“HAHINE.” Iesu ese nega haida hahine be unai bamona ia hereva henidia. Hegeregere, lagani 18 lalonai ena doruna ia kwaidu hahinena ia hanamoa neganai, ia gwau: “Hahine e, emu gorere amo oi lau ruhaia.” (Luka 13:10-13) Iesu ese ena sinana ia hereva henia neganai, unai hereva ia gaukaralaia danu, Baibel negadiai unai be hemataurai karana. (Ioa. 19:26; 20:13) To hereva ma ta ese unai hereva ia hereaia.

Baibel ese hahine ma haida ia herevalaia neganai, hereva ma ta ia gaukaralaia. Iesu ese lagani 12 lalonai rara halusia gorerena ia abia hahinena ia hereva henia neganai, unai hereva ia gaukaralaia. Unai hahine be Iesu dekenai ia lao dalana be Dirava ena Taravatu hegeregerena lasi, badina Taravatu ese unai bamona gorere ia abia tauna ia gwauraia miro. Unai dainai hutuma amo ia noho daudau be namo. (Lev. 15:19-27) To ia ura dikadika do ia namo. Ia be “doketa momo ia itaia ena gorere hanamoa totona, to hisihisi bada ia abia. Bona ena moni ibounai ia haorea, to namo ta ia davaria lasi bona ena gorere be ia bada ia lao.”​—⁠Mar. 5:25, 26.

Unai hahine be mai manau ida hutuma edia bogaraginai ia raka bona murina amo Iesu ena dabua dorina ia dogoatao. Bena maoromaoro ena rara halusia gorerena ia ore! Unai hahine ia ura lasi taunimanima ese idia itaia, to Iesu ia henanadai: “Daika ese lau ia dogoatao?” (Luka 8:45-47) Unai neganai, hahine be mai gari bada bona heudeheude danu Iesu vairanai ia tui diho “bona ia vara gauna ia gwauraia.”​—⁠Mar. 5:33.

Hahine ena lalona hanamoa totona, Iesu be mai manau ida ia gwau: “Natugu e, oi gari lasi!” (Mat. 9:22) Diba bada taudia idia gwau, inai Heberu bona Grik herevana idia hahanaia “natugu” idia gaukaralaia diba, bema ta be mai “hebogahisi bona lalokau” ida ma ta ia hereva henia. Iesu ese unai hahine ena lalona ia hagoadaia, ia gwau: “Emu abidadama ese oi ia hanamoa vadaeni. Mai maino ida oi lao bona inai gorere dikana ese oi do ia hahisia lou lasi.”​—⁠Mar. 5:34.

“Natugu.” Ia taga Israela tauna Boasi ese Moaba hahinena, Ruta, be unai bamona ia hereva henia. Ia danu ia daradara badina ia be ia diba lasi tauna ta ena uma ai bali ena momoru ia gogoa. Boasi ia gwau: “Lauegu natuna e, oi kamonai.” Bena Ruta ia hamaoroa ena uma ai bali ena momoru do ia gogoa diba. Ruta be Boasi vairanai ia tui diho, bona ia nanadaia dahaka dainai idau bese hahinena ia hebogahisi henia. Boasi ia haere, ia gwau: “Oiemu sivarai lau kamonai, oiemu adavana ia mase murinai oiemu ravana [vabu hahinena Naomi] oi durua. . . . Lohiabada ese oiemu davana do ia henia, oiemu kara hegeregerena.”​—⁠Ruta 2:8-12.

Keristani elda taudia dekenai Iesu bona Boasi be haheitalai namona! Nega haida elda taudia rua be Keristani hahinena ida idia helai diba, bona Baibel amo ia do idia durua bona hagoadaia. Guriguri amo Iehova ena heduru idia noia bona taihu ena hereva idia kamonai namonamo murinai, elda taudia ese Baibel amo ia idia hagoadaia diba.