Iehova be Ita Ia Itaia Noho, Ita Ia Hagoadaia Totona

“[Iehova] ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.”​​—⁠2 SIV. 16:⁠9.

1. Dahaka dainai Iehova be ita ia itaia noho?

IEHOVA be iseda Tamana goevadaena. Ia be ita ia diba namonamo dainai, “iseda laloa ibounai bona iseda ura ibounai ia diba.” (1 Siv. 28:⁠9) Dirava be ita ia itaia neganai, Ia be iseda kerere ia tahua lasi. (Sal. 11:4; 130:⁠3) To, mai lalokau ida ia ura iseda hetura karana ia ida o mauri hanaihanai abia dalana idia hadikaia diba gaudia amo ita ia gimaia.​​—⁠Sal. 25:​8-​10, 12, 13.

2. Iehova ese ena siahu ia gaukaralaia daidia ia hagoadaia totona?

² Iehova be siahu ibounai Diravana bona gau ibounai ia itaia diba. Unai dainai, Ia idia badinaia taudia be metau idia davaria bona heduru  totona idia boiboi neganai, Ia ese ia durudia. Sivarai Iharuana 16:9 ia gwau: “[Iehova] ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.” Unai siri amo ita itaia, Iehova ese ena siahu ia gaukaralaia mai edia kudouna ibounai bona mai momokani ida Ia idia hesiai henia taudia ia hagoadaia totona. To, koikoi taudia dekenai unai bamona ia karaia lasi.​​—⁠Ios. 7:​1, 20, 21, 25; Aon. 1:​23-​33.

Dirava ida Oi Raka

3, 4. ‘Dirava ida ita raka’ ena anina be dahaka, bona edena Baibel sivaraidia ese ita idia durua unai ita lalopararalaia totona?

³ Momo idia laloa, taunimanima be tanobada bona guba ia Havaraia Diravana idia tura henia diba lasi bona laulau dalanai Ia ida idia raka diba lasi. To, Iehova ia ura ita be Ia ida do ita raka hebou. Baibel ia hahedinaraia Enoka bona Noa be ‘Dirava ida idia raka.’ (Gen. 5:​24; 6:​9, NW ) “Mose ena lalona ia goada noho, ita itaia diba lasi Diravana, be Mose ese matana dekenai ia itaia bamona.” (Heb. 11:27) King Davida be mai manau ida iena guba Tamana badinai ia raka bona ia gwau: “Iehova be . . . egu idibana kahana ai ia noho dainai, do lau marere lasi.”​​—⁠Sal. 16:​8, BHğ.

⁴ Oibe, ita be Iehova ena imana ita dogoatao bona ia ida ita raka diba lasi. To, laulau dalanai unai bamona ita karaia diba. Edena dala ai? Salamo torea tauna, Asapa ia gwau: “Lau be nega ibounai oi kahirakahira lau noho, bona oi ese egu imana oi dogoatao noho. Oi ese oiemu sisiba dekena amo lau oi hakaua noho.” (Sal. 73:​23, 24) Ita gwau diba, ita be Iehova ida ita raka bema iena Hereva bona “hesiai tauna mai ena kamonai, bona mai ena kara maoromaoro” amo idia mai sisiba herevadia ita badinaia namonamo.​​—⁠Mat. 24:45; 2 Tim. 3:​16.

5. Edena dala ai Iehova be lalokau tamana ta bamona Ia idia abidadama henia taudia ia itaia noho, bona Iehova be edena bamona ita laloa be namo?

⁵ Iehova be Ia ida idia raka taudia ia lalodia bada dainai, tama ta bamona idia ia itaia, anina be idia ia naria, ia durua bona ia hadibaia. Dirava ia gwau: “Lau ese oiemu raka dalana oi dekenai do lau hadibaia. Lau ese oi do lau hakaua, bona sisiba oi dekenai do lau henia.” (Sal. 32:⁠8) Vadaeni, namona be sibona oi nanadaia: ‘Laulau dalanai, lau be Iehova ena imana lau dogoatao bona ia ida lau raka, ena aonega herevadia lau kamonai bona lau diba ia be lau ia laloa bada, a? Lau diba Iehova ia noho dainai, egu lalohadai, hereva bona kara lau naria namonamo, a? Bona kerere ta lau karaia neganai, Iehova be kara auka Tamana ta bamona lau laloa lasi, to lau itaia ia be mai ena hebogahisi ida helalo-kerehai taudia ia abia dae bona ia ura ia tura henidia, a?’​​—⁠Sal. 51:⁠17.

6. Edena dala ai Iehova be iseda tama sina bamona lasi?

⁶ Nega haida, ita be dala kererena ita ura abia hidi gwauraia neganai, Iehova ia mai ita ia durua totona. Hegeregere, ia itaia iseda koikoi bada kudouna be gau dikana ta ia ura henia. (Ier. 17:⁠9) Unai nega ai, Ia be iseda kudouna ia itaia dainai, karaharaga kara ta ia karaia diba. Iseda tama sina be unai bamona idia karaia diba lasi. (Sal. 11:4; 139:4; Ier. 17:10) Mani, Ieremia ena seketere tauna bona turana namona Baruku dekenai Dirava ese ia karaia karana mani ita laloa.

Baruku Dekenai Iehova be Tamana Namona

7, 8. (a) Baruku be daika, bona ena kudouna lalonai dahaka lalohadai kererena ia abia? (b) Edena dala ai Iehova be tama ta bamona Baruku ia durua?

⁷ Baruku be Ieremia ena seketere tauna bona idia ruaosi be hesiai gaukara aukana ta idia karaia​​—⁠Iehova ena hahemaoro herevadia be Iuda taudia dekenai idia harorolaia. (Ier. 1:​18, 19) Baruku be ladana bada ruma besena amo ia mai, bona nega ta ia be sibona totona “gau namo herea” ia tahua. Reana ia ura dagi badana ta o kohu momo ia abia. Herevana dahaka ia ura, to Iehova ia itaia Baruku ena kudouna ai ura dikana ia vara matamaia noho. Karaharaga, Iehova be Ieremia amo Baruku ia hereva henia, ia gwau: “Oi be inai bamona oi hereva noho, oi gwau, ‘Lau madi o, lau be dika vadaeni, badina Lohiabada ese egu hisihisi ena latanai lalohisihisi ma ia atoa kau vadaeni, bona lau tai noho, ia mai bona lau hesiku vadaeni, bona laga-ani sisina lau davaria diba lasi.’ ” Bena Dirava ia gwau: “To  oi ese gau namo herea, oi sibona totona, oi tahua noho, a? Lau Lohiabada lau gwau: Inai bamona tahua kara do oi karaia lasi.”​​—⁠Ier. 45:​1-5.

⁸ Iehova be mai badu ida Baruku ia gwau henia lasi, to tama ta bamona mai hebogahisi ida ia sisiba henia. Dirava ia itaia, ena be Baruku ese unai gaudia ia ura henia, to ena kudouna be ia dika lasi. Danu, Iehova ia diba Ierusalema bona Iuda hanuadia be kahirakahira do idia hadikaia ore bona Ia ura lasi unai negai Baruku ena abidadama do ia manoka. Unai dainai, Dirava ese iena hesiai tauna ia durua totona ia hadibaia, ‘Ia ese taunimanima ibounai dekenai dika do ia havaraia’ bona ia hamaoroa ia mauri totona do ia aonega be namo. (Ier. 45:⁠5) Unai be hegeregere Dirava gwau: ‘Baruku e, mani oi laloa namonamo. Kahirakahira Iuda bona Ierusalema do lau hadikaia ore. Namona be egu hereva oi badinaia bona do oi mauri! Lau ese oi do lau gimaia.’ Iehova ena hereva ese Baruku ena kudouna ia hamarerea dainai, dala maorona ia abia hidi bona lagani 17 murinai Ierusalema ena dika amo ia roho mauri.

9. Paragraf lalonai idia noho henanadai be edena bamona do oi haerelaia?

⁹ Baruku ena sivarai oi laloa neganai, mani inai henanadai bona siri haida oi laloa dobu: Dirava ese Baruku ia kara henia dalana amo ia hedinarai Iehova be edena bamona Diravana, bona ena hesiai taudia be edena bamona ia lalodia? (Heberu 12:​9 duahia.) Ita be nega dokona ai ita noho dainai, Dirava ese Baruku dekenai ia gwauraia sisiba herevana bona Baruku ena kara amo dahaka ita dibaia? (Luka 21:​34-​36 duahia.) Ieremia ia karaia bamona, elda taudia be edena dala ai idia hahedinaraia Iehova be ena hesiai taudia laloa bada?​​—⁠Galatia 6:1 duahia.

Natuna be Tamana Ena Lalokau Ia Tohotohoa

10. Edena dala ai Iesu be ia hegeregere Keristani kongrigeisen ena Kwarana ena maduna ia huaia totona?

¹⁰ Gunaguna, peroveta taudia bona hesiai taudia ma haida amo Iehova ese ena lalokau be iena taunimanima dekenai ia hahedinaraia. Hari inai negai, kongrigeisen ena Kwarana, Iesu Keriso amo unai lalokau ita itaia diba. (Efe. 1:​22, 23) Unai dainai, Apokalupo bukana be laulau dalanai ia hahedinaraia Iesu be mamoe mai ena matana 7 bona “unai matana 7 be Dirava ena lauma 7, tanobada ena kahana ibounai dekenai ia siaia.” (Apok. 5:⁠6) Oibe, Iesu be Dirava ena lauma helaga ia abia dainai, ia be gau ibounai ia lalopararalaia namonamo. Iseda kudouna lalonai idia noho gaudia ia itaia diba danu bona gau ta ia reaia lasi.

11. Iesu ena dagi ladana ta be dahaka, bona edena dala ai ia ese Tamana ena lalohadai ia hahedinaraia?

 ¹¹ Iehova bamona, Iesu be guba ai ia noho pulisi tauna ta bamona lasi. Iesu be mai lalokau ida ita ia itaia noho. Iena dagi ladana ta be, “Hanaihanai Noho Tamana,” bona unai ese ia hahedinaraia, idia abidadama henia taudia dekenai mauri hanaihanai do ia henia. (Isa. 9:⁠6) Bona danu, Keriso be Keristani kongrigeisen ena Kwarana dainai, lo Keristani elda taudia ia gaukaralaia heduru idia ura taudia idia hagoadaia o sisiba henia totona.​​—⁠1 Tes. 5:​14; 2 Tim. 4:​1, 2.

12. (a) Asia Minor dekenai ia siaia revareva ese Iesu ena kara dekenai dahaka idia hahedinaraia? (b) Edena dala ai elda taudia ese Dirava ena mamoe dekenai Keriso ena kara idia hahedinaraia?

¹² Keriso be Asia Minor ai idia noho kongrigeisen 7 dekenai ia siaia revareva ese ia hahedinaraia, ia be ena mamoe ia lalodia bada. (Apok. 2:1–​3:​22) Unai revareva lalodiai, Iesu ia hahedinaraia kongrigeisen ta ta dekenai idia vara gaudia ia diba bona ia murinai idia raka taudia ia laloa bada. Hari inai negai unai bamona ia karaia be gau badana, badina Apokalupo ena matahanai be “Lohiabada ena Dina” ai ia guguru. * (Apok. 1:​10) Nega momo Keriso ena lalokau be elda taudia amo ia hedinarai, idia be kongrigeisen lalonai mamoe naria gaukarana idia karaia. Ia ese elda taudia ia gaukaralaia kongrigeisen taudia idia durua, hagoadaia bona sisiba henia totona. (Efe. 4:8; Kara 20:28; Isaia 32:​1, 2 duahia.) Oi itaia edia gaukara idia karaia neganai, oi abia dae Keriso be oi ia laloa bada, a?

Heduru Nega Korikori Ai

13-15. Dirava be edena dala ai iseda guriguri ia haerelaia diba? Ekspiriens haida gwauraia.

¹³ Nega ta mai emu lalona ibounai ida heduru totona oi guriguri bena lo tadikaka ta ese oi ia vadivadi henia bona oi ia durua, a? (Iam. 5:​14-​16) Eiava hebou dekenai tok ta amo eiava iseda magasin ta amo heduru oi abia, a? Nega momo Iehova be unai dala amo iseda guriguri ia haerelaia. Hegeregere, elda ta be tok ta ia henia murinai, taihu ta ese ia hereva henia, unai taihu be pura gunanai ma haida ese ia idia kara namo henia lasi. Unai taihu be iena hekwakwanai dainai ia maumau lasi, to tadikaka ese siri namodia amo point namodia ia hahedinaraia dainai tadikaka ia tanikiu henia. Unai siri be taihu ena hekwakwanai idia herevalaia dainai, ia idia hagoadaia bada. Unai hebou dekenai ia lao dainai, ia moale bada!

¹⁴ Guriguri karana amo heduru idia abia dibura taudia toi edia ekspiriens mani oi laloa. Idia be dibura ruma lalonai Baibel idia stadilaia bena bapatiso lasi pablisa ai idia lao. Dibura rumana ai, dagedage karana ta ia vara dainai, dibura taudia ibounai dekenai gau haida idia taravatua. Unai dainai dibura taudia idia gwau-edeede, bona idia gwau edia badu hahedinaraia totona, daba ena aniani murinai edia mereki do idia henia lou lasi. Unai bapatiso lasi pablisa toi be dahaka do idia karaia? Bema unai gwau-edeede karana lalonai idia vareai, idia be Iehova ena sisiba Roma 13:1 dekenai do idia utua. To bema idia vareai lasi, dibura taudia ma haida ese do idia dagedage henidia.

¹⁵ Idia toi be ta ta dekenai idia herevahereva diba lasi dainai, idia ta ta be aonega totona Dirava idia guriguri henia. Unai daba ai, idia davaria unai hekwakwanai hanaia totona idia toi be lalohadai tamona idia abia​​—⁠daba ena aniani do idia abia lasi. Gadi taudia idia mai mereki idia  gogoa gwauraia neganai, unai tatau toi be mereki lasi. Idia moale bada badina ‘guriguri ia kamonai tauna’ be idia kahirakahira ia noho!​​—⁠Sal. 65:⁠2.

Mai Moale ida Vaira Negana Ita Naria

16. Edena dala ai haroro gaukara amo Iehova ia hahedinaraia, ia be mamoe bamona taudia ia laloa bada?

¹⁶ Tanobada hegegemadai haroro gaukarana ese ia hahedinaraia, Iehova be kara maoromaoro taudia ia laloa bada. (Gen. 18:25) Nega momo Iehova be aneru ia gaukaralaidia iena hesiai taudia ia hakaudia lao mamoe bamona taudia dekenai, ena be unai taudia edia noho gabuna be sivarai namona ia do lao lasi. (Apok. 14:​6, 7) Hegeregere, aneru ta amo Dirava ese haroro tauna Filipo ia hakaua lao bona Etiopia ena kwini ena gaukara tauna dekenai Baibel ena hereva edia anina ia hahedinaraia. Vadaeni, dahaka ia vara? Unai tauna ese sivarai namona ia abia dae, ia bapatiso bona Iesu murinai ia raka. *​​—⁠Ioa. 10:14; Kara 8:​26-​39.

17. Dahaka dainai vaira negana totona do ita lalohekwarahi momo lasi?

¹⁷ Inai tanobada ena dokona be ia kahirakahira noho lalonai, Iesu ese ia perovetalaia “hisihisi ena matamana sibona” negana do ia vara noho. (Mat. 24:⁠8) Hegeregere, taunimanima edia namba ia bada ia lao, medu o abata ese aniani idia hadikaia, eiava moni ena siahu ia ore dainai, aniani edia davana ia bada daekau. Moni gaukara davaria be auka bona kampani biagudia be gaukara taudia idia doria hora momo lalonai do idia gaukara totona. Herevana dahaka ia vara, to Iehova ena hesiai gaukara idia atoa guna bona kohu momo idia tahua lasi taudia be do idia lalohekwarahi lasi. Idia diba Dirava ese idia ia lalokau henidia bona idia do ia naria. (Mat. 6:​22-​34) Hegeregere, lagani 607 B.C.E. ai Ierusalema idia hadikaia neganai, Iehova ese Ieremia ia naria ena sivarai ita laloa.

18. Edena dala ai Iehova be Ieremia dekenai ena lalokau ia hahedinaraia?

¹⁸ Babulonia tuari taudia ese Ierusalema idia hagegea negana ena dokona kahana ai, Ieremia be “gima taudia edia ariara magu lalonai idia koua.” Edena bamona aniani ia abia diba? Bema idia koua lasi, ia be ena aniani ia tahua diba. To, ia be dala lasi, badina idia noho taudia be ena inai taudia! To, Ieremia be taunimanima dekenai ia tabekau lasi, ia be Dirava ia abidadama henia, badina Dirava ia gwauhamata vadaeni ia do ia naria. Iehova be iena gwauhamata ia hagugurua, a? Oibe! Dala ia kehoa bona Ieremia be ‘dina ibounai beredi tamona idia henia, ela bona hanua ena beredi ibounai ia ore.’ (Ier. 37:21) Oibe, Ieremia, Baruku, Ebede Meleke bona ma haida be unai hitolo, gorere dikana bona mase negana amo idia roho mauri.​​—⁠Ier. 38:2; 39:​15-​18.

19. Vaira negana ita laloa neganai, iseda lalona ita hadaia dahaka do ita karaia totona?

¹⁹ Oibe, “Lohiabada ese, kara maoromaoro taudia ia naridia noho, bona edia guriguri ia kamonai henia noho.” (1 Pet. 3:​12) Oiemu guba Tamana be oi ia naria bona ia laloa bada dainai oi moale, a? Oi gari lasi bona oi lalohekwarahi lasi, badina oi diba ena matana be oi ia itaia noho, oi ia hagoadaia totona, a? Herevana vaira negana ai dahaka do ia vara, emu lalona oi hadaia Dirava ida do oi raka noho. Ita diba momokani Iehova be tama ta bamona, mai hebogahisi ida ia idia badinaia taudia ia itaia noho.​​—⁠Sal. 32:8; Isaia 41:13 duahia.

[Footnotes]

Anina Oi Gwauraia Diba, A?

• Edena dala ai ita hahedinaraia ita be ‘Dirava ida ita raka’?

• Edena dala ai Iehova ia hahedinaraia Baruku ia lalokau henia?

• Keriso be Keristani kongrigeisen ena Kwarana dainai, edena dala ai ena Tamana ena kara ia hahedinaraia?

• Edena dala ai ita hahedinaraia metau negadia ai, ita be Dirava ita abidadama henia?

[Study Questions]

[Pictures on page 9]

Ieremia ese Baruku dekenai ia hahedinaraia bamona, hari elda taudia idia hahedinaraia Iehova be ita ia laloa bada

[Picture on page 10]

Edena dala ai Iehova be nega korikori ai heduru ia henia?