MOSE ENA TARAVATU henunai, kerea manu bona pune manu be Iehova dekenai idia bouboulaia diba. Nega momo boubou karaia totona taravatu lalonai unai manu rua be ia gwauraia hebou, bona bema kerea manu be lasi, pune manu idia bouboulaia diba. (Lev. 1:14; 12:8; 14:30) Dahaka dainai unai be mai ena namo? Ena badina ta be, kerea manudia be nega momo idia noho lasi. Dahaka dainai?

Siahu negadia ai kerea manu be Israela ena gabu ibounai dekenai idia noho. To lagani ta ta ai, keru negana ia ginidae neganai unai manu be saut kahana ena siahu tanodia dekenai idia roho lao, bona Israela ai siahu negana ia ginidae neganai idia giroa lou. (Sol. 2:11, 12; Ier. 8:7) Idaunegai Israela ai, keru negadia ai unai manu ia noho lasi dainai boubou totona idia gaukaralaia be auka.

To, pune manu be tano ma ta dekenai idia roho lao lasi, unai dainai lagani ibounai lalonai Israela ai idia noho. Danu, pune manu be taunimanima ese idia naria. (Ioane 2:14, 16 hahegeregerea.) Buka ta (Bible Plants and Animals) ese ia hahedinaraia, “Palestine ai idia noho hanua bona taoni ibounai dekenai taunimanima ese pune manu idia naria. Ruma taudia be edia haba dekenai unai manu edia noho gabudia idia karaia.”​—Isaia 60:8 hahegeregerea.

Lagani ta ta ai Israela taudia dekenai ia noho manu idia bouboulaia diba bona Iehova ese ia abia dae, unai amo Iehova be lalokau bona laloa maoromaoro karana ia hahedinaraia.