Tahua gaukara idia karaia taudia haida ese climate change idia stadilaia murinai, unai hereva idia gwauraia. Bema oi abia dae taunimanima ia laloa bada Havaraia Tauna ia noho, saiens taudia idia davaria lalohadaina dainai do oi laloparara Dirava ese tanobada ia karaia dalana amo, sibona ia hanamoa lou diba.

To, taunimanima ese tanobada idia hadikaia dainai, tanobada do ia namo lou totona gau ma haida idia vara be namo. Dahaka dainai ita abia dae Dirava ese kara ta do ia karaia tanobada ia namo lou totona?

Maua ai idia noho Baibel siridia amo ita diba tanobada be do ia namo lou.

• Dirava ese iseda tanobada ia havaraia. “Matamana negana ai, Dirava ese guba bona tanobada ia havaraia.”—Genese 1:1

• Iseda tanobada be Dirava ese ia biagua. “Tanobada bona ia lalonai idia noho gaudia ibounai be Iehova a ena.”—Salamo 24:1

• Dirava ese iseda tanobada ia karaia do ia noho hanaihanai totona. “[Ia] ese tanobada be badina aukana latanai [ia] haginia, bona ena gabu amo do idia kokia lasi ela bona hanaihanai.”—Salamo 104:5

• Dirava ia gwauhamata iseda tanobada be mauri gaudia amo do ia honu ela bona hanaihanai. “Dirava momokanina, tanobada ia karaia, . . . Ia karaia kava lasi, to taunimanima ese idia noholaia totona ia karaia.”—Isaia 45:18

• Dirava ia gwauhamata taunimanima be iseda tanobada ai do idia mauri ela bona hanaihanai. “Kara maoromaoro taudia be tanobada do idia abia, bona tanobada ai do idia noho ela bona hanaihanai.”—Salamo 37:29

Dirava ese tanobada be sibona ia hanamoa lou diba dalana ai ia karaia, unai amo taunimanima idia karaia ese do ia hadikaia lasi. Baibel ia peroveta Iehova Dirava be ena nega maorona ai, iseda tanobada idia hadikaia karadia ibounai do ia haorea.—Apokalupo 11:18

Baibel ia gwauhamata, unai nega ai Dirava ese iseda tanobada be paradaiso hairaina ai do ia halaoa bona ena imana do ia kehoa “mauri gaudia ibounai edia ura gaudia [ia] henia.”—Salamo 145:16