Kongrigeisen ai Emu Kahana Oi Moalelaia
Kongrigeisen ai Emu Kahana Oi Moalelaia
“Dirava ese kahana ta ta tauanina lalonai ia atoa vadaeni, iena ura hegeregerena.”—1 KOR. 12:18.
1, 2. (a) Dahaka ese ia hahedinaraia kongrigeisen ai idia noho taudia be edia kahana idia moalelaia diba? (b) Dahaka henanadai be inai stadi lalonai do ita herevalaia?
IDAUNEGAI Israela ena nega amo ema bona hari, Iehova be kongrigeisen amo ena taunimanima ia naria bona hakaua. Haheitalai be inai: Israela taudia ese Ai taudia idia halusia murinai, Iosua ese “Taravatu hereva ibounai ia duahia hedinaraia, hanamoa hereva, bona hadikaia hereva danu, Taravatu Buka lalonai idia torea hegeregerena . . . Israela taudia [“Israela ena kongrigeisen,” NW ] ibounai dekenai ia duahia hedinaraia.”—Ios. 8:34, 35.
2 Aposetolo edia negai, Paulo be elda tauna Timoteo ia hamaoroa kongrigeisen be “Dirava ena ruma bese” bona “hereva momokani ena du, bona hereva momokani ia durua.” (1 Tim. 3:15, NW ) Hari inai negai, Dirava ena “ruma bese” be tanobada ibounai tadikaka oreana o Keristani taudia momokanidia. Paulo ese 1 Korinto karoa 12 ai, kongrigeisen be eda tauanina ida ia hahegeregerea. Ia gwau, ena be tauanina ena kahana ta ta edia gaukara be idauidau to idia be mai anina bada. Paulo ia gwau: “Dirava ese kahana ta ta tauanina lalonai ia atoa vadaeni, iena ura hegeregerena.” Ma ia gwau, “Tauanina kahadia haida ita laloa be namo bada lasi, to idia ita naria namonamo.” (1 Kor. 12:18, 23) Unai dainai kongrigeisen lalonai, ena be kara maoromaoro badinaia tauna ta ena gaukara be abidadama tadikaka ma ta ena gaukara amo ia idau, to ta ena gaukara ese ma ta ena ia hanaia lasi. Edena dala ai kongrigeisen ai eda kahana ita diba bona moalelaia? Dahaka gau haida be ita idia durua o koua diba? Bona edena dala ai ‘taunimanima ibounai do idia itaia, ita be ita goada ita lao’?—1 Tim. 4:15.
Iseda Kahana Ita Moalelaia Dalana
3. Kongrigeisen lalonai eda kahana ita diba bona moalelaia dalana ta be dahaka?
3 Kongrigeisen ai eda kahana ita diba bona moalelaia dalana ta be inai: “Hesiai tauna mai ena kamonai bona mai ena kara maoromaoro” bona ena Hakaua Oreana ida ita gaukara hebou. (Mataio 24:45-47 duahia.) Namona be ita tahua ita be unai hesiai tauna ena hakaua hereva ita badinaia eiava lasi. Hegeregere: Lagani momo lalodiai, hesiai tauna be dabua, tauanina ena toana, moale karadia, bona Internet gaukaralaia kerere karana dekenai hakaua herevadia ia henia. Unai sisiba namona ita badinaia dainai, Iehova ita tura henia noho, a? Ruma bese ena tomadiho ita karaia hanaihanai ena sisiba be edena bamona? Unai sisiba hegeregerena hanuaboi ta ita makaia unai ita karaia totona, a? Bema ita do headava lasi, nega ita atoa ita sibona be Baibel ita stadilaia totona, a? Bema hesiai tauna ena hakaua herevana ita badinaia, Iehova be ita ta ta bona eda ruma bese do ia hanamoa.
4. Ita eda ura hegeregerena abia hidi ita karaia neganai, dahaka ita laloa be namo?
4 Reana haida do idia gwau, ‘Ta ese moale karadia, dabua o tauanina ena toana dekenai taravatu ia atoa be maoro lasi; ta ta sibona be ena ura hegeregerena unai abia hidi ia karaia be namo.’ To, bapatiso ia abia bona kongrigeisen ai ena kahana ia moalelaia tauna ese unai lalohadai ia abia be maoro lasi. Namona be ia ese Iehova ena lalohadai, Baibel dekenai, ia laloa guna. Baibel ena ‘hereva be lamepa bamona, ita ia hakaua noho, vadaeni ita raka maoromaoro diba. Iena hereva be diari, ia ese eda dala ia hadiaria noho.’ (Sal. 119:105) Danu, inai lalohadai ita abia be aonega karana: Ita abia hidi gaudia be eda haroro gaukara bona kongrigeisen taudia o ma haida edia hemami do ia hadikaia o lasi.—2 Korinto 6:3, 4 duahia.
5. Dahaka dainai ita naria namonamo bona ita sibona eda ura ita badinaia lasi?
5 “Hari kamonai lasi taudia edia lalona dekenai ia gaukara” lalohadaina be gabu ibounai dekenai ia noho, hodahoda bamona. (Efe. 2:2, NW ) Unai lalohadai idia abia taudia idia ura lasi Iehova ena orea ese ia hakaudia. Oibe, ita ura lasi Diotrepe bamona ita karaia, “ia ese [Ioane ena] hereva ia kamonai henia lasi.” (3 Ioa. 9, 10) Ita naria namonamo, bona ita sibona eda ura ita badinaia lasi. Eda hereva bona kara amo ita hahedinaraia, Iehova ese hari ia gaukaralaia hesiai tauna ita matauraia bada. (Num. 16:1-3) Momokani, hesiai tauna ida ita gaukara hebou bona idia ita badinaia karana ita moalelaia. Danu, ita hekwarahi eda kongrigeisen idia naria taudia ita kamonai henia be namo.—Heberu 13:7, 17 duahia.
6. Dahaka dainai eda noho dalana ita tahua namonamo be namo?
6 Kongrigeisen lalonai eda kahana ita moalelaia dalana ma ta be inai: Eda noho dalana ita tahua namonamo, bona eda hesiai gaukara ita moalelaia bona Iehova ita hanamoa. (Roma 11:13) Haida be idia hegeregere regula painia gaukara idia karaia totona. Ma haida be misinari gaukara, loaloa naria gaukara, o Betele gaukara idia karaia. Tadikaka bona taihu momo be Kingdom Hall konstraksen gaukara idia durua. Iehova ena taunimanima momo be edia ruma bese idia durua Iehova idia badinaia noho bona wiki ta ta lalonai haroro gaukara idia karaia momo. (Kolose 3:23, 24 duahia.) Ita diba momokani, hanaihanai Iehova ena kongrigeisen ai eda kahana do ita moalelaia, bema mai eda ura bona kudouna ibounai ida Dirava ena hesiai gaukara ita karaia.
Gau Haida be Ita Idia Durua o Koua Diba
7. Oi hahedinaraia edena dala ai eda noho dalana ese ita ia durua kongrigeisen ai eda kahana ita karaia totona.
7 Iseda noho dalana ita tahua namonamo be gau badana, badina nega haida gau haida be ita idia durua o koua diba eda kahana kongrigeisen ai ita karaia totona. Hegeregere, kongrigeisen ai tadikaka ta ese ia huaia maduna be taihu ta ena amo ia idau. Danu, iseda mauri lagani, goada bona gau ma haida ese ita idia durua diba Iehova ena hesiai gaukara haida ita karaia totona. Aonega Herevadia 20:29 ia gwau: “Eregabe taudia edia hairaina be edia goada. To buruka taudia edia hairaina be edia huina kurokuro.” Kongrigeisen ena matamata taudia be reana idia goada dainai gaukara momo idia karaia diba, to buruka taudia be edia aonega o idia diba vadaeni gaudia amo kongrigeisen idia durua bada diba. Danu, inai ita laloatao: Iehova ena hariharibada karana dainai, ena orea lalonai gau momo ita karaia diba.—Kara 14:26; Roma 12:6-8.
8. Iseda ura ese ita ia durua kongrigeisen ai eda kahana ita karaia totona, a?
8 Kongrigeisen taihu rua edia haheitalai ese gau ma ta ia hahedinaraia, bona unai gauna ese ita ia durua diba eda kahana kongrigeisen ai ita huaia totona. Idia ruaosi be haisikuli idia haorea. Edia noho dalana be hegeregere. Edia tama sina ese nega momo idia ruaosi idia hagoadaia, sikuli idia haorea neganai regula painia gaukara idia karaia be namo. To sikuli murinai, ta be painia gaukara ia karaia, ma ta be ful-taim moni gaukara ia hamatamaia. Dahaka gau ese edia abia hidi ia haidaua? Edia ura. Oibe, idia ta ta be edia ura gauna idia abia hidi. Ita be unai bamona, a? Dirava ena hesiai gaukara lalonai ita ura karaia gauna ita lalohadailaia be mai anina bada. Ita ura Dirava ena hesiai gaukara ita habadaia diba, herevana unai ita karaia totona eda noho dalana ita hamaoromaoroa be namo, a?—2 Kor. 9:7.
9, 10. Bema Iehova ena hesiai gaukara habadaia urana ia maragi ia lao, dahaka ita karaia be namo?
9 Bema kongrigeisen ai ita noho kava sibona bona ita ura lasi Iehova ena hesiai gaukara ita habadaia be edena bamona? Paulo ese Filipi taudia ia hamaoroa: “Dirava ese umui emui lalona dekenai ia gaukara noho. Ia ese ura namodia bona goada umui dekenai ia henia noho, vadaeni iena ura karadia do umui karaia.” Momokani, Iehova be eda lalona ai ia gaukara noho bona iseda ura ia haidaua diba.—Fili. 2:13; 4:13.
10 Unai dainai, Iehova ita noia ita ia hagoadaia ena ura ita karaia totona. Idaunegai Israela ena King Davida be unai bamona ia karaia. Ia guriguri neganai ia gwau: “Lohiabada e, oiemu kara lau dekenai do oi hadibaia. Oiemu dala lau dekenai do oi hedinaraia. Oiemu hereva momokani ena dala dekenai, lau do oi hakaua, bona inai hereva momokani, be lau dekenai do oi hadibaia. Badina oi be egu Dirava, oi ese lau oi hamauria noho. Nega ibounai oi dekenai lau abidadama henia noho.” (Sal. 25:4, 5) Davida bamona, Iehova ita noia ita ia durua Ia moalelaia karadia ita karaia noho totona. Iehova bona ena Natuna edia ura gaudia ita karaia bona edia lalohadai o hemami ita dibaia neganai, ita moale bona idia ita tanikiu henia. (Mat. 26:6-10; Luka 21:1-4) Unai bamona hemami ita abia dainai, Iehova ita noia ita ia durua mai eda ura ida iena hesiai gaukara ita habadaia totona. Peroveta tauna Isaia ena kara ita tohotohoa be namo. Iehova ia henanadai: “Daika do lau siaia? Daika be ai totona do ia lao?” Isaia ia haere: “Lau be inai, do lau lao! Lau do oi siaia!”—Isa. 6:8.
Edena Dala ai Ita Goada Ita Lao?
11. (a) Dahaka dainai tadikaka idia hekwarahi orea ena maduna idauidau idia huaia totona? (b) Tadikaka ta be dahaka ia karaia diba unai bamona maduna ia abia totona?
11 Hesiai laganina 2008 ai, tanobada hegegemadai, bapatiso idia abia taudia be 289,678—unai ese ia hahedinaraia ita ura tadikaka momo ese kongrigeisen idia naria be gau badana. Edena dala ai tadikaka ta be unai maduna ia abia diba? Namona be ia hekwarahi Baibel ai elda bona hesiai taudia edia taravatu ia duahia bona ia badinaia totona. (1 Tim. 3:1-10, 12, 13; Tito 1:5-9) Edena dala ai tadikaka ta be unai taravatu ia badinaia diba? Namona be hanaihanai ia haroro, kongrigeisen ai maduna ia huaia namonamo, ia gaukara goada hebou ai haere namodia henia karana ia hanamoa, bona tadikaka taihu edia namo ia laloa bada. Unai bamona ia karaia neganai, ia hahedinaraia ia be kongrigeisen ai ena kahana ia moalelaia.
12. Edena dala ai matamata taudia ese idia hahedinaraia idia be hereva momokani idia ura henia?
12 Bema tadikaka ta ena mauri lagani be 20 henunai, dahaka ia karaia diba kongrigeisen ai ia goada ia lao totona? Namona be Baibel amo diba ia abia, unai amo “aonega ibounai bona Dirava ena lauma ese ia henia laloparara” ia habadaia diba. (Kol. 1:9) Unai bamona ia vara diba, bema hanaihanai Baibel ia stadilaia bona kongrigeisen heboudia dekenai heduru ia henia. Danu, ful-taim hesiai gaukara idauidau edia “iduara badana ia kehoa vadaeni” dainai, namona be tadikaka matamatadia idia gaukara goada, unai amo idia hegeregere diba unai iduara badana dekenai idia vareai totona. (1 Kor. 16:9) Momokani, Iehova ita hesiai henia neganai, eda mauri lalonai ita moale bona hahenamo momo ita abia.—Hadibaia Tauna 12:1 duahia.
13, 14. Edena dala ai taihu ese idia hahedinaraia kongrigeisen ai edia kahana idia moalelaia?
13 Danu, taihu be Salamo 68:11 ena hereva idia hagugurua, bona unai amo idia hahedinaraia idia be edia kahana idia moalelaia. Unai siri ia gwau: “Lohiabada ese iena oda ia gwauraia, vadaeni taunimanima [“hahine,” NW ] momo ese, unai hereva idia gwauraia hedinarai.” Taihu ese kongrigeisen ai edia kahana idia moalelaia dala namona ta be inai: Hahediba taudia halaoa gaukarana idia karaia. (Mat. 28:19, 20) Unai dainai, bema taihu be mai edia ura ida gau momo idia dadaraia bona hanaihanai haroro gaukara idia karaia, vadaeni idia hahedinaraia kongrigeisen ai edia kahana idia moalelaia.
14 Paulo be Tito ia tore henia neganai, ia gwau: “Inai bamona danu hahine badadia do oi hadibaia, do idia noho namonamo, hahine helagadia bamona. . . . Idia ese kara namo do idia hadibaia. Vadaeni edia hadibaia hereva ese hahine matamatadia do ia durua, edia adavana bona natuna do idia lalokau henia. Bona do idia laloa maoromaoro, do idia noho namonamo, mai laloa goevagoeva danu, bona edia ruma lalonai do idia gaukara. Bogahisihisi karadia do idia karaia, bona edia adavana edia hereva do idia kamonai henia. Unai dekena amo, tau ta ese Dirava ena Sivarai Namona do ia hadikaia diba lasi.” (Tito 2:3-5) Momokani, lo taihu ese kongrigeisen ai heduru idia henia diba! Bema iena tauanina ena toana, dabua, bona moale karadia dekenai abia hidi maorodia ia karaia bona elda o tadikaka ia matauraia, vadaeni ia hahedinaraia kongrigeisen ai ena kahana ia moalelaia bona haheitalai namona ia hahedinaraia ma haida totona.
15. Ia headava lasi taihu be dahaka ia karaia diba sibona ia noho lalohadaina ia hanaia totona?
15 Nega haida ai, ia auka ia headava lasi taihu ese kongrigeisen ai ena kahana ia moalelaia totona. Taihu ta ia gwau: “Lau headava lasi dainai nega haida lau lalometau badina lau sibona lau noho.” To, dahaka ese unai taihu ia durua ena lalometau ia haheaukalaia totona? Ia gwau: “Guriguri bona stadi karana ese lau ia durua kongrigeisen ai egu kahana lau moalelaia lou totona. Iehova ese lau ia laloa dalana lau stadilaia. Danu, kongrigeisen ai ma haida lau durua toho. Unai ese lau ia durua lau sibona lau laloa bada lasi, to ma haida lau laloa bada totona.” Salamo 32:8 ai, Iehova ese Davida ia hamaoroa: “Lau ese oi do lau hakaua, bona sisiba oi dekenai do lau henia.” Momokani, Iehova be ena hesiai taudia—idia headava lasi taihu danu—edia namo ia laloa bada, bona Ia ese idia do ia durua kongrigeisen ai edia kahana idia moalelaia totona.
Emu Kahana Oi Karaia Noho!
16, 17. (a) Dahaka dainai Iehova ena boiboi ita abia dae bena ena orea lalonai ita vareai be abia hidi hereadaena? (b) Dahaka ita karaia diba Iehova ena orea lalonai iseda kahana ita karaia noho totona?
16 Iehova be mai ena lalokau ida ena hesiai taudia ta ta ia boiria ena turana ai idia lao totona. Iesu ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba.” (Ioa. 6:44) Hari inai negai, Iehova be taunimanima bilioni momo huana amo ita ia boiria ena kongrigeisen dekenai ita vareai totona. Unai boiboi ita abia dae be kara hereadaena, ani? Unai abia hidi ita karaia dainai, iseda mauri be mai ena anina. Danu, ita moale badina kongrigeisen ai ita be mai eda kahana!
17 Salamo torea tauna ia gwau: “Lohiabada e, oi noho Ruma, be lau ura henia noho.” Ma ia gwau: “Lau gini goada noho, bona lau hadikaia totona gauna ta ia noho lasi. Lohiabada e, oiemu bese taudia, edia hebou badana lalonai, lau ese oi do lau hanamoa bada.” (Sal. 26:8, 12) Dirava momokanina ese ena orea lalonai ita ta ta dekenai kahana ta ta ia henia. Bema tiokratik dalana ita badinaia noho bona Dirava ena hesiai gaukara lalonai ita bisi, kongrigeisen lalonai iseda kahana ita karaia noho unai.
Oi Laloatao, A?
• Dahaka dainai ita gwau diba kongrigeisen ai Keristani taudia ibounai be mai edia kahana?
• Edena dala ai ita hahedinaraia diba kongrigeisen ai eda kahana ita moalelaia?
• Dahaka gau haida be ita idia durua o koua diba eda kahana kongrigeisen ai ita karaia totona?
• Edena dala ai Keristani taudia maragidia bona badadia ese idia hahedinaraia kongrigeisen ai edia kahana idia moalelaia?
[Study Questions]
[Pictures on page 16]
Tadikaka be dahaka idia karaia diba kongrigeisen ai maduna idauidau idia huaia totona?
[Picture on page 17]
Edena dala ai taihu ese idia hahedinaraia kongrigeisen ai edia kahana idia moalelaia?