HEADAVA TAUDIA
3: Hemataurai
ANINA BE DAHAKA?
Headava taudia mai edia hemataurai be idia laloa bada heheni, ena be nega haida gau ta dekenai idia lalotamona lasi. Buka ta ladana Ten Lessons to Transform Your Marriage ia gwau: “Unai headava taudia be lalotamona havaraia dalana idia koua lasi. To, idia hepapahuahulaia gauna idia herevalaia hebou namonamo. Tau o hahine be mai hemataurai ida ena adavana ena lalohadai ia kamonai namonamo bona idia ruaosi ese do idia moalelaia disisen idia tahua.”
BAIBEL ENA HAKAUA HEREVA: “Lalokau be . . . sibona ena namo ia tahua lasi.”—1 Korinto 13:4, 5.
“Egu hahine lau matauraia ena anina be, ia do lau laloa bada bona lau ura lasi egu kara o hereva amo ena lalona lau hahisia bena emai headava ia dika.”—Micah.
DAHAKA DAINAI HEMATAURAI HEHENI BE GAU BADANA?
Bema headava taudia idia hemataurai heheni lasi, edia herevahereva lalonai ma ta hadikaia herevadia do idia gwauraia badabada, ma ta kirikirilaia herevadia do idia gwauraia, bona inai heheni—researchers idia gwau, unai bamona idia karaia headava taudia be gabeai idia divos.
“Emu hahine hadikaia o kirikirilaia herevadia oi gwauraia neganai, ia be oi do ia trast diba lasi, bona headava do oi hadikaia.”—Brian.
DAHAKA OI KARAIA DIBA?
OI SIBONA OI NANADAIA
Wiki ta lalonai emu kara bona hereva oi stadilaia namonamo. Bena oi sibona oi nanadaia:
-
‘Nega hida egu adavana dekenai hadikaia herevadia lau gwauraia? Nega hida ia lau tanikiu henia o hanamoa?’
-
‘Edena dala haida ai lau hahedinaraia egu adavana lau matauraia?’
EMU ADAVANA IDA OI HEREVALAIA HENANADAI
-
Edena bamona karadia bona herevadia dainai, umui laloa umui hemataurai heheni?
-
Edena bamona karadia bona herevadia dainai, umui laloa umui hemataurai heheni lasi?
DALA MA HAIDA
-
Emu adavana ese oi ia matauraia daladia toi be pepa ta dekenai oi torea. Emu adavana ese unai bamona ia karaia danu be namo. Bena tau ese unai pepa be hahine dekenai ia henia, bona hahine ese ena pepa be tau dekenai ia henia.
-
Emu adavana ena kara namodia ena lista ta oi karaia. Bena emu adavana oi hamaoroa, oi be unai kara oi moalelaia.
“Egu tau lau matauraia totona, namona be egu kara amo lau hahedinaraia lau be ia lau laloa bada bona lau ura ia moale. Nega ibounai kara badana ta ita karaia amo hemataurai karana ita hahedinaraia be anina lasi; nega haida, kara maragina ta amo hemataurai karana ita hahedinaraia diba.”—Megan.
Oi sibona ese hemataurai oi hahedinaraia lalohadaina oi abia be gau badana lasi; gau badana be emu adavana ia mamia oi be ia oi matauraia.
BAIBEL ENA HAKAUA HEREVA: “Inai bamona kara be dabua bamona do umui hahedokilaia, hebogahisi mai lalokauna, hariharibada, lalomanau, manau, bona boga-auka.”—Kolose 3:12.
