Iesu ena toana ia idau matahanaina bona demoni ese ia biagua merona ia hanamoa murinai, Kaisarea Filipi ia rakatania bona Kaperanauma dekenai ia lao. Ia bona ena hahediba taudia sibona idia lao, bona hutuma “be unai idia diba” lasi. (Mareko 9:30) Unai be nega namona, ena hahediba taudia dekenai ena mase bona do idia karaia gaukarana ia herevalaia totona. Ia gwau: “Taunimanima ena Natuna be ena inai taudia edia imana dekenai do idia atoa, bona do idia hamasea, bena dina ihatoina ai do ia toreisi lou.”​—Mataio 17:22, 23.

Iena hahediba taudia dekenai unai be hereva matamatana lasi. Guna Iesu ese ia do idia hamasea herevana ia gwauraia neganai, Petero ia abia dae lasi unai do ia vara. (Mataio 16:21, 22) Bona aposetolo taudia toi ese Iesu ena toana ia idau matahanaina idia itaia bona Iesu ese “tanobada do ia rakatania” herevana idia kamonai. (Luka 9:31) Vadaeni iena hahediba taudia be iena hereva dainai, “idia lalohisihisi bada,” ena be iena hereva ena anina idia lalopararalaia lasi. (Mataio 17:23) To gari dainai idia henanadai lou lasi.

Vadaeni Kaperanauma dekenai idia ginidae, unai gabu ai Iesu be gaukara momo ia karaia, bona inai be aposetolo taudia momo edia hanua. Unuseniai dubu ena takisi gogoa taudia be Petero dekenai idia mai. Reana Iesu be takisi ia henia lasi dainai idia ura samania toho, idia henanadai: “Emui hadibaia tauna be dubu ena takisi moni ia henia, a?”​—Mataio 17:24.

Petero ia haere: “Oibe.” Ruma ai Iesu be ia vara gauna ia diba vadaeni. Unai dainai ia naria lasi Petero ese unai ia herevalaia totona, to Iesu ia henanadai: “Simona e, dahaka oi laloa? Tanobada ena king taudia be daidia amo gau idauidau edia takisi moni idia abia? Edia natudia amo eiava idau taudia amo?” Petero ia gwau: “Idau taudia amo.” Iesu ese ia hamaoroa: “Unai dainai natudia be takisi moni idia henia lasi.”​—Mataio 17:25, 26.

Iesu ena Tamana be iunives ena King bona dubu helaga ai idia tomadiho henia Diravana. Unai dainai taravatu ia gwau lasi Dirava ena Natuna be dubu helaga ena takisi do ia henia. Iesu ia gwau: “To ita ura lasi idia ita hahekwakwanaia dainai, gohu dekenai oi lao, kimai oi negea, bona oi veria gwarume ginigunana ena uduna oi kehoa neganai, siliva koini a ta do oi davaria. Oi abia bona ita ruaosi totona idia dekenai oi henia.”​—Mataio 17:27.

Hahediba taudia ibounai idia noho hebou neganai, Iesu idia nanadaia, daika be Basileia lalonai do ia bada. Matamanai, Iesu be iena mase ia herevalaia neganai, unai tatau be gari dainai idia henanadai lasi, to hari mai gari lasi ida edia vaira nega totona idia henanadai. Iesu be edia lalohadai ia diba. Kaperanauma dekenai idia giroa neganai, idia be Iesu murinai idia raka bona unai idia hepapahuahulaia. Vadaeni ia nanadaidia: “Dala dekenai dahaka umui hepapahuahulaia?” (Mareko 9:33) Idia hemarai dainai idia haere lasi, badina sibodia huanai idia hepapahuahu daika be bada. Dokonai, aposetolo taudia ese idia herevalaia noho henanadaina be Iesu dekenai idia gwauraia: “Guba Basileia lalonai daika be bada?”​—Mataio 18:1.

Hahediba taudia be kahirakahira lagani toi Iesu ia karaia gaudia idia itaia bona ena hereva  idia kamonai, unai dainai ita hoa unai idia hepapahuahulaia. To idia be goevadae lasi. Bona guna idia badinaia tomadihona lalonai dagi bona ladana bada idia hadibaia. Danu, guna Iesu ia gwauhamata Petero dekenai Basileia ena “ki” idauidau do ia henia. Unai dainai reana ia laloa ia be haida ia hereaia, a? Reana Iakobo bona Ioane be unai idia mamia danu, badina idia be Iesu ena toana ia idau matahanaina idia itaia.

Herevana ena badina be dahaka, to Iesu ese edia lalohadai ia hamaoromaoroa. Mero maragina ta ia boiria, edia huanai ia haginia, bena hahediba taudia ia hamaoroa: “Bema emui kara umui haidaua lasi bona natudia maragidia bamona umui karaia lasi, guba Basileia lalonai do umui vareai lasi. Unai dainai, inai natuna maragina bamona ia sibona ia hamanaua tauna be guba Basileia lalonai do ia bada. Bona egu ladanai unai bamona natuna maragina ta ia abia dae tauna ese lau ia abia dae danu.”​—Mataio 18:3-5.

Unai be hadibaia dalana namo hereana! Iesu ese iena hahediba taudia ia gwau henia lasi, bona ia gwau lasi idia be hekokoroku o ladana bada eiava dagi bada tahua taudia. To haheitalai ta ia gaukaralaia. Natu maragidia be dagi o ladana bada idia tahua lasi. Unai dainai Iesu ese ena hahediba taudia ia hadibaia unai idia karaia danu be namo. Bena Iesu be ena hahediba taudia ia hamaoroa: “Umui ibounai huanai ia maragi tauna be do ia bada.”​—Luka 9:48.