Vanegai, tanobada gunalaia taudia, saiens, bona teknoloji idia karaia taudia ese artificial intelligence (AI) ena gaukara dalana idia herevalaia. Idia diba ia be mai ena namo, to danu idia gwau dika do ia havaraia diba.

•   “AI be hari nega ena teknoloji goadana ta, taunimanima edia mauri durua totona . . . To danu, AI dainai iseda seifti bona sekiuriti totona ita gari, iseda maoro bona privacy ia hadikaia diba bona do ia auka gavamani ena gaukara dalana ita trast totona.”​—Kamala Harris, United States ena vice president, May 4, 2023.

•   “Inai kompiuta program (AI) ese medikol dalanai taunimanima ia durua, to danu dala ma haida ai, edia helt ia hadikaia.” International group of doctors and health-care ia gunalaia diba bada tauna, Dr. Frederik Federspiel, ena hereva be May 9, 2023, BMJ Global Health a atikol ta ai idia halasia.

•   “AI be taunimanima ese idia gaukaralaia, sivarai koikoi halasia totona. Daudau lasi unai ese taunimanima edia moni gaukara dekenai dika do ia havaraia. Teknoloji masini idia karaia taudia haida idia laloa momo badina AI ese gabeai taunimanima dekenai dika do ia havaraia.”​—The New York Times, May 1, 2023.

 Taunimanima ese edena bamona AI do idia gaukaralaia, idia do ia durua o hadikaia be nega ia hanaia lalonai do ia hedinarai. Baibel be dahaka ia gwau?

 Baibel ia hahedinaraia taunimanima be hegeregere lasi idia karaia teknoloji matamatadia amo namo sibona idia havaraia totona.

1.  1. Taunimanima be mai lalohadai namona ida teknoloji matamatadia idia karaia, to idia karaia gaudia ese gabeai dika bada do ia havaraia be idia diba lasi.

   •   “Tau ta ia laloa ia lao henia dalana be maoro, to unai dala ena dokona be mase.”​—Aonega Herevadia 14:12.

2.  2. Haida ese ta ia karaia gauna idia gaukaralaia, to unai gauna do idia gaukaralaia namonamo eiava lasi be unai tauna ese ia biagua diba lasi.

   •   “Egu murinai do ia lohia tauna dekenai [egu gaukara] do lau rakatania. Bona lau diba lasi ia be do ia aonega eiava ia be kavakava tauna ai do ia lao. To ia ese tanobada dekenai egu hekwarahi bona egu aonega amo lau abia gaudia ibounai do ia biagua.”​—Hadibaia Tauna 2:18, 19.

 Unai bamona lalohadai ese ia hahedinaraia ita ura iseda Havaraia Tauna ena hereva ese ita ia hakaua.

 Iseda Havaraia Tauna ia gwauhamata taunimanima eiava idia karaia teknoloji ese tanobada o taunimanima do idia hadikaia diba lasi.

•   “Tanobada be ia noho hanaihanai.”​—Hadibaia Tauna 1:4.

•   “Kara maoromaoro taudia be tanobada do idia abia, bona tanobada ai do idia noho ela bona hanaihanai.”​—Salamo 37:29.

 Iseda Havaraia Tauna ese Baibel amo ita dekenai hakaua herevadia ia henia, unai ese ita dekenai maino bona vaira nega namona ia henia. Baibel ena hereva oi diba namonamo totona, inai atikol oi duahia “Dahaka ese Ita Ia Durua Vaira Nega Namona Ita Abia Totona?” bona “Helaro Korikorina Vaira Nega Totona.”