulo ena negai, King Nero (54-68 C.E.) be Roma “gavamani” ia lohiaia. Paulo ia gwau, “gavamani ena siahu be Dirava ese ia henia.” (Roma 13:1, 2 duahia.) Paulo ena hereva ena anina be, taunimanima edia lohia dalana ese Dirava ena lohia dalana ia hereaia, a? Lasi. Paulo ena hereva ena anina be inai: Iehova ese taunimanima edia lohia dalana ia do koua lasi dainai, Keristani taudia ese Dirava ia haginia dalana idia matauraia bona abia dae be namo.
Dala Dikana
4. Dahaka dainai taunimanima edia lohia dalana ia kwalimu lasi?
4 Satani henunai idia noho lohia taudia do idia kwalimu lasi. Dahaka dainai? Badina ta be inai: Idia ese Dirava ena aonega idia dadaraia. Iehova ena aonega sibona be goevadae. Unai dainai, Ia be ita ia hakaua namonamo bona ena lohia dalana ia kwalimu diba. (Ier. 8:9; Roma 16:27) Nega momo taunimanima be edia kerere amo gau ta idia dibaia, to Iehova be nega ibounai dala maorodia ia diba. Iehova ena dala ia dadaraia gavamanina be do ia kwalimu lasi. Unai badina—bona Satani ena hekokoroku karana—dainai, matamana amo ema bona hari, taunimanima edia lohia dalana ia kwalimu lasi.
5, 6. Dahaka dainai Satani be Iehova ia inai henia?
5 Laloa namonamo tauna be dala dikadia ia tohoa lasi. Bema mai ena ura ida unai ia tohoa, gabeai do ia laloparara ia be kerere ia karaia unai. Idia vara gaudia amo ita itaia loulou, Havaraia Tauna hereadaena ia inai henia tauna be kavakava tauna. (Aonega Herevadia 21:30 duahia.) To, Satani be ia hekokoroku bona Iehova ia dadaraia. Unai dainai, Diabolo be dala dikana sibona ia abia hidi.
6 Gabeai, Babulonia ena king be Satani ena hekokoroku karana ia tohotohoa, badina ia gwau: “ ‘Guba dekenai do lau daekau lao, Dirava ena hisiu edia ataiai, be lau ese egu terona do lau atoa, bona dirava idia hebou gabuna dekenai do lau helai. Mirigini kahana dekenai ia noho ororo be unai.’ Oi gwau danu, oi be ori edia ataiai do oi daekau lao, Siahu Ibounai Dirava hegeregerena do oi lao.” (Isa. 14:13-15) Unai king ena lohia dalana ia kwalimu lasi, bona Babulonia ena lohia besena ia ore. Unai hegeregerena, Satani bona ena tanobada be kahirakahira do idia lusi momokani.
Dahaka Dainai Dirava ese Haida Edia Lohia Dalana Ia Koua Lasi?
7, 8. Iehova ese kara dika ia do koua lasi ena namo haida be dahaka?
7 To reana haida idia henanadai, ‘Dahaka dainai Iehova ese taunimanima ia koua lasi dainai, Satani idia badinaia bona idia kwalimu lasi lohia daladia idia haginia noho?’ Siahu Ibounai Diravana be idia ia koua diba. (Eso. 6:3) To, Ia ura lasi kara ta ia karaia haraga. Aonega Diravana ia diba, bema nega ia henia taunimanima idia gwau-edeede noho totona, gabeai gau namona ta do ia vara. Hegeregere, do ia hedinarai Iehova be kara maoromaoro bona lalokau King hereadaena, bona ia idia abidadama henia taudia be iena hereva amo namo do idia davaria.
8 Bema taunimanima be Satani ena lalohadai dikadia idia dadaraia bona Dirava ena lohia dalana idia badinaia, hekwakwanai be lasi! To, Iehova be nega ia henia taunimanima idia lohia totona, bona unai ese namo ia havaraia. Kudou-maoro taudia idia itaia Dirava idia kamonai henia o abidadama henia be aonega karana. Lagani momo lalodiai, taunimanima be gavamani idauidau idia tohoa vadaeni, to namo ta ia vara lasi. Unai dainai, Dirava idia tomadiho henia taudia idia abia dae momokani Iehova ena lohia dalana sibona be hereadae. Madi, Iehova be Satani ena lohia dalana dikana ia koua lasi dainai, taunimanima ibounai—Dirava idia tomadiho henia taudia danu—be metau bada idia davaria noho. To, Iehova idia tomadiho henia goadagoada taudia be unai dala amo namo idia abia danu.
Gwau-Edeede Karana ese Dala Ia Kehoa Iehova ese Ladana Bada Ia Abia Totona
9, 10. Edena dala ai Satani ena lohia dalana ese dala ia kehoa Iehova ese ladana bada ia abia totona?
9 Satani ena siahu henunai idia noho taudia o taunimanima edia lohia dalana be Iehova ena lohia dalana idia hadikaia diba, a? Lasi. Idia vara gaudia amo ita itaia, Ieremia ena hereva be maoro, badina ia gwau taunimanima be hegeregere lasi edia mauri idia biagua noho totona. (Ieremia 10:23 duahia.) Ma danu, Satani ia gwau-edeede neganai, unai ese dala ia kehoa Iehova ena kara namodia idia hedinarai totona. Edena dala ai?
10 Ena be Satani ena lohia dalana ese dika ia havaraia, to Iehova ena kara namodia idia hedinarai namonamo danu. Unai dainai, Iehova idia lalokau henia taudia idia itaia Iehova be ladana bada ia abia. Reana unai hereva dekenai ita hoa, to Satani ena lohia dalana ese dala ia kehoa Iehova ese ladana bada ia abia totona. Satani be Dirava ena lohia dalana ia hepapahuahulaia neganai, Iehova be dala hereadaena amo unai ia hamaoromaoroa. Unai ita diba namonamo totona, namona be Iehova ena kara haida ita herevalaia bona ita itaia edena dala ai Satani ena lohia dalana dikana ese dala ia kehoa Iehova be dala idauidau ai ena kara namodia ia hahedinaraia totona.
11. Edena dala ai Iehova be ena lalokau ia hahedinaraia?
11Lalokau. Baibel be ita ia hamaoroa “Dirava be lalokau.” (1 Ioa. 4:8) Ia be lalokau dainai taunimanima ginigunadia ia karaia. Danu, ia be lalokau badina ita ia karaia dalana be hoa gauna. Ma danu, Iehova be lalokau dainai taunimanima edia noho gabuna namona bona idia moalelaia gaudia ibounai ia henia. (Gen. 1:29-31; 2:8, 9; Sal. 139:14-16) To taunimanima idia gwau-edeede neganai, Iehova ena lalokau be dala matamatadia ai ia hedinarai. Edena dala ai? Ioane be Iesu ena hereva ia gwauraia lou, ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioa. 3:16) Dirava ena lalokau hereadaena be inai: Ia sibona ia havaraia Natuna tamona be tanobada dekenai ia siaia, unai amo kara dika taudia edia mauri davana ia karaia. (Ioa. 15:13) Unai ese taunimanima ia durua edia dina ta ta maurina lalonai, Iehova ena lalokau—sibona ena ura ia dadaraia lalokauna—idia hahedinaraia totona, Iesu be unai bamona ia karaia danu.—Ioa. 17:25, 26.
12. Edena dala ai Iehova be ena siahu ia hahedinaraia?
12Siahu. “Siahu Ibounai Diravana” be mauri ia henia diba. (Apok. 11:17; Sal. 36:9) Beibi ta ia vara neganai, gau ta ia diba lasi—pepa ta ai toretore ta ia noho lasi bamona. To gabeai, ia bada noho lalonai ia karaia abia hidi, gaukara, bona ena mauri o kara idauidau be ena lalona ai ia atoa—pepa ia hahonua bamona. Unai tau ia mase neganai, Iehova be unai gaudia ia laloatao—pepa be faila ai ia atoa bamona. Gabeai, Iehova ese unai tau ia hamauria lou neganai, unai gaudia do ia henia lou. (Ioa. 5:28, 29) Dirava ia ura lasi taunimanima idia mase dainai, gabeai do ia hedinarai Ia be mai ena siahu mase taudia ia hamauria lou totona. Oibe, Iehova be “Siahu Ibounai Diravana.”
13. Edena dala ai Iesu ena boubou gauna ese ia hahedinaraia Iehova be hahemaoro goeva ia karaia?
13Hahemaoro Goeva. Iehova ia koikoi diba lasi bona gau dikana ta ia karaia lasi. (Deu. 32:4; Tito 1:2) Nega ibounai taravatu maoromaorodia ia badinaia, ena be ia karaia gaudia haida dekenai lalohisihisi ia abia. (Roma 8:32) Ita gwau diba, Ia lalohisihisi badina be ena matanai, ena Natuna lalokauna be Dirava ena ladana ia hadikaia tauna ta bamona idia kara henia, bona hisihisi auna ai ia mase! To, Iehova be goevadae lasi taudia ia lalokau henia bona iena taravatu maoromaorodia ia badinaia dainai, Iesu ena hisihisi ia koua lasi. (Roma 5:18-21 duahia.) Ena be tanobada dekenai kara gagevadia be momo, to gabeai do ia hedinarai Iehova sibona be hahemaoro goeva ia karaia Diravana.
14, 15. Edena dala ai Iehova ese aonega bona haheauka ia hahedinaraia?
14Aonega. Adamu bona Heva idia kara dika murinai, karaharaga Iehova be dika do ia hamaoromaoroa dalana ia gwauraia. (Gen. 3:15) Unai karaharaga karana—Iehova ese ena hesiai taudia dekenai ena ura edia anina ibounai ia hahedinaraia noho karana danu—ese idia hamomokania, Iehova be aonega Diravana. (Roma 11:33) Oibe, Iehova be dika ibounai do ia hamaoromaoroa, ta ese do ia koua lasi. Inai tanobada ai matabodaga karadia, tuari, kara gageva, gwau-edeede, hebogahisi lasi karana, kopi idauidau taudia inai henia karana, bona koikoi karana be bada, to Iehova ese ia havaraia taudia dekenai aonega korikori ena anina be dala idauidau ai ia hahedinaraia. Iamesi ia gwau: “Dirava dekena amo aonega ia abia tauna ena kara ginigunana be inai: Ia laloa goevagoeva. Ma iena kara haida be inai: Mai ena maino, laloa manada bona gado namo. Ia be mai ena bogahisihisi, bona kara namodia momo ia havaraia noho. Ia be maka tamona dekena amo taunimanima ibounai ia kara henidia, edia toana dekena amo lasi.”—Iam. 3:17.
15Haheauka. Ena be ita be goevadae lasi bona ita kerere momo, to Iehova be mai haheauka ida ita ia kara henia. Lagani tausen momo lalonai, Iehova ese taunimanima ia durua noho karana ese ia hahedinaraia ia be haheauka Diravana, bona ita tanikiu henia be namo. Aposetolo Petero ena hereva be maoro, ia gwau: “Lohiabada ena haheauka karana umui laloa.”—2 Pet. 3:9, 15, NW.
16. Dahaka dainai ita moale badina Iehova be mai ena ura ida eda dika ia gwauatao?
16Mai Ena Ura ida Dika Ia Gwauatao. Ita be goevadae lasi bona nega momo ita kerere. (Iam. 3:2; 1 Ioa. 1:8, 9) To, ita moale badina Iehova be mai ena ura ida eda ‘dika ia gwauatao momokani’! (Isa. 55:7) Mani oi laloa: Ena be sinana ena bogana amo ita vara neganai ita be goevadae lasi, to Dirava ese iseda kerere ia gwauatao neganai, ita moale bada. (Sal. 51:5, 9, 17) Unai ese ita ia hagoadaia Ia ita lalokau henia, bona Ia ita tohotohoa haida edia dika ita gwauatao totona.—Kolose 3:13 duahia.
Tanobada Ia Gorere Ena Badina
17, 18. Edena dala ai Satani ena lohia dalana ia kwalimu lasi?
17 Lagani handred momo lalodiai, tanobada ai, Satani ena siahu henunai idia noho lohia dalana ibounai be hanaihanai idia kwalimu lasi. Lagani 1991 ai, niuspepa ta (The European) ia gwau: “Tanobada ia gorere, a? Oibe, to. . . Dirava ese ia havaraia lasi—tanobada ena gorere be taunimanima ese idia havaraia.” Unai be hereva momokani! Satani ese eda tama sina ginigunadia ia koia dainai, idia be taunimanima edia lohia dalana idia abia hidi bona Iehova ena lohia dalana idia dadaraia. Unai dainai, edia lohia dalana be do ia kwalimu lasi. Tanobada ibounai, taunimanima be hisihisi bona dika idauidau idia abia, bona unai ese ia hahedinaraia tanobada ena lohia dalana be gorere dikana ta ia abia bamona.
18 Hekokoroku taudia be Satani ena lohia dalana idia ura henia. To, hekokoroku be lalokau ia halusia diba lasi; unai dainai Iehova be mai lalokau ida ena lohia dalana ia gaukaralaia. Satani ena lohia dalana be moale bona noho namona ia havaraia lasi. To, Iehova ena lohia dalana be unai ia havaraia diba! Hari, gau haida ese unai idia hamomokania, a? Oibe, stadi gabena ai unai do ita herevalaia.
Lohia Dalana amo Dahaka Ita Dibaia, Bema Inai Siri Ita Duahia . . .
• Roma 13:1, 2?
• Aonega Herevadia 21:30?
• Ieremia 10:23?
• Kolose 3:13?
[Study Questions]
[Pictures on page 25]
Satani ena lohia dalana ese taunimanima ia durua lasi
[Credit Lines]
U.S. Army photo
WHO photo by P. Almasy
[Picture on page 26]
Iehova be mai ena siahu mase taudia ia hamauria lou totona
[Picture on page 27]
Iesu ena boubou karana ese Iehova ena lalokau bona hahemaoro goeva idia hahedinaraia