Emu Guriguri Dalana Ia Hahedinaraia Oi be Iehova Ena Turana, A?
Emu Guriguri Dalana Ia Hahedinaraia Oi be Iehova Ena Turana, A?
“Oi ese aiemai guriguri oi kamonai. Taunimanima ibounai be oi dekenai do idia mai.”—SAL. 65:2.
1, 2. Dahaka dainai Iehova ena hesiai taudia idia abia dae momokani ia ese edia guriguri do ia kamonai?
IEHOVA be hanaihanai ena abidadama hesiai taudia edia guriguri ia kamonai. Oibe, ita abia dae momokani Iehova be unai bamona ia karaia. Herevana, Iehova ena Witnes taudia milioni momo be nega tamona idia guriguri, to Dirava ese idia ta ta edia guriguri ia kamonai diba.
2 Salamo torea tauna, Davida ia abia dae Dirava ese ena guriguri ia kamonai dainai, ia gwau: “Oi ese aiemai guriguri oi kamonai. Taunimanima ibounai be oi dekenai do idia mai.” (Sal. 65:2) Davida be Iehova ia badinaia goada dainai ena guriguri ia haerelaia. Namona be ita sibona ita nanadaia: ‘Egu guriguri dalana ese ia hahedinaraia lau be Iehova lau abidadama henia bona tomadiho momokani lau laloa bada, a? Egu guriguri dalana ese dahaka ia hahedinaraia?’
Mai Manau ida Iehova Guriguri Henia
3, 4. (a) Dirava ita guriguri henia neganai, edena kara ita hahedinaraia be namo? (b) Bema kara dika badana ta ita karaia dainai ita lalohekwarahi momo, dahaka ita karaia be namo?
3 Bema ita ura Dirava ese iseda guriguri ia haerelaia, vadaeni namona be mai manau ida Ia ita guriguri henia. (Sal. 138:6) Iehova ita noia iseda lalona ai idia noho gaudia do ia tahua, Davida ia karaia bamona, ia gwau: “Dirava e, egu kudouna do oi tahua, ena dala ibounai do oi diba. Egu lalona danu do oi tohoa, bona egu laloa gaudia do oi davaria. Do oi itaia, bema egu lalona dekenai dika ta ia noho, bona noho hanaihanai dalana dekenai mani lau do oi hakaua.” (Sal. 139:23, 24) Ita guriguri sibona lasi, to danu Dirava ita noia iseda lalona do ia tahua bona Baibel ena sisiba do ita badinaia. Iehova ese ita ia durua diba mauri hanaihanai dalana dekenai ita raka totona.
4 Bema kara dika badana ta ita karaia dainai ita lalohekwarahi momo, dahaka ita karaia be namo? (Salamo 32:1-5 duahia.) Kara dika ita hunia toho bona lalomamina ita koua toho neganai, do ita gorere bamona; ranu lasi gabunai ia gini au be dina ena siahu dekenai ia kakoro bamona. Davida be ia karaia kara dikana dainai ia moale lasi bona ia gorere. To, Dirava dekenai ena dika ia gwauraia hedinarai neganai, ena hemami ia namo! Bona Davida ia mamia Iehova ese ena “kara dika ia gwauatao” neganai, ia moale bada. Kara dika tauna be Dirava dekenai ena dika ia gwauraia hedinarai neganai ena hemami do ia namo, bona elda taudia edia heduru amo ena hetura karana Iehova ida ia hagoadaia lou diba.—Aon. 28:13; Iam. 5:13-16.
Dirava Ita Noia Bona Ita Tanikiu Henia
5. Edena bamona negadia ai Iehova ita noia goadagoada be namo?
5 Gau ta totona ita lalohekwarahi momo neganai, namona be Paulo ena sisiba ita badinaia, ia gwau: “Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai.” (Fili. 4:6, NW ) Dika o dagedage ita davaria negadia ai, namona be Iehova ita noia goadagoada ita ia durua bona gimaia totona.
6, 7. Dahaka gaudia dainai Iehova ita tanikiu henia be namo?
6 To, bema heduru abia sibona totona Iehova ita guriguri henia, unai ese dahaka ia hahedinaraia? Ita be Dirava ita tura henia namonamo, eiava? Paulo ia gwau namona be “mai tanikiu danu” Dirava ita guriguri henia. Bona Dirava ita tanikiu henia, Davida ia karaia bamona, ia gwau: “Lohiabada e, goada bona siahu bona hairai bona kwalimu, bona King ena toana be oiemu. Guba bona tanobada dekenai idia noho gaudia ibounai be oiemu. Oi be King momokani, basileia ibounai be oi ese oi biagua noho. . . . Aiemai Dirava, harihari ai ese oi dekenai ai tanikiu henia, bona oiemu ladana namo herea momokani ai hanamoa noho.”—1 Siv. 29:11-13.
7 Iesu be aniani totona Dirava ia tanikiu henia bona Lohiabada Ena Anibou dekenai paraoa bona wain totona unai bamona ia karaia danu. (Mat. 15:36; Mar. 14:22, 23) Aniani totona Iehova do ita tanikiu henia sibona lasi, to ena “kara namodia,” iena “kota hereva maoromaoro” bona ena hereva, Baibel lalonai dainai ia ita tanikiu henia danu be namo.—Sal. 107:15; 119:62, 105.
Ma Haida Totona Guriguri
8, 9. Dahaka dainai eda tadikaka taihu totona ita guriguri be namo?
8 Momokani, ita sibona totona Dirava dekenai ita guriguri, to ma haida, edia ladana ita diba lasi tadikaka taihu totona ita guriguri be namo. Ena be aposetolo Paulo be Kolose ai idia noho tadikaka haida sibona ia diba, to ia gwau: “Ai ruaosi ai guriguri negadia ibounai, Dirava, iseda Lohiabada Iesu Keriso ena Tamana ai tanikiu henia noho. Badina be ai kamonai vadaeni umui ese Keriso Iesu umui abidadama henia noho, Dirava ena taudia ibounai umui lalokau henia danu.” (Kol. 1:3, 4) Paulo be Tesalonika ai idia noho Keristani taudia totona ia guriguri danu. (2 Tes. 1:11, 12) Ita be eda tadikaka bona taihu ma haida totona ita guriguri neganai, ita hahedinaraia ita be idia ita laloa bada.
9 Horoa Keristani taudia bona “mamoe idaudia” totona ita guriguri neganai, ita hahedinaraia ita be Dirava ena orea ita laloa bada. (Ioa. 10:16) Paulo ese ena tadikaka ia hamaoroa ia dainai do idia guriguri, unai amo ‘do ia haroro neganai, Sivarai Namona ena hunia hereva do ia hahedinaraia, mai maoromaoro bona mai gari lasi danu.’ (Efe. 6:17-20) Ita ta ta be eda tadikaka taihu totona unai bamona ita guriguri, a?
10. Edena dala ai ma haida totona ita guriguri karana ese ita ia durua?
10 Ma haida totona ita guriguri neganai, ita ia durua eda lalohadai kererena idia dekenai ita haidaua totona. Bema Dirava ita noia ita ura henia lasi tauna ia durua totona, vadaeni reana iseda lalohadai kererena ia dekenai do ita haidaua diba. (1 Ioa. 4:20, 21) Unai bamona guriguri karana ese tadikaka taihu ia hagoadaia bona lalotamona ia havaraia. Danu, unai bamona guriguri ese ia hahedinaraia ita be Keriso ese ia hahedinaraia lalokau ita hahedinaraia. (Ioa. 13:34, 35) Unai kara be Dirava ena lauma helaga ena huahua ta. Ita ta ta ese Iehova ita noia ita ia durua lauma helaga ena huahua—lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana—ita hahedinaraia totona, a? (Luka 11:13; Gal. 5:22, 23) Unai bamona ita karaia neganai, eda mauri dalana amo do ita hahedinaraia ita be lauma helaga ena hakaua dalana ita badinaia.—Galatia 5:16, 25 duahia.
11. Dahaka dainai ma haida ita hamaoroa ita totona do idia guriguri be maoro?
11 Bema ita diba iseda natudia be sikuli ai koikoi dalanai eksam idia karaia, namona be idia totona ita guriguri bona Baibel siri amo ita durudia, unai amo mai momokani ida do idia kara. Paulo ese Korinto ai idia noho Keristani taudia ia hamaoroa, ia gwau: “Dirava ai noia noho, ia ese umui do ia durua, vadaeni do umui kara dika lasi.” (2 Kor. 13:7) Mai manau ida unai bamona ita guriguri ese Iehova ia hamoalea bona ia hahedinaraia ita be Iehova ita tura henia namonamo. (Aonega Herevadia 15:8 duahia.) Namona be ma haida ita hamaoroa ita totona idia guriguri, Paulo hegeregerena, ia gwau: “Umui ese ai totona do umui guriguri noho, badina ai laloa aiemai kudouna ena laloa be maoromaoro, Dirava ena vairanai. Bona ai ura be nega ibounai kara maoromaoro do ai karaia.”—Heb. 13:18.
Iseda Guriguri Dalana ese Ia Hahedinaraia Gau Ma Haida
12. Iseda guriguri lalonai dahaka gaudia ita gwauraia be mai anina bada?
12 Iseda guriguri dalana ese ia hahedinaraia ita be mai moale bona goada ida Iehova ita hesiai henia, a? Iseda guriguri dalana amo ita hahedinaraia ita be Dirava ena ura, Basileia sivarai harorolaia gaukarana, Iena lohia siahuna abia isi karana, bona Iena ladana hahelagaia karana ita laloa bada, a? Iseda guriguri lalonai unai gaudia ita gwauraia be mai anina bada. Iesu ena guriguri amo unai ia hahedinaraia: “Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”—Mat. 6:9, 10.
13, 14. Dirava dekenai ita gwauraia guriguri ese dahaka ia hahedinaraia?
13 Dirava dekenai ita gwauraia guriguri ese eda lalohadai, ura, bona tahua gaudia idia hahedinaraia. Iehova be ita ia diba namonamo. Aonega Herevadia 17:3 ia gwau: “Golo bona siliva be lahi ese, ia tohoa bona ia hagoevaia, bona tau ta ena kudouna be Lohiabada ese, ia tohoa bona ia hagoevaia noho.” Dirava be iseda lalona dekenai idia noho gaudia ia itaia. (1 Sam. 16:7) Iehova be eda hebou lao karana, eda haroro gaukara, bona tadikaka taihu ita laloa daladia ia diba. Bona Keriso ena “tadikakana” dekenai dahaka lalohadai ita abia be Iehova ia diba danu. (Mat. 25:40) Iehova ia diba ita gurigurilaia gauna ita laloa bada o ita be hereva ita gwauraia lou gwauraia lou kava. Iesu ena negai, haida be guriguri karana dekenai lalohadai kererena idia abia dainai, Iesu ia gwau: “Umui guriguri neganai, hereva kava momo do umui gwauraia lou, gwauraia lou lasi, Dirava diba lasi taudia bamona, badina be idia laloa edia hereva momo dainai, Dirava ese idia do ia kamonai.”—Mat. 6:7.
14 Danu, iseda guriguri idia hahedinaraia ita be Dirava dekenai ita tabekau eiava lasi. Davida ia gwau: “[Iehova] e, oi be egu heau mauri gabuna. Oi be lauegu kohoro, bona oi ese lau idia hadikaia gwauraia taudia oi koua noho. Oiemu Ruma lalonai do lau noho ela bona hanaihanai. Lohiabada e, mani emu kara oiemu hanina edia henunai lau do oi hunia, do lau mauri totona.” (Sal. 61:3, 4) Dirava be ita ia “naria noho” neganai, ita moale bona ita noho namonamo diba. (Apok. 7:15) Hahetoho negadiai Iehova ita guriguri henia kara ese ita ia hagoadaia badina ita diba momokani ‘Lohiabada sibona ese ita ia durua noho.’—Salamo 118:5-9 duahia.
15, 16. Guriguri karana ese edena dala ai ita ia durua kongrigeisen lalonai maduna abia karana dekenai lalohadai maorona ita abia totona?
15 Mai momokani ida Iehova dekenai eda ura gaudia ita gurigurilaia neganai, unai ese ita do ia durua iseda lalohadai korikorina ita diba totona. Hegeregere, kongrigeisen lalonai naria gaukarana ta ita ura karaia neganai, ita be mai manau ida ita ura tadikaka taihu ita durua bona Basileia harorolaia gaukarana ita habadaia, a? O ita ura ma haida vairanai ita hahedinaraia ita be “lohia” taudia, a? Iehova ena taunimanima be unai bamona kara idia hahedinaraia lasi. (3 Ioane 9, 10; Luka 22:24-27 duahia.) Bema iseda lalohadai be kerere, namona be mai momokani ida Iehova Dirava ita guriguri henia unai lalohadai kererena ia hahedinaraia bona ita ia durua unai ita haidaua totona. Unai amo unai lalohadai kererena ese ita do ia biagua lasi.
16 Keristani hahine idia ura bada edia adavana be hesiai tauna ena maduna ia abia bona gabeai elda tauna ai ia lao. Namona be unai taihu be sibodia edia guriguri lalonai unai ura idia gwauraia hedinarai bona edia kara amo haheitalai namona idia hahedinaraia. Ruma bese taudia edia hereva bona kara be mai anina bada, badina unai ese tadikaka ena maduna kongrigeisen lalonai ia hanamoa eiava ia hadikaia diba.
Taunimanima Vairanai Ma Haida Totona Ita Guriguri
17. Dahaka dainai regerege lasi gabudia ai ita sibona ita guriguri be namo?
17 Nega momo, Iesu be hutuma amo ia raka siri bona regerege lasi gabunai ena Tamana ia guriguri henia. (Mat. 14:13; Luka 5:16; 6:12) Ita danu be regerege lasi gabudia ai ita sibona ita guriguri be namo. Unai bamona gabudia ai ita guriguri neganai, ita be Iehova ese ia moalelaia abia hidi namodia do ita karaia bona ita ia durua ia tomadiho henia karana ita goadalaia noho totona. To, Iesu be taunimanima vairanai ia guriguri danu. Namona be ita tahua edena dala namona ai unai ita karaia diba.
18. Kongrigeisen heboudia ai tadikaka idia guriguri neganai, dahaka gaudia idia laloa be namo?
18 Hebou gabudia ai, Dirava idia badinaia tatau be kongrigeisen vairanai idia guriguri. (1 Tim. 2:8) Guriguri dokonai tadikaka taihu be “amen” idia gwauraia diba, ena anina be “momokani o unai bamona do ia vara.” To, “amen” idia gwauraia totona, guriguri herevana dekenai idia lalotamona be gau badana. Iesu be Lohiabada Ena Guriguri lalonai hereva dikana o kamonai taudia edia lalona ia hahekwakwanaia herevadia ia gwauraia lasi. (Luka 11:2-4) Danu, Iesu be kamonai taudia ta ta edia hekwakwanai ta ta ia gwauraia lasi. Namo lasi taunimanima vairanai ita sibona eda lalohekwarahi gaudia ita gurigurilaia; unai be ita sibona eda guriguri lalonai ita gwauraia diba. Bona taunimanima vairanai ita guriguri neganai, hehuni herevadia do ita gwauraia lasi.
19. Keristani heboudia ai ta ia guriguri neganai, edena bamona ita kara be namo?
19 Ma ta ese ita dainai ia guriguri neganai, namona be eda kara amo ita hahedinaraia ita be ‘Dirava ita gari henia.’ (1 Pet. 2:17) Keristani heboudia ai kara haida be maoro lasi, to gabu ma ta bona nega ma ta ai ia be kerere lasi. (Had. 3:1) Hegeregere, guriguri lalonai reana ta ia ura ibounai be imana do idia dogoatao. Unai ese tadikaka taihu haida o iseda hahediba herevadia idia diba lasi kamonai taudia do ia hahekwakwanaia diba. Guriguri lalonai headava taudia haida be mai hemataurai ida imana idia dogoatao, to bema idia rosia heheni bona tadikaka taihu haida ese unai idia itaia, idia do ia hahekwakwanaia diba. Do idia laloa unai headava taudia be Iehova idia matauraia lasi, to sibodia edia ura idia laloa bada. Iehova ita matauraia dainai, namona be ‘gau ibounai do ita karaia Dirava hanamoa totona’ bona ta ena lalona ia veria o ia hahekwakwanaia karana ita dadaraia.—1 Kor. 10:31, 32; 2 Kor. 6:3.
Dahaka Totona Ita Guriguri?
20. Roma 8:26, 27 ena anina be dahaka?
20 Nega haida, reana ita sibona eda guriguri lalonai ita diba lasi dahaka do ita herevalaia. Paulo ia gwau: “Ita diba ita guriguri be namo, to ita diba lasi dahaka do ita gurigurilaia. Iseda kudouna ai ita taitai bona ita hereva diba lasi. Unai negadia ai, lauma helaga ese Dirava ia noia ita ia durua totona. Dirava ese taunimanima edia kudouna ia tahua bona lauma helaga amo idia vara herevadia edia anina ia lalopararalaia.” (Roma 8:26, 27, NW ) Iehova ese tatau haida ia abia hidi Baibel lalonai guriguri momo idia torea totona. Unai guriguri herevadia ia abia dae hegeregere idia be iseda guriguri bamona bona ia haerelaia. Dirava be ita ia diba bona ena lauma helaga amo idia torea guriguri edia anina ia lalopararalaia. Lauma helaga be ita totona Iehova ia “noia” neganai, Ia ese iseda guriguri ia haerelaia diba. To, Dirava ena Hereva ita duahia momo neganai, do ita diba dahaka gaudia totona do ita guriguri.
21. Stadi iharuana ai dahaka do ita stadilaia?
21 Vadaeni, iseda stadi amo ita itaia, iseda guriguri ese idia hahedinaraia ita be edena bamona taudia: Ita be Iehova ita tura henia namonamo bona iena Hereva ita badinaia eiava lasi. (Iam. 4:8) Stadi iharuana ai, ita ese Baibel ai idia noho guriguri haida do ita stadilaia. Edena dala ai unai guriguri ita stadilaia karana ese ita do ia durua iseda guriguri dalana Dirava dekenai ita hanamoa totona?
Edena Bamona Do Oi Haere?
• Iehova ita guriguri henia neganai, edena kara ita hahedinaraia be namo?
• Dahaka dainai eda tadikaka taihu totona ita guriguri be namo?
• Edena dala ai iseda guriguri dalana ese iseda lalohadai bona kara ia hahedinaraia?
• Keristani heboudia ai guriguri idia gwauraia neganai, edena bamona kara ita hahedinaraia be namo?
[Study Questions]
[Picture on page 4]
Oi be hanaihanai Iehova oi hanamoa bona tanikiu henia, a?
[Picture on page 6]
Namona be Keristani heboudia ai guriguri lalonai, eda kara amo Iehova ita matauraia