Stiuden Ta Ena Daradara
Peter be ia helai namonamo lasi bona ia lalohekwarahi dainai ena hemami be ia dika. Ia matauraia tisa hahinena be Charles Darwin ena evolusen hahediba herevana ia kikilaia, ia gwau Darwin ena hahediba ese saiens ena diba bada ia hahedinaraia bona ia ese taunimanima be edia sene taudia edia lalohadai amo ia ruhaia. Gabeai, tisa ese ena stiuden taudia ia nanadaia edia lalohadai unai sivarai dekenai do idia gwauraia hedinarai totona.
Peter ia daradara bada. Ena tama sina idia hadibaia Dirava ese tanobada bona mauri gaudia ibounai ia havaraia. Idia gwau Baibel ena hereva gau ibounai idia vara dalana dekenai ita abidadama henia diba, to evolusen be taunimanima idia lalohadailaia gauna sibona, bona hamomokania gauna ta be lasi. Peter ena tisa bona ena tama sina idia ura ia idia durua. To daika ena hereva do ia abia dae?
Lagani ta ta ai, tanobada hegegemadai ai sikuli momo dekenai unai bamona kara be klasrum tausen momo lalonai idia vara. Peter bona ia bamona stiuden taudia be dahaka do idia karaia be namo? Reana do oi gwau, sibodia edia lalohadai unai sivarai dekenai do idia hamomokania, ia maoro eiava lasi, ani? Namona be evolusen ena hahediba hamomokania gaudia, bona Dirava ese mauri ia havaraia ena hahediba hamomokania gaudia idia tahua, bena murinai, sibodia do idia abia hidi diba edena be maoro.
Momokani, Baibel ese ita ia sisiba henia ta ena hadibaia herevana ita abia dae kava lasi. Baibel torea tauna ta ia gwau: “Diba bada lasi tauna ese hereva ibounai ia abia dae, to aonega tauna be do ia karaia gaudia ia laloa namonamo guna.” (Aonega Herevadia 14:15) Baibel ese Keristani taudia ia hagania “mai laloa namonamo ida” idia gaukara, bona idia sibodia ese do idia hamomokania idia dibaia noho gaudia be maoro o kerere.—Roma 12:1, 2.
Inai buklet be tomadiho grup idauidau durua totona idia karaia lasi, sikuli dekenai mauri gaudia edia vara dalana idia hadibaia totona. To inai buklet ai karaia ena badina be mauri ia vara kava ena hahediba idia abia dae taudia edia hereva ita tahua namonamo totona, badina idia gwau Baibel lalonai gau iboudiai idia vara sivaraina be gori sibona.
Mauri gaudia edia sel ita laloa guna, badina be mauri gaudia iboudiai be sel amo idia vara matamaia. Sel edia gaukara dalana do oi diba neganai do oi hoa. Danu, henanadai idia noho oi laloa totona, unai amo do oi itaia evolusen lalohadaina durua totona idia gwauraia herevadia be maoro eiava lasi.
Hari eiava gabeai, ita ibounai ese inai henanadai do ita laloa be namo, Ta ese mauri ia Havaraia eiava evolusen amo ia vara? Reana guna unai hereva oi laloa momo. Inai buklet lalonai hamomokania gaudia haida do ia hahedinaraia, dahaka dainai taunimanima momo idia abia dae Dirava ese mauri ia havaraia.
