Aneru Gabriela ese kekeni matamata Maria ia hamaoroa ia be natuna mero ta do ia havaraia, bona ena ladana do ia hatoa Iesu, bona do ia lohia ela bona hanaihanai. Unai murinai, Maria ia henanadai: “Unai be edena bamona do ia vara, badina lau be tau ta ida lau mahuta hebou lasi?”​—Luka 1:34.

Gabriela ia haere: “Lauma helaga be oi latanai do ia diho, bona Ataiai Momokani Diravana ena siahu ese oi do ia koua. Bona unai dainai, ia vara natuna be do idia gwauraia helaga, Dirava ena Natuna.”​—Luka 1:35.

Maria ese unai hereva ia abia dae totona, Gabriela ma ia gwau: “Kamonai! Emu varavara Elisabeta be ia rogorogo bona inai be ena hua namba 6, ena be ia be buruka bona taunimanima idia gwau ia be gabani, badina Dirava ese ia gwauraia hereva ibounai be do idia guguru.”​—Luka 1:36, 37.

Maria ena haere amo ita diba, Gabriela ena hereva ia abia dae. Ia gwau: “Lau be Iehova ena hesiai kekenina! Mani emu hereva hegeregerena lau dekenai do ia vara.”​—Luka 1:38.

Gabriela ia lao murinai, Maria ia hegaegae Elisabeta ia vadivadi henia totona. Elisabeta bona ena tau, Sekaraia, be Iudea ena ororo gabudia, Ierusalema kahirakahira, idia noho. Maria be ena noho gabuna Nasareta amo dina toi o foa do ia laolao.

Maria be Sekaraia ena ruma dekenai ia ginidae. Ia vareai neganai, ena varavara Elisabeta ia hanamoa. Unai nega dekenai, Elisabeta be lauma helaga amo ia honu, bona Maria dekenai ia gwau: “Hahine huanai Dirava ese oi ia hanamoa, bona emu bogana lalonai ia noho beibi be Dirava ese ia hanamoa! Lau dekenai inai be hahenamo badana, badina egu Lohiabada ena sinana be lau ia vadivadi henia. Itaia! Emu hanamoa herevana lau kamonai neganai, egu bogana lalonai ia noho beibi be mai moale bada ida ia marere.”​—Luka 1:42-44.

Bena Maria be mai moale ida ia gwau: “Lau ese Iehova lau hanamoa, bona Dirava, egu Hamauria Tauna dekenai lau moale bada, badina ia ese ena manau hesiai kekenina ia itaia. Itaia! Inai nega amo uru ibounai do idia gwau hahenamo lau abia, badina siahu ibounai Diravana ese lau totona kara badadia ia karaia.” Maria ena hereva amo ita itaia, herevana Elisabeta ese ia hanamoa, to hanamoa ibounai be Dirava ia henia. Ia gwau: “Iena ladana be helaga, bona uru ta ta ibounai ia idia gari henia taudia latanai iena hebogahisi do ia noho.”​—Luka 1:46-50.

Maria ese Dirava ia hanamoa loulou, ia gwau: “Iena imana amo siahu karadia ia karaia vadaeni, bona edia kudouna ai idia hekokoroku taudia be gabu idauidau dekenai ia luludia lao. Ia ese dagi bada taudia be edia terona amo ia kokia bona ladana maragi taudia ia abia isi. Ia ese gau namodia be hitolo taudia dekenai ia henia bona taga taudia be imana kavakava ia siaidia lao. Ia be ena hesiai tauna Israela durua totona ia mai, unai amo do ia hahedinaraia iena gwauhamata ia laloatao. Ia gwauhamata Aberahamo bona ena bese taudia dekenai hebogahisi do ia hahedinaraia ela bona hanaihanai, iseda tubudia ia hamaoroa hegeregerena.”​—Luka 1:51-55.

Maria be Elisabeta ida hua toi ia noho—reana ia ura heduru ia henia badina Elisabeta ena mara negana be ia kahirakahira. Inai abidadama hahine rua be Dirava ena heduru amo natudia do idia havaraia dainai, unai nega ai idia ruaosi idia durua heheni be moale gauna!

Mani oi laloa: Ena be Iesu ia do vara lasi, to taunimanima be ia idia hanamoa. Maria be nega ginigunana ia vadivadi neganai, Elisabeta ese Iesu ia gwauraia “egu Lohiabada,” unai nega ai Elisabeta ena bogana ai ia noho natuna be “mai moale bada ida ia marere.” To gabeai, taunimanima ese Maria bona ena bogana ai ia noho natuna idia kara henia dalana be idau momokani.