Satani ese hereva koikoi ginigunana ia gwauraia neganai, tanobada ai dika ia matamaia. Matamana ai, Satani be aneru goevadaena, to “hereva momokani ia badinaia lasi.” (Ioane 8:44) Satani ia ura taunimanima ese ia idia tomadiho henia, to unai be kerere, badina Dirava sibona ita tomadiho henia be maoro. Satani ese Heva ia koia bona ena lalona ia ania Dirava do ia kamonai henia lasi, to Satani do ia kamonai henia. Adamu be Heva ida Dirava idia gwau-edeede henia. Adamu ena abia hidi dainai, hisihisi bona mase idia vara noho.—Genese 3:1-6, 19 duahia.

Satani ese Heva ia koia Dirava ia gwau-edeede henia negana amo, Satani ia gwau, Ataiai Momokani Diravana ia lohia be maoro lasi. Taunimanima momo danu be Satani ida Dirava ena lohia dalana idia dadaraia. Unai dainai, Baibel ia gwau, Satani be “tanobada ena lohia tauna.”—Ioane 14:30; 1 Ioane 5:19 duahia.

Dirava ese ia karaia gaudia ibounai be goevadae. Ia havaraia anerudia bona taunimanima be Dirava idia badinaia namonamo diba. (Deuteronomi 32:4, 5) Dirava ese ita ia havaraia neganai ura kwalimu ia henia danu, anina be ita sibona ese namo o dika ita abia hidi diba. Unai ura kwalimu dainai, Dirava ita lalokau henia diba.—Iamesi 1:13-15; 1 Ioane 5:3 duahia.

Adamu bona Heva edia nega amo ema bona hari, momo be Iehova ena lohia dalana idia gwau-edeede henia. To, dahaka dainai Dirava ese unai kara ia koua lasi? Dirava ia ura hahedinaraia, ena lohia dalana sibona ese taunimanima edia mauri ia hanamoa diba. (Hadibaia Tauna 7:29; 8:9) Lagani 6,000 murinai,  taunimanima edia histori lalonai idia vara gaudia ese unai idia hamomokania. Tanobada ena lohia taudia be idia hegeregere lasi tuari, raskol karadia, kara gageva, o gorere idia haorea.—Ieremia 10:23; Roma 9:17 duahia.

To, Dirava ena lohia dalana idia abia dae taudia be namo idia davaria. (Isaia 48:17, 18) Kahirakahira, Iehova ese taunimanima edia gavamani ibounai do ia haorea. To, Dirava ena lohia dalana idia abia hidi taudia sibona ese tanobada do idia noholaia.—Isaia 11:9.—Daniela 2:44 duahia.

Satani ia gwau, taunimanima be sibodia edia namo idia laloa dainai Dirava idia hesiai henia. Satani ena hereva oi hakoikoia diba, a? Oibe! Dirava ia haheauka noho lalonai, iseda mauri dalana amo do ita hahedinaraia, ita be Dirava ena lohia dalana ita abia dae o taunimanima edia lohia dalana ita abia dae.—Iobu 1:8-12; Aonega Herevadia 27:11 duahia.

Dirava ena lohia dalana ita abia dae dalana ta be inai: Baibel ese ia gwauraia tomadiho momokani karadia ita dibaia bona ita badinaia. (Ioane 4:23) Satani ena lohia dalana ita dadaraia dalana ta be inai: Politikol bona tuari karadia amo ita gini siri, Iesu ia karaia bamona.—Ioane 17:14 duahia.

Satani ese ena siahu ia gaukaralaia dalana ta be inai: Ita ia doria matabodaga bona dika idia havaraia karadia ita karaia totona. Unai kara ita dadaraia neganai, reana iseda turadia o varavara haida ese ita do idia kirikirilaia o dadaraia. (1 Petero 4:3, 4) To, abia hidi maorona ita karaia be gau badana. Ita ese Dirava idia lalokau henia taudia do ita bamoa, a? Ita ese Dirava ena taravatu namodia do ita badinaia, a? Unai bamona ita karaia neganai, ita ese Satani ena hereva ita hakoikoia, badina ia gwau, ‘metau negadiai, ita be Dirava ita badinaia diba lasi.’—1 Korinto 6:9, 10; 15:33 duahia.

Dirava be taunimanima ia lalokau henia dainai, ita diba ia ese dika bona hisihisi do ia haorea. Dirava ena lohia dalana idia abia dae taudia be tanobada ai mauri namona do idia moalelaia ela bona hanaihanai.—Ioane 3:16 duahia.