“Lohiabada be Egu Goada”

 

Joan Coville ese ia sivarailaia

Lau be July 1925, Huddersfield, England dekenai lau vara. Emai ruma bese dekenai lau be sibona lau vara, bona mai egu gorere. Nega momo egu tamana ia gwau, “Bema lai ia toa negadiai, do oi gorere.” Iena hereva be momokani!

LAU maragi neganai, nega momo dubu gunalaia taudia be maino totona idia guriguri, to Tanobada Tuarina Iharuana ia vara neganai, idia be kwalimu totona idia guriguri. Unai dainai, gau momo dekenai lau daradara. Unai nega ai, emai gabu dekenai ia noho Iehova ena Witnes hahinena, Annie Ratcliffe, be ai ia vadivadi henia.

Hereva Momokani Lau Dibaia

Annie ese Salvation bukana be ai dekenai ia henia, bona egu sinana ia boiria iena ruma dekenai Baibel idia herevalaia totona. * Egu sinana be lau ia hamaoroa ia ida do lau lao totona. Unai negai lau kamonai gaudia haida lau do laloatao noho. Hegeregere, idia be Iesu ena mauri davalaia boubouna idia herevalaia, bona unai hebou lau moalelaia. Unai hebou lalonai, egu henanadai momo edia haere lau abia. Wiki gabena ai, Annie ena ruma dekenai ai lao lou. Unai negai, idia be Iesu ese ia perovetalaia nega dokona ena toa idauidau idia herevalaia. Lau bona egu sinana be tanobada ai idia vara gau dikadia ai itaia neganai, ai laloparara ai dibaia gaudia be momokani. Unai dina tamona ai, lau bona sinana idia boiria Kingdom Hall dekenai ai lao totona.

Kingdom Hall ai, lau be painia haida lau hedavari henia, bona idia ta be Joyce Barber (hari ena ladana be Ellis), ia bona ena adavana, Peter, be London Betele ai idia do gaukara noho. Lau itaia momo be painia gaukara idia karaia. Unai dainai, maoromaoro haroro gaukara lau karaia bona hua ta ta ai hora 60 lau abia, ena be lau do sikuli noho.

Hua 5 murinai, February 11, 1940 ai, lau bona egu sinana be Bradford ena soun hebouhebou (hari ita gwauraia sekit hebouhebouna) dekenai bapatiso ai abia. Egu tamana be emai tomadiho matamatana ia matauraia, to ia be Witnes tauna ta ai ia lao lasi. Lau bapatiso negana ai, dala haroro gaukara idia hamatamaia. Lau be magasin bona saini bodi lau dogoatao, bona taunimanima dekenai lau hahedinaraia. Saturday ta ai, tadikaka ese lau idia hamaoroa taunimanima momo idia noho gabuna dekenai lau gini totona. To, lau gari badina egu sikuli turadia ibounai be lau gini gabuna dekenai idia raka lao raka mai!

Lagani 1940 ai, aiemai kongrigeisen (unai negai idia gwauraia “kampani”) be kahana rua dekenai idia haria. Unai ia vara neganai, egu turana ibounai be kongrigeisen iharuana dekenai idia lao. Lau ese unai kara be hakaua naria tauna (unai negai idia gwauraia “kampani naria tauna”) dekenai lau herevalaia. Bona tadikaka ia  gwau, “Bema oi ura inai kongrigeisen ai matamata taudia idia noho, vadaeni oi lao bona matamata taudia oi haroro henia.” Vadaeni unai tadikaka ena hereva hegeregerena lau karaia! Daudau lasi murinai, lau be Elsie Noble lau davaria. Ia be hereva momokani ia abia dae bona egu turana namona ai ia lao.

Painia Gaukara Bona Ena Hahenamo

Sikuli lau haorea murinai, lau be bisinesi ta ai akaun gaukara lau karaia. To, painia taudia ese idia abia moalena lau itaia neganai, lau ura dikadika unai gaukara amo Iehova lau hesiai henia. May 1945 ai, lau be spesel painia gaukara lau hamatamaia. Egu dina ginigunana painia gaukara lau karaia neganai, medu bada herea ia diho. To, haroro gaukara lau moalelaia, medu lau laloa lasi. Dina ta ta ai, basikele amo lau haroro loaloa karana ese egu tauanina ia hagoadaia. Ena be egu tauanina ena metau be 42 kilogram sibona, to egu painia gaukara lau hadokoa lasi. Lagani momo lalonai, lau mamia Iehova “be egu goada.”​​—⁠Sal. 28:⁠7.

Lau be spesel painia dainai, Witnes taudia idia noho lasi gabudia dekenai lau idia siaia lao, bona lau ura unuseniai kongrigeisen matamatadia lau hamatamaia. Matamanai be England dekenai lagani toi lau noho, bena unai murinai, Ireland dekenai lau lao bona lagani toi lau noho. Lisburn, Ireland dekenai, painia gaukara lau karaia neganai, tau ta lau stadi henia bona ia be Protestant dubu ena pasto ia durua tauna. Ia ese Baibel amo ia dibaia hereva momokanidia be ena dubu taudia dekenai ia harorolaia. To, dubu taudia haida be dubu gunalaia taudia dekenai unai tau idia samania. Vadaeni, dubu gunalaia taudia be unai tau idia nanadaia dahaka dainai dubu dekenai unai gaudia ia hadibaia. Unai tau ia gwau, ‘Lau be Keristani tauna dainai, namona be dubu taudia lau hamaoroa lau ese lagani momo lalonai hahediba hereva koikoi momo be idia dekenai lau hadibaia.’ Herevana unai tau be ena ruma bese taudia ese idia dagedage henia, to Iehova dekenai ena mauri ia gwauhamatalaia bona Iena hesiai gaukara ia karaia ela bona ia mase.

Egu spesel painia gaukara iharuana be, Ireland ena siti, Larne dekenai lau karaia, bona unuseniai wiki 6 lalonai lau sibona lau gaukara, badina egu painia turana be lagani 1950 ena Dirava Ena Orea Ia Bada Ia Lao Hebouhebouna totona, New York dekenai ia lao. Lau sibona lau gaukara be mai ena hekwarahi. Lau ura bada unai hebouhebou dekenai lau lao. To, unai wiki 6 lalodiai, Ireland dekenai haroro gaukara amo ekspiriens namodia haida lau davaria. Hegeregere, tau buruka ta lau davaria, bona ia be lagani 20 gunanai iseda buka ta ia abia. Unai lagani 20 lalonai, ia be unai buka ia duahia loulou dainai, unai buka ena hereva ibounai ia laloatao. Ia bona ena natuna merona bona kekenina be hereva momokani idia abia dae.

Gilead Sikuli ai Diba Lau Abia

Lagani 1951 ai, lau bona England amo painia taudia 10 be South Lansing, New York ai, Gilead Sikuli ena klas namba 17 dekenai ai lao. Unai hua lalodiai, sikuli amo lau dibaia gaudia lau moalelaia bada! Unai negadiai, kongrigeisen ai taihu be Tiokratik Haroro Sikuli dekenai tok idia henia lasi, to Gilead Sikuli dekenai ai be tok ai henia. Ai gari dikadika! Egu tok ginigunana lau henia neganai, egu imana bona pepa ia heudeheude. Hadibaia  tauna, Tadikaka Maxwell Friend be mai kiri ida ia gwau: “Idia manada taudia be tok ena matamanai sibona idia gari, to oi be tok ena matamanai oi gari ela bona tok ena dokona.” Unai sikuli lalonai, ai ibounai be klas vairanai tok henia karana ai hanamoa. Daudau lasi murinai emai sikuli ia ore, bona stiuden ibounai be tano ta ta dekenai idia siaia lao. Lau be Thailand dekenai idia siaia lao!

“Kiri Tanona”

Lau laloa Iehova ena harihari gauna ta be, Astrid Anderson ia siaia lau ida Thailand dekenai misinari gaukara ai karaia totona. Kago udaia bouti ta dekenai ai guia bona wiki 7 lalonai ai heau. Thailand ena siti badana, Bangkok dekenai ai ginidae neganai, maketi dekenai taunimanima be momo herea, bona sinavai maragidia momo idia noho, unai amo taunimanima be vanagi amo idia lao bona idia mai. Lagani 1952 ai, Thailand dekenai pablisa ibounai be 150.

Thai gado ai idia hahanaia Gima Kohorona be nega ginigunana ai itaia neganai, ai laloa unai gado dibaia totona be do ia auka. Momokani, hereva maorona ai gwauraia totona be mai ena hekwarahi. Hegeregere, inai hereva khaù gwauraia dalana ena regena oi habadaia neganai, ena anina be “raisi,” to khaù gwauraia dalana ena regena oi hadihoa neganai, ena anina be “sivarai.” Unai dainai, nega ginigunana taunimanima ai haroro henia neganai, ai gwau lasi “sivarai” namona ai mailaia, to ai gwau ai be “raisi” namona ai mailaia! Nega momo ai kiri, to gabeai, metairametaira unai gado ai manadalaia.

Thailand taudia be taunimanima namodia. Unai dainai, Thailand idia gwauraia Kiri Tanona. Emai misinari gaukara ginigunana be Khorat (hari idia gwauraia Nakhon Ratchasima) dekenai ai karaia, bona unuseniai lagani rua ai noho. Gabeai, Chiang Mai dekenai ai idia siaia lao. Thailand taudia momo be Buddhist tomadiho idia lao, bona Baibel idia diba namonamo lasi. Khorat dekenai, lau be pos opesi biaguna lau stadi henia. Ia ida Israela ena bese kwarana, Aberahamo ai kikilaia. To, unai tau be Abraham ma ta ena ladana ia diba dainai, Aberahamo lau herevalaia neganai, ia be ena kwarana ia hamarerea, unai amo ia hahedinaraia egu hereva ia abia dae. Gabeai lau laloparara, lau be Baibel ese ia gwauraia Aberahamo lau kikilaia to pos opesi biaguna ia laloa lau be United States edia presiden gunana ta, Abraham Lincoln lau herevalaia!

Ai moale, badina Thailand ai kudou-maoro taudia dekenai Baibel ena hereva ai hadibaia sibona lasi, to danu, idia ese ai dekenai unuseniai ai noho dalana idia hadibaia. Unai be heduru namona, badina Khorat dekenai misinari rumana ginigunana dekenai ai noho neganai, paua bona ranu be lasi. Unai bamona gabudia dekenai, ‘aiemai gau be momo, o hegeregere lasi neganai, emai lalona ia namo noho.’ Aposetolo Paulo bamona, ‘siahu ia henia Diravana dainai, ai be mai emai goada gau iboudiai karaia totona.’​​—⁠Fili. 4:​12, 13; BHğ.

Turana Matamatana Bona Gabu Matamatana

Lagani 1945 ai, lau lao London dekenai lau loaloa totona. Unuseniai, lau be painia bona Betele tadikaka taihu haida ida British ena miusiam ta dekenai ai lao. Allan Coville be ai ida ia mai danu. Ia be Gilead Sikuli ena klas namba 11 dekenai ia lao murinai, ia idia siaia lao France dekenai, bona unai murinai Belgium dekenai ia lao. * Gabeai, lau be Thailand dekenai misinari gaukara lau do karaia lalonai, Allan ese lau ia noia ia lau adavaia totona, bona lau abia dae.

Ai ruaosi be July 9, 1955 ai, Brussels, Belgium dekenai, ai headava. Lau ura emai headava ena holide totona Paris dekenai ai lao be namo. Unai dainai, Allan be palani ia karaia Paris dekenai ai lao, bona wiki gabena ai unuseniai do idia karaia hebouhebouna dekenai ai lao totona. To, Paris dekenai ai ginidae neganai, maoromaoro tadikaka ese Allan idia noia hebouhebou ibounai lalonai tok do ia hahanaia totona. Dina ta ta ai, ai be daba momokani ai lao, bona hanuaboi momokani emai noho gabuna dekenai ai giroa lou. Paris dekenai aiemai headava ena holide lau moalelaia, to nega momo Allan be lau kahirakahira ia noho lasi badina ia be platfom dekenai ia gini bona tok ia henia! To, lau moale badina lau adavaia tauna be tadikaka taihu ia hesiai henidia, bona lau diba momokani Iehova be emai headava lalonai ia noho.

 Danu, ai headava murinai, lau be haroro gabuna matamata dekenai lau lao, unai be Belgium dekenai. Lau diba Belgium be tuari gabuna, to gabeai unai gabu dekenai lau lao neganai, lau itaia unai gabu taudia momo be maino idia ura henia. To danu, French gado lau diba be namo, badina unai tano ena saut kahanai idia noho taudia ibounai be unai gado idia herevalaia.

Lagani 1955 ai, Belgium dekenai pablisa ibounai be 4,500 bamona. Kahirakahira lagani 50 lalodiai, lau bona Allan be Betele bona loaloa naria gaukarana ai karaia. Lagani rua mai kahana lalonai, ai be ororo gabudiai, medu negadiai bona siahu negadiai basikele amo ai loaloa. Lagani momo lalodiai, hanuaboi negadiai, ai be tadikaka taihu edia ruma idauidau 2,000 mai kahana dekenai ai mahuta! Nega momo lau hedavari henidia tadikaka taihu momo edia tauanina be goada momokani lasi, to idia gaukara goada Iehova ena hesiai gaukara idia karaia noho totona. Edia haheitalai namona ese lau ia hagoadaia, egu hesiai gaukara lau rakatania lasi totona. Kongrigeisen ai vadivadi henidia ena wiki ta ta edia dokonai, ai be hanaihanai lalogoada ai abia. (Roma 1:​11, 12) Allan be egu turana namona. Oibe, Hadibaia Tauna 4:​9, 10 ena hereva be momokani, ia gwau: “Tau rua ese tau tamona idia hereaia noho, . . . badina bema ta ia moru neganai, iena turana ese do ia abia isi”!

‘Iehova Ena Goada’ Dekenai Lau Abia Hahenamo Idauidau

Lagani momo lalodiai, lau bona Allan ai moale bada badina ma haida ai durua Iehova idia hesiai henia totona. Hegeregere, lagani 1983 ai, Antwerp ena French kongrigeisen ai vadivadi henia, bona Witnes ruma bese ta ese ai idia abia dae idia ida ai noho totona. Zaire (hari idia gwauraia Democratic Republic of Congo) amo ia mai tadikaka matamatana ta ladana, Benjamin Bandiwila be idia ida ia noho danu. Benjamin be Belgium dekenai ia lao, sikuli badadia dekenai ena diba ia habadaia totona. Ia ese ai ia hamaoroa: “Lau be emui mauri namona lau ura henia, badina umui be mai emui lalona ibounai ida Iehova ena hesiai gaukara umui karaia.” Allan ia gwau: “Oi gwau emai mauri namona oi ura henia; to oi be oi hekwarahi tanobada oi hesiai henia totona. To, namona be oi diba oi be unai gau rua edia hesiai gaukara oi karaia diba lasi.” Allan ena hereva ese Benjamin ia durua, ena mauri ia lalohadailaia namonamo totona. Gabeai, Benjamin be Zaire dekenai ia giroa lou neganai, painia gaukara ia hamatamaia, bona hari, ia be Brens Komiti tauna ta.

Lagani 1999 ai, lauegu gadona dekenai toto ta ia vara dainai, opereisen lau abia. Unai nega amo, egu tauanina ena metau be 30 kilogram sibona. Momokani, lau be “hodu” manokana ta bamona. To, Iehova lau tanikiu henia, badina Ia ese lau dekenai “siahu badana” ia henia. Lau be opereisen lau abia murinai, Iehova ese lau ia hagoadaia dainai, sekit gaukara dekenai Allan lau bamoa lou. (2 Kor. 4:⁠7) March 2004 ai, Allan ia mase. Allan lau reaia bada, to lau diba Iehova ese ia laloatao bona unai ese lau dekenai goada ia henia.

Hari, ena be egu mauri lagani be 83, to nega momo lagani 63 lalonai lau karaia ful-taim hesiai gaukara lau laloa. Lau be haroro gaukara lau do goadalaia noho, egu ruma ai be Baibel stadi ta lau karaia bona dina ta ta ai dala ia kehoa negadiai, ma haida dekenai Iehova ese do ia karaia gau namodia lau harorolaia. Nega haida lau gwau, ‘Bema lagani 1945 ai painia gaukara lau hamatamaia lasi, lau be edena bamona maurina do lau noholaia?’ Unai negadiai, lau be mai egu gorere dainai, painia gaukara lau karaia diba lasi. To lau moale, badina egu matamata negana lau gaukaralaia painia gaukara lau karaia totona! Egu mauri lalonai lau mamia, bema Iehova ita atoa guna, Ia be iseda goada abia gabuna ai do ia lao.

[Footnotes]

[Picture on page 18]

Lau bona egu misinari turana, Astrid Anderson (idiba kahanai)

[Picture on page 18]

Lagani 1956 ai, loaloa naria gaukara dekenai, lau bona egu adavana

[Picture on page 20]

Lagani 2000 ai, Lau bona Allan