Baibel be lagani momo ia noho bukana. Lagani hida ia noho vadaeni? Baibel be lagani 3,500 gunanai idia torea matamaia. Unai nega ai, China ena lohia ginigunana (Shang dynasty) ena aria idia karaia bona India ai Buda tomadihona ia matamaia danu.​—Maua ladana, “Baibel Ia Herevalaia Gaudia” itaia.

Bema buka ta be taunimanima dekenai heduru ia henia bona idia ia hakaua namonamo, namona be unai buka idia lalopararalaia bona gaukaralaia. Baibel be unai bamona bukana ta. Bona mauri lalonai idia vara henanadai badadia ia haerelaia diba.

Hegeregere, nega ta oi henanadai, ‘Dahaka dainai tanobada ai ita noho?’ Lagani tausen momo lalonai taunimanima ese unai henanadai idia daradaralaia, bona idia do daradara noho. To, unai henanadai ena haere be Baibel ena buka ginigunana, Genese, ena karoa ginigunadia rua lalonai idia noho. Unai karoa rua lalonai Baibel ese ia hahedinaraia, “matamaia neganai”​—lagani bilioni momo gunanai​—iseda unives lalonai idia noho gaudia, hegeregere tanobada, galaksi, bona hisiu idia vara dalana edia sivarai ia noho. (Genese 1:1) Danu tanobada ita noholaia dalana, mauri gaudia idauidau idia vara dalana, bona taunimanima ia havaraia dalana ia hahedinaraia danu.

Baibel ese hakaua hereva namodia ia henia, unai ese ita ia durua dina ta ta ena hekwakwanai ita hamaoromaoroa totona. Unai hakaua herevadia ita lalopararalaia diba. Mani unai dala rua ita itaia.

Ginigunana be, Baibel be ita lalopararalaia dalanai idia torea, bona ena hereva be maoromaoro bona iseda lalona ia veria diba. Baibel ai hereva aukadia eiava hehuni herevadia idia gaukaralaia lasi, to hereva maorodia bona ita lalopararalaia diba herevadia idia gaukaralaia. Bona dina ta ta ai ita gaukaralaia herevadia idia gaukaralaia, lalohadai aukadia edia anina idia hahedinaraia totona.

Hegeregere, Iesu be taunimanima ese dina ta ta ai idia davaria gaudia amo auka lasi dalanai haheitalai ia gaukaralaia, unai amo ia hadibaia gaudia ese edia kudouna ia veria diba. Iesu ena Ororo Harorona ai, unai bamona sivarai momo ia gaukaralaia bona Mataio karoa 5 ia lao 7 dekenai idia noho. Unai dainai Baibel herevalaia tauna ta ia gwau: “Baibel be iseda  mauri ia durua bukana ta bona ia be lalohadai sibona ia henia lasi to iseda mauri ai ita ia hakaua danu.” Oi ese unai karoa be miniti 15 ia lao 20 ai oi duahia diba, bona Iesu ese ia gaukaralaia auka lasi bona lalona veria herevadia oi davaria dainai do oi hoa.

Baibel ita lalopararalaia diba dalana iharuana be inai, ia lalonai idia noho hereva badadia be auka lasi dalanai idia torea. Ia be gori bukana lasi. Bona buka ta (The World Book Encyclopedia) ese Baibel ia herevalaia neganai, ia gwau ia be “ladana bada bona ladana maragi taudia totona,” bona edia “hekwarahi, helaro, manoka gaudia bona idia kwalimulaia gaudia” ia herevalaia. Baibel ai idia noho taudia edia sivarai, edia mauri ai idia vara gaudia, bona idia dibaia mai anina bada gaudia, ita duahia neganai ita laloatao bona lalopararalaia diba.​—Roma 15:4.

Buka ta oi lalopararalaia totona, emu gado dekenai ia noho be namo. Herevana edeseni oi noho eiava oi be edena bese tauna, to Baibel be oi lalopararalaia diba gado dekenai oi abia diba. Baibel be emu gado ai oi abia totona, dahaka gaudia rua idia karaia?

Trensleisen. Baibel be Heberu, Aramia bona Grik gado ai idia torea guna. Unai dainai haida sibona ese idia duahia diba. Trensleita taudia idia gaukara goada Baibel be gado ma haida dekenai idia hahanaia totona. Unai dainai hari Baibel ibounai eiava ena kahana ta be gado 2,700 mai kahana ai idia hahanaia. Anina be tanobada hegegemadai taunimanima edia popiuleisen amo 90 pesen mai kahana be edia gado korikori ai Baibel ena kahana haida idia duahia diba.

Halasia. Guna Baibel ena toretore ginigunadia be idia dika haraga diba gaudia, hegeregere, leda bona papirus dekenai idia torea. Unai toretoredia idia boio lasi totona, namona be idia torea namonamo bona idia torea hanai lou. Unai kopi edia davana be bada, bona haida sibona ese idia hoia diba. To lagani 550 gunanai Gutenberg ena printa masini amo Baibel ena kopi momo idia printaia. Baibel ibounai eiava ena kahana be kopi 5 bilioni mai kahana bamona idia hariharilaia.

Tomadiho haida edia buka be Baibel hegeregerena lasi. Unai ese ia hahedinaraia, Baibel be ita lalopararalaia diba bukana ta. To, ita lalopararalaia totona be mai ena hekwarahi. To heduru dalana ia noho. Edeseni ai oi davaria diba? Bona edena bamona oi do ia durua? Atikol gabena ai unai do oi diba.