Duahia Taudia Edia Henanadai

Keristani tauna korikorina be mase guria eiava headava totona dubu ta dekenai ia lao be namo, a?

Tomadiho koikoi karadia lalonai ita vareai karana be Iehova ese ia ura henia lasi bona unai kara ita dadaraia be namo. (2 Korinto 6:14-17; Apokalupo 18:4) Dubu dekenai idia karaia mase guria hebouna be tomadiho karana ta, bona reana Baibel idia hakoikoia herevadia, hegeregere souli ia mase diba lasi herevana bona taunimanima namodia ibounai be guba dekenai idia lao herevana, idia hadibaia. Reana korosi ena saini idia karaia bona pris eiava pasto ida idia guriguri hebou. Dubu dekenai eiava gabu ma ta dekenai idia karaia headava danu, guriguri bona Baibel idia hakoikoia herevadia bona karadia idia karaia diba. Keristani tauna be tomadiho koikoi karadia idia karaia taudia huanai ia noho neganai, unai kara ia dadaraia be auka. Unai bamona taudia huanai ita noho be aonega karana lasi!

Bema Keristani tauna ia laloa unai be ena maduna dubu ta dekenai mase guria hebouna eiava headava dekenai ia lao be edena bamona? Hegeregere, reana abidadama lasi tauna ese ena Keristani adavana ia doria unai bamona nega lalonai ia ida do ia lao. Hahine ese ena adavana do ia bamoa diba bona idia vara gaudia ia itaia sibona, a? Reana hahine ese ena tau ena ura ia matauraia dainai, tau ida do ia lao, to ena lalona ia hadaia tomadiho karadia lalonai do ia vareai lasi. Eiava, reana ena lalona ia hadaia do ia lao lasi, badina ia laloa idia vara gaudia ese ena lalona do idia hametaua diba, bena Dirava ena hakaua herevadia do ia utua. Abia hidi be ia sibona ese do ia karaia. Ia ura hamomokania ena kudouna ia hahisia lasi, ena lalona ena mamina ia goeva totona.​—1 Timoteo 1:19.

Danu, ia do ia durua bada bema ena tau dekenai do ia hahedinaraia ena lalona ena mamina ia namo totona tomadiho karadia lalonai do ia vareai lasi, ane ia abia lasi, bona guriguri idia gwauraia neganai ena kwarana do ia atoa diho lasi. Ena badina ia herevalaia dainai, reana tau do ia laloa ena hahine be unuseniai do ia noho dainai, reana do ia hemarai. Reana ena hahine ia lalokau henia dainai, hahine ia abia dae gaudia ia matauraia dainai, eiava ia ura lasi hahemaraia gauna ta do ia vara dainai, ia laloa ia sibona do ia lao be namo. To bema hahine be ia ida ia lao totona tau ia hereva goada, reana hahine ia lao diba to idia vara gaudia do ia itaia sibona.

Tomadiho rumana ta dekenai ita lao karana ena anina tadikaka dekenai ita laloaboio lasi. Haida edia lalona ena mamina do ia hadikaia, a? Kaivakuku tomadiho henia karana idia dadaraia karana do ia hamanokaia, a? Aposetolo Paulo ia gwau: “Gau namodia edia toana do umui diba. Vadaeni mai goeva danu, bona kerere lasi do umui noho, ela bona Keriso do ia giroa mai dinana.”​—Filipi 1:10.

Bema unai be varavara korikorina ta ena mase guria hebouna eiava headava negana, reana varavara edia lalo-ani herevadia be momo. To, Keristani tauna ese gau ibounai ia laloa namonamo be namo. Nega haida ta ia laloa diba mase guria hebouna eiava headava totona dubu ta dekenai ia lao bona idia vara gaudia ia itaia sibona amo hekwakwanai ta do ia vara lasi. To, nega haida ia lao ena dika ena lalona ena mamina eiava ma haida edia lalona ena mamina dekenai ese ia lao ena namo ia hanaia. Herevana Keristani tauna be edena dala ia abia hidi, namona be ia abia hidi dalana ese Dirava bona taunimanima vairanai ena lalona ena mamina ia hadikaia lasi.