Felisa: Egu ruma bese be tomadiho idia laloa bada. Egu varavara 13 be guna pris taudia. Pope John Paul II ese egu sinana ena kasin ia hanamoa danu, ia be pris tauna bona Katolik sikuli ta ai ia hahediba. Egu tamana be auri amo gau idauidau ia karaia, to egu sinana be uma dekenai ia gaukara. Lau be roboana bona egu tadidia be 7.

Egu mauri lagani be 12 neganai, Spain ai tuari ia matamaia. Tuari murinai, egu tamana idia hadiburaia, badina gavamani ese ena politikol lalohadaidia idia moalelaia lasi. Egu sina ia hekwarahi bada ai ia ubua totona, unai dainai ena turana ta ese ia hamaoroa egu taihudia toi​—Araceli, Lauri, bona Ramoni​—be Bilbao, Spain, dekenai do ia siaidia, bona nan edia ruma ai do idia noho. Unuseniai idia aniani namonamo diba.

Araceli: Unai nega ai, emai mauri lagani be 14, 12, bona 10, bona ia auka emai ruma bese ai rakatania totona. Bilbao ai, gabu hagoevaia gaukarana ai karaia. Lagani rua murinai, Zaragoza dekenai ai idia siaia, unuseniai buruka taudia idia naria bona unai ruma be bada. Emai gaukara be kisini do ai hagoevaia, unai be gaukara badana.

Felisa: Egu taihudia be Zaragoza dekenai idia lao neganai, egu sinana bona vavana, pris tauna, idia laloa lau danu be unuseni lau lao be namo, unai amo lau ia ura henia merona amo do lau noho daudau. Lau be tomadiho lau laloa bada dainai,  edia lalohadai lau abia dae. Dina ibounai dubu dekenai lau lao, bona lau ura egu kasin bamona, misinari gaukara lau karaia, Africa ai ia be fada ta.

To unai nan ese lau idia hagoadaia lasi tano ma haida ai Dirava lau hesiai henia totona, bona lau mamia lau be dibura ruma ai lau noho bamona. Unai dainai lagani ta murinai, egu ruma dekenai lau giroa lou, egu vavana, pris tauna, lau naria totona. Iena ruma gaukara lau karaia sibona lasi, to hanuaboi ibounai ia ida Rosary ai dogoatao bona ai guriguri. Danu, dubu ena flaoaflaoa hanamoa bona Maria bona “seint” edia kaivakuku hagoevaia gaukarana lau moalelaia.

Araceli: Gabeai emai mauri ia idau. Egu gwauhamata rua lau karaia murinai, ai idia hapararaia. Ramoni be Zaragoza ai ia noho, Lauri be Valencia dekenai ia lao, bona lau be Madrid dekenai idia siaia, unuseni ai egu gwauhamata iharuana lau karaia. Madrid ai, stiuden taudia, buruka taudia, bona vadivadi taudia idia naria danu, unai dainai gaukara be bada. Lau be nan edia hospital ai lau gaukara.

Lau laloa bema nan ai lau lao, do lau moale bada. Badina Baibel lau duahia bona lalopararalaia diba. To ta be Dirava o Iesu ia herevalaia lasi, bona Baibel ai gaukaralaia lasi. Latin gado sibona lau dibaia, “seint” edia mauri lau stadilaia, bona Maria lau tomadiho henia. To nega momo, gaukara metauna lau karaia.

Lau lalometau matamaia, bona “sinana badana” dekenai unai lau herevalaia. Ia lau hamaoroa, lau ura lasi lau gaukara bona ma haida be moni idia abia, to egu ruma bese be idia ogogami. Unai dainai sel ta ai lau ia lokaia. Ia laloa unai ese egu lalona do ia haidaua bona do lau noho.

Nega toi sel amo lau idia ruhaia, idia laloa egu lalohadai do lau haidaua. To lau ura bada do lau lao dainai, lau idia hamaoroa inai hereva do lau torea: “Lau ura inai gabu lau rakatania, badina lau ura Satani lau hesiai henia, to Dirava lasi.” Unai hereva dainai lau hoa bada. Ena be lau ura bada unai gabu lau rakatania, to unai hereva lau torea diba lasi. Dokonai, idia lau noia pris tauna ta lau hereva henia totona, bona egu sivarai be ia lau hamaoroa. Unai dainai dala ia karaia bisop ese Zaragoza dekenai lau ia siaia lou totona. Unuseni hua haida lau noho murinai, unai gabu lau rakatania. Daudau lasi murinai, Lauri bona Ramoni danu be unai gabu idia rakatania.

Felisa: Gabeai, lau headava bona Cantabria  dekenai lau lao. Dubu lau lao karana lau rakatania lasi, bena Sunday ta ai, hadibaia hereva badana ta lau kamonai. Pris be mai badu ida ia boiboi ia gwau, “Inai buka umui itaia!,” bena Mauri Ia lao Henia Hereva Momokanina bukana ia poinia. Ma ia gwau, “Bema ta ese oi dekenai inai buka ia henia, lau dekenai umui henia o umui negea!”

Lau dekenai unai buka ia noho lasi, to ena kopi ta lau ura. Bena dina haida murinai, Witnes hahine rua be egu ruma ai idia pidipidi bona lau dekenai unai buka idia henia. Unai hanuaboi ai unai buka lau duahia, bona unai hahine idia lou mai neganai, idia ida Baibel stadi lau matamaia.

Daudau lasi hereva momokani ese egu kudouna ia hamarerea. Bena Iehova lau lalokau henia matamaia, bona haroro gaukara lau goadalaia. Lagani 1973 ai, lau bapatiso. Dala ia kehoa negadiai sibona ai, egu ruma bese lau haroro henidia. Matamanai lau hereva bamona, egu ruma bese ese lau abia dae herevadia idia ura henia lasi, egu taihuna Araceli danu.

Araceli: Nan edia ruma ai lau idia kara auka henia dainai, lau badu. To Sunday ibounai dubu lau lao, bona dina ta ta Rosary lau dogoatao bona lau guriguri. Lau ura bada Baibel lau lalopararalaia, bona Dirava lau noia lau ia durua totona. To egu taihuna Felisa ese ia dibaia gaudia be lau dekenai ia herevalaia neganai, lau itaia ia moale, to lau laloa ia kavakava. Bona iena hereva lau abia dae lasi.

Lagani haida murinai, gaukara totona Madrid dekenai lau giroa lou, bona lau headava. Lau itaia dubu idia lao hanaihanai taudia be Evanelia Bukadia edia hereva idia badinaia lasi. Unai dainai dubu lau lao lou lasi. “Seint,” pris ta dekenai emu dika gwauraia kwarana, o hel lahina lau abia dae lasi. Bona egu kaivakuku ibounai lau kokia danu. Lau diba lasi bema kara maorona lau karaia. Lau lalohisihisi bada, to Dirava lau guriguri henia noho: “Lau ura oi lau dibaia. Mani lau oi durua!” Lau laloatao, Iehova ena Witnes taudia be nega momo egu iduara dekenai idia pidipidi, to iduara lau kehoa diba lasi. Tomadiho ta lau abia dae lasi.

 Lagani 1980 bamona ai, egu taihuna Lauri bona Ramoni be Iehova ena Witnes ida Baibel idia stadilaia matamaia, unai nega ai idia be France bona Spain ai idia noho. Lau laloa, Felisa bamona, idia be koikoi herevadia idia abia dae. Gabeai, Angelines, egu neiba hahinena, lau hedavari henia, bona ia be egu tura namona ai ia lao. Ia danu be Iehova ena Witnes hahinena. Nega momo Angelines bona ena adavana ese lau idia noia idia ida Baibel lau stadilaia totona. Idia laloparara ena be tomadiho lau laloa bada lasi, to lau ura bada Baibel lau dibaia. Gabeai idia lau hamaoroa: “Ia namo. Umui ida do lau stadi, bema egu Baibel lau gaukaralaia!,” unai be Nácar-Colunga Baibel.

Felisa: Lagani 1973 ai lau bapatiso neganai, Santander ai, Witnes taudia be 70 bamona, unai be Cantabria, Spain, ena siti badana. Emai teritori be bada herea dainai, basi amo ai lao bena motuka ai guia bona hanua ta ta ibounai dekenai ai haroro.

Idia hanaia laganidia lalonai, taunimanima momo lau stadi henia, bona 11 idia bapatiso. Idia momo be Katolik taudia. Guna lau be Katolik dainai, lau diba lau haheauka be namo. Lau laloparara idia dekenai nega lau henia be namo, unai amo hahediba hereva koikoidia idia rakatania diba, bona Iehova ena lauma helaga ese edia kudouna ia hamarerea guna be namo, unai amo hereva momokani do ia abia dae. (Heb. 4:12) Egu adavana, Bienvenido, be guna pulisi tauna, ia be lagani 1979 ai ia bapatiso, bona egu sinana be Baibel ia stadilaia matamaia bena ia mase.

Araceli: Iehova ena Witnes taudia ida Baibel lau stadi matamaia neganai, idia lau abidadama henia lasi. To wiki idia hanaia lalonai, lau mamia egu kara ia idau. Lau itaia Witnes taudia be idia harorolaia herevadia idia badinaia. Unai ese egu abidadama ia hagoadaia bona lau moale. Egu neiba taudia haida be lau idia hamaoroa, “Araceli e, oi abia hidi dalana oi badinaia noho!”

Egu guriguri lau laloatao, “Iehova e, oi lau tanikiu henia badina lau dekenai oi hesiku haraga lasi, bona lau dekenai dala oi kehoa lau tahua gauna​—Baibel ena diba maoromaoro​—lau davaria totona.” Danu, egu taihuna Felisa lau noia lau gwauraia herevadia dainai egu dika do ia gwauatao. Unai nega amo, ta ta ida ai hepapahuahu lasi, to mai moale ida Baibel ai herevalaia hebou. Lagani 1989 ai, bapatiso lau abia, unai nega ai egu mauri lagani be 61.

Felisa: Hari egu mauri lagani be 91, lau be vabu, bona egu goada be maragi. To dina ta ta ai Baibel lau duahia, bema lau hegeregere, hebou lau lao henia bona haroro gaukara lau moalelaia.

Araceli: Reana guna lau be nan dainai, lau ura bada haroro gaukara ai lau davaria pris bona nan taudia lau haroro henia. Idia ida buka bona magasin momo lau rakatania, bona ai herevahereva namonamo. Pris ta lau laloatao. Vadivadi haida murinai, lau ia hamaoroa: “Araceli e, emu hereva lau abia dae, to lau buruka dainai edeseni do lau lao? Pris ma haida bona egu famili taudia be dahaka do idia gwau?” Lau gwau: “Bona Dirava be dahaka do ia gwau?” Ia lalohisihisi sisina, to ia gari tomadiho momokani ia tahua totona.

Egu mauri ai mai anina bada negana ta lau laloa. Unai be egu adavana ese lau ia hamaoroa ia ura lau ida hebou dekenai do ia lao. Ena be unai nega ai iena mauri lagani be 80 bamona, to unai murinai hebou ta ia reaia lasi. Baibel ia stadilaia bona pablisa ai ia lao. Ai haroro hebou negadia lau laloaboio diba lasi. Hua rua idia do noho bena do ia bapatiso neganai, ia mase.

Felisa: Lau moale bada, badina ena be guna egu egu taihudia toi ese lau inai henia, to hari idia be lau ida Iehova idia tomadiho henia. Oibe, lau moale idia ida emai Dirava Iehova, bona ena Hereva, Baibel, lau herevalaia! Hari, ai ibounai be Iehova ai tomadiho henia. *