Iesu be reana Ioridane Sinavai ena ist kahanai ia noho hanuana, Perea, dekenai ia do noho neganai, boio mamoe bona ia boio moni edia parabole ia gwauraia. Unai parabole rua amo ia hahedinaraia, kara dika tauna ia helalo-kerehai bona Dirava dekenai ia giroa neganai, ita moale be namo. Iesu be unai bamona taudia ia abia dae dainai, Farisea taudia bona taravatu hadibaia taudia ese ia idia gwauraia dika. To idia be Iesu ena parabole rua amo gau ta idia dibaia, a? Iseda guba Tamana ese idia helalo-kerehai taudia ia laloa dalana idia lalopararalaia, a? Iesu ese parabole ta amo ena hereva ena anina ia hahedinaraia.

Inai parabole ai, tamana ta mai ena natuna memero rua ia herevalaia. Inai sivarai lalonai natuna mero iharuana ia herevalaia momo. Farisea bona taravatu hadibaia taudia bona Iesu ena parabole idia kamonai taudia ma haida be natuna mero iharuana ena kara amo gau ta idia dibaia be namo. To Iesu ese tamana bona iena vara guna natuna mero ia herevalaia dalana ita laloa danu be namo, edia kara amo gau ta ita dibaia diba. Iesu ese unai parabole ia gwauraia neganai, mani unai tatau toi ita laloa.

Iesu ia gwau: “Tau ta be mai ena natuna memero rua. Bona natuna iharuana be ena tamana dekenai ia gwau, ‘Egu tamana e, kohu oi haria bona egu kahana oi henia.’ Vadaeni ena kohu be idia huanai ia haria.” (Luka 15:11, 12) Mani oi laloa, natuna mero iharuana be ena tamana ena ahuna totona ia henanadai, ena be ena tamana be ia do mauri noho. Ia ura hari ena ahuna do ia abia, unai amo sibona do ia naria bona ena ura hegeregerena ia gaukaralaia diba. Unai ena anina be dahaka?

Iesu ia gwau: “Dina haida murinai, mero iharuana be ena kohu ibounai ia haboua bona tano daudauna dekenai ia lao, bona gwau-edeede mauri dekenai ena kohu ibounai ia haorea.” (Luka 15:13) Tamana ese ena natudia ia lalokau henia bona ia naridia namonamo, to natuna iharuana ese unai ibounai ia rakatania bona tano ma ta dekenai ia lao. Unuseniai, kara dika idauidau  ia karaia, bona tauanina ena ura hagugurua totona, ena ahuna ibounai ia haorea. Gabeai ena mauri ia auka. Iesu ia gwau:

“Ena kohu ibounai ia haorea neganai, unai tano ibounai dekenai hitolo bada ia vara bona ia ogogami. Vadaeni ia lao bona unai tano tauna ta totona ia gaukara, bena unai tauna ese ia siaia, ena gabu murimuri ai boroma do ia naridia. Bona ia ura dikadika boroma edia aniani ia ania, to tau ta be ia dekenai gau ta ia henia lasi.”​—Luka 15:14-16.

Dirava ena Taravatu ia gwau boroma be miro, to inai mero ese boroma naria gaukarana ia karaia. Ia hitolo bada dainai, ia naridia boroma edia aniani ia ura ania. Unai dika bada bona lalohisihisi negana ai, natuna “ia laloparara.” Dahaka ia karaia? Sibona dekenai ia gwau: “Lauegu tamana ena gaukara taudia edia paraoa be momo, to lau be iniseniai lau hitolo noho! Do lau toreisi bona egu tamana dekenai do lau lao bona ia dekenai do lau gwau: ‘Egu tamana e, lau be oi bona Dirava dekenai lau kara dika vadaeni. Lau be hegeregere lasi oi ese lau be emu natuna bamona oi gwauraia. Lau be emu gaukara tauna ta ai oi halaoa.’” Vadaeni ia toreisi bona ena tamana dekenai ia lao.​—Luka 15:17-20.

Ena tamana be dahaka do ia karaia? Ena natuna do ia gwau henia badina ruma ia rakatania bona ia lao, a? Tamana be iena natuna do ia dadaraia bona hereva henia lasi, a? Bema unai be oi, dahaka do oi karaia? Bema unai be emu natuna mero o kekeni, dahaka do oi karaia?

Iesu ese tamana ena hemami bona kara ia gwauraia: “Daudau amo [natuna mero] ia mai noho lalonai, ena tamana ese ia itaia bona ia hebogahisi henia bena ia heau lao, ia rosia bona ia kisi henia.” (Luka 15:20) Ena be tamana ese ena natuna ena mauri dikana ena sivarai ia kamonai, to mai moale ida ia abia dae. Iuda tomadiho gunalaia taudia idia gwau idia be Iehova idia diba bona tomadiho henia. To unai parabole amo iseda guba Tamana ena hemami idia helalo-kerehai kara dika taudia dekenai idia lalopararalaia, a? Do idia laloparara Iesu ena hemami be ena Tamana ena hegeregere, a?

Tamana be ena natuna ena lalohisihisi toana amo ia diba natuna be ia helalo-kerehai. Danu, tamana be mai moale ida ia lao bona natuna ia hedavari henia dainai, ia auka lasi natuna be ena kara dika ia gwauraia hedinarai. Iesu ia gwau: “Bena natuna be ena tamana dekenai ia gwau, ‘Egu tamana e, lau be oi bona Dirava dekenai lau kara dika vadaeni. Lau be hegeregere lasi oi ese lau be emu natuna bamona oi gwauraia.’”​—Luka 15:21.

Tamana ese ena hesiai taudia ia hamaoroa: “Karaharaga! Dabua namo hereana ta umui mailaia bona ia dekenai umui atoa, bona ena imana dekenai rini umui atoa bona ena aena dekenai sandolo umui atoa. Boromakau natuna namona ta danu umui mailaia, umui alaia, bena do ita aniani bona moale hebou, badina egu natuna inai be ia mase to ia mauri lou, ia boio to ia giroa mai.’ Vadaeni idia moale hebou matamaia.”​—Luka 15:22-24.

Unai neganai, vara guna mero be uma gabu dekenai ia noho. Iesu ia gwau: “Ia giroa mai bona ruma kahirakahira ia lao neganai, miusiki bona mavaru regena ia kamonai. Unai dainai hesiai tauna ta ia boiria bona ia nanadaia dahaka ia vara noho. Unai hesiai tauna be ia dekenai ia gwau, ‘Emu tadina ia mai, bona emu tamana ese boromakau natuna namona ia alaia,  badina ia giroa mai bona dika ta ia davaria lasi.’ To ia badu bona ia ura lasi ia vareai. Bena ena tamana ia raka-lasi bona ia noia goadagoada ia vareai totona. Bena ena tamana ia haere henia, ia gwau, ‘Kamonai! Lagani momo lalonai emu hesiai gaukara lau karaia bona nega ta emu hereva lau utua lasi, to lau dekenai nanigosi natuna ta oi henia lasi, egu turadia ida lau moale totona. To emu natuna inai, ariara hahinedia ida emu kohu ia haorea tauna ia ginidae neganai, oi ese ia totona boromakau natuna namona oi alaia.’”​—Luka 15:25-30.

Iesu be ladana maragi bona kara dika taudia ia hebogahisi henia neganai, daidia be unai natuna ginigunana bamona Iesu idia gwauraia dika? Taravatu hadibaia taudia bona Farisea taudia. Idia ese Iesu idia gwauraia dika, badina ia ese kara dika taudia ia abia dae, unai dainai Iesu be unai parabole ia gwauraia. Momokani, Dirava ese kara dika taudia ia hebogahisi henia dainai ia idia gwauraia dika taudia be unai parabole amo gau ta idia dibaia be namo.

Parabole dokonai, Iesu ese tamana ena noinoi ena vara guna natuna dekenai ia gwauraia: “Egu natuna e, oi be hanaihanai lau danu oi noho, bona lauegu kohu ibounai be oiemu. To ita moale hebou be namo, badina emu tadina inai, be ia mase, to ia mauri lou, ia boio to ia giroa mai.”​—Luka 15:31, 32.

Vara guna natuna ese gabeai ia karaia gauna be Iesu ese ia gwauraia lasi. To Iesu ia mase bona toreisi lou murinai, “hahelaga taudia momo be abidadama taudia ai idia lao.” (Kara 6:7) Reana idia haida be Iesu ese boio merona ena parabole ia gwauraia neganai, idia kamonai. Oibe, inai be nega namona lalohadai namona idia abia, idia helalo-kerehai, bona Dirava dekenai idia giroa totona.

Unai nega amo, Iesu ena hahediba taudia be unai parabole amo mai anina bada gaudia idia dibaia be namo. Gau ginigunana be inai: Dirava ena taunimanima huanai ita noho be aonega karana, unai amo iseda Tamana ese ita ia naria bona ubua diba, badina ita ia lalokau henia, to namo lasi moale karadia tahua totona “tano daudauna” dekenai ita lao.

Bona gau iharuana be inai: Bema Dirava ena dala amo ita raka siri, namona be mai manau ida eda Tamana dekenai ita giroa, unai amo ita ia lalonamo henia diba.

Parabole ai tamana be mai moale ida natuna ia abia dae bona iena dika ia gwauatao, to natuna ginigunana be ia badu bona tadina ia abia dae lasi. Unai amo ita dibaia gauna ihatoina be inai: Bema ia kara dika tauna be ia helalo-kerehai bona ‘Tamana ena ruma’ dekenai ia giroa, namona be ena dika ita gwauatao bona ia ita abia dae. Ita moale badina iseda tadikaka “ia mase, to ia mauri lou” bona “ia boio to ia giroa mai.”