1, 2. (a) Iehova be ita dekenai dahaka ia hahedinaraia? (b) Isaia 46:10, 11 bona 55:11 amo dahaka ita dibaia?

BAIBEL ena hamatamaia herevadia be inai: “Matamaia neganai Dirava ese guba bona tanobada ia karaia.” (Gen. 1:1) Dirava ese ia havaraia gaudia ibounai, hegeregere speis, diari, bona graviti dekenai iseda diba be bada lasi, ani? Ita be iunives ena kahana maragina sibona ita itaia diba. (Had. 3:11) To, Iehova ese ita dekenai iena ura tanobada bona taunimanima totona ia hahedinaraia. Iehova ia ura iena toana hegeregerena ia karaia tatau bona hahine be gabu namona dekenai idia noho. (Gen. 1:26) Idia be iena natudia ai do idia lao, bona Iehova be edia Tamana.

² To Genese karoa 3 ese ia hahedinaraia, hekwakwanai ta ia vara dainai, unai nega ai Iehova ena ura ia guguru lasi. (Gen. 3:1-7) To, Iehova ese unai hekwakwanai ia hamaoromaoroa diba. Bona ta ese Ia do ia koua lasi. (Isa. 46:10, 11; 55:11) Unai dainai ita diba momokani Iehova ese ena ura ginigunana be ena nega korikorina ai do ia hagugurua!

3. (a) Baibel ita lalopararalaia totona, edena mai anina bada hereva momokanidia ita diba be namo? (b) Dahaka dainai unai hahediba herevadia ita stadilaia? (c) Edena henanadai do ita herevalaidia?

³ Baibel amo inai hereva momokanidia ita diba: Dirava ena  ura tanobada bona taunimanima totona, bona Iesu Keriso ena maduna Dirava ena ura hagugurua karana dekenai. Dirava ena Hereva ita stadilaia matamaia neganai, unai mai anina bada hereva momokanidia ita dibaia. Bona ita ura kudou-maoro taudia ita durua unai mai anina bada hahediba herevadia idia dibaia totona. Inai atikol ita stadilaia karana amo ita hahedinaraia, ita ura bada Memorial hebouna dekenai taunimanima momo do ita boiria. (Luka 22:19, 20) Unai hebou idia mai taudia be Dirava ena ura dekenai diba ma haida do idia abia. Unai dainai Memorial dinana ia do ginidae lasi neganai, namona be henanadai haida ita lalodia bona gaukaralaia Baibel stadi taudia bona kudou-maoro taudia edia ura ita habadaia totona. Hari ita ese henanadai toi do ita herevalaia: Dirava ena ura tanobada bona taunimanima totona be dahaka? To dahaka ia vara? Bona dahaka dainai Iesu ena mauri davalaia boubouna sibona ese Dirava ena ura ia hagugurua diba?

4. Havaraia gaudia ese edena dala ai Iehova ena hairai idia hahedinaraia?

⁴ Iehova be gau ibounai ia Havaraia Tauna. Ia havaraia gaudia ibounai be namo herea. (Gen. 1:31; Ier. 10:12) Ia havaraia gaudia edia hairai bona gaukara dalana amo dahaka ita dibaia? Iehova ia havaraia gaudia ibounai ita itaia neganai, ita hoa badina unai gaudia ibounai be badina namona ta dainai idia noho. Guba ena hisiu momo, davara ena hurehure badadia, eiava waterfall edia hairai ita hoalaia, ani? Unai gaudia ita moalelaia, badina ita diba unai gaudia be mai edia hairai.—Salamo 19:1; 104:24 duahia.

5. Iehova be dahaka ia karaia, unai amo ia havaraia gaudia idia gaukara hebou namonamo diba?

⁵ Iehova ese ia havaraia gaudia ibounai be ia ese ia atoa taravatuna idia badinaia. Unai ia karaia, unai amo ia havaraia gaudia ibounai be idia gaukara hebou namonamo diba. (Sal. 19:7-9) Oibe, iunives ai idia noho gaudia ibounai be edia gabu korikori ai idia noho, bona Dirava ena ura hegeregerena idia gaukara. Momokani, Iehova ese taravatu ia atoa, unai amo ia havaraia gaudia be idia gaukara hebou namonamo diba. Hegeregere, graviti ena taravatu ia noho dainai, hodahoda o atmosfia ese tanobada ia gegea diba, davara ena aru dalana ia biagua, bona tanobada dekenai mauri gaudia idia noho diba. Havaraia gaudia ibounai, taunimanima danu, be unai taravatu idia badinaia. Unai ibounai ese Dirava ena ura tanobada bona taunimanima totona idia hamomokania. Iseda haroro gaukara ai, unai gau ibounai ia Havaraia Tauna ita hanamoa diba, a?—Apok. 4:11.

6, 7. Iehova ese Adamu bona Heva dekenai dahaka harihari gaudia ia henia?

⁶ Iehova ena ura ginigunana be taunimanima be tanobada ai do idia noho hanaihanai. (Gen. 1:28; Sal. 37:29) Ia ese Adamu bona Heva dekenai harihari gaudia idauidau ia henia, unai amo edia mauri idia moalelaia diba. (Iamesi 1:17 duahia.) Iehova ese idia dekenai ura kwalimu ia henia, idia laloa maoromaoro, bona ma haida idia tura henia bona lalokau henia diba. Havaraia Tauna ese Adamu dekenai kamonai karana hahedinaraia dalana ia hadibaia. Danu, Adamu ese animal, tano, bona ia sibona naria dalana ia dibaia. (Gen. 2:15-17, 19, 20) Ma danu, Iehova ese Adamu bona Heva ia havaraia neganai, idia ese gau idauidau idia mamia, dogoatao, itaia, kamonai, bona bonaia diba. Danu, Paradaiso ai idia noho gaudia ibounai idia moalelaia diba. Tau bona hahine ginigunana be gau idauidau idia karaia, hagugurua, bona dibaia diba.

 ⁷ Dirava ia ura karaia gauna ma ta be dahaka? Iehova ia ura Adamu bona Heva ese natudia goevadaedia idia havaraia. Bona edia natudia ese natudia do idia havaraia danu, ela bona tanobada ena gabu ibounai idia hahonua. Ia ura Adamu bona Heva bona gabeai idia vara uru ese edia natudia do idia lalokau henia, Iehova ese ena goevadae natudia ginigunana ia lalokau henia hegeregerena. Bona idia ese tanobada bona ia lalonai idia noho gaudia ibounai do idia biagua.—Sal. 115:16.

8. Dahaka dainai Iehova ese Genese 2:16, 17 dekenai ia noho taravatu ia henia?

⁸ Dirava ena ura hegeregerena gau idia vara lasi. Dahaka dainai? Iehova ese Adamu bona Heva dekenai ia henia taravatu be auka lasi. Unai taravatu amo ia ura idia ia tohoa bema idia be edia ura kwalimu ena hetoana idia diba. Ia gwau: “Uma gabu dekenai gini au ibounai edia huahua oi ania diba, idia be taravatu lasi, to kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.” (Gen. 2:16, 17) Adamu bona Heva be unai taravatu idia lalopararalaia, bona ia auka lasi idia badinaia totona. Oibe, Paradaiso be aniani idauidau amo ia honu.

9, 10. (a) Satani be Iehova dekenai dahaka samania hereva ia gwauraia? (b) Adamu bona Heva be dahaka abia hidi idia karaia? (Laulau ginigunana herevalaia.)

⁹ Satani Diabolo ese gaigai ta amo Heva ia koia, bena ia ese iena Tamana, Iehova, ia gwau-edeede henia. (Genese 3:1-5 duahia; Apok. 12:9) Satani ese Dirava ena hereva ia hagagevaia, ia gwau Dirava ena tanobada natudia be “uma gabu ena au huahua” ibounai do idia ania lasi. Unai be hegeregere ia gwau: ‘Emu hereva ena anina be oi ura karaia gauna oi karaia diba lasi, ani?’ Gabeai ia koikoi, ia gwau: “Dohore umui mase lasi.” Bena Heva ena lalona ia veria Dirava ena hereva do ia kamonai lasi, ia gwau: “Dirava be inai bamona ia hereva badina ia diba, umui ania neganai aonega do umui davaria.” Satani ena hereva amo ia ura hahedinaraia, Iehova be ia ura lasi aonega idia abia dainai, idia ia hamaoroa unai huahua do idia ania lasi. Bena ia ese inai koikoi gwauhamata herevana ia gwauraia: “Dirava hegeregere do umui noho, kara namona bona kara dikana do umui diba.”

¹⁰ Vadaeni Adamu bona Heva be abia hidi idia karaia be namo. Idia ese Iehova do idia kamonai henia, eiava gaigai do idia kamonai henia? Idia ese Dirava idia gwau-edeede henia. Unai idia karaia neganai, idia be Satani ena gwau-edeede karana idia durua. Idia ese edia Tamana, Iehova, idia dadaraia bona ena lohia henunai idia abia noho namona idia haboioa.—Gen. 3:6-13.

11. Dahaka dainai Iehova ese kara dika do ia haheaukalaia noho lasi?

¹¹ Adamu bona Heva ese Iehova idia gwau-edeede henia neganai, edia goevadae maurina idia haboioa. Danu, edia gwau-edeede karana dainai, idia be Iehova amo idia daudau, badina iena “matana be ia goeva dainai kara dika do [ia] itaia noho lasi.” Oibe, ia ese “kara dika do [ia] haheaukalaia noho lasi.” (Hab. 1:13, NWT) Badina bema kara dika ia haheaukalaia o koua lasi, mauri gaudia ibounai—tanobada bona guba ai—edia noho be do ia dika. Ma danu, bema Eden umana ai ia vara kara dikana dainai Dirava be gau ta ia karaia lasi, reana ia do idia abidadama henia lasi. To Iehova be nega ibounai ena taravatu ia badinaia; ia utua lasi. (Sal. 119:142) Ena be Adamu bona Heva be mai edia ura kwalimu, to unai ese maoro ia henia lasi Dirava ena taravatu idia utua  totona. Iehova idia gwau-edeede henia dainai, idia mase bona tano dekenai idia giroa lou, badina idia be tano amo ia karaia.—Gen. 3:19.

12. Adamu ena natudia dekenai dahaka ia vara?

¹² Adamu bona Heva ese unai au huahua idia ania neganai, Dirava ese idia be iena ruma bese badana amo ia luludia. Oibe, Dirava ese Eden umana amo idia ia lulua, bona idia be do idia giroa lou lasi. (Gen. 3:23, 24) Edia abia hidi kererena dainai, Iehova ese idia ia panisia. (Deuteronomi 32:4, 5 duahia.) Idia be goevadae lasi dainai, Dirava ena kara idia badinaia namonamo diba lasi. Adamu be vaira nega ena helaro namona sibona ia haboioa lasi, to iena natudia dekenai kara dika bona mase ia henia hanai danu. (Roma 5:12) Iena bese taudia totona mauri hanaihanai helarona ia haboioa. Danu, Adamu bona Heva be goevadae natuna do idia havaraia lasi; bona edia natudia danu be goevadae natuna do idia havaraia lasi. Satani Diabolo ese Dirava amo Adamu bona Heva ia hakaua siri murinai, ia ese unai nega amo ema bona hari taunimanima ia do koia noho.—Ioa. 8:44.

13. Iehova ena ura taunimanima totona be dahaka?

¹³ Dirava ena lalokau taunimanima dekenai be do ia ore lasi. Ena be Adamu bona Heva idia gwau-edeede, to Iehova ia ura taunimanima ese ia do idia tura henia. Ia ura lasi tau ta ia mase. (2 Pet. 3:9) Unai dainai Adamu bona Heva idia gwau-edeede murinai, Dirava be dala ia karaia taunimanima be ia idia tura henia lou totona, to unai nega ai ia ese iena taravatu maoromaoro ia badinaia. Iehova ese edena dala ai unai ia karaia?

14. (a) Ioane 3:16 hegeregere, edena dala ai Dirava ese taunimanima ia hamauria? (b) Kamonai taudia ida edena henanadai do ita herevalaia?

¹⁴ Ioane 3:16 duahia. Memorial dekenai ita boiria taudia momo be unai siri idia diba. To henanadai be inai, Edena dala ai Iesu ena boubou gauna ese mauri hanaihanai ena dala ia kehoa? Kudou-maoro taudia ese unai mai anina bada henanadai ena haere idia diba totona, namona be Memorial pepapepa hariharilaia gaukarana ita durua, Memorial hebouna ita lao, bona unai hebou idia mai taudia ita vadivadi henia. Unai amo do idia laloparara, Iehova ese mauri davalaia boubouna amo iena lalokau bona aonega ia hahedinaraia. Mauri davalaia boubouna be edena bamona do ita herevalaia?

15. Edena dala ai Iesu be Adamu amo ia idau?

¹⁵ Iehova ese goevadae tauna ia siaia mauri davalaia boubouna ia henia totona. Namona be unai goevadae tauna ese Iehova ia badinaia bona mai ura bada ida iena mauri ia henia taunimanima ia hamauria totona. (Roma 5:17-19) Iehova ese ia havaraia tauna ginigunana be guba amo tanobada dekenai ia siaia diho. (Ioa. 1:14) Bena Iesu be tau goevadaena ai ia lao, Adamu hegeregerena. To Iesu ese Iehova ena taravatu ibounai ia badinaia. Ena be Iesu be hahetoho badadia ia davaria, to ia kara dika lasi bona Dirava ena taravatu ia makohia lasi.

16. Dahaka dainai mauri davalaia boubouna be harihari gauna hereadaena?

¹⁶ Iesu be goevadae tauna dainai, iena mauri ia henia karana amo taunimanima be kara dika bona mase amo ia ruhaia. Adamu ese ia karaia diba gaudia ibounai ia hagugurua—ia be goevadae tauna, Dirava ia badinaia bona kamonai henia. (1 Tim. 2:6) Iesu ena mauri davalaia boubouna dainai, “taunimanima momo”—tatau, hahine, bona natudia—be mauri hanaihanai do idia abia. (Mat. 20:28) Oibe, mauri davalaia boubouna ese dala ia kehoa Dirava ena ura ginigunana ia guguru totona. (2 Kor. 1:19, 20) Unai mauri davalaia boubouna dainai, abidadama  taudia ibounai be mauri hanaihanai do idia abia.

17. Mauri davalaia boubouna dainai dahaka hahenamo ita abia?

¹⁷ Iehova ese dava bada gauna ia henia mauri davana ia henia totona. (1 Pet. 1:19) Ia ese taunimanima edia mauri ia laloa bada dainai, ena Natuna korikorina ia henia bona idia totona ia mase. (1 Ioa. 4:9, 10) Unai be hegeregere, Iesu ese iseda tamana ginigunana, Adamu, ena gabu ia abia. (1 Kor. 15:45) Iesu be unai ia karaia neganai, ia ese ita ia hamauria sibona lasi, to dala ia kehoa danu Dirava ena ruma bese ita bamoa lou totona. Oibe, Iesu ena boubou gauna dainai, Iehova ese ita be iena ruma bese taudia ai ia halaoa lou diba, bona unai ese iena kara maoromaoro ia hahedinaraia. Ita moale badina nega ta abidadama taudia ibounai be goevadae taudia ai do idia lao, ani? Guba bona tanobada ai idia noho taudia ibounai be mai lalotamona ida iena ruma bese ta bamona do idia noho. Momokani, ita ibounai be Dirava ena natudia ai do ita lao.—Roma 8:21.

18. Edena nega ai Iehova be “gau ibounai edia kwarana ai do ia lao”?

¹⁸ Satani ena gwau-edeede karana ese Iehova ena lalokau taunimanima dekenai ia koua lasi, bona danu goevadae lasi taudia ia koua lasi Iehova idia badinaia noho totona. Mauri davalaia boubouna amo, Iehova ese iena natudia ibounai do ia durua idia be goevadae taudia ai idia lao totona. Mani oi laloa, ‘Natuna idia itaia bona abidadama henia taudia’ ibounai be mauri hanaihanai do idia abia. (Ioa. 6:40) Iseda lalokau bona aonega Tamana, Iehova, ese ena ura do ia hagugurua bona taunimanima be goevadae taudia ai do ia halaoa. Bena ia be “gau ibounai edia kwarana ai do ia lao.”—1 Kor. 15:28.

19. (a) Mauri davalaia boubouna dainai, oi ura dahaka oi karaia? (Maua ladana, “ Namona be Kamonai Taudia Ita Tahudia Noho” itaia.) (b) Stadi gabena ai dahaka do ita herevalaia?

¹⁹ Mauri davalaia boubouna dainai, ita ura ma haida ita durua, unai amo idia be unai dava bada harihari gauna amo namo do idia davaria. Namona be taunimanima idia diba, mauri davalaia boubouna amo Iehova ese mai lalokau ida taunimanima ibounai dekenai mauri hanaihanai ia henia. To, mauri davalaia boubouna ese unai sibona ia henia lasi. Stadi gabena ai, do ita itaia edena bamona Iesu ena boubou gauna ese Satani ena hereva Eden umana ai ia hamaoromaoroa.