Baibel ia gwau: “Iehova e, heduru totona do lau taitai ela bona edena negai, to oi kamonai lasi? Dagedage amo lau oi hamauria totona oi dekenai lau boiboi noho, to kara ta oi karaia lasi?” (Habakuku 1:2, 3, NWT) Inai be Dirava ena lalonamo ia abia tauna ena noinoi. Unai ese ia hahedinaraia ia be abidadama lasi, a? Lasi! Dirava ese Habakuku dekenai ia gwauhamata, ena nega korikori dekenai hisihisi ibounai do ia haorea.​—Habakuku 2:2, 3.

Emu ruma bese lalonai, ta be hekwakwanai ta ia davaria neganai, nega haida do oi laloa Dirava be kara ta ia karaia lasi, bona do oi ura Dirava be ia vara hekwakwanai ia kokia. To, Baibel ese ita ia hagoadaia, ia gwau: “Iehova be ena gwauhamata hagugurua totona ia metairametaira lasi, haida idia laloa bamona, to umui dekenai ia haheauka, badina ia ura lasi tau ta ia mase, to ia ura taunimanima ibounai idia helalo-kerehai.”​—2 Petero 3:9.

Kahirakahira! Iesu ese ia hahedinaraia, uru ta ese nega dokona ena “oromana” ai idia vara toa idauidau do idia itaia. (Mataio 24:3-42) Hari, Iesu ena peroveta hereva idia guguru karana ese idia hahedinaraia kahirakahira Dirava ese taunimanima ese idia davaria noho hisihisi ibounai do ia haorea. *

To, edena dala ai Dirava ese hisihisi ibounai do ia haorea? Iesu be tanobada ai ia noho neganai, Dirava ena siahu ia gaukaralaia taunimanima edia hisihisi ia hamaragia totona. Mani haheitalai haida ita itaia.

Disasta: Iesu bona ena aposetolo taudia be Galilea gohuna ai idia lao noho lalonai, guba lai ta ia toa bona kahirakahira edia bouti ia mutu. To, Iesu ese ia hahedinaraia, ia bona ena Tamana ese havaraia gaudia ibounai idia biagua diba. (Kolose 1:15, 16) Iesu be karaharaga ia gwau: “Hadokoa! Regerege lasi!” Dahaka ia vara? “Bena lai ia doko, bona gohu ia namo lou.”​—Mareko 4:35-39.

Gorere: Taunimanima momo idia diba Iesu be matakepulu bona aena dika taudia ia hanamoa, bona danu epilepsy gorere, lepera gorere o gorere ma haida ia hanamoa diba.​—Mataio 4:23, 24; 8:16; 11:2-5.

Hitolo bada: Iesu be ena Tamana ena siahu amo, idia hitolo bada taudia dekenai aniani momo ia henia. Baibel ese nega rua unai ia sivarailaia, ia ese taunimanima tausen momo ia ubua.​—Mataio 14:14-21; 15:32-38.

Mase: Baibel amo ita diba, idaunegai, Iesu ese idia mase taudia toi ia hatorea isi lou, unai ese ia hahedinaraia Iehova be mai ena siahu mase ia haorea totona. Unai sivarai ai ia hatorea isi lou tauna ta be dina foa lalonai ia mase.​—Mareko 5:35-42; Luka 7:11-16; Ioane 11:3-44.