1. Dahaka dainai ita gwau, Iehova be gau ibounai ia biagua? (Laulau ginigunana herevalaia.)

GAU IBOUDIAI be Iehova ena! Ia ese “guba bona ena atai herea momokani gabudia danu, bona tanobada bona ia lalonai idia noho gaudia ibounai danu” ia biagua. (Deu. 10:14 NWT; Apok. 4:11) Unai dainai, havaraia gaudia ibounai ese idia hahedinaraia, Iehova ese taunimanima ibounai ia karaia. (Sal. 100:3) To, idaunega idia vara gaudia dainai, Dirava ese taunimanima oreadia haida ia abia hidi ena taunimanima ai idia lao totona.

2. Baibel ai, daidia be Iehova ese dala hereadaena ai ia abia hidi iena taunimanima ai idia lao totona?

² Hegeregere, Salamo 135 ese idaunegai Israela taudia, Iehova ena abidadama hesiai taudia unai, ia gwauraia iena “bese korikori.” (Sal. 135, 4) Danu, Hosea bukana ia peroveta, idau bese taudia haida be Iehova ena taunimanima ai do idia lao. (Hos. 2:23) Hosea ena peroveta herevana ia guguru, Iehova ese Iuda lasi taudia ia abia hidi Keriso ida do idia lohia hebou totona. (Kara 10:45; Roma 9:23-26) Dala hereadaena ai, unai “bese helagana” be Iehova ena “taunimanima korikoridia” ai idia lao, badina Dirava ese lauma helaga amo idia ia horoa bona idia ia abia hidi guba maurina  idia abia totona. (1 Pet. 2:9, 10) To hari inai negai, tanobada helarona idia abia abidadama Keristani taudia be edena bamona? Iehova ese idia danu ia gwauraia, iena “bese taudia” bona iena “abia hidi taudia.”​—Isa. 65:22.

3. (a) Hari, daidia be Iehova ida hetura karana namona idia moalelaia? (b) Inai atikol ai dahaka do ita herevalaia?

³ Hari inai negai, guba helarona idia abia “seri maragi” bona tanobada helarona idia abia “mamoe ma haida” be “mamoe serina tamona” ai idia lao, badina idia be Iehova ena taunimanima bona idia ia laloa bada. (Luka 12:32; Ioa. 10:16) Ita ura Iehova ita tanikiu henia badina ia ese unai dala hereadaena amo dala ia kehoa ia ita tura henia diba. Inai atikol ai, Iehova ese ia henia hahenamo dainai ia dekenai iseda tanikiu karana ita hahedinaraia diba daladia do ita herevalaia.

4. Edena dala ta ai ita hahedinaraia Iehova ita tanikiu henia, bona edena dala ai Iesu ese unai ia hahedinaraia?

⁴ Iehova dekenai mai kudouna ibounai ida eda mauri ita gwauhamatalaia karana amo ita hahedinaraia, Ia ita tanikiu henia. Ranu lalonai ita bapatiso neganai, taunimanima vairanai ita hahedinaraia ita be Iehova ena, bona iseda mauri ai iena ura sibona do ita karaia. (Heb. 12:9) Iesu danu ia bapatiso neganai, unai ia hahedinaraia. Iehova dekenai ia gwau: “Lauegu Dirava e, lau ura dikadika oiemu ura do lau karaia.” (Sal. 40:8) Iesu be sibona ia henia Iehova ena ura ia karaia totona, herevana ia be Dirava ese ia abia hidi besena amo ia vara.

5, 6. (a) Edena dala ai Iehova ese Iesu ena bapatiso karana ia abia dae? (b) Iehova be iseda gwauhamata karana ia moalelaia, herevana ia be gau ibounai edia biaguna. Haheitalai gwauraia.

⁵ Edena dala ai Iehova ese Iesu ena bapatiso karana ia abia dae? Baibel ia gwau: “Iesu ia bapatiso bena maoromaoro ranu amo ia daekau neganai, guba ia kehoa, bona ia ese Dirava ena lauma ia itaia, pune ta bamona Iesu latanai ia diho. Bona gado ta guba amo ia mai, ia gwau: ‘Inai be egu Natuna, egu lalokau, ia lau lalonamo henia.’” (Mat. 3:16, 17) Iesu be ena guba Tamana dekenai sibona ia henia vadaeni, to Iehova be ena Natuna dekenai ia moale badina mai ura bada ida iena Tamana ena ura ia karaia. Unai hegeregerena, Iehova be mai moale ida iseda gwauhamata karana ia abia dae, bona ia ese ita do ia hanamoa.​—Sal. 149:4.

⁶ Mani inai haheitalai oi laloa. Tama ta be ena natuna kekeni maragina dekenai bisketi ta ia henia. Bena kekeni maragina ese ena tamana dekenai unai bisketi taina ia henia. Unai bisketi be tamana ese ia dekenai ia henia, ani? Dahaka dainai ia ura ena tamana dekenai ia henia? Lalokau tamana be unai bamona henanadai do ia laloa lasi. To, iena natuna kekeni maragina ese unai lalokau karana ia hahedinaraia dainai, mai moale ida unai harihari gauna do ia abia dae. Tamana be ena natuna kekeni ena henia karana do ia laloa bada. Bema Iehova sibona ita tomadiho henia, ita dekenai do ia moale bada.​—Eso. 34:14.

7. Mai kudouna ibounai ida Iehova ese ia idia hesiai henia taudia ia laloa dalana be Malaki ese edena bamona ia herevalaia?

⁷ Malaki 3:16 duahia. Bema emu mauri oi do gwauhamatalaia lasi bona bapatiso oi do abia lasi, edia badina oi laloa namonamo guna be namo. Momokani, Iehova ese oi ia havaraia dainai oi be ia ena. To Iehova do ia moale, bema ia dekenai oi gwauhamata bona iena ura oi karaia, badina unai ese ia hahedinaraia iena lohia siahuna oi abia isi. (Aon. 23:15) Iehova be mai kudouna ibounai ida ia idia hesiai henia taudia ia diba bona edia ladana be “buka ta” ai ia torea.

8, 9. Iehova ia ura ena “buka” ai edia ladana ia torea taudia ese dahaka idia karaia be namo?

⁸ Bema iseda ladana be Iehova ena “buka”  ai ia noho, anina be kara haida ita karaia be namo. Malaki ese ia hahedinaraia, namona be Iehova ita ‘gari henia, bona ita matauraia.’ Bema ita be taunimanima ta o gau ta ita tomadiho henia, Iehova ese mauri bukana amo iseda ladana do ia kokia.​—Eso. 32:33; Sal. 69:28.

⁹ Unai dainai, Iehova ena ura ita karaia totona, iseda mauri ita gwauhamatalaia bona ranu bapatiso ita abia sibona be hegeregere lasi. Badina gwauhamata bona bapatiso be nega tamona sibona ita karaia. Unai dainai namona be dina ta ta ai ita hahedinaraia ita be Iehova ena kahanai ita gini bona ia ita badinaia noho hari ela bona hanaihanai.​—1 Pet. 4:1, 2.

10. Edena bamona Iehova idia hesiai henia taudia bona idia hesiai henia lasi taudia edia idau ita diba?

¹⁰ Vanegai ita stadilaia atikol ese Baibel ai idia noho taudia, hegeregere, Kaino, Solomona bona Israela taudia edia sivarai ia herevalaia. Idia gwauhamata Iehova do idia tomadiho henia, to mai kudouna ida unai idia karaia lasi. Unai haheitalai ese idia hahedinaraia goevagoeva, namona be Iehova idia badinaia taudia be kara maoromaoro idia badinaia bona kara dika idia dadaraia. (Roma 12:9) Malaki ese Dirava ena “buka” ia herevalaia murinai, Iehova ese “kara maoromaoro tauna bona kara dika tauna, Dirava ia hesiai henia tauna bona ia hesiai henia lasi tauna, edia idau” ia herevalaia.​—Mal. 3:18, NWT.

11. Dahaka dainai taunimanima vairanai ita hahedinaraia ita be Iehova ita badinaia taudia?

¹¹ Danu, Iehova ese ita ia abia hidi ena taunimanima ai ita lao. Unai dainai, iseda tanikiu karana ita hahedinaraia dalana ma ta be, namona be “taunimanima ibounai do idia itaia” eda abidadama be ia goada. (1 Tim. 4:15; Mat. 5:16) Oi sibona oi nanadaia: Iehova lau badinaia karana be haida ese idia itaia, a? Ma haida lau hadibaia lau be Iehova ena Witnes tauna ta, a? Iehova be ita ia abia hidi ena taunimanima ai ita lao, to bema haida ita hadibaia lasi ita be ena Witnes taudia, do ia lalohisihisi bada.​—⁠Sal. 119:46; Mareko. 8:38 duahia.

12, 13. Edena dala ai, haida be idia hahedinaraia lasi idia be Iehova ena Witnes taudia?

¹² Madi, taunimanima haida be ‘Dirava ia hesiai henia tauna bona ia hesiai henia lasi tauna, ena idau’ idia diba lasi, badina idia be  “tanobada ena laloa dalana” idia tohotohoa noho. (1 Kor. 2:12) Inai tanobada ena laloa dalana ta be “tauanina ena ura” badinaia karana. (Efe. 2:3) Hegeregere, inai tanobada ena laloa dalana dadaraia totona, sisiba hereva momo ita kamonai vadaeni, to haida be hemataurai lasi dabua sitaelo idia do hahedokilaia noho bona vairana ena toana hahairaia dalana idia laloa bada. Herevana, Keristani moale karadia lalonai idia noho, to tauanina dekenai idia kamokau dabua bona tauanina ena hehuni kahadia idia hahedinaraia dabuadia idia hahedokilaia noho. Eiava, edia huina be sitaelo idauidau ai idia utua bona pania. (1 Tim. 2:9, 10) Unai dainai, hutuma huanai idia noho neganai, do ia auka “tanobada tura henia” taudia bona Iehova idia badinaia taudia edia idau oi diba totona.​—Iam. 4:4.

¹³ Witnes taudia haida be tanobada ena kara idia dadaraia lasi. Moale karadia dekenai edia mavaru dalana, bona edia kara be Keristani tauna ena kara bamona lasi. Idia sibona edia laulau be intanet ai idia atoa bona ma haida ida idia herevalaia, bona Keristani taudia dekenai unai be maoro lasi. Reana edia kara kererena ta dainai kongrigeisen lalonai sisiba idia do abia lasi, to Iehova ena orea lalonai kara namodia idia ura hahedinaraia noho matamata taudia haida dekenai, idia be hebamo dikana.​—1 Petero 2:11, 12 duahia.

14. Iseda hetura karana Iehova ida ita gimaia totona, dahaka ita karaia be namo?

¹⁴ Inai dagedage tanobadana ai “tauanina ena ura, matana ese idia ura henia gaudia bona ta ese ena kohu ia heagilaia karana” be ia bada ia lao noho. (1 Ioane 2:16) To, ita be Iehova ena taunimanima dainai, namona be “Dirava ia ura lasi karadia bona tanobada ena ura idauidau do ita dadaraia bona inai nega oromana lalonai do ita noho mai laloa maoromaoro bona kara maoromaoro ida bona Dirava do ita badinaia noho.” (Tito 2:12) Bona taunimanima vairanai iseda hereva, iseda aniani dalana bona ita inua gaudia, iseda toana bona dabua hahedokilaia dalana, gaukara karaia daladia​—⁠ita karaia gaudia ibounai lalonai, namona be ita hahedinaraia ita be mai kudouna ibounai ida Iehova sibona ita tomadiho henia bona lalokau henia.​—1 Korinto 10:31, 32 duahia.

15. Dahaka dainai mai hebogahisi bona lalokau ida iseda tadikaka taihu ita kara henidia be namo?

¹⁵ Iseda tadikaka taihu ita kara henidia  dalana amo ita hahedinaraia, eda hetura karana namona Iehova ida ita laloa bada. Idia danu be Iehova ena taunimanima. Bema unai ita laloa, mai hebogahisi bona lalokau ida iseda tadikaka taihu do ita kara henidia. (1 Tes. 5:15) Iesu be iena murinai idia raka taudia ia hamaoroa, ia gwau: “Unai amo taunimanima ibounai do idia diba umui be egu hahediba taudia, bema umui huanai lalokau ia noho.”​—Ioa. 13:35.

16. Mose ena taravatu amo edena haheitalai ese ia hahedinaraia, Iehova be ena taunimanima ia laloa bada?

¹⁶ Kongrigeisen ai, edena bamona ma haida ita kara henia be namo dalana ena haheitalai mani oi laloa. Iehova ena dubu ai idia gaukaralaia kohu ibounai be idia hahelagaia, gau ma ta totona lasi, to tomadiho goevana totona. Mose ena Taravatu ese unai kohu gaukaralaia dalana ia gwauraia. Bona unai taravatu idia utua taudia be do idia mase. (Num. 1:50-51) Bema Iehova ese ena dubu ai tomadiho totona idia gaukaralaia kohu ia laloa bada, vadaeni unai ese ia hahedinaraia mai kudouna ibounai ida ia idia tomadiho henia taudia ia laloa bada, badina idia be ena taunimanima! Iehova be ena taunimanima dekenai ia gwauhamata, ia gwau: “Umui ia hadikaia tauna be egu matana ia daua toho noho.”​—Sek. 2:8, NWT.

17. Iehova be dahaka “hereva ia kamonai” noho?

¹⁷ Momokani, Malaki ese ia hahedinaraia, Iehova ena taunimanima be sibodia idia herevahereva neganai, edia “hereva ia kamonai” noho. (Mal. 3:16) Iehova be “ena taunimanima ia diba.” (2 Tim. 2:19) Danu ita gwauraia herevadia ia kamonai bona ita karaia karadia ia itaia. (Heb. 4:13) Bema iseda tadikaka taihu ita hereva auka henidia, Iehova be ita gwauraia “hereva ia kamonai.” Bema ta ta dekenai heabidae bona hariharibada karana ita hahedinaraia, dika ita gwauatao bona mai hebogahisi ida ita kara, ita diba momokani Iehova be unai ia itaia danu.​—Heb. 13:16; 1 Pet. 4:8, 9.

18. Edena dala ai Iehova dekenai iseda tanikiu karana ita hahedinaraia diba?

¹⁸ Momokani, mai kudouna ibounai ida ita ura Iehova dekenai iseda tanikiu karana ita hahedinaraia, badina ita be iena taunimanima. Ita sibona eda ura dainai iseda mauri ita gwauhamatalaia bona unai amo ita hahedinaraia ia be iseda biaguna ai ia lao. Herevana “inai uru gagevana bona dikana lalonai” ita noho, to ita ura taunimanima vairanai ita hahedinaraia ita be “kerere lasi bona mai momokani ida,” . . . ‘inai tanobada ai, ita be diari bamona ita hedinarai.’ (Fili. 2:15) Unai dainai, namona be kara dika ita inai henia momokani. (Iam. 4:7) Bona iseda tadikaka taihu ita lalokau henidia bona ita matauraidia, badina ita diba idia danu be Iehova ena taunimanima.​—Roma 12:10.

19. Iehova ena taunimanima be dahaka hahenamo do idia abia?

¹⁹ Baibel ia gwau: “[‘Iehova,’ NWT] ese iena bese taudia do ia rakatania lasi.” (Sal. 94:14) Unai gwauhamata goadana dainai ita diba momokani herevana hahetoho ita davaria, to do ita gini goada. Mase danu be hegeregere lasi Iehova ena lalokau karana ita dekenai ia koua totona. (Roma 8:38, 39) Baibel ia gwau: “Bema ita mauri, unai be Iehova totona ita mauri, bona bema ita mase, unai be Iehova totona ita mase.” (Roma 14:8) Iehova ese ia idia badinaia tura namodia, idia mase vadaeni taudia be do ia hatoredia isi lou. Unai nega ita naria noho. (Mat. 22:32) Hari danu, hahenamo momo ita moalelaia. Baibel ena hereva hegeregerena,“bema bese ta ena Dirava be [‘Iehova,’ NWT] neganai, unai bese be do ia namo. Lohiabada ese ia abia hidi, iena bese korikori do idia lao taudia be do idia moale!”​—Sal. 33:12.