Iesu bona ena hahediba taudia be Perea ena saut kahana amo Ierusalema idia lao neganai, idia be Ieriko kahirakahira amo Ioridane Sinavai idia hanaia. Haida be lagani 33 C.E. ena Pasova aria totona idia ida idia lao.

Iesu be hahediba taudia vairanai ia raka, ia ura Ierusalema dekenai do ia ginidae haraga Pasova aria totona. To hahediba taudia idia gari. Guna, Lasaro ia mase bona Iesu be Perea amo ia ura lao Iudea neganai, Toma ese ia hamaorodia: “Namona be ita danu ita lao, unai amo ia ida do ita mase.” (Ioane 11:16, 47-53) Unai dainai hahediba taudia idia gari Ierusalema dekenai idia lao totona.

Do ia vara gauna totona Iesu ese ena aposetolo taudia ia hahegaegaea, ia gwau: “Ita be Ierusalema dekenai ita daekau lao noho, bona taunimanima ena Natuna be dubu biagudia bona taravatu hadibaia taudia dekenai do idia henia. Idia ese ia hamasea herevana do idia gwauraia, bona idau bese taudia dekenai ia do idia henia, do idia kirikirilaia, do idia kwadia bona au dekenai do idia kokoa kau, bena dina ihatoina ai do ia toreisi lou.”​—Mataio 20:18, 19.

Inai be nega ihatoina Iesu ese ena hahediba taudia dekenai iena mase bona toreisi lou ia herevalaia. (Mataio 16:21; 17:22, 23) To hari idia ia hamaoroa ia be au dekenai do idia kokoa kau. Iena hereva idia kamonai, to ena anina idia lalopararalaia lasi. Reana idia laloa Israela basileiana be tanobada ai do ia haginia lou, bona idia ura tanobada basileiana ai Keriso ida hairai bona hemataurai idia abia.

Aposetolo Iamesi bona Ioane edia sinana, reana Salome, be idia ida ia laolao. Iesu ese unai aposetolo taudia rua dekenai inai ladana, “Guba Boiboi Natudia,” ia henia, badina idia be badu haraga taudia. (Mareko 3:17; Luka 9:54)  Nega daudau lalonai idia ruaosi idia ura Keriso ena Basileia lalonai dagi badadia idia abia. Bona edia sinana be unai ia diba. Unai dainai Iesu dekenai ia lao, iena vairanai ia igo diho bona ena natudia totona ia noinoi. Iesu ia gwau: “Dahaka oi ura?” Ia haere: “Mani oi gwauhamata, egu natudia ruaosi be emu Basileia lalonai do idia helai, ta be emu idibana ai bona ta be emu laurina ai.”​—Mataio 20:20, 21.

Iesu ia diba unai be Iamesi bona Ioane edia lalohadai. Iesu ese ia hamaorodia vadaeni ia do idia hahemaraia bona hisihisi do ia davaria, unai dainai ia gwau: “Umui noia gauna be umui diba lasi. Lau inua gwauraia kapusi umui inua diba, a?” Idia haere: “Ai inua diba.” (Mataio 20:22) Reana idia ruaosi be unai hereva ena anina idia lalopararalaia lasi.

To Iesu ia gwau: “Lau inua kapusi do umui inua, to lau ese gwaumaoro do lau henia lasi, daika be egu idibana eiava laurina kahanai do ia helai, to egu Tamana ese ia abia hidi taudia be unuseniai do idia helai.”​—Mataio 20:23.

Aposetolo ma haida be Iamesi bona Ioane edia noinoi idia kamonai neganai idia badu dikadika. Guna aposetolo taudia ese daika be bada idia hepapahuahu neganai, reana Iamesi bona Ioane be idia hereva auka. (Luka 9:46-48) Herevana dahaka, edia noinoi ese ia hahedinaraia aposetolo taudia 12 be Iesu ena sisiba, manau karana dekenai idia badinaia lasi. Idia be idia ura dagi bada idia abia.

Iesu ia ura aposetolo rua edia noinoi bona ia vara hekwakwanai ia hamaoromaoroa. Unai dainai aposetolo 12 ia boiria, bona lalokau dalanai ia sisiba henidia, ia gwau: “Umui diba, bese idauidau taudia edia king ese edia bese idia biagudia auka bona edia ladana bada taudia ese idia kara auka henidia. Umui huanai unai bamona do ia vara lasi. To bema ta ia ura emui huanai do ia bada, namona be emui hesiai tauna ai do ia lao. Bona bema ta ia ura emui huanai do ia guna, ia be umui ibounai emui hesiai tauna ai ia lao be namo.”​—Mareko 10:42-44.

Iesu be haheitalai namona aposetolo taudia ese idia tohotohoa totona. Ia gwau: “Taunimanima ena Natuna ia mai, taunimanima ese ia idia hesiai henia totona lasi, to ma haida hesiai henia totona ia mai, bona ena mauri ia henia, taunimanima momo edia mauri davana karaia totona.” (Mataio 20:28) Lagani toi lalonai, Iesu be ma haida ia hesiai henia. Bona unai do ia karaia noho ela bona taunimanima ibounai totona ia mase! Hahediba taudia ese Iesu ena kara idia tohotohoa be namo, bona ma haida do idia hesiai henia. Namo lasi idia laloa haida ese idia do idia hesiai henia. Bona sibodia do idia laloa maragi, namo lasi dagi bada idia tahua.