Iesu ese hoa dalanai hutuma ia ubua karana ese taunimanima edia lalona ia veria momokani. Idia gwau, “momokani, tanobada dekenai do ia mai Peroveta Tauna korikorina be inai,” ia be Mesia, bona lohia tauna namona ai do ia lao. (Ioane 6:14; Deuteronomi 18:18) Unai dainai palani idia karaia, Iesu do idia dogoatao bona edia king ai do idia halaoa.

To Iesu be edia palani ia diba. Ia ese hutuma ia siaia bona ena hahediba taudia ia hamaoroa bouti dekenai do idia guia. Edeseni do idia lao? Idia be Betesaida kahana idia lao bona Kaperanauma dekenai idia kamokau. To Iesu be ororo dekenai ia daekau, unai hanuaboi ai ia guriguri totona.

Daba rere kahanai, hua ena diari ai, Iesu be daudau amo bouti ia itaia. Lai goadana ese davara dekenai hurehure badadia ia havaraia, bona aposetolo taudia be “mai hekwarahi bada ida idia bara noho, badina lai ia toa gabuna idia lao henia.” (Mareko 6:48) Iesu be ororo amo ia diho bena ranu latanai idia dekenai ia raka lao. Hari “idia bara lao 5 eiava 6 kilomita bamona.” (Ioane 6:19) Hahediba taudia idia itaia Iesu be ia raka hanaia neganai, mai gari ida idia boiboi: “Unai be dahaka ia mai noho!”​—Mareko 6:49.

Iesu ese ia hagoadadia: “Umui lalogoada! Inai be lau, umui gari lasi.” To Petero ia gwau: “Lohiabada e, bema inai be oi, lau oi hamaoroa ranu latanai oi dekenai do lau raka mai.” Iesu ia haere: “Oi mai!” Vadaeni Petero be bouti amo ia diho bona ranu latanai Iesu dekenai ia raka lao. To hurehure badadia ia itaia neganai, ia gari bona ia mutu matamaia. Ia boiboi: “Lohiabada e, lau oi hamauria!” Iesu ese ena imana ia toia roro bona Petero ia dogoatao, ia gwau: “Abidadama maragi tauna e, dahaka dainai oi daradara?”​—Mataio 14:27-31.

Petero bona Iesu be bouti dekenai idia guia, bena lai ia doko. Hahediba taudia idia hoa bada. To hora haida gunanai Iesu ese hoa dalanai hutuma ia ubua, bema unai idia laloatao, vadaeni ranu latanai ia raka bona lai ia koua karana dekenai do idia hoa lasi. Vadaeni Iesu vairanai idia igo diho, idia gwau: “Momokani, oi be Dirava ena Natuna.”​—Mareko 6:52; Mataio 14:33.

Nega sisina murinai, hairai bona aniani momo gabuna Genesareta dekenai idia ginidae, unai be Kaperanauma ena saut kahanai. Bouti ena dogo idia negea bona kone dekenai idia daekau. Taunimanima ese Iesu idia itaia, vadaeni idia bona unai tano ena badina hanua amo Iesu dekenai gorere taudia idia mailaia. Gorere taudia be Iesu ena dabua dorina sibona idia dogoatao neganai, idia namo.

Unai ia vara noho lalonai, hoa dalanai Iesu ese ia ubua hutuma be idia laloparara ia be ia lao vadaeni. Unai dainai Tiberia amo idia mai bouti maragidia dekenai idia guia bena Iesu tahua totona Kaperanauma dekenai idia lao. Idia davaria neganai, idia nanadaia: “Rabi e, edena negai iniseni oi mai?” (Ioane 6:25) To Iesu ese ia gwau henidia. Unai ena badina be gabeai do ita dibaia.