Tau ginigunana, Adamu ena bese amo ita mai dainai, ita be famili tamona. Ena be famili lalonai ta ta lalokau henia bona hemataurai heheni be gau badana, to hari inai negai ia auka unai bamona lalokau ita hahedinaraia totona. Iseda lalokau Diravana be unai ia ura henia lasi.

“Emui badibadinai tauna do umui lalokau henia, umui sibona umui lalokau henia hegeregerena.”​—LEVITIKO 19:18.

“Emui inai taudia do umui lalokau henia noho.”​—MATAIO 5:44.

Dirava ese 1 Korinto 13:4-7 ai, lalokau karana ia herevalaia dalana mani ita itaia:

“Lalokau be ia boga-auka, bona ia hebogahisi.”

Lalohadailaia: Bema haida be oi dekenai idia haheauka bona idia manau bona emu kara kereredia dekenai idia badu lasi, emu hemami be edena bamona?

“Lalokau be ia mama lasi.”

Lalohadailaia: Bema haida be oi idia laloa kerere o idia mama henia, emu hemami be edena bamona?

Lalokau be “sibona ena namo ia tahua lasi.”

Lalohadailaia: Bema haida be emu lalohadai idia matauraia bona hanaihanai oi idia doria lasi edia hereva oi badinaia, emu hemami be edena bamona?

Lalokau be “ta ena kerere ia laloatao noho lasi.”

Lalohadailaia: Dirava ia ura edia kara dika amo idia helalo-kerehai taudia edia dika ia gwauatao. “Ia ese ita do ia gwau henia hanaihanai lasi. Iena badu be hanaihanai do ia noho lasi.” (Salamo 103:9) Do ita moale bema ita habadua tauna be iseda dika ia gwauatao. Unai dainai, bema haida ese ita idia habadua, namona be ita noho hegaegae edia dika ita gwauatao totona.​—⁠Salamo 86:5.

Lalokau be “kara maoromaoro lasi karana ia moalelaia lasi.”

Lalohadailaia: Bema ita dekenai gau dikana ta ia vara, ita ura lasi ma haida ese ita davaria hisihisi dainai idia moale. Unai dainai namo lasi ita moale bema ma haida be mauri aukana idia davaria, ena be unai taudia ese ita idia kara namo henia lasi.

Dirava ena hahenamo ita moalelaia totona, namona be ma haida ita lalokau henia, ena be edia mauri lagani, bese bona tomadiho be idau. Unai ita badinaia diba dalana ta be, heduru idia ura henia taudia ita durudia.