1-3. Mase dainai taunimanima ese dahaka henanadai haida idia henia, bona tomadiho idauidau edia haere be dahaka?

TAUNIMANIMA ese unai henanadai be lagani tausen momo lalonai idia laloa. Unai be henanadai badadia. Herevana ita be edena bamona taudia eiava edeseni ita noho, unai henanadai edia haere be mai anina bada ita ibounai dekenai.

² Karoa gunanai, Iesu Keriso ena mauri davalaia boubouna ese mauri hanaihanai ia kehoa dalana ita herevalaia. Danu ita diba Baibel ia peroveta, nega ta ‘mase be do ia ore momokani.’ (Apokalupo 21:4) To, hari ita ibounai ita mase. Aonega King Solomona ia gwau: “Mauri taudia idia diba do idia mase.” (Hadibaia Tauna 9:5) Ita ura iseda mauri be do ia daudau. To ita laloa, ita mase neganai dahaka do ia vara ita dekenai.

³ Iseda lalokau taudia idia mase neganai, ita taitai. Bona ita henanadai: ‘Idia dekenai dahaka ia vara? Hisihisi idia mamia noho, a? Ita idia gimaia noho, a? Idia ita durua diba, a? Idia do ita itaia lou, a?’ Unai henanadai dekenai tanobada ena tomadiho edia haere be idauidau. Haida idia gwau bema kara namodia oi karaia, guba dekenai do oi lao, to bema kara dikadia oi karaia, hisihisi gabuna ta dekenai do oi lao. Tomadiho ma haida idia gwau, taunimanima idia mase neganai, idia be lauma gabuna ta dekenai idia hanaia lao, edia sene taudia danu idia noho hebou totona. To ma tomadiho haida idia gwau mase taudia be tano henunai ia noho gabu ta dekenai idia lao, hahemaoro idia abia totona bena tauanina idauna amo idia vara lou.

4. Mase dekenai, tomadiho momo idia hadibaia lalohadai badana be dahaka?

 ⁴ Unai bamona tomadiho hadibaia hereva ibounai idia hahedinaraia lalohadai badana be​—iseda tauanina ia mase neganai, ena kahana ta be ia mauri noho. Guna bona hari inai negai, kahirakahira tomadiho ibounai idia gwau, mase murinai do ita mauri noho ela bona hanaihanai bona do ita itaia, kamonai, bona laloa diba. To, unai be edena bamona ia vara diba? Iseda harana be ia gaukara dainai ita itaia, kamonai, bonaia, mamia, bona laloa diba. Ita mase neganai, iseda harana be ia gaukara lasi. Iseda laloatao karana, hemami, itaia, kamonai bona bonaia karana be hoa dalanai idia gaukara diba lasi, bema harana ia noho lasi.

5, 6. Baibel ese mase taudia be edena bamona ia herevalaia?

⁵ Iehova be iseda harana ia Havaraia Tauna dainai, ta ia mase neganai ia vara gauna ia diba. Unai dainai, Baibel lalonai mase taudia dekenai ia vara gauna ia gwauraia hedinarai. Iena hadibaia herevana be: Tau ta ia mase neganai, ia be ia mauri noho lasi. Mase be mauri amo ia idau momokani. Mase taudia be idia itaia, kamonai eiava laloa diba lasi. Tauanina ia mase neganai, ena kahana ta be ia mauri noho lasi. Bona ita lalonai mase diba lasi laumana ta ia noho lasi. *

⁶ Solomona ia gwau mauri taudia idia diba do idia mase, unai murinai, ia gwau: “Mase taudia be gau ta idia diba lasi.” Bena unai ma ia herevalaia ia gwau, mase taudia be lalokau bona badu idia hahedinaraia diba lasi bona “mase taudia edia gabu, oi lao gabuna, dekenai be kara ta lasi, laloa ta lasi, diba bona aonega ta lasi.” (Hadibaia Tauna 9:​5, 6, 10) Unai hegeregerena, Salamo 146:4 ia gwau, ta ia mase neganai, ‘ia ura do ia karaia gaudia be do idia doko.’ Iseda tauanina ia mase neganai, gau ta ia mauri noho lasi. Iseda mauri be kandolo ena hururu  bamona. Kandolo ena hururu ia bodo neganai, gabu ma ta dekenai ia lao lasi. To ia boio.

7. Iesu ese mase be dahaka ida ia hahegeregerea?

⁷ Iesu Keriso ese mase taudia dekenai ia vara gauna ia herevalaia. Unai bamona ia karaia, ia diba tauna Lasaro, ia mase neganai. Iesu ese ena hahediba taudia ia hamaoroa: “Iseda turana Lasaro be ia mahuta noho.” Iena hahediba taudia idia laloa Iesu ena hereva ena anina be Lasaro be ia gorere dainai ia mahuta noho. To edia lalohadai be kerere. Iesu ia gwau: “Lasaro be ia mase vadaeni.” (Ioane 11:​11-14) Mani oi itaia, Iesu ese mase be mahuta ida ia hahegeregerea. Lasaro be guba eiava hel lahina dekenai ia noho lasi. Aneru eiava ena sene taudia ida ia noho hebou lasi. Lasaro be tauanina ma ta dekenai ia vara lou lasi. Ia be mase dekenai ia mahuta, hegeregere ia mahuta boio. Nega ma ta ai, Iesu ia gwau mase be mahuta hegeregerena. Iesu ese Iairo ena natuna kekeni be mase amo ia hatorea isi lou neganai, ia gwau, “ia be ia mase lasi, ia mahuta noho.”​—Luka 8:​52, 53.

8. Edena bamona ita diba Dirava ia ura lasi taunimanima do idia mase?

⁸ Hamatamaia negana ai, Dirava ia ura taunimanima do idia mase, a? Lasi! Iehova ese taunimanima ia karaia tanobada dekenai idia noho hanaihanai totona. Inai buka ena karoa gunadia dekenai ita itaia bamona, Dirava ese tau bona hahine ginigunadia be paradaiso namo hereana ai ia atodia. Ia hanamodia dainai idia gorere lasi bona edia tauanina idia goada. Iehova ia ura edia mauri ia namo sibona. Oi laloa lalokau tama eiava sina do ia ura ena natuna be buruka bona mase dainai hisihisi do ia abia, a? Lasi! Iehova be ena natudia ia lalokau henia bona ia ura mai moale ida tanobada dekenai do idia noho ela bona hanaihanai. Baibel ese taunimanima be inai bamona  ia herevalaia: “[Iehova] ese gabeai do ia vara maurina do ita davaria ena ura, be ita dekenai ia henia.” (Hadibaia Tauna 3:11) Dirava ese ita ia karaia neganai, iseda lalona dekenai noho hanaihanai urana ia atoa. Bona dala ia kehoa unai ura ia hagugurua totona.

9. Iehova ese Adamu dekenai edena taravatu ia henia, bona dahaka dainai unai hahegani badinaia totona be auka lasi?

⁹ To, dahaka dainai taunimanima idia mase? Haere ita davaria totona, namona be tanobada ai tau bona hahine ginigunadia sibona idia noho neganai ia vara gauna ita laloa.  Baibel ia gwau: “Lohiabada Dirava ese tano dekena amo toana namo au ibounai ia havaraia, bona aniani idia atoa audia danu.” (Genese 2:9) To, taravatu ta ia henia. Iehova ese Adamu ia hamaoroa: “Uma gabu dekenai gini au ibounai edia huahua oi ania diba, idia be taravatu lasi, to kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.” (Genese 2:​16, 17) Unai hahegani badinaia totona be auka lasi. Adamu bona Heva ese do idia ania au huahua be momo herea. To dala ia kehoa idia dekenai gau ibounai, mauri goevadaena danu, ia henia Tauna dekenai edia tanikiu karana idia hahedinaraia totona. Edia kamonai karana ese do ia hahedinaraia, edia guba Tamana ena siahu idia matauraia bona idia ura ena lalokau hakaua dalana idia badinaia.

10, 11. (a) Edena dala ai tau bona hahine ginigunadia ese Dirava idia gwau-edeede henia? (b) Adamu bona Heva ese Dirava idia gwau-edeede henia neganai, dahaka dainai unai be kerere badana?

¹⁰ Madi, tau bona hahine ginigunadia ese Iehova idia gwau-edeede henia. Satani be gaigai ena uduna amo Heva ia nanadaia: “Momokani, uma gabu ena au huahua ta ania lasi taravatu Dirava ese ia atoa o lasi?” Heva ia gwau: “Uma gabu dekenai idia gini au edia huahua ibounai ai ania be ia namo, to uma gabu ena huana dekenai au ta ia gini, ena huahua dekenai Dirava ia gwau, ‘Unai au ena huahua umui ania lasi, bona dogoatao lasi, umui mase garina.’ ”​—Genese 3:​1-3.

¹¹ Satani ia gwau: “Inai be momokani lasi, dohore umui mase lasi. Dirava be inai bamona ia hereva badina ia diba, umui ania neganai aonega do umui davaria, bona Dirava hegeregere do umui noho, kara namona bona kara dikana do umui diba.” (Genese 3:​4, 5) Satani ia ura Heva ese do ia abia dae, unai taravatu au huahua ania karana amo namo do ia davaria. Satani ia gwau, Heva sibona ese dahaka be namo bona dahaka be dika ia abia hidi diba; ia sibona ena ura ia badinaia diba. Iehova ia gwau unai au huahua idia ania neganai do idia mase, to Satani ena hereva amo ia hahedinaraia Iehova ia koikoi. Heva ese Satani ena hereva ia abia dae. Unai dainai  au huahua haida ia abia bona ia ania. Bena ena adavana dekenai haida ia henia, bona ia danu ia ania. Mai edia ura ida unai idia karaia. Idia diba idia be Dirava ia gwau do idia karaia lasi gauna idia karaia. Unai au huahua idia ania neganai, idia gwau-edeede bona ia auka lasi haheganina idia utua. Unai kara amo idia hahedinaraia, edia guba Tamana bona ena siahu idia matauraia lasi. Edia Havaraia Tauna idia matauraia lasi karana dekenai badina namona ta be lasi!

12. Adamu bona Heva ese Iehova idia dadaraia neganai, dahaka ese ita ia durua diba Iehova ena hemami ita lalopararalaia totona?

¹² Haheitalai ta be inai: Bema natuna ta oi naria namonamo, to gabeai oi ia gwau-edeede henia, unai amo ia hahedinaraia  oi ia matauraia bona lalokau henia lasi, emu hemami be edena bamona? Unai ese emu lalona do ia hahisia bada. Mani oi laloa, Adamu bona Heva ese Iehova idia dadaraia neganai, Iena lalona idia hahisia bada.

13. Iehova ia gwau Adamu ia mase neganai, ia dekenai dahaka do ia vara, bona unai ena anina be dahaka?

¹³ Adamu bona Heva idia gwau-edeede murinai, badina ta dainai Iehova ese ia rakatanidia lasi idia mauri noho totona. To idia mase, Iehova ia hereva bamona. Adamu bona Heva be idia mauri noho lasi. Lauma gabuna dekenai idia hanaia lao lasi. Unai ita diba badina Adamu ia gwau-edeede murinai, Iehova ese Adamu dekenai ia gwau: “Tano dekenai do oi giroa lou, badina be tano dekena amo oi mai. Oi be tano dekena amo karaia gauna, bona tano dekenai do oi giroa lou.” (Genese 3:19) Dirava ese Adamu be tano ena kahu amo ia karaia. (Genese 2:7) Unai ia do karaia lasi neganai, Adamu be ia mauri noho lasi. Unai dainai, Iehova ia gwau Adamu be tano kahu dekenai do ia giroa neganai, Ena hereva ena anina be do ia mauri noho lasi. Adamu be tano kahu​—mauri lasi gauna unai​—ai do ia lao.

14. Dahaka dainai ita mase?

¹⁴ Adamu bona Heva be hari idia mauri noho diba, to idia mase badina Dirava idia gwau-edeede henia bona idia kara dika. Ita mase badina Adamu ese ena natudia ibounai dekenai kara dika bona mase ia henia hanai. (Roma 5:12) Unai kara dika be natuna ta ese ena tama eiava sina amo ia abia hanai gorere dikana ta bamona, bona ia reaia diba lasi. Kara dika ese ia havaraia gauna, mase, be gau dikana. Mase be ita inai henia gauna ta, ia be iseda turana lasi. (1 Korinto 15:26) Ita moale bada badina Iehova ese mauri davana ia henia, unai amo Ia ese ita be iseda inai tauna dikana amo ia hamauria!

15. Mase taudia dekenai ia vara gauna dibaia karana ese edena dala ai iseda lalona ia hanamoa?

¹⁵ Baibel ese mase taudia dekenai ia vara gauna ia herevalaia dalana ese iseda lalona ia hanamoa. Ita itaia bamona, mase  taudia be hisihisi idia davaria lasi bona idia lalohisihisi lasi. Unai dainai idia ita gari henia be anina lasi, badina ita idia hadikaia diba lasi. Idia ita durua diba lasi, bona idia ese ita do idia durua diba lasi. Idia ida ita herevahereva diba lasi bona idia be ita ida idia herevahereva diba lasi. Tomadiho gunalaia taudia momo idia gwau idia ese mase taudia idia durua diba, bona unai bamona gunalaia taudia edia hereva idia abia dae taudia ese idia dekenai moni idia henia. To mase taudia dekenai ia vara gauna ita dibaia karana ese ita ia gimaia, unai amo hadibaia koikoi taudia ese ita do idia koia lasi.

16. Tomadiho momo ese daika ena lalohadai idia hadibaia, bona edena dala ai?

¹⁶ Baibel ese mase taudia dekenai ia vara gauna ia herevalaia dalana be emu tomadiho ese ia hadibaia, a? Tomadiho momo ese unai idia hadibaia lasi. Dahaka dainai? Badina edia hahediba herevadia ese Satani ena lalohadai idia hahedinaraia. Ia ese tomadiho koikoi amo taunimanima edia lalona ia veria bena idia abia dae idia mase murinai, lauma gabuna ta dekenai idia hanaia lao bona unuseniai idia mauri noho. Satani ese unai bona hereva koikoi ma haida ia hakapudia, unai amo taunimanima be Iehova Dirava amo ia hakaua siri diba. Edena dala ai?

17. Dahaka dainai hisihisi abia hanaihanai karana ena hadibaia herevana ese Iehova ena ladana ia hadikaia?

¹⁷ Ita herevalaia vadaeni bamona, tomadiho haida idia gwau bema tau ta be kara dikadia ia karaia, ia mase neganai ia be hisihisi abia hanaihanai gabuna ta dekenai do ia lao. Unai hadibaia herevana ese Dirava ena ladana ia hadikaia. Iehova be lalokau Diravana bona taunimanima do ia hahisia lasi. (1 Ioane 4:8) Dahaka oi laloa bema tau ta ese ia gwau-edeede natuna ta ena imana be lahi dekenai ia dogoatao? Unai bamona tauna do oi matauraia, a? Do oi ura unai tauna oi dibaia, a? Lasi! Reana do oi laloa unai tau be hebogahisi lasi tauna momokani. To, Satani ia ura do ita abia dae Iehova ese taunimanima be lahi dekenai ia hahisia hanaihanai.

18. Tomadiho haida ese edena hadibaia hereva koikoina idia gwauraia dainai, taunimanima ese mase taudia idia tomadiho henia?

¹⁸ Satani ese tomadiho haida ia gaukaralaia, bena taunimanima  idia hadibaia idia mase murinai idia be lauma taudia ai idia lao bona mauri taudia ese idia matauraia be namo. Unai hadibaia herevana hegeregerena, mase taudia edia lauma be siahu bada turadia eiava iseda inai taudia dikadia ai idia lao diba. Taunimanima momo ese unai koikoi herevana idia abia dae. Idia ese mase taudia idia gari henia bona idia matauraia bona tomadiho henia. To Baibel ia gwau mase taudia be idia mahuta noho bona Dirava momokanina, Iehova, iseda Havaraia Tauna bona Hamauria Tauna sibona ita tomadiho henia be namo.​—Apokalupo 4:11.

19. Mase taudia dekenai ia vara gauna dibaia karana ese ita ia durua Baibel amo edena hadibaia herevana ita lalopararalaia totona?

¹⁹ Mase taudia dekenai ia vara gauna dibaia karana ese ita ia gimaia, unai amo tomadiho koikoi ese ita do idia hakaua kerere lasi. Unai ese oi ia durua Baibel ena hadibaia hereva ma haida oi lalopararalaia totona. Hegeregere, mase murinai taunimanima be lauma gabuna dekenai idia hanaia lao lasi herevana oi lalopararalaia neganai, do oi abia dae momokani mauri hanaihanai be tanobada paradaisona ai do ia vara.

20. Karoa gabena ai edena henanadai do ita laloa?

²⁰ Idaunegai, kara maoromaoro tauna Iobu ia henanadai: “Bema tau ta ia mase, ia be do ia mauri lou, a?” (Iobu 14:14) Mase lalonai ia mahuta noho tauna be ia mauri lou diba, a? Baibel ese unai ia herevalaia dalana ese emu lalona do ia hanamoa, karoa gabena ese unai do ia hahedinaraia.