Iesu be Farisea taudia edia gunalaia tauna ena ruma ai ia aniani lalonai, mai anina bada gaudia ia hadibaia. Ierusalema dekenai ia lao neganai, hutuma be ia idia bamoa. Dahaka dainai? Idia ura iena hahediba taudia ai idia lao, a? Hahediba tauna ena maduna huaia totona, edia ura idia dadaraia diba, a?

Idia raka noho lalonai, Iesu ese idia dekenai ia gwauraia herevana dainai haida idia hoa, ia gwau: “Bema tau ta be lau dekenai ia mai, to ena tamana, bona sinana, bona adavana, bona natudia, bona tadikaka, bona taihu bona ia sibona ena mauri danu ia inai henia lasi, ia be hegeregere lasi egu hahediba tauna ai do ia lao.” (Luka 14:26) To iena hereva ena anina be dahaka?

Iesu ia gwau lasi ia murinai idia raka taudia ese edia varavara do idia inai henia. To ena hereva anina be, edia lalokau edia varavara dekenai be do ia maragi, to Iesu dekenai be do ia bada. Namo lasi idia be iena haheitalai lalonai ia gwauraia tauna bamona, ia headava dainai Iesu ena boiboi herevana ia abia dae lasi. (Luka 14:20) Iuda taudia edia sene tauna, Iakobo, ese Lea ia “inai henia” to Rahela ia lalokau henia, anina be ena lalokau Rahela dekenai be bada, to Lea dekenai be maragi.​—Genese 29:31; futnout.

Mani oi laloa, Iesu ia gwau hahediba tauna be “ia sibona ena mauri danu ia inai henia” be namo. Anina be hahediba tauna momokanina be Iesu do ia lalokau henia bada, to ia sibona ena mauri do ia laloa maragi, bona bema hegeregere, ena mauri do ia halusia danu. Oibe, ta be Keriso ena hahediba tauna ai ia lao karana be maduna badana. Unai dainai ta ia laloa namonamo guna be namo, gabeai hahediba tauna ai ia lao diba.

Hahediba tauna be hekwakwanai bona dagedage do ia davaria, badina Iesu ia gwau: “Iena hisihisi auna ia huaia lasi bona egu murinai ia mai lasi tauna be hegeregere lasi egu hahediba tauna ai do ia lao.” (Luka 14:27) Oibe, namona be Iesu ena hahediba tauna momokanina ia abia dae haida ese ia do idia gwauraia dika, Iesu hegeregerena. Danu Iesu ia gwau ena inai taudia ese ia do idia hamasea.

Unai dainai Iesu idia bamoa hutuma be Keriso ena hahediba tauna ai idia lao karana ena anina idia laloa namonamo be namo. Unai hahedinaraia totona Iesu ese parabole ta ia gwauraia: “Hegeregere, bema umui ta ia ura kohoro ta ia haginia, do ia helai guna bona ena davana do ia laloa, do ia itaia bema ena moni be ia hegeregere kohoro ia haorea totona. Dika kohoro ena badina ia haginia to ia hegeregere lasi ia haorea totona.” (Luka 14:28, 29) Unai dainai hahediba taudia ai idia do lao lasi neganai, ia ida Ierusalema dekenai idia lao hutuma be edia lalona idia hadaia be namo, unai maduna idia huaia namonamo totona. Unai hagoadaia totona, parabole ma ta ia gwauraia:

 “King ta be king ma ta tuari henia totona ia lao neganai, ia be do ia helai bona haida edia lalohadai do ia tahua guna, bema ia bona ena tuari taudia 10,000 be idia hegeregere, unai king bona ena tuari taudia 20,000 idia tuari henia totona. To bema ia hegeregere lasi, vadaeni king ma ta be gabu daudau dekenai idia do noho neganai, ena gwaukau taudia do ia siaia, maino idia karaia totona.” Point hahedinaraia totona, Iesu ia gwau: “Unai hegeregerena, bema umui ta be iena kohu ibounai ia dadaraia lasi, ia be egu hahediba tauna ai ia lao diba lasi.”​—Luka 14:31-33.

Oibe, Iesu be ia idia bamoa hutuma sibona dekenai unai ia gwauraia lasi. To Keriso idia dibaia taudia ibounai ese iena hereva idia badinaia be namo. Anina be bema idia ura ena hahediba taudia ai idia lao, namona be edia lalona idia hadaia edia kohu, bona edia mauri danu, idia dadaraia totona. Unai idia laloa dobu bona gurigurilaia be namo.

Hari Iesu ese guna Ororo Harorona ai ia gwauraia herevana ia gwauraia lou, ia gwau ena hahediba taudia be “tanobada ena damena.” (Mataio 5:13) Damena be aniani dekenai idia atoa ia bodaga lasi totona, unai hegeregerena iena hahediba taudia ese taunimanima be tomadiho koikoi bona kara dikadia amo idia gimaia. Iesu ena haroro gaukara be kahirakahira do ia hadokoa dainai, ia gwau: “Damena be gau namona. To bema ena mamina ia ore, dahaka ese ena mamina ia hanamoa diba?” (Luka 14:34) Iena kamonai taudia idia diba, bema damena be tano ida idia mikisia, ia be goeva lasi, bona taunimanima ese idia gaukaralaia diba lasi.

Unai dainai Iesu ese ia hahedinaraia, nega daudau ia idia badinaia taudia ese edia abidadama idia hagoadaia noho be namo. Bema idia manoka, idia be hegeregere lasi taunimanima idia durua totona, damena ese ena mamina ia haboioa bamona. Bena tanobada taudia ese do idia kirikirilaia. Unai sibona lasi, Dirava ese do ia lalonamo henidia lasi, bona Iena ladana idia hadikaia. Unai ia vara lasi totona, Iesu ia gwau: “Mai ena taiana tauna ia kamonai be namo.”​—Luka 14:35.