Mauri Matauraia Karana Dekenai Dahaka Ia Vara?

PLAY

MAURI ITA MATAURAIA ENA BADINA

Mauri matauraia lasi karadia ese komiuniti ena helt bona seifti ia hadikaia diba.

Kuku ania karana ese kensa gorere ia havaraia sibona lasi, to tauanina ese gorere ia koua dalana ia hadikaia danu. Idia gwau, baragi kensa gorere amo idia mase taudia 90 pesen bamona be kuku idia ania taudia eiava kuku ena kwalahu idia hahodi taudia.
Lagani ta ta ai, ipidi amo hutuma hamasea karana ese momo dekenai gari ia havaraia. Stanford University ena ripoti ia gwau: “Tahua gaukara ese ia hahedinaraia, sikuli natudia idia pidia karana ia vara neganai, idia heau mauri taudia, ena be bero idia abia lasi, to lagani momo lalonai unai gauna do idia laloa noho.”
Idia inuinu o drag idia abia taudia be motuka idia taria neganai, dala ai idia raka taudia be do idia seif lasi. Taunimanima be mauri idia laloa bada lasi neganai, komiuniti taudia be nega momo dika idia davaria.

EDENA DALA AI MAURI ITA MATAURAIA DIBA?

Emu helt oi gimaia. Dika havaraia karadia hegeregere kuku ania karana, inuinu kekero, eiava drag ania karana be hari oi hadokoa diba. Unai bamona karadia ese emu mauri ia hadikaia bona ia hahedinaraia oi badinai idia noho taudia, hegeregere emu famili, edia mauri oi matauraia lasi.

“Namona be tauanina . . . hamiroa gaudia ibounai amo ita goeva.”—2 Korinto 7:1.

Seifti laloa bada. Aksiden ia vara lasi totona, emu ruma ena dika gabudia oi hanamoa. Motuka oi taria neganai, seifti oi laloa bona namona be emu motuka oi hanamoa. Namo lasi haida ese oi idia doria, oi ia haberoa o hamasea diba gauna ta oi karaia totona.

“Bema ruma matamata oi haginia, namona be emu ruma guhina ena isena ai magu maragina oi karaia danu, unai amo ta be guhi amo do ia moru lasi bona emu ruma bese taudia be rara dekenai do idia kerere lasi.”—Deuteronomi 22:8. a

Ma haida dekenai kara namo hahedinaraia. Mauri ita matauraia anina be bese idauidau taudia, ena be idia taga o ogogami, idia sikuli o lasi, to idia ita kara namo henia. Bese idauidau inai henia karana ese tanobada ibounai ai, dagedage bona tuari ia havaraia noho.

“Namona be inai heheni karana, badu, badu dikadika, boiboi badabada, hadikaia herevadia, bona dika gaudia ibounai danu umui dadaraia. To do umui kara namo heheni.”—Efeso 4:31, 32.

EDENA DALA AI IEHOVA ENA WITNES TAUDIA BE MAURI MATAURAIA KARANA IDIA HAHEDINARAIA?

Iehova ena Witnes taudia be taunimanima dekenai mauri naria namonamo dalana idia hadibaia. Emai Baibel edukeisen program ese taunimanima ia durua edia mauri ia hadikaia karadia idia rakatania totona.

Emai konstraksen projek lalonai seifti taravatu ai badinaia. Emai hebou rumadia bona bildin haida haginia totona idia volantia taudia be seifti treinini idia abia, unai amo dika do idia davaria lasi. Emai bildin idia sekea loulou, unai amo tano ena seifti taravatu ida do ia hegeregere.

Disasta idia vara gabudia ai heduru ai henia. Vanegai hua 12 lalonai, tanobada ibounai ai idia vara disasta badadia 200 bamona dekenai heduru ai henia bona moni 12 milioni dola bamona be dika idia davaria taudia durua totona ai gaukaralaia.

Ebola gorere ia vara matamaia neganai, West Africa (2014) bona Democratic Republic of Congo (2018) ai taunimanima momo idia mase. Bona ai ese taunimanima dekenai unai gorere amo sibona do idia gimaia dalana ai hadibaia. Ai ese haida ai siaia grup ta ta dekenai inai sinado “Obedience Saves Lives” idia herevalaia totona. Emai tomadiho gabudia ai imana huria gaudia haida ai atoa bona imana huria daladia haida bona sibona naria daladia haida ai herevalaia.

Sierra Leone ai, reidio amo Iehova ena Witnes taudia idia hanamoa badina komiuniti lalonai Witnes taudia bona Witnes lasi taudia idia durua Ebola gorere idia abia lasi totona.

Lagani 2014 ai Liberia dekenai Ebola gorere ia vara neganai, Kingdom Hall ai imana huria gabuna ta

a Idaunegai Middle East ai, unai aonega hereva ese ia hahedinaraia famili bona ma haida edia seifti be mai anina bada.

NOGA!