Galilea Gohu ena ist kahanai, Iesu ese hoa dalanai hutuma ia ubua, bena idia ura king ai idia halaoa gwauraia neganai ia heau. Unai hanuaboi ai, hurehure be bada, to Iesu be davara latanai ia raka. Petero danu be ranu latanai ia raka, to ena abidadama ia maragi dainai, ia mutu matamaia bona Iesu ese ia hamauria. Iesu ese lai ia hadokoa danu, unai amo ena hahediba taudia edia bouti ia dika lasi.

Hari Iesu be gohu ena west kahanai ia noho, unai be Kaperanauma ai. Hoa dalanai ia ubua taudia be ia idia davaria bona idia nanadaia: “Rabi e, edena negai iniseni oi mai?” Iesu ese ia gwau henidia, ia gwau idia be ia idia tahua badina idia ura ia ese do ia ubudia lou. Idia ia hamaoroa, “ia bodaga diba aniani totona umui gaukara lasi, to ia bodaga diba lasi bona mauri hanaihanai ia henia aniani totona do umui gaukara.” Unai dainai idia henanadai: “Dahaka do ai karaia Dirava ena ura ai karaia totona?”​—Ioane 6:25-28.

Reana idia be Taravatu ese ia gwauraia gaudia idia laloa, to Iesu be mai anina bada gaukarana ia herevalaia, ia gwau: “Dirava ena ura be inai, ia siaia tauna do umui abidadama henia.” Ena be Iesu ese hoa karadia momo ia karaia, to ia idia abidadama henia lasi. Idia ura toa ta ia hahedinaraia, unai amo do idia abidadama henia. Idia nanadaia: “Dahaka gaukara oi karaia noho? Emai sene taudia be taunimanima lasi gabuna ai mana idia ania, Toretore Helagadia dekenai idia torea hegeregerena: ‘Ia ese guba amo idia dekenai paraoa ia henia idia ania totona.’”​—Ioane 6:29-31; Salamo 78:24.

Toa ta totona idia henanadai dainai, Iesu ese hoa dalanai taunimanima edia dabu gaudia ia henia diba Tauna ia gwauraia: “Umui lau hamaoroa momokani, guba amo ia mai paraoa be Mose ese umui dekenai ia henia lasi, to egu Tamana ese guba amo umui dekenai paraoa momokanina ia henia. Badina Dirava ena paraoa be guba amo ia diho mai bona tanobada taudia dekenai mauri ia henia.” Iena hereva anina idia lalopararalaia lasi dainai, idia noinoi: “Lohiabada e, hanaihanai ai dekenai unai paraoa oi henia.” (Ioane 6:32-34) To Iesu be edena “paraoa” ia herevalaia?

Ia gwau: “Lau be mauri paraoana. Lau dekenai ia mai tauna be do ia hitolo lasi momokani, bona lau ia abidadama henia tauna be do ia ranu mase lasi momokani. To guna umui lau hamaoroa bamona, umui be lau umui itaia, to umui abidadama lasi. . . . Guba amo lau diho mai egu ura karaia totona lasi, to lau ia siaia tauna ena ura do lau karaia. Lau ia siaia tauna ena ura be inai, lau dekenai ia henia taudia ibounai amo ta do lau haboioa lasi, to dina dokona ai idia do lau hatorea isi lou. Egu Tamana ena ura be inai, Natuna ia diba bona abidadama henia tauna be mauri hanaihanai ia abia be namo.”​—Ioane 6:35-40.

Taunimanima idia badu bona Iesu idia maumauraia matamaia. Edena bamona ia gwau “lau be guba amo ia diho mai paraoa”? (Ioane 6:41) Idia laloa ia be taunimanima edia natuna sibona, Galilea siti Nasareta amo ia mai. Idia henanadai: “Inai be Iesu, Iosepa ena natuna, ena tamana bona sinana ita diba, ani?”​—Ioane 6:42.

Iesu ia haere: “Umui huanai maumau karana umui hadokoa. Tau ta be lau dekenai do ia mai diba, bema Tamana, lau ia siaia tauna ese ia veria mai, bona dina dokona ai ia do lau hatorea isi lou. Peroveta taudia edia toretore lalonai ia gwau: ‘Idia ibounai be Iehova ese do ia hadibaia.’ Tamana idia kamonai henia bona diba idia abia taudia ibounai be lau dekenai do idia  mai. Tau ta ese Tamana ia itaia lasi, to Dirava amo ia mai tauna sibona ese Tamana ia itaia. Umui lau hamaoroa momokani, ia abidadama tauna be mauri hanaihanai do ia abia.”​—Ioane 6:43-47; Isaia 54:13.

Guna Iesu be Nikodemo ida ia herevahereva neganai, ia hahedinaraia mauri hanaihanai abia totona tau ta ese taunimanima ena Natuna ia abidadama henia be namo, ia gwau: “Ia [Dirava sibona ese ia havaraia Natuna tamona] idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:15, 16) To hari ia be hutuma ia hereva henia, ia gwau ia ese idia do ia durua mauri hanaihanai idia abia totona, bona unai ese mana eiava Galilea ai idia abia paraoa ia hereaia. Vadaeni edena bamona mauri hanaihanai idia abia diba? Iesu ia gwau lou: “Lau be mauri paraoana.”​—Ioane 6:48.

Gabeai Iesu be Kaperanauma ena sinagoga ai ia hadibaia neganai, guba amo ia mai paraoana ia gwauraia lou.