TOI TAMONA hahediba herevana idia abia dae taudia idia gwau, Dirava tamona lalonai taunimanima toi​—Tamana, Natuna, bona Lauma Helaga​—idia noho. Idia gwau unai  taunimanima toi be idia hegeregere, edia siahu be bada bona idia be matamana lasi. Unai dainai, Toi Tamona hahediba herevana hegeregerena, Tamana be Dirava, Natuna be Dirava, bona Lauma Helaga be Dirava, to Dirava be tamona sibona.

Toi Tamona idia abia dae taudia momo idia gwau, idia ese unai hahediba herevana idia gwauraia hedinarai diba lasi. To, idia laloa unai be Baibel ena hahediba herevana ta. Namona be ita diba Baibel lalonai “Toi Tamona” herevana ia noho lasi. To Baibel ese Toi Tamona lalohadaina ia hahedinaraia, a? Unai henanadai haerelaia totona, Toi Tamona hahediba herevana idia abia dae taudia, ese idia gaukaralaia sirina mani ita laloa.

Ioane 1:1 ia gwau: “Matamaia neganai Hereva ia noho. Hereva be Dirava danu ia noho, bona unai Hereva be Dirava.” Unai karoa tamona dekenai, aposetolo Ioane ese gabeai ia hahedinaraia goevagoeva, “Hereva” be Iesu. (Ioane 1:14) To, Baibel ia gwau Hereva be Dirava dainai, haida idia laloa Natuna bona Tamana be Dirava tamona lalonai.

Laloaboio lasi, Baibel ena kahana ta be Greek gado dekenai idia torea. Gabeai, taunimanima ese Greek gado revarevadia be gado ma haida dekenai idia hahanaia. To, Baibel idia hahanaia taudia haida ese inai hereva, “Hereva be Dirava” idia hahanaia lasi. Dahaka dainai? Baibel idia torea Greek gadona idia diba dainai, idia laloa inai hereva, “Hereva be Dirava” be dala idauna ai idia hahanaia be namo. Edena dala ai? Haheitalai haida be inai: “Logos [Hereva] be dirava.” (A New Translation of the Bible) “Hereva be dirava ta.” (The New Testament in an Improved Version) “Hereva be Dirava danu ia noho, bona unai Hereva be Dirava hegeregerena.” (Taravatu Matamatana) Unai Baibel idauidau ese idia hahedinaraia, Hereva be Dirava lasi. * To, Iehova ia havaraia gaudia iboudiai amo Iesu ena dagi be bada dainai, Baibel ese Hereva ia gwauraia “dirava ta.” Inai hereva “dirava,” ena anina be “siahu bada tauna.”

Baibel idia torea neganai idia gaukaralaia Greek gado be momo idia diba lasi. Unai dainai, Ioane ena hereva ena anina korikorina oi dibaia diba, a? Mani inai haheitalai oi laloa: Tisa ta be ena stiuden taudia dekenai gau ta ia herevalaia. To, stiuden edia laloparara tisa ena hereva dekenai be idauidau. Stiuden taudia ese edena bamona unai idia hamaoromaoroa diba? Reana diba ma haida idia abia totona, tisa do idia nanadaia. Unai ese idia do ia durua ia herevalaia gauna idia lalopararalaia namonamo totona. Unai hegeregerena, Ioane 1:1 ena anina oi lalopararalaia totona, Ioane ena Evanelia bukana oi duahia diba, unai amo Iesu ena dagi dekenai diba ma haida do oi abia. Unai ese oi do ia durua unai siri ena anina korikori oi lalopararalaia totona.

Hegeregere, Ioane karoa 1 siri 18 dekenai ia noho herevana mani oi laloa, ia gwau: “Matamaia neganai ia mai bona harihari tau ta ese [Siahu Ibounai] Dirava ia itaia lasi.” To, taunimanima ese Iesu, Dirava ena Natuna unai, idia itaia vadaeni, badina Ioane ia gwau: “Hereva [Iesu] be taunimanima ena tauanina dekenai ia halaoa, bona iseda huanai ia noho. Iena hairai danu ita itaia.” (Ioane 1:14) Unai dainai, Natuna be edena bamona Siahu Ibounai Diravana ai ia sibona ia halaoa diba? Ioane ia gwau danu Hereva be “Dirava danu ia noho.” To, edena dala ai tau ta be ma ta danu ia noho bona unai nega tamona ai tau ma ta ai ia sibona ia halaoa diba? Ioane 17:3 ai Iesu ese ia hahedinaraia goevagoeva ia bona ena guba Tamana be idia idau. Iena Tamana ia gwauraia “Dirava momokani tamona.” Bona Ioane be ena Evanelia bukana ena dokonai, ia gwau: “Inai idia torea gaudia edia badina korikori be, umui ese do umui abia dae Iesu be Keriso, Dirava ena Natuna.” (Ioane 20:31) Unai siri ese ia hahedinaraia Iesu be Dirava ena Natuna, to Dirava lasi. Ioane ena Evanelia bukana dekenai ita abia diba ma haida, ese ita ia durua Ioane 1:1 ena hereva ita lalopararalaia totona. Baibel ese Iesu, Hereva unai, ia gwauraia “dirava ta” badina ena dagi be bada, to ia be Siahu Ibounai Diravana lasi.

Tisa bona stiuden taudia edia haheitalai mani ita laloa lou. Nega iharuana tisa ese unai gauna ia herevalaia murinai, reana  haida be idia do daradara noho. Dahaka do idia karaia? Reana tisa ma ta ena heduru do idia noia. Bema tisa iharuana ese tisa ginigunana ena hereva ia hamomokania, reana stiuden ibounai do idia daradara lou lasi. Unai hegeregerena, bema Baibel torea tauna Ioane, ese Iesu bona Siahu Ibounai Diravana ia herevalaia dalana oi lalopararalaia lasi, Baibel torea tauna ma ta amo diba ma haida oi abia diba. Hegeregere, Mataio ia torea herevana mani oi laloa. Mataio ese tanobada ena dokona ia herevalaia neganai, Iesu ena hereva ia gwauraia lou: “Unai dina, unai hora gauna, ta ia diba lasi, guba aneru danu idia diba lasi, Taunimanima ena Natuna ia diba lasi, to Tamana sibona ia diba.” (Mataio 24:36) Unai siri ese edena bamona ia hamomokania Iesu be Siahu Ibounai Diravana lasi?

Iesu ia gwau Tamana ena diba ese Natuna ena diba ia hereaia. To, bema Iesu be Siahu Ibounai Diravana hegeregerena, ena Tamana ia diba gaudia be do ia diba danu. Unai dainai Natuna bona Tamana be idia hegeregere lasi. To, haida do idia gwau: ‘Iesu be Dirava bona tau ta. Unai hereva ia gwauraia neganai, ia be tau ta.’ To bema unai be momokani, lauma helaga be edena bamona? Bema ia be Tamana hegeregerena, Dirava tamona lalonai, dahaka dainai Iesu ia gwau lasi lauma helaga ese Tamana ia diba gaudia ia diba?

Baibel oi stadilaia noho neganai, do oi davaria Baibel ena siri haida ese Toi Tamona ia hakoikoia. Unai siri ese Tamana, Natuna, bona Lauma Helaga dekenai lalohadai maorona idia hahedinaraia.​—Salamo 90:2; Kara 7:55; Kolose 1:15.