Duahia Taudia Edia Henanadai

Aonega Herevadia 24:27 amo dahaka ita dibaia?

Aonega Herevadia ia torea tauna ese tau matamata ta dekenai inai sisiba ia henia: “Oiemu tano hanamoa gaukara do oi haorea, bona oiemu uma gabuna do oi abia hegaegae. Unai murinai, oiemu noho rumana do oi haginia.” Unai siri ena anina be dahaka? Ta ia do headava lasi o ia sibona ena ruma bese ia do hamatamaia lasi neganai, ia hegaegae namonamo guna be namo, badina ia diba unai be maduna badadia.

Baibel negadiai, bema tau ta be ia ura ‘ruma do ia haginia,’ o ia headava bena ruma bese ta ia havaraia, ia sibona ia nanadaia guna, ‘Lau hegeregere egu adavana bona gabeai do ai havaraia natudia lau naria bona durua totona, a?’ Ruma bese ta ia do hamatamaia lasi neganai, iena maduna be uma gabu do ia karaia bona uhe do ia hadoa. Unai dainai, Baibel ta (Today’s English Version) lalonai Aonega Herevadia 24:27 be inai bamona idia torea: “Emu ruma oi do haginia lasi bona ruma bese oi do hamatamaia lasi neganai emu uma idia hegaegae guna, bona oi diba momokani tauanina durua gaudia oi abia diba.” Hari inai negai, unai hakaua herevana be mai anina bada, a?

Oibe. Gau badana be ia ura headava tauna be unai maduna totona ia hegaegae namonamo. Bema ena tauanina ia goada, vadaeni do ia gaukara be namo. Oibe, namona be tau ia gaukara goada ena ruma bese dekenai tauanina durua gaudia bona gau ma haida ia henia totona. Baibel ese ia hahedinaraia, bema tau ta ese ena ruma bese ia ubua lasi, edia hemami ia laloa lasi, bona Iehova ena sivarai o Baibel amo idia ia durua lasi, iena dika ese abidadama lasi tauna ena dika ia hereaia! (1 Tim. 5:⁠8) Unai dainai, bema tau matamata ta be headava totona ia hegaegae, namona be inai henanadai ia henia: ‘Lau hegaegae namonamo vadaeni egu ruma bese edia tauanina durua gaudia lau henia totona, a? Lau hegaegae namonamo vadaeni egu ruma bese ena tomadiho karadia lau gunalaia totona, a? Egu ruma bese ena stadi be hanaihanai do lau hakaua, a?’ Baibel be unai maduna badadia ia herevalaia danu.​​—⁠Deu. 6:​6-8; Efe. 6:⁠4.

Unai dainai, namona be adavana ia tahua tau matamata ese Aonega Herevadia 24:27 ena hakaua herevana ia laloa namonamo. Unai hegeregerena, namona be hahine matamata be ia sibona ia nanadaia, ‘Lau hegaegae vadaeni headava hahine bona sina ena maduna lau huaia totona, a?’ Danu, bema headava matamata tau bona ena hahine idia ura natudia idia havaraia, vadaeni unai bamona henanadai idia laloa be namo. (Luka 14:28) Bema Dirava ena taunimanima ese unai bamona hakaua herevadia idia badinaia, unai ese idia ia durua diba idia lalohisihisi lasi to ruma bese ena mauri namona idia moalelaia totona.

[Blurb on page 12]

Tau matamata ese edena bamona henanadai ia henia be namo?